Only Dharma. Since 1992
Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi

៣. ពោជ្ឈង្គកថា

3. Bojjhaṅgakathā

១៧. សាវត្ថិនិទានំ។ ‘‘សត្តិមេ , ភិក្ខវេ 1, ពោជ្ឈង្គា។ កតមេ សត្ត? សតិសម្ពោជ្ឈង្គោ , ធម្មវិចយសម្ពោជ្ឈង្គោ, វីរិយសម្ពោជ្ឈង្គោ, បីតិសម្ពោជ្ឈង្គោ, បស្សទ្ធិសម្ពោជ្ឈង្គោ, សមាធិសម្ពោជ្ឈង្គោ, ឧបេក្ខាសម្ពោជ្ឈង្គោ – ឥមេ ខោ, ភិក្ខវេ, សត្ត ពោជ្ឈង្គា’’។

17. Sāvatthinidānaṃ. ‘‘Sattime , bhikkhave 2, bojjhaṅgā. Katame satta? Satisambojjhaṅgo , dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo – ime kho, bhikkhave, satta bojjhaṅgā’’.

ពោជ្ឈង្គាតិ កេនដ្ឋេន ពោជ្ឈង្គា? ពោធាយ សំវត្តន្តីតិ – ពោជ្ឈង្គា។ ពុជ្ឈន្តីតិ – ពោជ្ឈង្គា។ អនុពុជ្ឈន្តីតិ – ពោជ្ឈង្គា។ បដិពុជ្ឈន្តីតិ – ពោជ្ឈង្គា។ សម្ពុជ្ឈន្តីតិ – ពោជ្ឈង្គា។

Bojjhaṅgāti kenaṭṭhena bojjhaṅgā? Bodhāya saṃvattantīti – bojjhaṅgā. Bujjhantīti – bojjhaṅgā. Anubujjhantīti – bojjhaṅgā. Paṭibujjhantīti – bojjhaṅgā. Sambujjhantīti – bojjhaṅgā.

ពុជ្ឈនដ្ឋេន ពោជ្ឈង្គា, អនុពុជ្ឈនដ្ឋេន ពោជ្ឈង្គា, បដិពុជ្ឈនដ្ឋេន ពោជ្ឈង្គា, សម្ពុជ្ឈនដ្ឋេន ពោជ្ឈង្គា។

Bujjhanaṭṭhena bojjhaṅgā, anubujjhanaṭṭhena bojjhaṅgā, paṭibujjhanaṭṭhena bojjhaṅgā, sambujjhanaṭṭhena bojjhaṅgā.

ពោធេន្តីតិ – ពោជ្ឈង្គា។ អនុពោធេន្តីតិ – ពោជ្ឈង្គា។ បដិពោធេន្តីតិ – ពោជ្ឈង្គា។ សម្ពោធេន្តីតិ – ពោជ្ឈង្គា។

Bodhentīti – bojjhaṅgā. Anubodhentīti – bojjhaṅgā. Paṭibodhentīti – bojjhaṅgā. Sambodhentīti – bojjhaṅgā.

ពោធនដ្ឋេន ពោជ្ឈង្គា, អនុពោធនដ្ឋេន ពោជ្ឈង្គា, បដិពោធនដ្ឋេន ពោជ្ឈង្គា, សម្ពោធនដ្ឋេន ពោជ្ឈង្គា។

Bodhanaṭṭhena bojjhaṅgā, anubodhanaṭṭhena bojjhaṅgā, paṭibodhanaṭṭhena bojjhaṅgā, sambodhanaṭṭhena bojjhaṅgā.

ពោធិបក្ខិយដ្ឋេន ពោជ្ឈង្គា, អនុពោធិបក្ខិយដ្ឋេន ពោជ្ឈង្គា, បដិពោធិបក្ខិយដ្ឋេន ពោជ្ឈង្គា, សម្ពោធិបក្ខិយដ្ឋេន ពោជ្ឈង្គា។

Bodhipakkhiyaṭṭhena bojjhaṅgā, anubodhipakkhiyaṭṭhena bojjhaṅgā, paṭibodhipakkhiyaṭṭhena bojjhaṅgā, sambodhipakkhiyaṭṭhena bojjhaṅgā.

ពុទ្ធិលភនដ្ឋេន ពោជ្ឈង្គា, ពុទ្ធិបដិលភនដ្ឋេន ពោជ្ឈង្គា, ពុទ្ធិរោបនដ្ឋេន ពោជ្ឈង្គា, ពុទ្ធិអភិរោបនដ្ឋេន ពោជ្ឈង្គា, ពុទ្ធិបាបនដ្ឋេន ពោជ្ឈង្គា, ពុទ្ធិសម្បាបនដ្ឋេន ពោជ្ឈង្គា។

Buddhilabhanaṭṭhena bojjhaṅgā, buddhipaṭilabhanaṭṭhena bojjhaṅgā, buddhiropanaṭṭhena bojjhaṅgā, buddhiabhiropanaṭṭhena bojjhaṅgā, buddhipāpanaṭṭhena bojjhaṅgā, buddhisampāpanaṭṭhena bojjhaṅgā.

មូលមូលកាទិទសកំ

Mūlamūlakādidasakaṃ

១៨. មូលដ្ឋេន ពោជ្ឈង្គា, មូលចរិយដ្ឋេន ពោជ្ឈង្គា, មូលបរិគ្គហដ្ឋេន ពោជ្ឈង្គា, មូលបរិវារដ្ឋេន ពោជ្ឈង្គា , មូលបរិបូរណដ្ឋេន 3 ពោជ្ឈង្គា, មូលបរិបាកដ្ឋេន ពោជ្ឈង្គា, មូលបដិសម្ភិទដ្ឋេន ពោជ្ឈង្គា, មូលបដិសម្ភិទាបាបនដ្ឋេន ពោជ្ឈង្គា, មូលបដិសម្ភិទាយ វសីភាវដ្ឋេន ពោជ្ឈង្គា, មូលបដិសម្ភិទាយ វសីភាវប្បត្តានម្បិ ពោជ្ឈង្គា។

18. Mūlaṭṭhena bojjhaṅgā, mūlacariyaṭṭhena bojjhaṅgā, mūlapariggahaṭṭhena bojjhaṅgā, mūlaparivāraṭṭhena bojjhaṅgā , mūlaparipūraṇaṭṭhena 4 bojjhaṅgā, mūlaparipākaṭṭhena bojjhaṅgā, mūlapaṭisambhidaṭṭhena bojjhaṅgā, mūlapaṭisambhidāpāpanaṭṭhena bojjhaṅgā, mūlapaṭisambhidāya vasībhāvaṭṭhena bojjhaṅgā, mūlapaṭisambhidāya vasībhāvappattānampi bojjhaṅgā.

ហេតុដ្ឋេន ពោជ្ឈង្គា, ហេតុចរិយដ្ឋេន ពោជ្ឈង្គា, ហេតុបរិគ្គហដ្ឋេន ពោជ្ឈង្គា, ហេតុបរិវារដ្ឋេន ពោជ្ឈង្គា, ហេតុបរិបូរណដ្ឋេន ពោជ្ឈង្គា, ហេតុបរិបាកដ្ឋេន ពោជ្ឈង្គា, ហេតុបដិសម្ភិទដ្ឋេន ពោជ្ឈង្គា, ហេតុបដិសម្ភិទាបាបនដ្ឋេន ពោជ្ឈង្គា, ហេតុបដិសម្ភិទាយ វសីភាវដ្ឋេន ពោជ្ឈង្គា, ហេតុបដិសម្ភិទាយ វសីភាវប្បត្តានម្បិ ពោជ្ឈង្គា។

Hetuṭṭhena bojjhaṅgā, hetucariyaṭṭhena bojjhaṅgā, hetupariggahaṭṭhena bojjhaṅgā, hetuparivāraṭṭhena bojjhaṅgā, hetuparipūraṇaṭṭhena bojjhaṅgā, hetuparipākaṭṭhena bojjhaṅgā, hetupaṭisambhidaṭṭhena bojjhaṅgā, hetupaṭisambhidāpāpanaṭṭhena bojjhaṅgā, hetupaṭisambhidāya vasībhāvaṭṭhena bojjhaṅgā, hetupaṭisambhidāya vasībhāvappattānampi bojjhaṅgā.

បច្ចយដ្ឋេន ពោជ្ឈង្គា, បច្ចយចរិយដ្ឋេន ពោជ្ឈង្គា, បច្ចយបរិគ្គហដ្ឋេន ពោជ្ឈង្គា, បច្ចយបរិវារដ្ឋេន ពោជ្ឈង្គា, បច្ចយបរិបូរណដ្ឋេន ពោជ្ឈង្គា, បច្ចយបរិបាកដ្ឋេន ពោជ្ឈង្គា, បច្ចយបដិសម្ភិទដ្ឋេន ពោជ្ឈង្គា, បច្ចយបដិសម្ភិទាបាបនដ្ឋេន ពោជ្ឈង្គា, បច្ចយបដិសម្ភិទាយ វសីភាវដ្ឋេន ពោជ្ឈង្គា, បច្ចយបដិសម្ភិទាយ វសីភាវប្បត្តានម្បិ ពោជ្ឈង្គា។

Paccayaṭṭhena bojjhaṅgā, paccayacariyaṭṭhena bojjhaṅgā, paccayapariggahaṭṭhena bojjhaṅgā, paccayaparivāraṭṭhena bojjhaṅgā, paccayaparipūraṇaṭṭhena bojjhaṅgā, paccayaparipākaṭṭhena bojjhaṅgā, paccayapaṭisambhidaṭṭhena bojjhaṅgā, paccayapaṭisambhidāpāpanaṭṭhena bojjhaṅgā, paccayapaṭisambhidāya vasībhāvaṭṭhena bojjhaṅgā, paccayapaṭisambhidāya vasībhāvappattānampi bojjhaṅgā.

វិសុទ្ធដ្ឋេន ពោជ្ឈង្គា, វិសុទ្ធិចរិយដ្ឋេន ពោជ្ឈង្គា, វិសុទ្ធិបរិគ្គហដ្ឋេន ពោជ្ឈង្គា, វិសុទ្ធិបរិវារដ្ឋេន ពោជ្ឈង្គា, វិសុទ្ធិបរិបូរណដ្ឋេន ពោជ្ឈង្គា, វិសុទ្ធិបរិបាកដ្ឋេន ពោជ្ឈង្គា, វិសុទ្ធិបដិសម្ភិទដ្ឋេន ពោជ្ឈង្គា, វិសុទ្ធិបដិសម្ភិទាបាបនដ្ឋេន ពោជ្ឈង្គា, វិសុទ្ធិបដិសម្ភិទាយ វសីភាវដ្ឋេន ពោជ្ឈង្គា, វិសុទ្ធិបដិសម្ភិទាយ វសីភាវប្បត្តានម្បិ ពោជ្ឈង្គា។

Visuddhaṭṭhena bojjhaṅgā, visuddhicariyaṭṭhena bojjhaṅgā, visuddhipariggahaṭṭhena bojjhaṅgā, visuddhiparivāraṭṭhena bojjhaṅgā, visuddhiparipūraṇaṭṭhena bojjhaṅgā, visuddhiparipākaṭṭhena bojjhaṅgā, visuddhipaṭisambhidaṭṭhena bojjhaṅgā, visuddhipaṭisambhidāpāpanaṭṭhena bojjhaṅgā, visuddhipaṭisambhidāya vasībhāvaṭṭhena bojjhaṅgā, visuddhipaṭisambhidāya vasībhāvappattānampi bojjhaṅgā.

អនវជ្ជដ្ឋេន ពោជ្ឈង្គា, អនវជ្ជចរិយដ្ឋេន ពោជ្ឈង្គា, អនវជ្ជបរិគ្គហដ្ឋេន ពោជ្ឈង្គា, អនវជ្ជបរិវារដ្ឋេន ពោជ្ឈង្គា, អនវជ្ជបរិបូរណដ្ឋេន ពោជ្ឈង្គា, អនវជ្ជបរិបាកដ្ឋេន ពោជ្ឈង្គា, អនវជ្ជបដិសម្ភិទដ្ឋេន ពោជ្ឈង្គា, អនវជ្ជបដិសម្ភិទាបាបនដ្ឋេន ពោជ្ឈង្គា, អនវជ្ជបដិសម្ភិទាយ វសីភាវដ្ឋេន ពោជ្ឈង្គា, អនវជ្ជបដិសម្ភិទាយ វសីភាវប្បត្តានម្បិ ពោជ្ឈង្គា។

Anavajjaṭṭhena bojjhaṅgā, anavajjacariyaṭṭhena bojjhaṅgā, anavajjapariggahaṭṭhena bojjhaṅgā, anavajjaparivāraṭṭhena bojjhaṅgā, anavajjaparipūraṇaṭṭhena bojjhaṅgā, anavajjaparipākaṭṭhena bojjhaṅgā, anavajjapaṭisambhidaṭṭhena bojjhaṅgā, anavajjapaṭisambhidāpāpanaṭṭhena bojjhaṅgā, anavajjapaṭisambhidāya vasībhāvaṭṭhena bojjhaṅgā, anavajjapaṭisambhidāya vasībhāvappattānampi bojjhaṅgā.

