| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
អនាបត្តិបន្នរសកាទិកថា
Anāpattipannarasakādikathā
១៧២. អនាបត្តិបន្នរសកេ – តេ ន ជានិំសូតិ សីមំ ឱក្កន្តាតិ វា ឱក្កមន្តីតិ វាតិ ន ជានិំសុ។ អថញ្ញេ អាវាសិកា ភិក្ខូ អាគច្ឆន្តីតិ គាមំ វា អរញ្ញំ វា កេនចិ ករណីយេន គន្ត្វា តេសំ និសិន្នដ្ឋានំ អាគច្ឆន្តិ។ វគ្គា សមគ្គសញ្ញិនោតិ តេសំ សីមំ ឱក្កន្តត្តា វគ្គា; សីមំ ឱក្កន្តភាវស្ស អជាននតោ សមគ្គសញ្ញិនោ។
172. Anāpattipannarasake – te na jāniṃsūti sīmaṃ okkantāti vā okkamantīti vāti na jāniṃsu. Athaññe āvāsikā bhikkhū āgacchantīti gāmaṃ vā araññaṃ vā kenaci karaṇīyena gantvā tesaṃ nisinnaṭṭhānaṃ āgacchanti. Vaggā samaggasaññinoti tesaṃ sīmaṃ okkantattā vaggā; sīmaṃ okkantabhāvassa ajānanato samaggasaññino.
១៧៣. វគ្គាវគ្គសញ្ញិបន្នរសកេ – តេ ជានន្តីតិ បព្ពតេ វា ថលេ វា ឋិតា សីមំ ឱក្កន្តេ វា ឱក្កមន្តេ វា បស្សន្តិ។ វេមតិកបន្នរសកំ ឧត្តានមេវ។
173. Vaggāvaggasaññipannarasake – te jānantīti pabbate vā thale vā ṭhitā sīmaṃ okkante vā okkamante vā passanti. Vematikapannarasakaṃ uttānameva.
១៧៥. កុក្កុច្ចបកតបន្នរសកេ – យថា ឥច្ឆាយ អភិភូតោ ‘‘ឥច្ឆាបកតោ’’តិ វុច្ចតិ, ឯវំ បុព្ពភាគេ សន្និដ្ឋានំ កត្វាបិ ករណក្ខណេ អកប្បិយេ អកប្បិយសញ្ញិតាសង្ខាតេន កុក្កុច្ចេន អភិភូតា ‘‘កុក្កុច្ចបកតា’’តិ វេទិតព្ពា។
175. Kukkuccapakatapannarasake – yathā icchāya abhibhūto ‘‘icchāpakato’’ti vuccati, evaṃ pubbabhāge sanniṭṭhānaṃ katvāpi karaṇakkhaṇe akappiye akappiyasaññitāsaṅkhātena kukkuccena abhibhūtā ‘‘kukkuccapakatā’’ti veditabbā.
១៧៦. ភេទបុរេក្ខារបន្នរសកេ – អកុសលពលវតាយ ថុល្លច្ចយំ វុត្តំ។
176. Bhedapurekkhārapannarasake – akusalabalavatāya thullaccayaṃ vuttaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
៩៥. អនាបត្តិបន្នរសកំ • 95. Anāpattipannarasakaṃ
៩៦. វគ្គាវគ្គសញ្ញីបន្នរសកំ • 96. Vaggāvaggasaññīpannarasakaṃ
៩៨. កុក្កុច្ចបកតបន្នរសកំ • 98. Kukkuccapakatapannarasakaṃ
៩៩. ភេទបុរេក្ខារបន្នរសកំ • 99. Bhedapurekkhārapannarasakaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / អនាបត្តិបន្នរសកាទិកថាវណ្ណនា • Anāpattipannarasakādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អនាបត្តិបន្នរសកាទិកថាវណ្ណនា • Anāpattipannarasakādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៩៥. អនាបត្តិបន្នរសកាទិកថា • 95. Anāpattipannarasakādikathā
