| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៦. អនុបខជ្ជសិក្ខាបទវណ្ណនា
6. Anupakhajjasikkhāpadavaṇṇanā
១១៩. ឆដ្ឋសិក្ខាបទេ – បលិពុន្ធេន្តីតិ បឋមតរំ គន្ត្វា បត្តចីវរំ អតិហរិត្វា រុម្ភិត្វា តិដ្ឋន្តិ។ ថេរា ភិក្ខូ វុដ្ឋាបេន្តីតិ ‘‘អម្ហាកំ អាវុសោ បាបុណាតី’’តិ វស្សគ្គេន គហេត្វា វុដ្ឋាបេន្តិ។ អនុបខជ្ជ សេយ្យំ កប្បេន្តីតិ ‘‘តុម្ហាកំ ភន្តេ មញ្ចដ្ឋានំយេវ បាបុណាតិ, ន សព្ពោ វិហារោ។ អម្ហាកំ ទានិ ឥទំ ឋានំ បាបុណាតី’’តិ អនុបវិសិត្វា មញ្ចបីឋំ បញ្ញបេត្វា និសីទន្តិបិ និបជ្ជន្តិបិ សជ្ឈាយម្បិ ករោន្តិ។
119. Chaṭṭhasikkhāpade – palibundhentīti paṭhamataraṃ gantvā pattacīvaraṃ atiharitvā rumbhitvā tiṭṭhanti. Therā bhikkhū vuṭṭhāpentīti ‘‘amhākaṃ āvuso pāpuṇātī’’ti vassaggena gahetvā vuṭṭhāpenti. Anupakhajja seyyaṃ kappentīti ‘‘tumhākaṃ bhante mañcaṭṭhānaṃyeva pāpuṇāti, na sabbo vihāro. Amhākaṃ dāni idaṃ ṭhānaṃ pāpuṇātī’’ti anupavisitvā mañcapīṭhaṃ paññapetvā nisīdantipi nipajjantipi sajjhāyampi karonti.
១២០. ជានន្តិ ‘‘អនុដ្ឋាបនីយោ អយ’’ន្តិ ជានន្តោ; តេនេវស្ស វិភង្គេ ‘‘វុឌ្ឍោតិ ជានាតី’’តិអាទិ វុត្តំ។ វុឌ្ឍោ ហិ អត្តនោ វុឌ្ឍតាយ អនុដ្ឋាបនីយោ , គិលានោ គិលានតាយ, សង្ឃោ បន ភណ្ឌាគារិកស្ស វា ធម្មកថិកវិនយធរាទីនំ វា គណវាចកអាចរិយស្ស វា ពហូបការតំ គុណវិសិដ្ឋតញ្ច សល្លក្ខេន្តោ ធុវវាសត្ថាយ វិហារំ សម្មន្និត្វា ទេតិ, តស្មា យស្ស សង្ឃេន ទិន្នោ, សោបិ អនុដ្ឋាបនីយោ។ កាមញ្ចេត្ថ គិលានស្សាបិ សង្ឃោយេវ អនុច្ឆវិកំ សេនាសនំ ទេតិ, គិលានោ បន ‘‘អបលោកេត្វា សង្ឃេន អទិន្នសេនាសនោបិ ន បីឡេតព្ពោ អនុកម្បិតព្ពោ’’តិ ទស្សេតុំ វិសុំ វុត្តោ។
120.Jānanti ‘‘anuṭṭhāpanīyo aya’’nti jānanto; tenevassa vibhaṅge ‘‘vuḍḍhoti jānātī’’tiādi vuttaṃ. Vuḍḍho hi attano vuḍḍhatāya anuṭṭhāpanīyo , gilāno gilānatāya, saṅgho pana bhaṇḍāgārikassa vā dhammakathikavinayadharādīnaṃ vā gaṇavācakaācariyassa vā bahūpakārataṃ guṇavisiṭṭhatañca sallakkhento dhuvavāsatthāya vihāraṃ sammannitvā deti, tasmā yassa saṅghena dinno, sopi anuṭṭhāpanīyo. Kāmañcettha gilānassāpi saṅghoyeva anucchavikaṃ senāsanaṃ deti, gilāno pana ‘‘apaloketvā saṅghena adinnasenāsanopi na pīḷetabbo anukampitabbo’’ti dassetuṃ visuṃ vutto.