នេក្ខម្មដ្ឋេន ពោជ្ឈង្គា, នេក្ខម្មចរិយដ្ឋេន ពោជ្ឈង្គា, នេក្ខម្មបរិគ្គហដ្ឋេន ពោជ្ឈង្គា, នេក្ខម្មបរិវារដ្ឋេន ពោជ្ឈង្គា, នេក្ខម្មបរិបូរណដ្ឋេន ពោជ្ឈង្គា, នេក្ខម្មបរិបាកដ្ឋេន ពោជ្ឈង្គា, នេក្ខម្មបដិសម្ភិទដ្ឋេន ពោជ្ឈង្គា, នេក្ខម្មបដិសម្ភិទាបាបនដ្ឋេន ពោជ្ឈង្គា, នេក្ខម្មបដិសម្ភិទាយ វសីភាវដ្ឋេន ពោជ្ឈង្គា, នេក្ខម្មបដិសម្ភិទាយ វសីភាវប្បត្តានម្បិ ពោជ្ឈង្គា។

Nekkhammaṭṭhena bojjhaṅgā, nekkhammacariyaṭṭhena bojjhaṅgā, nekkhammapariggahaṭṭhena bojjhaṅgā, nekkhammaparivāraṭṭhena bojjhaṅgā, nekkhammaparipūraṇaṭṭhena bojjhaṅgā, nekkhammaparipākaṭṭhena bojjhaṅgā, nekkhammapaṭisambhidaṭṭhena bojjhaṅgā, nekkhammapaṭisambhidāpāpanaṭṭhena bojjhaṅgā, nekkhammapaṭisambhidāya vasībhāvaṭṭhena bojjhaṅgā, nekkhammapaṭisambhidāya vasībhāvappattānampi bojjhaṅgā.

វិមុត្តដ្ឋេន ពោជ្ឈង្គា, វិមុត្តិចរិយដ្ឋេន ពោជ្ឈង្គា, វិមុត្តិបរិគ្គហដ្ឋេន ពោជ្ឈង្គា, វិមុត្តិបរិវារដ្ឋេន ពោជ្ឈង្គា, វិមុត្តិបរិបូរណដ្ឋេន ពោជ្ឈង្គា, វិមុត្តិបរិបាកដ្ឋេន ពោជ្ឈង្គា, វិមុត្តិបដិសម្ភិទដ្ឋេន ពោជ្ឈង្គា, វិមុត្តិបដិសម្ភិទាបាបនដ្ឋេន ពោជ្ឈង្គា, វិមុត្តិបដិសម្ភិទាយ វសីភាវដ្ឋេន ពោជ្ឈង្គា, វិមុត្តិបដិសម្ភិទាយ វសីភាវប្បត្តានម្បិ ពោជ្ឈង្គា។

Vimuttaṭṭhena bojjhaṅgā, vimutticariyaṭṭhena bojjhaṅgā, vimuttipariggahaṭṭhena bojjhaṅgā, vimuttiparivāraṭṭhena bojjhaṅgā, vimuttiparipūraṇaṭṭhena bojjhaṅgā, vimuttiparipākaṭṭhena bojjhaṅgā, vimuttipaṭisambhidaṭṭhena bojjhaṅgā, vimuttipaṭisambhidāpāpanaṭṭhena bojjhaṅgā, vimuttipaṭisambhidāya vasībhāvaṭṭhena bojjhaṅgā, vimuttipaṭisambhidāya vasībhāvappattānampi bojjhaṅgā.

អនាសវដ្ឋេន ពោជ្ឈង្គា, អនាសវចរិយដ្ឋេន ពោជ្ឈង្គា, អនាសវបរិគ្គហដ្ឋេន ពោជ្ឈង្គា, អនាសវបរិវារដ្ឋេន ពោជ្ឈង្គា, អនាសវបរិបូរណដ្ឋេន ពោជ្ឈង្គា, អនាសវបរិបាកដ្ឋេន ពោជ្ឈង្គា , អនាសវបដិសម្ភិទដ្ឋេន ពោជ្ឈង្គា, អនាសវបដិសម្ភិទាបាបនដ្ឋេន ពោជ្ឈង្គា, អនាសវបដិសម្ភិទាយ វសីភាវដ្ឋេន ពោជ្ឈង្គា, អនាសវបដិសម្ភិទាយ វសីភាវប្បត្តានម្បិ ពោជ្ឈង្គា។

Anāsavaṭṭhena bojjhaṅgā, anāsavacariyaṭṭhena bojjhaṅgā, anāsavapariggahaṭṭhena bojjhaṅgā, anāsavaparivāraṭṭhena bojjhaṅgā, anāsavaparipūraṇaṭṭhena bojjhaṅgā, anāsavaparipākaṭṭhena bojjhaṅgā , anāsavapaṭisambhidaṭṭhena bojjhaṅgā, anāsavapaṭisambhidāpāpanaṭṭhena bojjhaṅgā, anāsavapaṭisambhidāya vasībhāvaṭṭhena bojjhaṅgā, anāsavapaṭisambhidāya vasībhāvappattānampi bojjhaṅgā.

វិវេកដ្ឋេន ពោជ្ឈង្គា, វិវេកចរិយដ្ឋេន ពោជ្ឈង្គា, វិវេកបរិគ្គហដ្ឋេន ពោជ្ឈង្គា, វិវេកបរិវារដ្ឋេន ពោជ្ឈង្គា, វិវេកបរិបូរណដ្ឋេន ពោជ្ឈង្គា, វិវេកបរិបាកដ្ឋេន ពោជ្ឈង្គា, វិវេកបដិសម្ភិទដ្ឋេន ពោជ្ឈង្គា, វិវេកបដិសម្ភិទាបាបនដ្ឋេន ពោជ្ឈង្គា, វិវេកបដិសម្ភិទាយ វសីភាវដ្ឋេន ពោជ្ឈង្គា, វិវេកបដិសម្ភិទាយ វសីភាវប្បត្តានម្បិ ពោជ្ឈង្គា។

Vivekaṭṭhena bojjhaṅgā, vivekacariyaṭṭhena bojjhaṅgā, vivekapariggahaṭṭhena bojjhaṅgā, vivekaparivāraṭṭhena bojjhaṅgā, vivekaparipūraṇaṭṭhena bojjhaṅgā, vivekaparipākaṭṭhena bojjhaṅgā, vivekapaṭisambhidaṭṭhena bojjhaṅgā, vivekapaṭisambhidāpāpanaṭṭhena bojjhaṅgā, vivekapaṭisambhidāya vasībhāvaṭṭhena bojjhaṅgā, vivekapaṭisambhidāya vasībhāvappattānampi bojjhaṅgā.

វោសគ្គដ្ឋេន ពោជ្ឈង្គា, វោសគ្គចរិយដ្ឋេន ពោជ្ឈង្គា, វោសគ្គបរិគ្គហដ្ឋេន ពោជ្ឈង្គា, វោសគ្គបរិវារដ្ឋេន ពោជ្ឈង្គា, វោសគ្គបរិបូរណដ្ឋេន ពោជ្ឈង្គា, វោសគ្គបរិបាកដ្ឋេន ពោជ្ឈង្គា, វោសគ្គបដិសម្ភិទដ្ឋេន ពោជ្ឈង្គា, វោសគ្គបដិសម្ភិទាបាបនដ្ឋេន ពោជ្ឈង្គា, វោសគ្គបដិសម្ភិទាយ វសីភាវដ្ឋេន ពោជ្ឈង្គា, វោសគ្គបដិសម្ភិទាយ វសីភាវប្បត្តានម្បិ ពោជ្ឈង្គា។

Vosaggaṭṭhena bojjhaṅgā, vosaggacariyaṭṭhena bojjhaṅgā, vosaggapariggahaṭṭhena bojjhaṅgā, vosaggaparivāraṭṭhena bojjhaṅgā, vosaggaparipūraṇaṭṭhena bojjhaṅgā, vosaggaparipākaṭṭhena bojjhaṅgā, vosaggapaṭisambhidaṭṭhena bojjhaṅgā, vosaggapaṭisambhidāpāpanaṭṭhena bojjhaṅgā, vosaggapaṭisambhidāya vasībhāvaṭṭhena bojjhaṅgā, vosaggapaṭisambhidāya vasībhāvappattānampi bojjhaṅgā.

១៩. មូលដ្ឋំ ពុជ្ឈន្តីតិ – ពោជ្ឈង្គា។ ហេតុដ្ឋំ ពុជ្ឈន្តីតិ – ពោជ្ឈង្គា។ បច្ចយដ្ឋំ ពុជ្ឈន្តីតិ – ពោជ្ឈង្គា។ វិសុទ្ធដ្ឋំ ពុជ្ឈន្តីតិ – ពោជ្ឈង្គា។ អនវជ្ជដ្ឋំ ពុជ្ឈន្តីតិ – ពោជ្ឈង្គា។ នេក្ខម្មដ្ឋំ ពុជ្ឈន្តីតិ – ពោជ្ឈង្គា។ វិមុត្តដ្ឋំ ពុជ្ឈន្តីតិ – ពោជ្ឈង្គា។ អនាសវដ្ឋំ ពុជ្ឈន្តីតិ – ពោជ្ឈង្គា។ វិវេកដ្ឋំ ពុជ្ឈន្តីតិ – ពោជ្ឈង្គា ។ វោសគ្គដ្ឋំ ពុជ្ឈន្តីតិ – ពោជ្ឈង្គា។

19. Mūlaṭṭhaṃ bujjhantīti – bojjhaṅgā. Hetuṭṭhaṃ bujjhantīti – bojjhaṅgā. Paccayaṭṭhaṃ bujjhantīti – bojjhaṅgā. Visuddhaṭṭhaṃ bujjhantīti – bojjhaṅgā. Anavajjaṭṭhaṃ bujjhantīti – bojjhaṅgā. Nekkhammaṭṭhaṃ bujjhantīti – bojjhaṅgā. Vimuttaṭṭhaṃ bujjhantīti – bojjhaṅgā. Anāsavaṭṭhaṃ bujjhantīti – bojjhaṅgā. Vivekaṭṭhaṃ bujjhantīti – bojjhaṅgā . Vosaggaṭṭhaṃ bujjhantīti – bojjhaṅgā.

មូលចរិយដ្ឋំ ពុជ្ឈន្តីតិ – ពោជ្ឈង្គា។ ហេតុចរិយដ្ឋំ ពុជ្ឈន្តីតិ – ពោជ្ឈង្គា។ បច្ចយចរិយដ្ឋំ ពុជ្ឈន្តីតិ – ពោជ្ឈង្គា។ វិសុទ្ធិចរិយដ្ឋំ ពុជ្ឈន្តីតិ – ពោជ្ឈង្គា។ អនវជ្ជចរិយដ្ឋំ ពុជ្ឈន្តីតិ – ពោជ្ឈង្គា។ នេក្ខម្មចរិយដ្ឋំ ពុជ្ឈន្តីតិ – ពោជ្ឈង្គា។ វិមុត្តិចរិយដ្ឋំ ពុជ្ឈន្តីតិ – ពោជ្ឈង្គា។ អនាសវចរិយដ្ឋំ ពុជ្ឈន្តីតិ – ពោជ្ឈង្គា។ វិវេកចរិយដ្ឋំ ពុជ្ឈន្តីតិ – ពោជ្ឈង្គា។ វោសគ្គចរិយដ្ឋំ ពុជ្ឈន្តីតិ – ពោជ្ឈង្គា។

Mūlacariyaṭṭhaṃ bujjhantīti – bojjhaṅgā. Hetucariyaṭṭhaṃ bujjhantīti – bojjhaṅgā. Paccayacariyaṭṭhaṃ bujjhantīti – bojjhaṅgā. Visuddhicariyaṭṭhaṃ bujjhantīti – bojjhaṅgā. Anavajjacariyaṭṭhaṃ bujjhantīti – bojjhaṅgā. Nekkhammacariyaṭṭhaṃ bujjhantīti – bojjhaṅgā. Vimutticariyaṭṭhaṃ bujjhantīti – bojjhaṅgā. Anāsavacariyaṭṭhaṃ bujjhantīti – bojjhaṅgā. Vivekacariyaṭṭhaṃ bujjhantīti – bojjhaṅgā. Vosaggacariyaṭṭhaṃ bujjhantīti – bojjhaṅgā.

មូលបរិគ្គហដ្ឋំ ពុជ្ឈន្តីតិ – ពោជ្ឈង្គា…បេ.… វោសគ្គបរិគ្គហដ្ឋំ ពុជ្ឈន្តីតិ – ពោជ្ឈង្គា។ មូលបរិវារដ្ឋំ ពុជ្ឈន្តីតិ – ពោជ្ឈង្គា…បេ.… វោសគ្គបរិវារដ្ឋំ ពុជ្ឈន្តីតិ – ពោជ្ឈង្គា។ មូលបរិបូរណដ្ឋំ ពុជ្ឈន្តីតិ – ពោជ្ឈង្គា…បេ.… វោសគ្គបរិបូរដ្ឋំ ពុជ្ឈន្តីតិ – ពោជ្ឈង្គា។ មូលបរិបាកដ្ឋំ ពុជ្ឈន្តីតិ – ពោជ្ឈង្គា…បេ.… វោសគ្គបរិបាកដ្ឋំ ពុជ្ឈន្តីតិ – ពោជ្ឈង្គា។ មូលបដិសម្ភិទដ្ឋំ ពុជ្ឈន្តីតិ – ពោជ្ឈង្គា…បេ.… វោសគ្គបដិសម្ភិទដ្ឋំ ពុជ្ឈន្តីតិ – ពោជ្ឈង្គា។ មូលបដិសម្ភិទាបាបនដ្ឋំ ពុជ្ឈន្តីតិ – ពោជ្ឈង្គា…បេ.… វោសគ្គបដិសម្ភិទាបាបនដ្ឋំ ពុជ្ឈន្តីតិ – ពោជ្ឈង្គា។ មូលបដិសម្ភិទាយ វសីភាវដ្ឋំ ពុជ្ឈន្តីតិ – ពោជ្ឈង្គា…បេ.… វោសគ្គបដិសម្ភិទាយ វសីភាវដ្ឋំ ពុជ្ឈន្តីតិ – ពោជ្ឈង្គា…បេ.…។

Mūlapariggahaṭṭhaṃ bujjhantīti – bojjhaṅgā…pe… vosaggapariggahaṭṭhaṃ bujjhantīti – bojjhaṅgā. Mūlaparivāraṭṭhaṃ bujjhantīti – bojjhaṅgā…pe… vosaggaparivāraṭṭhaṃ bujjhantīti – bojjhaṅgā. Mūlaparipūraṇaṭṭhaṃ bujjhantīti – bojjhaṅgā…pe… vosaggaparipūraṭṭhaṃ bujjhantīti – bojjhaṅgā. Mūlaparipākaṭṭhaṃ bujjhantīti – bojjhaṅgā…pe… vosaggaparipākaṭṭhaṃ bujjhantīti – bojjhaṅgā. Mūlapaṭisambhidaṭṭhaṃ bujjhantīti – bojjhaṅgā…pe… vosaggapaṭisambhidaṭṭhaṃ bujjhantīti – bojjhaṅgā. Mūlapaṭisambhidāpāpanaṭṭhaṃ bujjhantīti – bojjhaṅgā…pe… vosaggapaṭisambhidāpāpanaṭṭhaṃ bujjhantīti – bojjhaṅgā. Mūlapaṭisambhidāya vasībhāvaṭṭhaṃ bujjhantīti – bojjhaṅgā…pe… vosaggapaṭisambhidāya vasībhāvaṭṭhaṃ bujjhantīti – bojjhaṅgā…pe….

