| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
យាគុមធុគោឡកាទិកថាវណ្ណនា
Yāgumadhugoḷakādikathāvaṇṇanā
២៨២. មធុគោឡកន្តិ សក្ករាទិសំយុត្តបូវំ។ អាយុំ ទេតីតិ អាយុទានំ ទេតិ។ វណ្ណន្តិ សរីរវណ្ណំ។ សុខន្តិ កាយិកចេតសិកសុខំ។ ពលន្តិ សរីរថាមំ។ បដិភានន្តិ យុត្តមុត្តបដិភានំ។ វាតំ អនុលោមេតីតិ វាតំ អនុលោមេត្វា ហរតិ។ វត្ថិំ សោធេតីតិ ធមនិយោ សុទ្ធំ ករោតិ។ អាមាវសេសំ បាចេតីតិ សចេ អាមាវសេសកំ ហោតិ, តំ បាចេតិ។ អនុប្បវេច្ឆតីតិ ទេតិ។ វាតញ្ច ព្យបនេតីតិ សម្ពន្ធិតព្ពំ។
282.Madhugoḷakanti sakkarādisaṃyuttapūvaṃ. Āyuṃ detīti āyudānaṃ deti. Vaṇṇanti sarīravaṇṇaṃ. Sukhanti kāyikacetasikasukhaṃ. Balanti sarīrathāmaṃ. Paṭibhānanti yuttamuttapaṭibhānaṃ. Vātaṃ anulometīti vātaṃ anulometvā harati. Vatthiṃ sodhetīti dhamaniyo suddhaṃ karoti. Āmāvasesaṃ pācetīti sace āmāvasesakaṃ hoti, taṃ pāceti. Anuppavecchatīti deti. Vātañca byapanetīti sambandhitabbaṃ.
២៨៣. ននុ ច ‘‘បរម្បរភោជនេន ការេតព្ពោ’’តិ កស្មា វុត្តំ។ បរម្បរភោជនញ្ហិ បញ្ចន្នំ ភោជនានំ អញ្ញតរេន និមន្តិតស្ស តំ ឋបេត្វា អញ្ញំ បញ្ចន្នំ ភោជនានំ អញ្ញតរំ ភុញ្ជន្តស្ស ហោតិ, ឥមេ ច ភិក្ខូ ភោជ្ជយាគុំ បរិភុញ្ជិំសុ, បញ្ចសុ ភោជនេសុ អញ្ញតរន្តិ អាហ ‘‘ភោជ្ជយាគុយា ហិ បវារណា ហោតី’’តិ។ យស្មា បញ្ចន្នំ ភោជនានំ អញ្ញតរំ បដិក្ខិបន្តស្ស វុត្តា បវារណា ភោជ្ជយាគុំ បដិក្ខិបន្តស្សបិ ហោតិយេវ, តស្មា ភោជ្ជយាគុបិ ឱទនគតិកាយេវាតិ អធិប្បាយោ។
283. Nanu ca ‘‘paramparabhojanena kāretabbo’’ti kasmā vuttaṃ. Paramparabhojanañhi pañcannaṃ bhojanānaṃ aññatarena nimantitassa taṃ ṭhapetvā aññaṃ pañcannaṃ bhojanānaṃ aññataraṃ bhuñjantassa hoti, ime ca bhikkhū bhojjayāguṃ paribhuñjiṃsu, pañcasu bhojanesu aññataranti āha ‘‘bhojjayāguyā hi pavāraṇā hotī’’ti. Yasmā pañcannaṃ bhojanānaṃ aññataraṃ paṭikkhipantassa vuttā pavāraṇā bhojjayāguṃ paṭikkhipantassapi hotiyeva, tasmā bhojjayāgupi odanagatikāyevāti adhippāyo.
២៨៤. សុខុមោជំ បក្ខិបិំសូតិ ‘‘ភគវា បរិភុញ្ជិស្សតី’’តិ មញ្ញមានា បក្ខិបិំសុ។
284.Sukhumojaṃpakkhipiṃsūti ‘‘bhagavā paribhuñjissatī’’ti maññamānā pakkhipiṃsu.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
១៧០. យាគុមធុគោឡកានុជាននា • 170. Yāgumadhugoḷakānujānanā
១៧១. តរុណបសន្នមហាមត្តវត្ថុ • 171. Taruṇapasannamahāmattavatthu
១៧២. ពេលដ្ឋកច្ចានវត្ថុ • 172. Belaṭṭhakaccānavatthu
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / យាគុមធុគោឡកាទិកថា • Yāgumadhugoḷakādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / យាគុមធុគោឡកាទិកថាវណ្ណនា • Yāgumadhugoḷakādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / យាគុមធុគោឡកាទិកថាវណ្ណនា • Yāgumadhugoḷakādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១៧០. យាគុមធុគោឡកាទិកថា • 170. Yāgumadhugoḷakādikathā
