| Library / Tipiṭaka / തിപിടക • Tipiṭaka / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) |
൯. വണിജ്ജസുത്തവണ്ണനാ
9. Vaṇijjasuttavaṇṇanā
൭൯. നവമേ താദിസാ വാതി തംസദിസാവ തംസരിക്ഖകാവ. ഛേദഗാമിനീ ഹോതീതി ഛേദം ഗച്ഛതി. യം പത്ഥിതം, തം സബ്ബം നസ്സതീതി അത്ഥോ. ന യഥാധിപ്പായാ ഹോതീതി യഥാജ്ഝാസയാ ന ഹോതി. പരാധിപ്പായാ ഹോതീതി പരജ്ഝാസയാ അജ്ഝാസയതോ അധികതരഫലാ ഹോതി. സമണം വാ ബ്രാഹ്മണം വാതി ഏത്ഥ സമിതപാപബാഹിതപാപതാഹി സമണബ്രാഹ്മണതാ വേദിതബ്ബാ. വദതു, ഭന്തേ, പച്ചയേനാതി, ഭന്തേ, ചതുബ്ബിധേന ചീവരാദിനാ പച്ചയേന വദേയ്യാസീതി ഏവം പവാരേതി നിമന്തേതി. യേന പവാരേതീതി പരിച്ഛിന്ദിത്വാ യത്തകേന പവാരേതി. തം ന ദേതീതി തം സബ്ബസോവ ന ദേതി. ന യഥാധിപ്പായം ദേതീതി യഥാ തസ്സ അജ്ഝാസയോ, ഏവം ദാതും ന സക്കോതി, ഹാപേത്വാ അപ്പകം ദേതി. യഥാധിപ്പായം ദേതീതി യത്തകം സോ ഇച്ഛതി, തത്തകമേവ ദേതി. പരാധിപ്പായം ദേതീതി അപ്പകം പവാരേത്വാ അവത്ഥരിത്വാ ബഹും ദേതി.
79. Navame tādisā vāti taṃsadisāva taṃsarikkhakāva. Chedagāminī hotīti chedaṃ gacchati. Yaṃ patthitaṃ, taṃ sabbaṃ nassatīti attho. Na yathādhippāyā hotīti yathājjhāsayā na hoti. Parādhippāyā hotīti parajjhāsayā ajjhāsayato adhikataraphalā hoti. Samaṇaṃ vā brāhmaṇaṃ vāti ettha samitapāpabāhitapāpatāhi samaṇabrāhmaṇatā veditabbā. Vadatu, bhante, paccayenāti, bhante, catubbidhena cīvarādinā paccayena vadeyyāsīti evaṃ pavāreti nimanteti. Yena pavāretīti paricchinditvā yattakena pavāreti. Taṃ na detīti taṃ sabbasova na deti. Na yathādhippāyaṃ detīti yathā tassa ajjhāsayo, evaṃ dātuṃ na sakkoti, hāpetvā appakaṃ deti. Yathādhippāyaṃ detīti yattakaṃ so icchati, tattakameva deti. Parādhippāyaṃ detīti appakaṃ pavāretvā avattharitvā bahuṃ deti.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൯. വണിജ്ജസുത്തം • 9. Vaṇijjasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൯-൧൦. വണിജ്ജസുത്താദിവണ്ണനാ • 9-10. Vaṇijjasuttādivaṇṇanā