បរិគ្គហដ្ឋំ ពុជ្ឈន្តីតិ – ពោជ្ឈង្គា។ បរិវារដ្ឋំ ពុជ្ឈន្តីតិ – ពោជ្ឈង្គា។ បរិបូរណដ្ឋំ ពុជ្ឈន្តីតិ – ពោជ្ឈង្គា។ ឯកគ្គដ្ឋំ ពុជ្ឈន្តីតិ – ពោជ្ឈង្គា។ អវិក្ខេបដ្ឋំ ពុជ្ឈន្តីតិ – ពោជ្ឈង្គា។ បគ្គហដ្ឋំ ពុជ្ឈន្តីតិ – ពោជ្ឈង្គា។ អវិសារដ្ឋំ ពុជ្ឈន្តីតិ – ពោជ្ឈង្គា។ អនាវិលដ្ឋំ ពុជ្ឈន្តីតិ – ពោជ្ឈង្គា។ អនិញ្ជនដ្ឋំ ពុជ្ឈន្តីតិ – ពោជ្ឈង្គា។ ឯកត្តុបដ្ឋានវសេន ចិត្តស្ស ឋិតដ្ឋំ ពុជ្ឈន្តីតិ – ពោជ្ឈង្គា។ អារម្មណដ្ឋំ ពុជ្ឈន្តីតិ – ពោជ្ឈង្គា។ គោចរដ្ឋំ ពុជ្ឈន្តីតិ – ពោជ្ឈង្គា។ បហានដ្ឋំ ពុជ្ឈន្តីតិ – ពោជ្ឈង្គា។ បរិច្ចាគដ្ឋំ ពុជ្ឈន្តីតិ – ពោជ្ឈង្គា។ វុដ្ឋានដ្ឋំ ពុជ្ឈន្តីតិ – ពោជ្ឈង្គា។ វិវដ្ដនដ្ឋំ ពុជ្ឈន្តីតិ – ពោជ្ឈង្គា។ សន្តដ្ឋំ ពុជ្ឈន្តីតិ – ពោជ្ឈង្គា។ បណីតដ្ឋំ ពុជ្ឈន្តីតិ – ពោជ្ឈង្គា។ វិមុត្តដ្ឋំ ពុជ្ឈន្តីតិ – ពោជ្ឈង្គា។ អនាសវដ្ឋំ ពុជ្ឈន្តីតិ – ពោជ្ឈង្គា។ តរណដ្ឋំ ពុជ្ឈន្តីតិ – ពោជ្ឈង្គា។ អនិមិត្តដ្ឋំ ពុជ្ឈន្តីតិ – ពោជ្ឈង្គា។ អប្បណិហិតដ្ឋំ ពុជ្ឈន្តីតិ – ពោជ្ឈង្គា។ សុញ្ញតដ្ឋំ ពុជ្ឈន្តីតិ – ពោជ្ឈង្គា។ ឯករសដ្ឋំ ពុជ្ឈន្តីតិ – ពោជ្ឈង្គា។ អនតិវត្តនដ្ឋំ ពុជ្ឈន្តីតិ – ពោជ្ឈង្គា។ យុគនទ្ធដ្ឋំ ពុជ្ឈន្តីតិ – ពោជ្ឈង្គា។ និយ្យានដ្ឋំ ពុជ្ឈន្តីតិ – ពោជ្ឈង្គា។ ហេតុដ្ឋំ ពុជ្ឈន្តីតិ – ពោជ្ឈង្គា។ ទស្សនដ្ឋំ ពុជ្ឈន្តីតិ – ពោជ្ឈង្គា។ អាធិបតេយ្យដ្ឋំ ពុជ្ឈន្តីតិ – ពោជ្ឈង្គា។

Pariggahaṭṭhaṃ bujjhantīti – bojjhaṅgā. Parivāraṭṭhaṃ bujjhantīti – bojjhaṅgā. Paripūraṇaṭṭhaṃ bujjhantīti – bojjhaṅgā. Ekaggaṭṭhaṃ bujjhantīti – bojjhaṅgā. Avikkhepaṭṭhaṃ bujjhantīti – bojjhaṅgā. Paggahaṭṭhaṃ bujjhantīti – bojjhaṅgā. Avisāraṭṭhaṃ bujjhantīti – bojjhaṅgā. Anāvilaṭṭhaṃ bujjhantīti – bojjhaṅgā. Aniñjanaṭṭhaṃ bujjhantīti – bojjhaṅgā. Ekattupaṭṭhānavasena cittassa ṭhitaṭṭhaṃ bujjhantīti – bojjhaṅgā. Ārammaṇaṭṭhaṃ bujjhantīti – bojjhaṅgā. Gocaraṭṭhaṃ bujjhantīti – bojjhaṅgā. Pahānaṭṭhaṃ bujjhantīti – bojjhaṅgā. Pariccāgaṭṭhaṃ bujjhantīti – bojjhaṅgā. Vuṭṭhānaṭṭhaṃ bujjhantīti – bojjhaṅgā. Vivaṭṭanaṭṭhaṃ bujjhantīti – bojjhaṅgā. Santaṭṭhaṃ bujjhantīti – bojjhaṅgā. Paṇītaṭṭhaṃ bujjhantīti – bojjhaṅgā. Vimuttaṭṭhaṃ bujjhantīti – bojjhaṅgā. Anāsavaṭṭhaṃ bujjhantīti – bojjhaṅgā. Taraṇaṭṭhaṃ bujjhantīti – bojjhaṅgā. Animittaṭṭhaṃ bujjhantīti – bojjhaṅgā. Appaṇihitaṭṭhaṃ bujjhantīti – bojjhaṅgā. Suññataṭṭhaṃ bujjhantīti – bojjhaṅgā. Ekarasaṭṭhaṃ bujjhantīti – bojjhaṅgā. Anativattanaṭṭhaṃ bujjhantīti – bojjhaṅgā. Yuganaddhaṭṭhaṃ bujjhantīti – bojjhaṅgā. Niyyānaṭṭhaṃ bujjhantīti – bojjhaṅgā. Hetuṭṭhaṃ bujjhantīti – bojjhaṅgā. Dassanaṭṭhaṃ bujjhantīti – bojjhaṅgā. Ādhipateyyaṭṭhaṃ bujjhantīti – bojjhaṅgā.

សមថស្ស អវិក្ខេបដ្ឋំ ពុជ្ឈន្តីតិ – ពោជ្ឈង្គា។ វិបស្សនាយ អនុបស្សនដ្ឋំ ពុជ្ឈន្តីតិ – ពោជ្ឈង្គា។ សមថវិបស្សនានំ ឯករសដ្ឋំ ពុជ្ឈន្តីតិ – ពោជ្ឈង្គា។ យុគនទ្ធស្ស អនតិវត្តនដ្ឋំ ពុជ្ឈន្តីតិ – ពោជ្ឈង្គា។ សិក្ខាយ សមាទានដ្ឋំ ពុជ្ឈន្តីតិ – ពោជ្ឈង្គា។ អារម្មណស្ស គោចរដ្ឋំ ពុជ្ឈន្តីតិ – ពោជ្ឈង្គា។ លីនស្ស ចិត្តស្ស បគ្គហដ្ឋំ ពុជ្ឈន្តីតិ – ពោជ្ឈង្គា។ ឧទ្ធតស្ស ចិត្តស្ស និគ្គហដ្ឋំ ពុជ្ឈន្តីតិ – ពោជ្ឈង្គា។ ឧភោវិសុទ្ធានំ អជ្ឈុបេក្ខនដ្ឋំ ពុជ្ឈន្តីតិ – ពោជ្ឈង្គា។ វិសេសាធិគមដ្ឋំ ពុជ្ឈន្តីតិ – ពោជ្ឈង្គា។ ឧត្តរិ បដិវេធដ្ឋំ ពុជ្ឈន្តីតិ – ពោជ្ឈង្គា។ សច្ចាភិសមយដ្ឋំ ពុជ្ឈន្តីតិ – ពោជ្ឈង្គា។ និរោធេ បតិដ្ឋាបកដ្ឋំ ពុជ្ឈន្តីតិ – ពោជ្ឈង្គា។

Samathassa avikkhepaṭṭhaṃ bujjhantīti – bojjhaṅgā. Vipassanāya anupassanaṭṭhaṃ bujjhantīti – bojjhaṅgā. Samathavipassanānaṃ ekarasaṭṭhaṃ bujjhantīti – bojjhaṅgā. Yuganaddhassa anativattanaṭṭhaṃ bujjhantīti – bojjhaṅgā. Sikkhāya samādānaṭṭhaṃ bujjhantīti – bojjhaṅgā. Ārammaṇassa gocaraṭṭhaṃ bujjhantīti – bojjhaṅgā. Līnassa cittassa paggahaṭṭhaṃ bujjhantīti – bojjhaṅgā. Uddhatassa cittassa niggahaṭṭhaṃ bujjhantīti – bojjhaṅgā. Ubhovisuddhānaṃ ajjhupekkhanaṭṭhaṃ bujjhantīti – bojjhaṅgā. Visesādhigamaṭṭhaṃ bujjhantīti – bojjhaṅgā. Uttari paṭivedhaṭṭhaṃ bujjhantīti – bojjhaṅgā. Saccābhisamayaṭṭhaṃ bujjhantīti – bojjhaṅgā. Nirodhe patiṭṭhāpakaṭṭhaṃ bujjhantīti – bojjhaṅgā.

សទ្ធិន្ទ្រិយស្ស អធិមោក្ខដ្ឋំ ពុជ្ឈន្តីតិ – ពោជ្ឈង្គា…បេ.… បញ្ញិន្ទ្រិយស្ស ទស្សនដ្ឋំ ពុជ្ឈន្តីតិ – ពោជ្ឈង្គា។ សទ្ធាពលស្ស អស្សទ្ធិយេ អកម្បិយដ្ឋំ ពុជ្ឈន្តីតិ – ពោជ្ឈង្គា…បេ.… បញ្ញាពលស្ស អវិជ្ជាយ អកម្បិយដ្ឋំ ពុជ្ឈន្តីតិ – ពោជ្ឈង្គា។ សតិសម្ពោជ្ឈង្គស្ស ឧបដ្ឋានដ្ឋំ ពុជ្ឈន្តីតិ – ពោជ្ឈង្គា…បេ.… ឧបេក្ខាសម្ពោជ្ឈង្គស្ស បដិសង្ខានដ្ឋំ ពុជ្ឈន្តីតិ – ពោជ្ឈង្គា។ សម្មាទិដ្ឋិយា ទស្សនដ្ឋំ ពុជ្ឈន្តីតិ – ពោជ្ឈង្គា…បេ.… សម្មាសមាធិស្ស អវិក្ខេបដ្ឋំ ពុជ្ឈន្តីតិ – ពោជ្ឈង្គា។

Saddhindriyassa adhimokkhaṭṭhaṃ bujjhantīti – bojjhaṅgā…pe… paññindriyassa dassanaṭṭhaṃ bujjhantīti – bojjhaṅgā. Saddhābalassa assaddhiye akampiyaṭṭhaṃ bujjhantīti – bojjhaṅgā…pe… paññābalassa avijjāya akampiyaṭṭhaṃ bujjhantīti – bojjhaṅgā. Satisambojjhaṅgassa upaṭṭhānaṭṭhaṃ bujjhantīti – bojjhaṅgā…pe… upekkhāsambojjhaṅgassa paṭisaṅkhānaṭṭhaṃ bujjhantīti – bojjhaṅgā. Sammādiṭṭhiyā dassanaṭṭhaṃ bujjhantīti – bojjhaṅgā…pe… sammāsamādhissa avikkhepaṭṭhaṃ bujjhantīti – bojjhaṅgā.

