| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៦. ចារិត្តសិក្ខាបទវណ្ណនា
6. Cārittasikkhāpadavaṇṇanā
២៩៤. ឆដ្ឋសិក្ខាបទេ – ទេថាវុសោ ភត្តន្តិ ឯត្ថ តំ កិរ ភត្តំ អភិហដំ អហោសិ, តស្មា ឯវមាហំសុ។ អនភិហដេ បន ឯវំ វត្តុំ ន លព្ភតិ, បយុត្តវាចា ហោតិ។
294. Chaṭṭhasikkhāpade – dethāvuso bhattanti ettha taṃ kira bhattaṃ abhihaṭaṃ ahosi, tasmā evamāhaṃsu. Anabhihaṭe pana evaṃ vattuṃ na labbhati, payuttavācā hoti.
២៩៥. តេន ហិ ភិក្ខវេ បដិគ្គហេត្វា និក្ខិបថាតិ ឥទំ បន ភគវា កុលស្ស សទ្ធានុរក្ខណត្ថាយ អាហ។ យទិ ‘‘ភាជេត្វា ខាទថា’’តិ វទេយ្យ, មនុស្សានំ បសាទញ្ញថត្តំ សិយា។ ឧស្សារិយិត្ថាតិ បដិហរិយិត្ថ; ឃរំយេវ នំ គហេត្វា អគមំសូតិ វុត្តំ ហោតិ។
295.Tena hi bhikkhave paṭiggahetvā nikkhipathāti idaṃ pana bhagavā kulassa saddhānurakkhaṇatthāya āha. Yadi ‘‘bhājetvā khādathā’’ti vadeyya, manussānaṃ pasādaññathattaṃ siyā. Ussāriyitthāti paṭihariyittha; gharaṃyeva naṃ gahetvā agamaṃsūti vuttaṃ hoti.
២៩៨. សន្តំ ភិក្ខុន្តិ ឯត្ថ កិត្តាវតា សន្តោ ហោតិ, កិត្តាវតា អសន្តោតិ? អន្តោវិហារេ យត្ថ ឋិតស្ស កុលានិ បយិរុបាសនចិត្តំ ឧប្បន្នំ, តតោ បដ្ឋាយ យំ បស្សេ វា អភិមុខេ វា បស្សតិ, យស្ស សក្កា ហោតិ បកតិវចនេន អារោចេតុំ, អយំ សន្តោ នាម។ ឥតោ ចិតោ ច បរិយេសិត្វា អារោចនកិច្ចំ នាម នត្ថិ។ យោ ហិ ឯវំ បរិយេសិតព្ពោ, សោ អសន្តោយេវ។ អបិច អន្តោឧបចារសីមាយ ភិក្ខុំ ទិស្វា អាបុច្ឆិស្សាមីតិ គន្ត្វា តត្ថ យំ បស្សតិ, សោ អាបុច្ឆិតព្ពោ។ នោ ចេ បស្សតិ, អសន្តំ ភិក្ខុំ អនាបុច្ឆា បវិដ្ឋោ នាម ហោតិ។
298.Santaṃ bhikkhunti ettha kittāvatā santo hoti, kittāvatā asantoti? Antovihāre yattha ṭhitassa kulāni payirupāsanacittaṃ uppannaṃ, tato paṭṭhāya yaṃ passe vā abhimukhe vā passati, yassa sakkā hoti pakativacanena ārocetuṃ, ayaṃ santo nāma. Ito cito ca pariyesitvā ārocanakiccaṃ nāma natthi. Yo hi evaṃ pariyesitabbo, so asantoyeva. Apica antoupacārasīmāya bhikkhuṃ disvā āpucchissāmīti gantvā tattha yaṃ passati, so āpucchitabbo. No ce passati, asantaṃ bhikkhuṃ anāpucchā paviṭṭho nāma hoti.
៣០២. អន្តរារាមន្តិ អន្តោគាមេ វិហារោ ហោតិ, តំ គច្ឆតិ។ ភត្តិយឃរន្តិ និមន្តិតឃរំ វា សលាកភត្តាទិទាយកានំ វា ឃរំ។ អាបទាសូតិ ជីវិតព្រហ្មចរិយន្តរាយេសុ សតិ គន្តុំ វដ្ដតិ។ សេសមេត្ថ ឧត្តានមេវ។
302.Antarārāmanti antogāme vihāro hoti, taṃ gacchati. Bhattiyagharanti nimantitagharaṃ vā salākabhattādidāyakānaṃ vā gharaṃ. Āpadāsūti jīvitabrahmacariyantarāyesu sati gantuṃ vaṭṭati. Sesamettha uttānameva.
កថិនសមុដ្ឋានំ – កាយវាចតោ កាយវាចាចិត្តតោ ច សមុដ្ឋាតិ, កិរិយាកិរយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ។
Kathinasamuṭṭhānaṃ – kāyavācato kāyavācācittato ca samuṭṭhāti, kiriyākirayaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ចារិត្តសិក្ខាបទំ ឆដ្ឋំ។
Cārittasikkhāpadaṃ chaṭṭhaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៥. អចេលកវគ្គោ • 5. Acelakavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៦. ចារិត្តសិក្ខាបទវណ្ណនា • 6. Cārittasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៦. ចារិត្តសិក្ខាបទវណ្ណនា • 6. Cārittasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៦. ចារិត្តសិក្ខាបទវណ្ណនា • 6. Cārittasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៦. ចារិត្តសិក្ខាបទំ • 6. Cārittasikkhāpadaṃ
