| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៦. អនុបខជ្ជសិក្ខាបទំ
6. Anupakhajjasikkhāpadaṃ
១១៩. ឆដ្ឋេ រូម្ភិត្វាតិ និវារេត្វា, អាវរណំ កត្វាតិ អត្ថោ។ វស្សគ្គេនាតិ វស្សគណនាយ។ អនុបខជ្ជាតិ ឯត្ថ ខទ ហិំសាយន្តិ ធាតុបាឋេសុ (សទ្ទនីតិធាតុមាលាយំ ១៥ ទការន្តធាតុ) វុត្តត្តា ខទសទ្ទោ ហិំសត្ថោ ហោតិ។ អនុសមីបំ ឧបគន្ត្វា ខទនំ ហិំ សនំ នាម អនុសមីបំ បវិសនមេវាតិ ទស្សេន្តោ អាហ ‘‘អនុបវិសិត្វា’’តិ។
119. Chaṭṭhe rūmbhitvāti nivāretvā, āvaraṇaṃ katvāti attho. Vassaggenāti vassagaṇanāya. Anupakhajjāti ettha khada hiṃsāyanti dhātupāṭhesu (saddanītidhātumālāyaṃ 15 dakārantadhātu) vuttattā khadasaddo hiṃsattho hoti. Anusamīpaṃ upagantvā khadanaṃ hiṃ sanaṃ nāma anusamīpaṃ pavisanamevāti dassento āha ‘‘anupavisitvā’’ti.
១២០. ‘‘ជាន’’ន្តិ ឯត្ថ ជាននាការំ ទស្សេតុំ វុត្តំ ‘‘អនុដ្ឋាបនីយោ អយ’’ន្តិ។ តេនេវាតិ ជាននហេតុនា ឯវ។ អស្សាតិ ‘‘ជាន’’ន្តិបទស្ស។ ហីតិ វិត្ថារជោតកោ។ សង្ឃោ បន ទេតីតិ សម្ពន្ធោ។ យស្សាតិ វុឌ្ឍាទីសុ អញ្ញតរស្ស។ ឯត្ថាតិ វុឌ្ឍគិលានាទីសុ។ គិលានស្សបិ ទេតីតិ យោជនា។ ‘‘គិលានោ’’តិ បទំ ‘‘ន បីឡេតព្ពោ, អនុកម្បិតព្ពោ’’តិបទទ្វយេ វុត្តកម្មំ។ ‘‘កាមញ្ចា’’តិ បទស្ស អនុគ្គហត្ថជោតកត្តា បនសទ្ទោ គរហត្ថជោតកោ។
120. ‘‘Jāna’’nti ettha jānanākāraṃ dassetuṃ vuttaṃ ‘‘anuṭṭhāpanīyo aya’’nti. Tenevāti jānanahetunā eva. Assāti ‘‘jāna’’ntipadassa. Hīti vitthārajotako. Saṅgho pana detīti sambandho. Yassāti vuḍḍhādīsu aññatarassa. Etthāti vuḍḍhagilānādīsu. Gilānassapi detīti yojanā. ‘‘Gilāno’’ti padaṃ ‘‘na pīḷetabbo, anukampitabbo’’tipadadvaye vuttakammaṃ. ‘‘Kāmañcā’’ti padassa anuggahatthajotakattā panasaddo garahatthajotako.
១២១. មញ្ចបីឋានំ ឧបចារោ នាមាតិ សម្ពន្ធោ។ យតោតិ យតោ កុតោចិ ឋានតោ។ យាវ មញ្ចបីឋំ អត្ថិ, តាវ ឧបចារោ នាមាតិ យោជនា។ តស្មិំ ឧបចារេ ឋិតស្ស ភិក្ខុនោ ឧបចារេតិ សម្ពន្ធោ។
121. Mañcapīṭhānaṃ upacāro nāmāti sambandho. Yatoti yato kutoci ṭhānato. Yāva mañcapīṭhaṃ atthi, tāva upacāro nāmāti yojanā. Tasmiṃ upacāre ṭhitassa bhikkhuno upacāreti sambandho.
‘‘អភិនិសីទតិ វា អភិនិបជ្ជតិ វា’’តិ ឯត្ថ វាសទ្ទស្ស អនិយមវិកប្បត្ថំ ទស្សេតុំ វុត្តំ ‘‘អភិនិសីទនមត្តេនា’’តិអាទិ។
‘‘Abhinisīdati vā abhinipajjati vā’’ti ettha vāsaddassa aniyamavikappatthaṃ dassetuṃ vuttaṃ ‘‘abhinisīdanamattenā’’tiādi.
១២២. ឥតោតិ វារតោ។ ឥធាតិ ឥមស្មិំ បាចិត្តិយវារេ។ យថា វុត្តោ, ឯវន្តិ សម្ពន្ធោ។ សព្ពត្ថេវាតិ សព្ពេសុ ឯវ វិហារបរិវេណេសុ។ អស្សាតិ វិសភាគបុគ្គលស្ស។ ឥធាបីតិ ឥមស្មិម្បិ សិក្ខាបទេ។ តត្ថាតិ វិស្សាសិកបុគ្គលេ។
122.Itoti vārato. Idhāti imasmiṃ pācittiyavāre. Yathā vutto, evanti sambandho. Sabbatthevāti sabbesu eva vihārapariveṇesu. Assāti visabhāgapuggalassa. Idhāpīti imasmimpi sikkhāpade. Tatthāti vissāsikapuggale.
១២៣. បាឡិយំ ‘‘អាបទាសូ’’តិបទំ ‘‘បវិសតី’’តិ អជ្ឈាហារបទេន សម្ពន្ធិតព្ពន្តិ អាហ ‘‘អាបទាសូតិអាទី’’តិ។ ឆដ្ឋំ។
123. Pāḷiyaṃ ‘‘āpadāsū’’tipadaṃ ‘‘pavisatī’’ti ajjhāhārapadena sambandhitabbanti āha ‘‘āpadāsūtiādī’’ti. Chaṭṭhaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ២. ភូតគាមវគ្គោ • 2. Bhūtagāmavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៦. អនុបខជ្ជសិក្ខាបទវណ្ណនា • 6. Anupakhajjasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៦. អនុបខជ្ជសិក្ខាបទវណ្ណនា • 6. Anupakhajjasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៦. អនុបខជ្ជសិក្ខាបទវណ្ណនា • 6. Anupakhajjasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៦. អនុបខជ្ជសិក្ខាបទវណ្ណនា • 6. Anupakhajjasikkhāpadavaṇṇanā