ឥន្ទ្រិយានំ អាធិបតេយ្យដ្ឋំ ពុជ្ឈន្តីតិ – ពោជ្ឈង្គា។ ពលានំ អកម្បិយដ្ឋំ ពុជ្ឈន្តីតិ – ពោជ្ឈង្គា។ និយ្យានដ្ឋំ ពុជ្ឈន្តីតិ – ពោជ្ឈង្គា។ មគ្គស្ស ហេតុដ្ឋំ ពុជ្ឈន្តីតិ – ពោជ្ឈង្គា។ សតិបដ្ឋានានំ ឧបដ្ឋានដ្ឋំ ពុជ្ឈន្តីតិ – ពោជ្ឈង្គា។ សម្មប្បធានានំ បទហនដ្ឋំ ពុជ្ឈន្តីតិ – ពោជ្ឈង្គា។ ឥទ្ធិបាទានំ ឥជ្ឈនដ្ឋំ ពុជ្ឈន្តីតិ – ពោជ្ឈង្គា។ សច្ចានំ តថដ្ឋំ ពុជ្ឈន្តីតិ – ពោជ្ឈង្គា។ បយោគានំំំំំ បដិប្បស្សទ្ធដ្ឋំ ពុជ្ឈន្តីតិ – ពោជ្ឈង្គា។ ផលានំ សច្ឆិកិរិយដ្ឋំ ពុជ្ឈន្តីតិ – ពោជ្ឈង្គា។

Indriyānaṃ ādhipateyyaṭṭhaṃ bujjhantīti – bojjhaṅgā. Balānaṃ akampiyaṭṭhaṃ bujjhantīti – bojjhaṅgā. Niyyānaṭṭhaṃ bujjhantīti – bojjhaṅgā. Maggassa hetuṭṭhaṃ bujjhantīti – bojjhaṅgā. Satipaṭṭhānānaṃ upaṭṭhānaṭṭhaṃ bujjhantīti – bojjhaṅgā. Sammappadhānānaṃ padahanaṭṭhaṃ bujjhantīti – bojjhaṅgā. Iddhipādānaṃ ijjhanaṭṭhaṃ bujjhantīti – bojjhaṅgā. Saccānaṃ tathaṭṭhaṃ bujjhantīti – bojjhaṅgā. Payogānaṃṃṃṃṃ paṭippassaddhaṭṭhaṃ bujjhantīti – bojjhaṅgā. Phalānaṃ sacchikiriyaṭṭhaṃ bujjhantīti – bojjhaṅgā.

វិតក្កស្ស អភិនិរោបនដ្ឋំ ពុជ្ឈន្តីតិ – ពោជ្ឈង្គា។ វិចារស្ស ឧបវិចារដ្ឋំ ពុជ្ឈន្តីតិ – ពោជ្ឈង្គា។ បីតិយា ផរណដ្ឋំ ពុជ្ឈន្តីតិ – ពោជ្ឈង្គា។ សុខស្ស អភិសន្ទនដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស ឯកគ្គដ្ឋំ ពុជ្ឈន្តីតិ – ពោជ្ឈង្គា។

Vitakkassa abhiniropanaṭṭhaṃ bujjhantīti – bojjhaṅgā. Vicārassa upavicāraṭṭhaṃ bujjhantīti – bojjhaṅgā. Pītiyā pharaṇaṭṭhaṃ bujjhantīti – bojjhaṅgā. Sukhassa abhisandanaṭṭhaṃ bujjhantīti – bojjhaṅgā. Cittassa ekaggaṭṭhaṃ bujjhantīti – bojjhaṅgā.

អាវជ្ជនដ្ឋំ ពុជ្ឈន្តីតិ – ពោជ្ឈង្គា។ វិជាននដ្ឋំ ពុជ្ឈន្តីតិ – ពោជ្ឈង្គា។ បជាននដ្ឋំ ពុជ្ឈន្តីតិ – ពោជ្ឈង្គា។ សញ្ជាននដ្ឋំ ពុជ្ឈន្តីតិ – ពោជ្ឈង្គា។ ឯកោទដ្ឋំ ពុជ្ឈន្តីតិ – ពោជ្ឈង្គា។ អភិញ្ញាយ ញាតដ្ឋំ 5 ពុជ្ឈន្តីតិ – ពោជ្ឈង្គា។ បរិញ្ញាយ តីរណដ្ឋំ ពុជ្ឈន្តីតិ – ពោជ្ឈង្គា។ បហានស្ស បរិច្ចាគដ្ឋំ ពុជ្ឈន្តីតិ – ពោជ្ឈង្គា។ ភាវនាយ ឯករសដ្ឋំ ពុជ្ឈន្តីតិ – ពោជ្ឈង្គា ។ សច្ឆិកិរិយាយ ផស្សនដ្ឋំ ពុជ្ឈន្តីតិ – ពោជ្ឈង្គា ។ ខន្ធានំ ខន្ធដ្ឋំ ពុជ្ឈន្តីតិ – ពោជ្ឈង្គា។ ធាតូនំ ធាតុដ្ឋំ ពុជ្ឈន្តីតិ – ពោជ្ឈង្គា។ អាយតនានំ អាយតនដ្ឋំ ពុជ្ឈន្តីតិ – ពោជ្ឈង្គា។ សង្ខតានំ សង្ខតដ្ឋំ ពុជ្ឈន្តីតិ – ពោជ្ឈង្គា។ អសង្ខតស្ស អសង្ខតដ្ឋំ ពុជ្ឈន្តីតិ – ពោជ្ឈង្គា។

Āvajjanaṭṭhaṃ bujjhantīti – bojjhaṅgā. Vijānanaṭṭhaṃ bujjhantīti – bojjhaṅgā. Pajānanaṭṭhaṃ bujjhantīti – bojjhaṅgā. Sañjānanaṭṭhaṃ bujjhantīti – bojjhaṅgā. Ekodaṭṭhaṃ bujjhantīti – bojjhaṅgā. Abhiññāya ñātaṭṭhaṃ 6 bujjhantīti – bojjhaṅgā. Pariññāya tīraṇaṭṭhaṃ bujjhantīti – bojjhaṅgā. Pahānassa pariccāgaṭṭhaṃ bujjhantīti – bojjhaṅgā. Bhāvanāya ekarasaṭṭhaṃ bujjhantīti – bojjhaṅgā . Sacchikiriyāya phassanaṭṭhaṃ bujjhantīti – bojjhaṅgā . Khandhānaṃ khandhaṭṭhaṃ bujjhantīti – bojjhaṅgā. Dhātūnaṃ dhātuṭṭhaṃ bujjhantīti – bojjhaṅgā. Āyatanānaṃ āyatanaṭṭhaṃ bujjhantīti – bojjhaṅgā. Saṅkhatānaṃ saṅkhataṭṭhaṃ bujjhantīti – bojjhaṅgā. Asaṅkhatassa asaṅkhataṭṭhaṃ bujjhantīti – bojjhaṅgā.

ចិត្តដ្ឋំ ពុជ្ឈន្តីតិ – ពោជ្ឈង្គា។ ចិត្តានន្តរិយដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស វុដ្ឋានដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស វិវដ្ដនដ្ឋំ 7 ពុជ្ឈន្តីតិ – ពោជ្ឈង្គា។ ចិត្តស្ស ហេតុដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស បច្ចយដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស វត្ថុដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស ភូមដ្ឋំ 8 ពុជ្ឈន្តីតិ – ពោជ្ឈង្គា។ ចិត្តស្ស អារម្មណដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស គោចរដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស ចរិយដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស គតដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស អភិនីហារដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស និយ្យានដ្ឋំ ពុជ្ឈន្តីតិ – ពោជ្ឈង្គា។ ចិត្តស្ស និស្សរណដ្ឋំ ពុជ្ឈន្តីតិ – ពោជ្ឈង្គា។

Cittaṭṭhaṃ bujjhantīti – bojjhaṅgā. Cittānantariyaṭṭhaṃ bujjhantīti – bojjhaṅgā. Cittassa vuṭṭhānaṭṭhaṃ bujjhantīti – bojjhaṅgā. Cittassa vivaṭṭanaṭṭhaṃ 9 bujjhantīti – bojjhaṅgā. Cittassa hetuṭṭhaṃ bujjhantīti – bojjhaṅgā. Cittassa paccayaṭṭhaṃ bujjhantīti – bojjhaṅgā. Cittassa vatthuṭṭhaṃ bujjhantīti – bojjhaṅgā. Cittassa bhūmaṭṭhaṃ 10 bujjhantīti – bojjhaṅgā. Cittassa ārammaṇaṭṭhaṃ bujjhantīti – bojjhaṅgā. Cittassa gocaraṭṭhaṃ bujjhantīti – bojjhaṅgā. Cittassa cariyaṭṭhaṃ bujjhantīti – bojjhaṅgā. Cittassa gataṭṭhaṃ bujjhantīti – bojjhaṅgā. Cittassa abhinīhāraṭṭhaṃ bujjhantīti – bojjhaṅgā. Cittassa niyyānaṭṭhaṃ bujjhantīti – bojjhaṅgā. Cittassa nissaraṇaṭṭhaṃ bujjhantīti – bojjhaṅgā.

ឯកត្តេ អាវជ្ជនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ វិជាននដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បជាននដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សញ្ជាននដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ឯកោទដ្ឋំ ពុជ្ឈន្តីតិ – ពោជ្ឈង្គា។ ( ) 11។ ឯកត្តេ បក្ខន្ទនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បសីទនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សន្តិដ្ឋនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ វិមុច្ចនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ឯតំ សន្តន្តិ បស្សនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ យានីកតដ្ឋំ ពុជ្ឈន្តីតិ – ពោជ្ឈង្គា។ ឯកត្តេ វត្ថុកតដ្ឋំ ពុជ្ឈន្តីតិ – ពោជ្ឈង្គា។ ឯកត្តេ អនុដ្ឋិតដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បរិចិតដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សុសមារទ្ធដ្ឋំ ពុជ្ឈន្តីតិ – ពោជ្ឈង្គា ។ ឯកត្តេ បរិគ្គហដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បរិវារដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បរិបូរណដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សមោធានដ្ឋំ ពុជ្ឈន្តីតិ – ពោជ្ឈង្គា។ ឯកត្តេ អធិដ្ឋានដ្ឋំ ពុជ្ឈន្តីតិ – ពោជ្ឈង្គា។ ឯកត្តេ អាសេវនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ភាវនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ពហុលីកម្មដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សុសមុគ្គតដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សុវិមុត្តដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ពុជ្ឈនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ អនុពុជ្ឈនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បដិពុជ្ឈនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សម្ពុជ្ឈនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ពោធនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ អនុពោធនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បដិពោធនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សម្ពុជ្ឈនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ពោធិបក្ខិយដ្ឋំ ពុជ្ឈន្តីតិ – ពោជ្ឈង្គា។ ឯកត្តេ អនុពោធិបក្ខិយដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បដិពោធិបក្ខិយដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សម្ពោធិបក្ខិយដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ជោតនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ ឧជ្ជោតនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ អនុជោតនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ បដិជោតនដ្ឋំ ពុជ្ឈន្តីតិ – ពោជ្ឈង្គា។ ឯកត្តេ សញ្ជោតនដ្ឋំ ពុជ្ឈន្តីតិ – ពោជ្ឈង្គា។

Ekatte āvajjanaṭṭhaṃ bujjhantīti – bojjhaṅgā. Ekatte vijānanaṭṭhaṃ bujjhantīti – bojjhaṅgā. Ekatte pajānanaṭṭhaṃ bujjhantīti – bojjhaṅgā. Ekatte sañjānanaṭṭhaṃ bujjhantīti – bojjhaṅgā. Ekatte ekodaṭṭhaṃ bujjhantīti – bojjhaṅgā. ( ) 12. Ekatte pakkhandanaṭṭhaṃ bujjhantīti – bojjhaṅgā. Ekatte pasīdanaṭṭhaṃ bujjhantīti – bojjhaṅgā. Ekatte santiṭṭhanaṭṭhaṃ bujjhantīti – bojjhaṅgā. Ekatte vimuccanaṭṭhaṃ bujjhantīti – bojjhaṅgā. Ekatte etaṃ santanti passanaṭṭhaṃ bujjhantīti – bojjhaṅgā. Ekatte yānīkataṭṭhaṃ bujjhantīti – bojjhaṅgā. Ekatte vatthukataṭṭhaṃ bujjhantīti – bojjhaṅgā. Ekatte anuṭṭhitaṭṭhaṃ bujjhantīti – bojjhaṅgā. Ekatte paricitaṭṭhaṃ bujjhantīti – bojjhaṅgā. Ekatte susamāraddhaṭṭhaṃ bujjhantīti – bojjhaṅgā . Ekatte pariggahaṭṭhaṃ bujjhantīti – bojjhaṅgā. Ekatte parivāraṭṭhaṃ bujjhantīti – bojjhaṅgā. Ekatte paripūraṇaṭṭhaṃ bujjhantīti – bojjhaṅgā. Ekatte samodhānaṭṭhaṃ bujjhantīti – bojjhaṅgā. Ekatte adhiṭṭhānaṭṭhaṃ bujjhantīti – bojjhaṅgā. Ekatte āsevanaṭṭhaṃ bujjhantīti – bojjhaṅgā. Ekatte bhāvanaṭṭhaṃ bujjhantīti – bojjhaṅgā. Ekatte bahulīkammaṭṭhaṃ bujjhantīti – bojjhaṅgā. Ekatte susamuggataṭṭhaṃ bujjhantīti – bojjhaṅgā. Ekatte suvimuttaṭṭhaṃ bujjhantīti – bojjhaṅgā. Ekatte bujjhanaṭṭhaṃ bujjhantīti – bojjhaṅgā. Ekatte anubujjhanaṭṭhaṃ bujjhantīti – bojjhaṅgā. Ekatte paṭibujjhanaṭṭhaṃ bujjhantīti – bojjhaṅgā. Ekatte sambujjhanaṭṭhaṃ bujjhantīti – bojjhaṅgā. Ekatte bodhanaṭṭhaṃ bujjhantīti – bojjhaṅgā. Ekatte anubodhanaṭṭhaṃ bujjhantīti – bojjhaṅgā. Ekatte paṭibodhanaṭṭhaṃ bujjhantīti – bojjhaṅgā. Ekatte sambujjhanaṭṭhaṃ bujjhantīti – bojjhaṅgā. Ekatte bodhipakkhiyaṭṭhaṃ bujjhantīti – bojjhaṅgā. Ekatte anubodhipakkhiyaṭṭhaṃ bujjhantīti – bojjhaṅgā. Ekatte paṭibodhipakkhiyaṭṭhaṃ bujjhantīti – bojjhaṅgā. Ekatte sambodhipakkhiyaṭṭhaṃ bujjhantīti – bojjhaṅgā. Ekatte jotanaṭṭhaṃ bujjhantīti – bojjhaṅgā. Ekatte ujjotanaṭṭhaṃ bujjhantīti – bojjhaṅgā. Ekatte anujotanaṭṭhaṃ bujjhantīti – bojjhaṅgā. Ekatte paṭijotanaṭṭhaṃ bujjhantīti – bojjhaṅgā. Ekatte sañjotanaṭṭhaṃ bujjhantīti – bojjhaṅgā.