១២១. ឧបចារេតិ ឯត្ថ មញ្ចបីឋានំ តាវ មហល្លកេ វិហារេ សមន្តា ទិយឌ្ឍោ ហត្ថោ ឧបចារោ, ខុទ្ទកេ យតោ បហោតិ តតោ ទិយឌ្ឍោ ហត្ថោ, បាទេ ធោវិត្វា បវិសន្តស្ស បស្សាវត្ថាយ និក្ខមន្តស្ស ច យាវ ទ្វារេ និក្ខិត្តបាទធោវនបាសាណតោ បស្សាវដ្ឋានតោ ច មញ្ចបីឋំ, តាវ ទិយឌ្ឍហត្ថវិត្ថារោ មគ្គោ ឧបចារោ នាម។ តស្មិំ មញ្ចស្ស វា បីឋស្ស វា ឧបចារេ ឋិតស្ស វា ភិក្ខុនោ បវិសន្តស្ស វា និក្ខមន្តស្ស វា ឧបចារេ យោ អនុបខជ្ជ សេយ្យំ កប្បេតុកាមោ សេយ្យំ សន្ថរតិ វា សន្ថរាបេតិ វា, អាបត្តិ ទុក្កដស្ស។
121.Upacāreti ettha mañcapīṭhānaṃ tāva mahallake vihāre samantā diyaḍḍho hattho upacāro, khuddake yato pahoti tato diyaḍḍho hattho, pāde dhovitvā pavisantassa passāvatthāya nikkhamantassa ca yāva dvāre nikkhittapādadhovanapāsāṇato passāvaṭṭhānato ca mañcapīṭhaṃ, tāva diyaḍḍhahatthavitthāro maggo upacāro nāma. Tasmiṃ mañcassa vā pīṭhassa vā upacāre ṭhitassa vā bhikkhuno pavisantassa vā nikkhamantassa vā upacāre yo anupakhajja seyyaṃ kappetukāmo seyyaṃ santharati vā santharāpeti vā, āpatti dukkaṭassa.
អភិនិសីទតិ វា អភិនិបជ្ជតិ វាតិ ឯត្ថ អភិនិសីទនមត្តេន អភិនិបជ្ជនមត្តេនេវ វា បាចិត្តិយំ។ សចេ បន ទ្វេបិ ករោតិ, ទ្វេ បាចិត្តិយានិ។ ឧដ្ឋាយុដ្ឋាយ និសីទតោ វា និបជ្ជតោ វា បយោគេ បយោគេ បាចិត្តិយំ។
Abhinisīdativā abhinipajjati vāti ettha abhinisīdanamattena abhinipajjanamatteneva vā pācittiyaṃ. Sace pana dvepi karoti, dve pācittiyāni. Uṭṭhāyuṭṭhāya nisīdato vā nipajjato vā payoge payoge pācittiyaṃ.
១២២. ឧបចារំ ឋបេត្វា សេយ្យំ សន្ថរតិ វា សន្ថរាបេតិ វាតិ ឥមស្មិំ ឥតោ បរេ ច ‘‘វិហារស្ស ឧបចារេ’’តិអាទិកេ ទុក្កដវារេបិ យថា ឥធ អភិនិសីទនមត្តេ អភិនិបជ្ជនមត្តេ ឧភយករណេ បយោគភេទេ ច បាចិត្តិយប្បភេទោ វុត្តោ, ឯវំ ទុក្កដប្បភេទោ វេទិតព្ពោ។ ឯវរូបេន ហិ វិសភាគបុគ្គលេន ឯកវិហារេ វា ឯកបរិវេណេ វា វសន្តេន អត្ថោ នត្ថិ, តស្មា សព្ពត្ថេវស្ស និវាសោ វារិតោ។ អញ្ញស្ស បុគ្គលិកេតិ ឥធាបិ វិស្សាសិកស្ស បុគ្គលិកំ អត្តនោ បុគ្គលិកសទិសមេវ, តត្ថ អនាបត្តិ។
122.Upacāraṃ ṭhapetvā seyyaṃ santharati vā santharāpeti vāti imasmiṃ ito pare ca ‘‘vihārassa upacāre’’tiādike dukkaṭavārepi yathā idha abhinisīdanamatte abhinipajjanamatte ubhayakaraṇe payogabhede ca pācittiyappabhedo vutto, evaṃ dukkaṭappabhedo veditabbo. Evarūpena hi visabhāgapuggalena ekavihāre vā ekapariveṇe vā vasantena attho natthi, tasmā sabbatthevassa nivāso vārito. Aññassa puggaliketi idhāpi vissāsikassa puggalikaṃ attano puggalikasadisameva, tattha anāpatti.
១២៣. អាបទាសូតិ សចេ ពហិ វសន្តស្ស ជីវិតព្រហ្មចរិយន្តរាយោ ហោតិ, ឯវរូបាសុ អាបទាសុ យោ បវិសតិ, តស្សាបិ អនាបត្តិ។ សេសំ ឧត្តានមេវាតិ។ បឋមបារាជិកសមុដ្ឋានំ, កិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, អកុសលចិត្តំ, ទុក្ខវេទនន្តិ។
123.Āpadāsūti sace bahi vasantassa jīvitabrahmacariyantarāyo hoti, evarūpāsu āpadāsu yo pavisati, tassāpi anāpatti. Sesaṃ uttānamevāti. Paṭhamapārājikasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, dukkhavedananti.
អនុបខជ្ជសិក្ខាបទំ ឆដ្ឋំ។
Anupakhajjasikkhāpadaṃ chaṭṭhaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ២. ភូតគាមវគ្គោ • 2. Bhūtagāmavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៦. អនុបខជ្ជសិក្ខាបទវណ្ណនា • 6. Anupakhajjasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៦. អនុបខជ្ជសិក្ខាបទវណ្ណនា • 6. Anupakhajjasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៦. អនុបខជ្ជសិក្ខាបទវណ្ណនា • 6. Anupakhajjasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៦. អនុបខជ្ជសិក្ខាបទំ • 6. Anupakhajjasikkhāpadaṃ
