| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៧. និក្កឌ្ឍនសិក្ខាបទវណ្ណនា
7. Nikkaḍḍhanasikkhāpadavaṇṇanā
១២៦. សត្តមសិក្ខាបទេ – ឯកេន បយោគេន ពហុកេបិ ទ្វារេ អតិក្កាមេតីតិ យេ ចតុភូមកបញ្ចភូមកា បាសាទា ឆសត្តកោដ្ឋកានិ វា ចតុស្សាលានិ, តាទិសេសុ សេនាសនេសុ ហត្ថេសុ វា គីវាយ វា គហេត្វា អន្តរា អដ្ឋបេន្តោ ឯកេន បយោគេន អតិក្កាមេតិ, ឯកមេវ បាចិត្តិយំ។ ឋបេត្វា ឋបេត្វា នានាបយោគេហិ អតិក្កាមេន្តស្ស ទ្វារគណនាយ បាចិត្តិយានិ។ ហត្ថេន អនាមសិត្វា ‘‘និក្ខមា’’តិ វត្វា វាចាយ និក្កឌ្ឍន្តស្សាបិ ឯសេវ នយោ។
126. Sattamasikkhāpade – ekena payogena bahukepi dvāre atikkāmetīti ye catubhūmakapañcabhūmakā pāsādā chasattakoṭṭhakāni vā catussālāni, tādisesu senāsanesu hatthesu vā gīvāya vā gahetvā antarā aṭṭhapento ekena payogena atikkāmeti, ekameva pācittiyaṃ. Ṭhapetvā ṭhapetvā nānāpayogehi atikkāmentassa dvāragaṇanāya pācittiyāni. Hatthena anāmasitvā ‘‘nikkhamā’’ti vatvā vācāya nikkaḍḍhantassāpi eseva nayo.
អញ្ញំ អាណាបេតីតិ ឯត្ថ ‘‘ឥមំ និក្កឌ្ឍា’’តិ អាណត្តិមត្តេ ទុក្កដំ។ សចេ សោ សកិំ អាណត្តោ ពហុកេបិ ទ្វារេ អតិក្កាមេតិ, ឯកំ បាចិត្តិយំ។ សចេ បន ‘‘ឯត្តកានិ ទ្វារានិ និក្កឌ្ឍាហី’’តិ វា ‘‘យាវ មហាទ្វារំ តាវ និក្កឌ្ឍាហី’’តិ វា ឯវំ និយាមេត្វា អាណត្តោ ហោតិ, ទ្វារគណនាយ បាចិត្តិយានិ។
Aññaṃ āṇāpetīti ettha ‘‘imaṃ nikkaḍḍhā’’ti āṇattimatte dukkaṭaṃ. Sace so sakiṃ āṇatto bahukepi dvāre atikkāmeti, ekaṃ pācittiyaṃ. Sace pana ‘‘ettakāni dvārāni nikkaḍḍhāhī’’ti vā ‘‘yāva mahādvāraṃ tāva nikkaḍḍhāhī’’ti vā evaṃ niyāmetvā āṇatto hoti, dvāragaṇanāya pācittiyāni.
តស្ស បរិក្ខារន្តិ យំកិញ្ចិ តស្ស សន្តកំ បត្តចីវរបរិស្សាវនធមករណមញ្ចបីឋភិសិពិម្ពោហនាទិភេទំ, អន្តមសោ រជនឆល្លិម្បិ; យោ និក្កឌ្ឍតិ វា និក្កឌ្ឍាបេតិ វា; តស្ស វត្ថុគណនាយ ទុក្កដានិ ។ គាឡ្ហំ ពន្ធិត្វា ឋបិតេសុ បន ឯកាវ អាបត្តីតិ មហាបច្ចរិយំ វុត្តំ។
Tassaparikkhāranti yaṃkiñci tassa santakaṃ pattacīvaraparissāvanadhamakaraṇamañcapīṭhabhisibimbohanādibhedaṃ, antamaso rajanachallimpi; yo nikkaḍḍhati vā nikkaḍḍhāpeti vā; tassa vatthugaṇanāya dukkaṭāni . Gāḷhaṃ bandhitvā ṭhapitesu pana ekāva āpattīti mahāpaccariyaṃ vuttaṃ.
១២៧. អញ្ញស្ស បុគ្គលិកេតិ ឥធាបិ វិស្សាសិកបុគ្គលិកំ អត្តនោ បុគ្គលិកសទិសមេវ។ យថា ច ឥធ; ឯវំ សព្ពត្ថ។ យត្រ បន វិសេសោ ភវិស្សតិ, តត្រ វក្ខាម។
127.Aññassa puggaliketi idhāpi vissāsikapuggalikaṃ attano puggalikasadisameva. Yathā ca idha; evaṃ sabbattha. Yatra pana viseso bhavissati, tatra vakkhāma.
១២៨. អលជ្ជិំ និក្កឌ្ឍតិ វាតិអាទីសុ ភណ្ឌនការកកលហការកមេវ សកលសង្ឃារាមតោ និក្កឌ្ឍិតុំ លភតិ, សោ ហិ បក្ខំ លភិត្វា សង្ឃម្បិ ភិន្ទេយ្យ។ អលជ្ជីអាទយោ បន អត្តនោ វសនដ្ឋានតោយេវ និក្កឌ្ឍិតព្ពា, សកលសង្ឃារាមតោ និក្កឌ្ឍិតុំ ន វដ្ដតិ។ ឧម្មត្តកស្សាតិ សយំ ឧម្មត្តកស្ស អនាបត្តិ។ សេសំ ឧត្តានមេវាតិ។
128.Alajjiṃ nikkaḍḍhati vātiādīsu bhaṇḍanakārakakalahakārakameva sakalasaṅghārāmato nikkaḍḍhituṃ labhati, so hi pakkhaṃ labhitvā saṅghampi bhindeyya. Alajjīādayo pana attano vasanaṭṭhānatoyeva nikkaḍḍhitabbā, sakalasaṅghārāmato nikkaḍḍhituṃ na vaṭṭati. Ummattakassāti sayaṃ ummattakassa anāpatti. Sesaṃ uttānamevāti.
តិសមុដ្ឋានំ – កាយចិត្តតោ វាចាចិត្តតោ កាយវាចាចិត្តតោ ច សមុដ្ឋាតិ, កិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, វចីកម្មំ, អកុសលចិត្តំ, ទុក្ខវេទនន្តិ។
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
និក្កឌ្ឍនសិក្ខាបទំ សត្តមំ។
Nikkaḍḍhanasikkhāpadaṃ sattamaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ២. ភូតគាមវគ្គោ • 2. Bhūtagāmavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៧. និក្កឌ្ឍនសិក្ខាបទវណ្ណនា • 7. Nikkaḍḍhanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៧. និក្កឌ្ឍនសិក្ខាបទវណ្ណនា • 7. Nikkaḍḍhanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៧. និក្កឌ្ឍនសិក្ខាបទវណ្ណនា • 7. Nikkaḍḍhanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៧. និក្កឌ្ឍនសិក្ខាបទំ • 7. Nikkaḍḍhanasikkhāpadaṃ