បតាបនដ្ឋំ ពុជ្ឈន្តីតិ – ពោជ្ឈង្គា។ វិរោចនដ្ឋំ ពុជ្ឈន្តីតិ – ពោជ្ឈង្គា ។ កិលេសានំ សន្តាបនដ្ឋំ ពុជ្ឈន្តីតិ – ពោជ្ឈង្គា។ អមលដ្ឋំ ពុជ្ឈន្តីតិ – ពោជ្ឈង្គា។ វិមលដ្ឋំ ពុជ្ឈន្តីតិ – ពោជ្ឈង្គា។ និម្មលដ្ឋំ ពុជ្ឈន្តីតិ – ពោជ្ឈង្គា។ សមដ្ឋំ ពុជ្ឈន្តីតិ – ពោជ្ឈង្គា។ សមយដ្ឋំ ពុជ្ឈន្តីតិ – ពោជ្ឈង្គា។ វិវេកដ្ឋំ ពុជ្ឈន្តីតិ – ពោជ្ឈង្គា។ វិវេកចរិយដ្ឋំ ពុជ្ឈន្តីតិ – ពោជ្ឈង្គា។ វិរាគដ្ឋំ ពុជ្ឈន្តីតិ – ពោជ្ឈង្គា។ វិរាគចរិយដ្ឋំ ពុជ្ឈន្តីតិ – ពោជ្ឈង្គា។ និរោធដ្ឋំ ពុជ្ឈន្តីតិ – ពោជ្ឈង្គា។ និរោធចរិយដ្ឋំ ពុជ្ឈន្តីតិ – ពោជ្ឈង្គា។ វោសគ្គដ្ឋំ ពុជ្ឈន្តីតិ – ពោជ្ឈង្គា។ វោសគ្គចរិយដ្ឋំ ពុជ្ឈន្តីតិ – ពោជ្ឈង្គា។ វិមុត្តដ្ឋំ ពុជ្ឈន្តីតិ – ពោជ្ឈង្គា។ វិមុត្តិចរិយដ្ឋំ ពុជ្ឈន្តីតិ – ពោជ្ឈង្គា។

Patāpanaṭṭhaṃ bujjhantīti – bojjhaṅgā. Virocanaṭṭhaṃ bujjhantīti – bojjhaṅgā . Kilesānaṃ santāpanaṭṭhaṃ bujjhantīti – bojjhaṅgā. Amalaṭṭhaṃ bujjhantīti – bojjhaṅgā. Vimalaṭṭhaṃ bujjhantīti – bojjhaṅgā. Nimmalaṭṭhaṃ bujjhantīti – bojjhaṅgā. Samaṭṭhaṃ bujjhantīti – bojjhaṅgā. Samayaṭṭhaṃ bujjhantīti – bojjhaṅgā. Vivekaṭṭhaṃ bujjhantīti – bojjhaṅgā. Vivekacariyaṭṭhaṃ bujjhantīti – bojjhaṅgā. Virāgaṭṭhaṃ bujjhantīti – bojjhaṅgā. Virāgacariyaṭṭhaṃ bujjhantīti – bojjhaṅgā. Nirodhaṭṭhaṃ bujjhantīti – bojjhaṅgā. Nirodhacariyaṭṭhaṃ bujjhantīti – bojjhaṅgā. Vosaggaṭṭhaṃ bujjhantīti – bojjhaṅgā. Vosaggacariyaṭṭhaṃ bujjhantīti – bojjhaṅgā. Vimuttaṭṭhaṃ bujjhantīti – bojjhaṅgā. Vimutticariyaṭṭhaṃ bujjhantīti – bojjhaṅgā.

ឆន្ទដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស មូលដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស បាទដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស បធានដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស ឥជ្ឈនដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស អធិមោក្ខដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស បគ្គហដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស ឧបដ្ឋានដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស អវិក្ខេបដ្ឋំ ពុជ្ឈន្តីតិ – ពោជ្ឈង្គា។ ឆន្ទស្ស ទស្សនដ្ឋំ ពុជ្ឈន្តីតិ – ពោជ្ឈង្គា។

Chandaṭṭhaṃ bujjhantīti – bojjhaṅgā. Chandassa mūlaṭṭhaṃ bujjhantīti – bojjhaṅgā. Chandassa pādaṭṭhaṃ bujjhantīti – bojjhaṅgā. Chandassa padhānaṭṭhaṃ bujjhantīti – bojjhaṅgā. Chandassa ijjhanaṭṭhaṃ bujjhantīti – bojjhaṅgā. Chandassa adhimokkhaṭṭhaṃ bujjhantīti – bojjhaṅgā. Chandassa paggahaṭṭhaṃ bujjhantīti – bojjhaṅgā. Chandassa upaṭṭhānaṭṭhaṃ bujjhantīti – bojjhaṅgā. Chandassa avikkhepaṭṭhaṃ bujjhantīti – bojjhaṅgā. Chandassa dassanaṭṭhaṃ bujjhantīti – bojjhaṅgā.

វីរិយដ្ឋំ ពុជ្ឈន្តីតិ – ពោជ្ឈង្គា…បេ.… ចិត្តដ្ឋំ ពុជ្ឈន្តីតិ – ពោជ្ឈង្គា…បេ.… វីមំសដ្ឋំ ពុជ្ឈន្តីតិ – ពោជ្ឈង្គា។ វីមំសាយ មូលដ្ឋំ ពុជ្ឈន្តីតិ – ពោជ្ឈង្គា។ វីមំសាយ បាទដ្ឋំ ពុជ្ឈន្តីតិ – ពោជ្ឈង្គា។ វីមំសាយ បធានដ្ឋំ ពុជ្ឈន្តីតិ – ពោជ្ឈង្គា។ វីមំសាយ ឥជ្ឈនដ្ឋំ ពុជ្ឈន្តីតិ – ពោជ្ឈង្គា។ វីមំសាយ អធិមោក្ខដ្ឋំ ពុជ្ឈន្តីតិ – ពោជ្ឈង្គា។ វីមំសាយ បគ្គហដ្ឋំ ពុជ្ឈន្តីតិ – ពោជ្ឈង្គា។ វីមំសាយ ឧបដ្ឋានដ្ឋំ ពុជ្ឈន្តីតិ – ពោជ្ឈង្គា។ វីមំសាយ អវិក្ខេបដ្ឋំ ពុជ្ឈន្តីតិ – ពោជ្ឈង្គា។ វីមំសាយ ទស្សនដ្ឋំ ពុជ្ឈន្តីតិ – ពោជ្ឈង្គា។

Vīriyaṭṭhaṃ bujjhantīti – bojjhaṅgā…pe… cittaṭṭhaṃ bujjhantīti – bojjhaṅgā…pe… vīmaṃsaṭṭhaṃ bujjhantīti – bojjhaṅgā. Vīmaṃsāya mūlaṭṭhaṃ bujjhantīti – bojjhaṅgā. Vīmaṃsāya pādaṭṭhaṃ bujjhantīti – bojjhaṅgā. Vīmaṃsāya padhānaṭṭhaṃ bujjhantīti – bojjhaṅgā. Vīmaṃsāya ijjhanaṭṭhaṃ bujjhantīti – bojjhaṅgā. Vīmaṃsāya adhimokkhaṭṭhaṃ bujjhantīti – bojjhaṅgā. Vīmaṃsāya paggahaṭṭhaṃ bujjhantīti – bojjhaṅgā. Vīmaṃsāya upaṭṭhānaṭṭhaṃ bujjhantīti – bojjhaṅgā. Vīmaṃsāya avikkhepaṭṭhaṃ bujjhantīti – bojjhaṅgā. Vīmaṃsāya dassanaṭṭhaṃ bujjhantīti – bojjhaṅgā.

ទុក្ខដ្ឋំ ពុជ្ឈន្តីតិ – ពោជ្ឈង្គា។ ទុក្ខស្ស បីឡនដ្ឋំ ពុជ្ឈន្តីតិ – ពោជ្ឈង្គា។ ទុក្ខស្ស សង្ខតដ្ឋំ ពុជ្ឈន្តីតិ – ពោជ្ឈង្គា។ ទុក្ខស្ស សន្តាបដ្ឋំ ពុជ្ឈន្តីតិ – ពោជ្ឈង្គា។ ទុក្ខស្ស វិបរិណាមដ្ឋំ ពុជ្ឈន្តីតិ – ពោជ្ឈង្គា។ សមុទយដ្ឋំ ពុជ្ឈន្តីតិ – ពោជ្ឈង្គា។ សមុទយស្ស អាយូហនដ្ឋំ និទានដ្ឋំ សញ្ញោគដ្ឋំ បលិពោធដ្ឋំ ពុជ្ឈន្តីតិ – ពោជ្ឈង្គា។ និរោធដ្ឋំ ពុជ្ឈន្តីតិ – ពោជ្ឈង្គា។ និរោធស្ស និស្សរណដ្ឋំ វិវេកដ្ឋំ អសង្ខតដ្ឋំ អមតដ្ឋំ ពុជ្ឈន្តីតិ – ពោជ្ឈង្គា។ មគ្គដ្ឋំ ពុជ្ឈន្តីតិ – ពោជ្ឈង្គា។ មគ្គស្ស និយ្យានដ្ឋំ ហេតុដ្ឋំ ទស្សនដ្ឋំ អាធិបតេយ្យដ្ឋំ ពុជ្ឈន្តីតិ – ពោជ្ឈង្គា។

Dukkhaṭṭhaṃ bujjhantīti – bojjhaṅgā. Dukkhassa pīḷanaṭṭhaṃ bujjhantīti – bojjhaṅgā. Dukkhassa saṅkhataṭṭhaṃ bujjhantīti – bojjhaṅgā. Dukkhassa santāpaṭṭhaṃ bujjhantīti – bojjhaṅgā. Dukkhassa vipariṇāmaṭṭhaṃ bujjhantīti – bojjhaṅgā. Samudayaṭṭhaṃ bujjhantīti – bojjhaṅgā. Samudayassa āyūhanaṭṭhaṃ nidānaṭṭhaṃ saññogaṭṭhaṃ palibodhaṭṭhaṃ bujjhantīti – bojjhaṅgā. Nirodhaṭṭhaṃ bujjhantīti – bojjhaṅgā. Nirodhassa nissaraṇaṭṭhaṃ vivekaṭṭhaṃ asaṅkhataṭṭhaṃ amataṭṭhaṃ bujjhantīti – bojjhaṅgā. Maggaṭṭhaṃ bujjhantīti – bojjhaṅgā. Maggassa niyyānaṭṭhaṃ hetuṭṭhaṃ dassanaṭṭhaṃ ādhipateyyaṭṭhaṃ bujjhantīti – bojjhaṅgā.

តថដ្ឋំ ពុជ្ឈន្តីតិ – ពោជ្ឈង្គា។ អនត្តដ្ឋំ ពុជ្ឈន្តីតិ – ពោជ្ឈង្គា។ សច្ចដ្ឋំ ពុជ្ឈន្តីតិ – ពោជ្ឈង្គា។ បដិវេធដ្ឋំ ពុជ្ឈន្តីតិ – ពោជ្ឈង្គា។ អភិជាននដ្ឋំ ពុជ្ឈន្តីតិ – ពោជ្ឈង្គា។ បរិជាននដ្ឋំ ពុជ្ឈន្តីតិ – ពោជ្ឈង្គា។ ធម្មដ្ឋំ ពុជ្ឈន្តីតិ – ពោជ្ឈង្គា។ ធាតុដ្ឋំ ពុជ្ឈន្តីតិ – ពោជ្ឈង្គា។ ញាតដ្ឋំ ពុជ្ឈន្តីតិ – ពោជ្ឈង្គា។ សច្ឆិកិរិយដ្ឋំ ពុជ្ឈន្តីតិ – ពោជ្ឈង្គា។ ផស្សនដ្ឋំ ពុជ្ឈន្តីតិ – ពោជ្ឈង្គា។ អភិសមយដ្ឋំ ពុជ្ឈន្តីតិ – ពោជ្ឈង្គា។

Tathaṭṭhaṃ bujjhantīti – bojjhaṅgā. Anattaṭṭhaṃ bujjhantīti – bojjhaṅgā. Saccaṭṭhaṃ bujjhantīti – bojjhaṅgā. Paṭivedhaṭṭhaṃ bujjhantīti – bojjhaṅgā. Abhijānanaṭṭhaṃ bujjhantīti – bojjhaṅgā. Parijānanaṭṭhaṃ bujjhantīti – bojjhaṅgā. Dhammaṭṭhaṃ bujjhantīti – bojjhaṅgā. Dhātuṭṭhaṃ bujjhantīti – bojjhaṅgā. Ñātaṭṭhaṃ bujjhantīti – bojjhaṅgā. Sacchikiriyaṭṭhaṃ bujjhantīti – bojjhaṅgā. Phassanaṭṭhaṃ bujjhantīti – bojjhaṅgā. Abhisamayaṭṭhaṃ bujjhantīti – bojjhaṅgā.

នេក្ខម្មំ ពុជ្ឈន្តីតិ – ពោជ្ឈង្គា។ អព្យាបាទំ ពុជ្ឈន្តីតិ – ពោជ្ឈង្គា។ អាលោកសញ្ញំ ពុជ្ឈន្តីតិ – ពោជ្ឈង្គា។ អវិក្ខេបំ ពុជ្ឈន្តីតិ – ពោជ្ឈង្គា។ ធម្មវវត្ថានំ ពុជ្ឈន្តីតិ – ពោជ្ឈង្គា។ ញាណំ ពុជ្ឈន្តីតិ – ពោជ្ឈង្គា។ បាមោជ្ជំ ពុជ្ឈន្តីតិ – ពោជ្ឈង្គា។ បឋមំ ឈានំ ពុជ្ឈន្តីតិ – ពោជ្ឈង្គា…បេ.… អរហត្តមគ្គំ ពុជ្ឈន្តីតិ – ពោជ្ឈង្គា។ អរហត្តផលសមាបត្តិំ ពុជ្ឈន្តីតិ – ពោជ្ឈង្គា។

Nekkhammaṃ bujjhantīti – bojjhaṅgā. Abyāpādaṃ bujjhantīti – bojjhaṅgā. Ālokasaññaṃ bujjhantīti – bojjhaṅgā. Avikkhepaṃ bujjhantīti – bojjhaṅgā. Dhammavavatthānaṃ bujjhantīti – bojjhaṅgā. Ñāṇaṃ bujjhantīti – bojjhaṅgā. Pāmojjaṃ bujjhantīti – bojjhaṅgā. Paṭhamaṃ jhānaṃ bujjhantīti – bojjhaṅgā…pe… arahattamaggaṃ bujjhantīti – bojjhaṅgā. Arahattaphalasamāpattiṃ bujjhantīti – bojjhaṅgā.

អធិមោក្ខដ្ឋេន សទ្ធិន្ទ្រិយំ ពុជ្ឈន្តីតិ – ពោជ្ឈង្គា…បេ.… ទស្សនដ្ឋេន បញ្ញិន្ទ្រិយំ ពុជ្ឈន្តីតិ – ពោជ្ឈង្គា។ អស្សទ្ធិយេ អកម្បិយដ្ឋេន សទ្ធាពលំ ពុជ្ឈន្តីតិ – ពោជ្ឈង្គា…បេ.… អវិជ្ជាយ អកម្បិយដ្ឋេន បញ្ញាពលំ ពុជ្ឈន្តីតិ – ពោជ្ឈង្គា។ ឧបដ្ឋានដ្ឋេន សតិសម្ពោជ្ឈង្គំ ពុជ្ឈន្តីតិ – ពោជ្ឈង្គា…បេ.… បដិសង្ខានដ្ឋេន ឧបេក្ខាសម្ពោជ្ឈង្គំ ពុជ្ឈន្តីតិ – ពោជ្ឈង្គា។

Adhimokkhaṭṭhena saddhindriyaṃ bujjhantīti – bojjhaṅgā…pe… dassanaṭṭhena paññindriyaṃ bujjhantīti – bojjhaṅgā. Assaddhiye akampiyaṭṭhena saddhābalaṃ bujjhantīti – bojjhaṅgā…pe… avijjāya akampiyaṭṭhena paññābalaṃ bujjhantīti – bojjhaṅgā. Upaṭṭhānaṭṭhena satisambojjhaṅgaṃ bujjhantīti – bojjhaṅgā…pe… paṭisaṅkhānaṭṭhena upekkhāsambojjhaṅgaṃ bujjhantīti – bojjhaṅgā.

ទស្សនដ្ឋេន សម្មាទិដ្ឋិំ ពុជ្ឈន្តីតិ – ពោជ្ឈង្គា…បេ.… អវិក្ខេបដ្ឋេន សម្មាសមាធិំ ពុជ្ឈន្តីតិ – ពោជ្ឈង្គា។ អាធិបតេយ្យដ្ឋេន ឥន្ទ្រិយំ ពុជ្ឈន្តីតិ – ពោជ្ឈង្គា។ អកម្បិយដ្ឋេន ពលំ ពុជ្ឈន្តីតិ – ពោជ្ឈង្គា។ និយ្យានដ្ឋំ ពុជ្ឈន្តីតិ – ពោជ្ឈង្គា។ ហេតុដ្ឋេន មគ្គំ ពុជ្ឈន្តីតិ – ពោជ្ឈង្គា។ ឧបដ្ឋានដ្ឋេន សតិបដ្ឋានំ ពុជ្ឈន្តីតិ – ពោជ្ឈង្គា។ បទហនដ្ឋេន សម្មប្បធានំ ពុជ្ឈន្តីតិ – ពោជ្ឈង្គា។ ឥជ្ឈនដ្ឋេន ឥទ្ធិបាទំ ពុជ្ឈន្តីតិ – ពោជ្ឈង្គា។ តថដ្ឋេន សច្ចំ ពុជ្ឈន្តីតិ – ពោជ្ឈង្គា។ អវិក្ខេបដ្ឋេន សមថំ ពុជ្ឈន្តីតិ – ពោជ្ឈង្គា។ អនុបស្សនដ្ឋេ វិបស្សនំ …បេ.… ឯករសដ្ឋេន សមថវិបស្សនំ ពុជ្ឈន្តីតិ – ពោជ្ឈង្គា។ អនតិវត្តនដ្ឋេន យុគនទ្ធំ ពុជ្ឈន្តីតិ – ពោជ្ឈង្គា។ សំវរដ្ឋេន សីលវិសុទ្ធិំ ពុជ្ឈន្តីតិ – ពោជ្ឈង្គា។ អវិក្ខេបដ្ឋេន ចិត្តវិសុទ្ធិំ ពុជ្ឈន្តីតិ – ពោជ្ឈង្គា។ ទស្សនដ្ឋេន ទិដ្ឋិវិសុទ្ធិំ ពុជ្ឈន្តីតិ – ពោជ្ឈង្គា។ មុត្តដ្ឋេន វិមោក្ខំ ពុជ្ឈន្តីតិ – ពោជ្ឈង្គា។ បដិវេធដ្ឋេន វិជ្ជំ ពុជ្ឈន្តីតិ – ពោជ្ឈង្គា។ បរិច្ចាគដ្ឋេន វិមុត្តិំ ពុជ្ឈន្តីតិ – ពោជ្ឈង្គា។ សមុច្ឆេទដ្ឋេន ខយេ ញាណំ ពុជ្ឈន្តីតិ – ពោជ្ឈង្គា។ បដិប្បស្សទ្ធដ្ឋេន អនុប្បាទេ ញាណំ ពុជ្ឈន្តីតិ – ពោជ្ឈង្គា។

Dassanaṭṭhena sammādiṭṭhiṃ bujjhantīti – bojjhaṅgā…pe… avikkhepaṭṭhena sammāsamādhiṃ bujjhantīti – bojjhaṅgā. Ādhipateyyaṭṭhena indriyaṃ bujjhantīti – bojjhaṅgā. Akampiyaṭṭhena balaṃ bujjhantīti – bojjhaṅgā. Niyyānaṭṭhaṃ bujjhantīti – bojjhaṅgā. Hetuṭṭhena maggaṃ bujjhantīti – bojjhaṅgā. Upaṭṭhānaṭṭhena satipaṭṭhānaṃ bujjhantīti – bojjhaṅgā. Padahanaṭṭhena sammappadhānaṃ bujjhantīti – bojjhaṅgā. Ijjhanaṭṭhena iddhipādaṃ bujjhantīti – bojjhaṅgā. Tathaṭṭhena saccaṃ bujjhantīti – bojjhaṅgā. Avikkhepaṭṭhena samathaṃ bujjhantīti – bojjhaṅgā. Anupassanaṭṭhe vipassanaṃ …pe… ekarasaṭṭhena samathavipassanaṃ bujjhantīti – bojjhaṅgā. Anativattanaṭṭhena yuganaddhaṃ bujjhantīti – bojjhaṅgā. Saṃvaraṭṭhena sīlavisuddhiṃ bujjhantīti – bojjhaṅgā. Avikkhepaṭṭhena cittavisuddhiṃ bujjhantīti – bojjhaṅgā. Dassanaṭṭhena diṭṭhivisuddhiṃ bujjhantīti – bojjhaṅgā. Muttaṭṭhena vimokkhaṃ bujjhantīti – bojjhaṅgā. Paṭivedhaṭṭhena vijjaṃ bujjhantīti – bojjhaṅgā. Pariccāgaṭṭhena vimuttiṃ bujjhantīti – bojjhaṅgā. Samucchedaṭṭhena khaye ñāṇaṃ bujjhantīti – bojjhaṅgā. Paṭippassaddhaṭṭhena anuppāde ñāṇaṃ bujjhantīti – bojjhaṅgā.

ឆន្ទំ មូលដ្ឋេន ពុជ្ឈន្តីតិ – ពោជ្ឈង្គា។ មនសិការំ សមុដ្ឋានដ្ឋេន ពុជ្ឈន្តីតិ – ពោជ្ឈង្គា។ ផស្សំ សមោធានដ្ឋេន ពុជ្ឈន្តីតិ – ពោជ្ឈង្គា។ វេទនំ សមោសរណដ្ឋេន ពុជ្ឈន្តីតិ – ពោជ្ឈង្គា។ សមាធិំ បមុខដ្ឋេន ពុជ្ឈន្តីតិ – ពោជ្ឈង្គា។ សតិំ អាធិបតេយ្យដ្ឋេន ពុជ្ឈន្តីតិ – ពោជ្ឈង្គា។ បញ្ញំ តតុត្តរដ្ឋេន ពុជ្ឈន្តីតិ – ពោជ្ឈង្គា។ វិមុត្តិំ សារដ្ឋេន ពុជ្ឈន្តីតិ – ពោជ្ឈង្គា។ អមតោគធំ និព្ពានំ បរិយោសានដ្ឋេន ពុជ្ឈន្តីតិ – ពោជ្ឈង្គា។

Chandaṃ mūlaṭṭhena bujjhantīti – bojjhaṅgā. Manasikāraṃ samuṭṭhānaṭṭhena bujjhantīti – bojjhaṅgā. Phassaṃ samodhānaṭṭhena bujjhantīti – bojjhaṅgā. Vedanaṃ samosaraṇaṭṭhena bujjhantīti – bojjhaṅgā. Samādhiṃ pamukhaṭṭhena bujjhantīti – bojjhaṅgā. Satiṃ ādhipateyyaṭṭhena bujjhantīti – bojjhaṅgā. Paññaṃ tatuttaraṭṭhena bujjhantīti – bojjhaṅgā. Vimuttiṃ sāraṭṭhena bujjhantīti – bojjhaṅgā. Amatogadhaṃ nibbānaṃ pariyosānaṭṭhena bujjhantīti – bojjhaṅgā.

២០. សាវត្ថិនិទានំ។ តត្រ ខោ អាយស្មា សារិបុត្តោ ភិក្ខូ អាមន្តេសិ – ‘‘អាវុសោ ភិក្ខវោ’’តិ 13។ ‘‘អាវុសោ’’តិ ខោ តេ ភិក្ខូ អាយស្មតោ សារិបុត្តស្ស បច្ចស្សោសុំ។ អាយស្មា សារិបុត្តោ ឯតទវោច –

20. Sāvatthinidānaṃ. Tatra kho āyasmā sāriputto bhikkhū āmantesi – ‘‘āvuso bhikkhavo’’ti 14. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –

‘‘សត្តិមេ, អាវុសោ, ពោជ្ឈង្គា ។ កតមេ សត្ត? សតិសម្ពោជ្ឈង្គោ, ធម្មវិចយសម្ពោជ្ឈង្គោ…បេ.… ឧបេក្ខាសម្ពោជ្ឈង្គោ – ឥមេ ខោ, អាវុសោ, សត្ត ពោជ្ឈង្គា។ ឥមេសំ ខ្វាហំ, អាវុសោ, សត្តន្នំ ពោជ្ឈង្គានំ យេន យេន ពោជ្ឈង្គេន អាកង្ខាមិ បុព្ពណ្ហសមយំ វិហរិតុំ, តេន តេន ពោជ្ឈង្គេន បុព្ពណ្ហសមយំ វិហរាមិ។ យេន យេន ពោជ្ឈង្គេន អាកង្ខាមិ មជ្ឈន្ហិកសមយំ…បេ.… សាយន្ហសមយំ វិហរិតុំ, តេន តេន ពោជ្ឈង្គេន សាយន្ហសមយំ វិហរាមិ។ សតិសម្ពោជ្ឈង្គោ ឥតិ ចេ មេ, ‘អាវុសោ, ហោតិ, អប្បមាណោ’តិ មេ ហោតិ, ‘សុសមារទ្ធោ’តិ មេ ហោតិ។ តិដ្ឋន្តញ្ច នំ 15 ‘តិដ្ឋតី’តិ បជានាមិ។ សចេបិ មេ ចវតិ, ‘ឥទប្បច្ចយា មេ ចវតី’តិ បជានាមិ។ ធម្មវិចយសម្ពោជ្ឈង្គោ…បេ.… ឧបេក្ខាសម្ពោជ្ឈង្គោ ឥតិ ចេ មេ, អាវុសោ, ហោតិ, ‘អប្បមាណោ’តិ មេ ហោតិ, ‘សុសមារទ្ធោ’តិ មេ ហោតិ។ តិដ្ឋន្តញ្ច នំ ‘តិដ្ឋតី’តិ បជានាមិ។ សចេបិ មេ ចវតិ, ‘ឥទប្បច្ចយា មេ ចវតី’តិ បជានាមិ។

‘‘Sattime, āvuso, bojjhaṅgā . Katame satta? Satisambojjhaṅgo, dhammavicayasambojjhaṅgo…pe… upekkhāsambojjhaṅgo – ime kho, āvuso, satta bojjhaṅgā. Imesaṃ khvāhaṃ, āvuso, sattannaṃ bojjhaṅgānaṃ yena yena bojjhaṅgena ākaṅkhāmi pubbaṇhasamayaṃ viharituṃ, tena tena bojjhaṅgena pubbaṇhasamayaṃ viharāmi. Yena yena bojjhaṅgena ākaṅkhāmi majjhanhikasamayaṃ…pe… sāyanhasamayaṃ viharituṃ, tena tena bojjhaṅgena sāyanhasamayaṃ viharāmi. Satisambojjhaṅgo iti ce me, ‘āvuso, hoti, appamāṇo’ti me hoti, ‘susamāraddho’ti me hoti. Tiṭṭhantañca naṃ 16 ‘tiṭṭhatī’ti pajānāmi. Sacepi me cavati, ‘idappaccayā me cavatī’ti pajānāmi. Dhammavicayasambojjhaṅgo…pe… upekkhāsambojjhaṅgo iti ce me, āvuso, hoti, ‘appamāṇo’ti me hoti, ‘susamāraddho’ti me hoti. Tiṭṭhantañca naṃ ‘tiṭṭhatī’ti pajānāmi. Sacepi me cavati, ‘idappaccayā me cavatī’ti pajānāmi.

‘‘សេយ្យថាបិ, អាវុសោ, រញ្ញោ វា រាជមហាមត្តស្ស វា នានារត្តានំ ទុស្សានំ ទុស្សករណ្ឌកោ បូរោ អស្ស។ សោ យញ្ញទេវ ទុស្សយុគំ អាកង្ខេយ្យ បុព្ពណ្ហសមយំ បារុបិតុំ, តំ តទេវ ទុស្សយុគំ បុព្ពណ្ហសមយំ បារុបេយ្យ។ យញ្ញទេវ ទុស្សយុគំ អាកង្ខេយ្យ មជ្ឈន្ហិកសមយំ…បេ.… សាយន្ហសមយំ បារុបិតុំ, តំ តទេវ ទុស្សយុគំ សាយន្ហសមយំ បារុបេយ្យ។ ឯវមេវ ខ្វាហំ, អាវុសោ, ឥមេសំ សត្តន្នំ ពោជ្ឈង្គានំ យេន យេន ពោជ្ឈង្គេន អាកង្ខាមិ បុព្ពណ្ហសមយំ វិហរិតុំ, តេន តេន ពោជ្ឈង្គេន បុព្ពណ្ហសមយំ វិហរាមិ។ យេន យេន ពោជ្ឈង្គេន អាកង្ខាមិ មជ្ឈន្ហិកសមយំ…បេ.… សាយន្ហសមយំ វិហរិតុំ, តេន តេន ពោជ្ឈង្គេន សាយន្ហសមយំ វិហរាមិ។ សតិសម្ពោជ្ឈង្គោ ឥតិ ចេ មេ, អាវុសោ, ហោតិ, ‘អប្បមាណោ’តិ មេ ហោតិ, ‘សុសមារទ្ធោ’តិ មេ ហោតិ។ តិដ្ឋន្តញ្ច នំ ‘តិដ្ឋតី’តិ បជានាមិ។ សចេបិ មេ ចវតិ, ‘ឥទប្បច្ចយា មេ ចវតី’តិ បជានាមិ…បេ.… ឧបេក្ខាសម្ពោជ្ឈង្គោ ឥតិ ចេ មេ, អាវុសោ, ហោតិ, ‘អប្បមាណោ’តិ មេ ហោតិ, ‘សុសមារទ្ធោ’តិ មេ ហោតិ។ តិដ្ឋន្តញ្ច នំ ‘តិដ្ឋតី’តិ បជានាមិ។ សចេបិ មេ ចវតិ, ‘ឥទប្បច្ចយា មេ ចវតី’តិ បជានាមិ’’។

‘‘Seyyathāpi, āvuso, rañño vā rājamahāmattassa vā nānārattānaṃ dussānaṃ dussakaraṇḍako pūro assa. So yaññadeva dussayugaṃ ākaṅkheyya pubbaṇhasamayaṃ pārupituṃ, taṃ tadeva dussayugaṃ pubbaṇhasamayaṃ pārupeyya. Yaññadeva dussayugaṃ ākaṅkheyya majjhanhikasamayaṃ…pe… sāyanhasamayaṃ pārupituṃ, taṃ tadeva dussayugaṃ sāyanhasamayaṃ pārupeyya. Evameva khvāhaṃ, āvuso, imesaṃ sattannaṃ bojjhaṅgānaṃ yena yena bojjhaṅgena ākaṅkhāmi pubbaṇhasamayaṃ viharituṃ, tena tena bojjhaṅgena pubbaṇhasamayaṃ viharāmi. Yena yena bojjhaṅgena ākaṅkhāmi majjhanhikasamayaṃ…pe… sāyanhasamayaṃ viharituṃ, tena tena bojjhaṅgena sāyanhasamayaṃ viharāmi. Satisambojjhaṅgo iti ce me, āvuso, hoti, ‘appamāṇo’ti me hoti, ‘susamāraddho’ti me hoti. Tiṭṭhantañca naṃ ‘tiṭṭhatī’ti pajānāmi. Sacepi me cavati, ‘idappaccayā me cavatī’ti pajānāmi…pe… upekkhāsambojjhaṅgo iti ce me, āvuso, hoti, ‘appamāṇo’ti me hoti, ‘susamāraddho’ti me hoti. Tiṭṭhantañca naṃ ‘tiṭṭhatī’ti pajānāmi. Sacepi me cavati, ‘idappaccayā me cavatī’ti pajānāmi’’.

សុត្តន្តនិទ្ទេសោ

Suttantaniddeso

២១. កថំ សតិសម្ពោជ្ឈង្គោ ឥតិ ចេ មេ ហោតីតិ ពោជ្ឈង្គោ? យាវតា និរោធូបដ្ឋាតិ តាវតា សតិសម្ពោជ្ឈង្គោ។ ឥតិ ចេ មេ ហោតីតិ ពោជ្ឈង្គោ។ សេយ្យថាបិ តេលប្បទីបស្ស ឈាយតោ យាវតា អច្ចិ តាវតា វណ្ណោ, យាវតា វណ្ណោ តាវតា អច្ចិ។ ឯវមេវ យាវតា និរោធូបដ្ឋាតិ តាវតា សតិសម្ពោជ្ឈង្គោ។ ឥតិ ចេ មេ ហោតីតិ ពោជ្ឈង្គោ។

21. Kathaṃ satisambojjhaṅgo iti ce me hotīti bojjhaṅgo? Yāvatā nirodhūpaṭṭhāti tāvatā satisambojjhaṅgo. Iti ce me hotīti bojjhaṅgo. Seyyathāpi telappadīpassa jhāyato yāvatā acci tāvatā vaṇṇo, yāvatā vaṇṇo tāvatā acci. Evameva yāvatā nirodhūpaṭṭhāti tāvatā satisambojjhaṅgo. Iti ce me hotīti bojjhaṅgo.

កថំ អប្បមាណោ ឥតិ ចេ មេ ហោតីតិ ពោជ្ឈង្គោ? បមាណពទ្ធា 17 កិលេសា, សព្ពេ ច បរិយុដ្ឋានា, យេ ច សង្ខារា បោនោភវិកា អប្បមាណោ និរោធោ អចលដ្ឋេន អសង្ខតដ្ឋេន។ យាវតា និរោធូបដ្ឋាតិ តាវតា អប្បមាណោ។ ឥតិ ចេ មេ ហោតីតិ ពោជ្ឈង្គោ។

Kathaṃ appamāṇo iti ce me hotīti bojjhaṅgo? Pamāṇabaddhā 18 kilesā, sabbe ca pariyuṭṭhānā, ye ca saṅkhārā ponobhavikā appamāṇo nirodho acalaṭṭhena asaṅkhataṭṭhena. Yāvatā nirodhūpaṭṭhāti tāvatā appamāṇo. Iti ce me hotīti bojjhaṅgo.

កថំ សុសមារទ្ធោ ឥតិ ចេ មេ ហោតីតិ – ពោជ្ឈង្គោ? វិសមា កិលេសា, សព្ពេ ច បរិយុដ្ឋានា, យេ ច សង្ខារា បោនោភវិកា, សមធម្មោ និរោធោ សន្តដ្ឋេន បណីតដ្ឋេន។ យាវតា និរោធូបដ្ឋាតិ តាវតា សុសមារទ្ធោ ឥតិ ចេ មេ ហោតីតិ ពោជ្ឈង្គោ។

Kathaṃ susamāraddho iti ce me hotīti – bojjhaṅgo? Visamā kilesā, sabbe ca pariyuṭṭhānā, ye ca saṅkhārā ponobhavikā, samadhammo nirodho santaṭṭhena paṇītaṭṭhena. Yāvatā nirodhūpaṭṭhāti tāvatā susamāraddho iti ce me hotīti bojjhaṅgo.

កថំ ‘‘តិដ្ឋន្តញ្ច នំ តិដ្ឋតី’’តិ បជានាមិ; សចេបិ ចវតិ ‘‘ឥទប្បច្ចយា ចវតី’’តិ បជានាមិ? កតិហាការេហិ សតិសម្ពោជ្ឈង្គោ តិដ្ឋតិ? កតិហាការេហិ សតិសម្ពោជ្ឈង្គោ ចវតិ? អដ្ឋហាការេហិ សតិសម្ពោជ្ឈង្គោ តិដ្ឋតិ។ អដ្ឋហាការេហិ សតិសម្ពោជ្ឈង្គោ ចវតិ។

Kathaṃ ‘‘tiṭṭhantañca naṃ tiṭṭhatī’’ti pajānāmi; sacepi cavati ‘‘idappaccayā cavatī’’ti pajānāmi? Katihākārehi satisambojjhaṅgo tiṭṭhati? Katihākārehi satisambojjhaṅgo cavati? Aṭṭhahākārehi satisambojjhaṅgo tiṭṭhati. Aṭṭhahākārehi satisambojjhaṅgo cavati.

កតមេហិ អដ្ឋហាការេហិ សតិសម្ពោជ្ឈង្គោ តិដ្ឋតិ? អនុប្បាទំ អាវជ្ជិតត្តា សតិសម្ពោជ្ឈង្គោ តិដ្ឋតិ, ឧប្បាទំ អនាវជ្ជិតត្តា សតិសម្ពោជ្ឈង្គោ តិដ្ឋតិ, អប្បវត្តំ អាវជ្ជិតត្តា សតិសម្ពោជ្ឈង្គោ តិដ្ឋតិ, បវត្តំ អនាវជ្ជិតត្តា សតិសម្ពោជ្ឈង្គោ តិដ្ឋតិ, អនិមិត្តំ អាវជ្ជិតត្តា សតិសម្ពោជ្ឈង្គោ តិដ្ឋតិ, និមិត្តំ អនាវជ្ជិតត្តា សតិសម្ពោជ្ឈង្គោ តិដ្ឋតិ, និរោធំ អាវជ្ជិតត្តា សតិសម្ពោជ្ឈង្គោ តិដ្ឋតិ, សង្ខារេ អនាវជ្ជិតត្តា សតិសម្ពោជ្ឈង្គោ តិដ្ឋតិ – ឥមេហិ អដ្ឋហាការេហិ សតិសម្ពោជ្ឈង្គោ តិដ្ឋតិ។

Katamehi aṭṭhahākārehi satisambojjhaṅgo tiṭṭhati? Anuppādaṃ āvajjitattā satisambojjhaṅgo tiṭṭhati, uppādaṃ anāvajjitattā satisambojjhaṅgo tiṭṭhati, appavattaṃ āvajjitattā satisambojjhaṅgo tiṭṭhati, pavattaṃ anāvajjitattā satisambojjhaṅgo tiṭṭhati, animittaṃ āvajjitattā satisambojjhaṅgo tiṭṭhati, nimittaṃ anāvajjitattā satisambojjhaṅgo tiṭṭhati, nirodhaṃ āvajjitattā satisambojjhaṅgo tiṭṭhati, saṅkhāre anāvajjitattā satisambojjhaṅgo tiṭṭhati – imehi aṭṭhahākārehi satisambojjhaṅgo tiṭṭhati.

កតមេហិ អដ្ឋហាការេហិ សតិសម្ពោជ្ឈង្គោ ចវតិ? ឧប្បាទំ អាវជ្ជិតត្តា សតិសម្ពោជ្ឈង្គោ ចវតិ, អនុប្បាទំ អនាវជ្ជិតត្តា សតិសម្ពោជ្ឈង្គោ ចវតិ, បវត្តំ អាវជ្ជិតត្តា សតិសម្ពោជ្ឈង្គោ ចវតិ, អប្បវត្តំ អនាវជ្ជិតត្តា សតិសម្ពោជ្ឈង្គោ ចវតិ, និមិត្តំ អាវជ្ជិតត្តា សតិសម្ពោជ្ឈង្គោ ចវតិ, អនិមិត្តំ អនាវជ្ជិតត្តា សតិសម្ពោជ្ឈង្គោ ចវតិ, សង្ខារេ អាវជ្ជិតត្តា សតិសម្ពោជ្ឈង្គោ ចវតិ, និរោធំ អនាវជ្ជិតត្តា សតិសម្ពោជ្ឈង្គោ ចវតិ – ឥមេហិ អដ្ឋហាការេហិ សតិសម្ពោជ្ឈង្គោ ចវតិ។ ឯវំ ‘‘តិដ្ឋន្តញ្ច នំ តិដ្ឋតី’’តិ បជានាមិ។ សចេបិ ចវតិ, ‘‘ឥទប្បច្ចយា មេ ចវតី’’តិ បជានាមិ…បេ.…។

Katamehi aṭṭhahākārehi satisambojjhaṅgo cavati? Uppādaṃ āvajjitattā satisambojjhaṅgo cavati, anuppādaṃ anāvajjitattā satisambojjhaṅgo cavati, pavattaṃ āvajjitattā satisambojjhaṅgo cavati, appavattaṃ anāvajjitattā satisambojjhaṅgo cavati, nimittaṃ āvajjitattā satisambojjhaṅgo cavati, animittaṃ anāvajjitattā satisambojjhaṅgo cavati, saṅkhāre āvajjitattā satisambojjhaṅgo cavati, nirodhaṃ anāvajjitattā satisambojjhaṅgo cavati – imehi aṭṭhahākārehi satisambojjhaṅgo cavati. Evaṃ ‘‘tiṭṭhantañca naṃ tiṭṭhatī’’ti pajānāmi. Sacepi cavati, ‘‘idappaccayā me cavatī’’ti pajānāmi…pe….

កថំ ឧបេក្ខាសម្ពោជ្ឈង្គោ ឥតិ ចេ មេ ហោតីតិ ពោជ្ឈង្គោ? យាវតា និរោធូបដ្ឋាតិ តាវតា ឧបេក្ខាសម្ពោជ្ឈង្គោ ឥតិ ចេ មេ ហោតីតិ ពោជ្ឈង្គោ។ សេយ្យថាបិ តេលប្បទីបស្ស ឈាយតោ យាវតា អច្ចិ តាវតា វណ្ណោ, យាវតា វណ្ណោ តាវតា អច្ចិ។ ឯវមេវ យាវតា និរោធូបដ្ឋាតិ តាវតា ឧបេក្ខាសម្ពោជ្ឈង្គោ ឥតិ ចេ ហោតីតិ ពោជ្ឈង្គោ។

Kathaṃ upekkhāsambojjhaṅgo iti ce me hotīti bojjhaṅgo? Yāvatā nirodhūpaṭṭhāti tāvatā upekkhāsambojjhaṅgo iti ce me hotīti bojjhaṅgo. Seyyathāpi telappadīpassa jhāyato yāvatā acci tāvatā vaṇṇo, yāvatā vaṇṇo tāvatā acci. Evameva yāvatā nirodhūpaṭṭhāti tāvatā upekkhāsambojjhaṅgo iti ce hotīti bojjhaṅgo.

កថំ អប្បមាណោ ឥតិ ចេ ហោតីតិ ពោជ្ឈង្គោ? បមាណពទ្ធា កិលេសា, សព្ពេ ច បរិយុដ្ឋានា, យេ ច សង្ខារា បោនោភវិកា អប្បមាណោ និរោធោ អចលដ្ឋេន អសង្ខតដ្ឋេន។ យាវតា និរោធូបដ្ឋាតិ តាវតា អប្បមាណោ ឥតិ ចេ ហោតីតិ ពោជ្ឈង្គោ។

Kathaṃ appamāṇo iti ce hotīti bojjhaṅgo? Pamāṇabaddhā kilesā, sabbe ca pariyuṭṭhānā, ye ca saṅkhārā ponobhavikā appamāṇo nirodho acalaṭṭhena asaṅkhataṭṭhena. Yāvatā nirodhūpaṭṭhāti tāvatā appamāṇo iti ce hotīti bojjhaṅgo.

កថំ សុសមារទ្ធោ ឥតិ ចេ ហោតីតិ ពោជ្ឈង្គោ? វិសមា កិលេសា, សព្ពេ ច បរិយុដ្ឋានា, យេ ច សង្ខារា បោនោភវិកា សមធម្មោ និរោធោ សន្តដ្ឋេន បណីតដ្ឋេន។ យាវតា និរោធូបដ្ឋាតិ តាវតា សុសមារទ្ធោ ឥតិ ចេ ហោតីតិ ពោជ្ឈង្គោ។

Kathaṃ susamāraddho iti ce hotīti bojjhaṅgo? Visamā kilesā, sabbe ca pariyuṭṭhānā, ye ca saṅkhārā ponobhavikā samadhammo nirodho santaṭṭhena paṇītaṭṭhena. Yāvatā nirodhūpaṭṭhāti tāvatā susamāraddho iti ce hotīti bojjhaṅgo.

កថំ ‘‘តិដ្ឋន្តញ្ច នំ តិដ្ឋតី’’តិ បជានាមិ; សចេបិ ចវតិ ‘‘ឥទប្បច្ចយា មេ ចវតី’’តិ បជានាមិ? កតិហាការេហិ ឧបេក្ខាសម្ពោជ្ឈង្គោ តិដ្ឋតិ? កតិហាការេហិ ឧបេក្ខាសម្ពោជ្ឈង្គោ ចវតិ ? អដ្ឋហាការេហិ ឧបេក្ខាសម្ពោជ្ឈង្គោ តិដ្ឋតិ។ អដ្ឋហាការេហិ ឧបេក្ខាសម្ពោជ្ឈង្គោ ចវតិ។

Kathaṃ ‘‘tiṭṭhantañca naṃ tiṭṭhatī’’ti pajānāmi; sacepi cavati ‘‘idappaccayāme cavatī’’ti pajānāmi? Katihākārehi upekkhāsambojjhaṅgo tiṭṭhati? Katihākārehi upekkhāsambojjhaṅgo cavati ? Aṭṭhahākārehi upekkhāsambojjhaṅgo tiṭṭhati. Aṭṭhahākārehi upekkhāsambojjhaṅgo cavati.

កតមេហិ អដ្ឋហាការេហិ ឧបេក្ខាសម្ពោជ្ឈង្គោ តិដ្ឋតិ? អនុប្បាទំ អាវជ្ជិតត្តា ឧបេក្ខាសម្ពោជ្ឈង្គោ តិដ្ឋតិ, ឧប្បាទំ អនាវជ្ជិតត្តា ឧបេក្ខាសម្ពោជ្ឈង្គោ តិដ្ឋតិ, អប្បវត្តំ អាវជ្ជិតត្តា ឧបេក្ខាសម្ពោជ្ឈង្គោ តិដ្ឋតិ, បវត្តំ អនាវជ្ជិតត្តា ឧបេក្ខាសម្ពោជ្ឈង្គោ តិដ្ឋតិ, អនិមិត្តំ អាវជ្ជិតត្តា ឧបេក្ខាសម្ពោជ្ឈង្គោ តិដ្ឋតិ, និមិត្តំ អនាវជ្ជិតត្តា ឧបេក្ខាសម្ពោជ្ឈង្គោ តិដ្ឋតិ, និរោធំ អាវជ្ជិតត្តា ឧបេក្ខាសម្ពោជ្ឈង្គោ តិដ្ឋតិ, សង្ខារេ អនាវជ្ជិតត្តា ឧបេក្ខាសម្ពោជ្ឈង្គោ តិដ្ឋតិ – ឥមេហិ អដ្ឋហាការេហិ ឧបេក្ខាសម្ពោជ្ឈង្គោ តិដ្ឋតិ។

Katamehi aṭṭhahākārehi upekkhāsambojjhaṅgo tiṭṭhati? Anuppādaṃ āvajjitattā upekkhāsambojjhaṅgo tiṭṭhati, uppādaṃ anāvajjitattā upekkhāsambojjhaṅgo tiṭṭhati, appavattaṃ āvajjitattā upekkhāsambojjhaṅgo tiṭṭhati, pavattaṃ anāvajjitattā upekkhāsambojjhaṅgo tiṭṭhati, animittaṃ āvajjitattā upekkhāsambojjhaṅgo tiṭṭhati, nimittaṃ anāvajjitattā upekkhāsambojjhaṅgo tiṭṭhati, nirodhaṃ āvajjitattā upekkhāsambojjhaṅgo tiṭṭhati, saṅkhāre anāvajjitattā upekkhāsambojjhaṅgo tiṭṭhati – imehi aṭṭhahākārehi upekkhāsambojjhaṅgo tiṭṭhati.

កតមេហិ អដ្ឋហាការេហិ ឧបេក្ខាសម្ពោជ្ឈង្គោ ចវតិ? ឧប្បាទំ អាវជ្ជិតត្តា ឧបេក្ខាសម្ពោជ្ឈង្គោ ចវតិ, អនុប្បាទំ អនាវជ្ជិតត្តា ឧបេក្ខាសម្ពោជ្ឈង្គោ ចវតិ, បវត្តំ អាវជ្ជិតត្តា ឧបេក្ខាសម្ពោជ្ឈង្គោ ចវតិ, អប្បវត្តំ អនាវជ្ជិតត្តា ឧបេក្ខាសម្ពោជ្ឈង្គោ ចវតិ, និមិត្តំ អាវជ្ជិតត្តា ឧបេក្ខាសម្ពោជ្ឈង្គោ ចវតិ , អនិមិត្តំ អនាវជ្ជិតត្តា ឧបេក្ខាសម្ពោជ្ឈង្គោ ចវតិ, សង្ខារេ អាវជ្ជិតត្តា ឧបេក្ខាសម្ពោជ្ឈង្គោ ចវតិ, និរោធំ អនាវជ្ជិតត្តា ឧបេក្ខាសម្ពោជ្ឈង្គោ ចវតិ – ឥមេហិ អដ្ឋហាការេហិ ឧបេក្ខាសម្ពោជ្ឈង្គោ ចវតិ។ ឯវំ ‘‘តិដ្ឋន្តញ្ច នំ តិដ្ឋតី’’តិ បជានាមិ; សចេបិ ចវតិ, ‘‘ឥទប្បច្ចយា មេ ចវតី’’តិ បជានាមិ។

Katamehi aṭṭhahākārehi upekkhāsambojjhaṅgo cavati? Uppādaṃ āvajjitattā upekkhāsambojjhaṅgo cavati, anuppādaṃ anāvajjitattā upekkhāsambojjhaṅgo cavati, pavattaṃ āvajjitattā upekkhāsambojjhaṅgo cavati, appavattaṃ anāvajjitattā upekkhāsambojjhaṅgo cavati, nimittaṃ āvajjitattā upekkhāsambojjhaṅgo cavati , animittaṃ anāvajjitattā upekkhāsambojjhaṅgo cavati, saṅkhāre āvajjitattā upekkhāsambojjhaṅgo cavati, nirodhaṃ anāvajjitattā upekkhāsambojjhaṅgo cavati – imehi aṭṭhahākārehi upekkhāsambojjhaṅgo cavati. Evaṃ ‘‘tiṭṭhantañca naṃ tiṭṭhatī’’ti pajānāmi; sacepi cavati, ‘‘idappaccayā me cavatī’’ti pajānāmi.

ពោជ្ឈង្គកថា និដ្ឋិតា។

Bojjhaṅgakathā niṭṭhitā.




Next: ៤. មេត្តាកថា • 4. Mettākathā




Footnotes:
1. សំ. និ. ៥.២០០
2. saṃ. ni. 5.200
3. មូលបរិបូរដ្ឋេន (ស្យា. ក.) ឯវមុបរិបិ
4. mūlaparipūraṭṭhena (syā. ka.) evamuparipi
5. អភិញ្ញេយ្យត្ថំ (ស្យា.)
6. abhiññeyyatthaṃ (syā.)
7. វិវជ្ជនដ្ឋំ (ស្យា.)
8. ភុម្មដ្ឋំ (ស្យា.) បដិ. ម. ១.១៤ បស្សិតព្ពា
9. vivajjanaṭṭhaṃ (syā.)
10. bhummaṭṭhaṃ (syā.) paṭi. ma. 1.14 passitabbā
11. (ឯកត្តេ ឧបនិពន្ធនដ្ឋំ ពុជ្ឈន្តីតិ – ពោជ្ឈង្គា) (សព្ពត្ថ)
12. (ekatte upanibandhanaṭṭhaṃ bujjhantīti – bojjhaṅgā) (sabbattha)
13. អាវុសោតិ (ស្យា.) សំ. និ. ៥.១៨៥ បស្សិតព្ពា
14. āvusoti (syā.) saṃ. ni. 5.185 passitabbā
15. តិដ្ឋន្តំ ចរំ (ស្យា.) សំ. និ. ៥.១៨៥ បស្សិតព្ពា
16. tiṭṭhantaṃ caraṃ (syā.) saṃ. ni. 5.185 passitabbā
17. បមាណវន្តា (ស្យា.), អដ្ឋកថា ឱលោកេតព្ពា
18. pamāṇavantā (syā.), aṭṭhakathā oloketabbā



Related texts:



អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā
ពោជ្ឈង្គកថាវណ្ណនា • Bojjhaṅgakathāvaṇṇanā
មូលមូលកាទិទសកវណ្ណនា • Mūlamūlakādidasakavaṇṇanā
សុត្តន្តនិទ្ទេសវណ្ណនា • Suttantaniddesavaṇṇanā


© 1991-2026 Titi Tudorancea Yoga Bulletin | Titi Tudorancea® is a Registered Trademark | Terms of use and privacy policy
Contact