| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. ဝာလသုတ္တဝဏ္ဏနာ
5. Vālasuttavaṇṇanā
၁၁၁၅. ဥပာသနန္တိ အာစရိယဥပာသနံ, အာစရိယံ အန္တေဝာသိနာ ဝာ ဒိဝသေ ဒိဝသေ သိက္ခနဝသေန ဥပာသိတဗ္ဗတော ဥပာသနန္တိ လဒ္ဓနာမံ ကဏ္ဍခိပနသိပ္ပံ။ ကဏ္ဍံ အတိက္ကမန္တေတိ သရံ ခိပန္တေ။ ပောင္ခာနုပောင္ခန္တိ ပောင္ခသဒ္ဒတ္ထံ ပာကဋံ ကတ္ဝာ ဒသ္သေတုံ ‘‘ဧကံ ကဏ္ဍံ ခိပိတ္ဝာ’’တိအာဒိ ဝုတ္တံ။ အပရံ အနုပောင္ခန္တိ ဧတ္ထ အပရန္တိ တတိယကဏ္ဍံ။ အနုပောင္ခံ နာမ ဣဒန္တိ ဒသ္သေတုံ ‘‘အနုပောင္ခံ နာမ ဒုတိယသ္သ ပောင္ခ’’န္တိ ဝုတ္တံ။ တဉ္ဟိ တတိယေန သရေန ဝိဇ္ဈီယတိ။ ပုန အပရံ တသ္သ ပောင္ခန္တိ ဣဒံ ပန အပရာပရံ အဝိရဇ္ဈနံ ဒသ္သေတုံ ဝုတ္တံ။ ဒုရဘိသမ္ဘဝတရန္တိ အဘိဘဝိတုံ အသက္ကုဏေယ္ယတရံ။ ဝာလန္တိ ကေသံ။ သတ္တဓာ ဘိန္ဒိတ္ဝာတိ သတ္တက္ခတ္တုံ ဝိဖာလေတ္ဝာ။ တသ္သ ဧကံ ဘေဒန္တိ တသ္သ ကေသသ္သ ဧကံ အံသုသင္ခာတံ ဘေဒံ ဂဟေတ္ဝာ။ ဝာတိင္ဂဏမဇ္ဈေ ဗန္ဓိတ္ဝာတိ ဝာတိင္ဂဏဖလသ္သ မဇ္ဈဋ္ဌာနေ ဗန္ဓိတ္ဝာ။ အပရံ ဘေဒန္တိ အပရံ ကေသသ္သ အံသုသင္ခာတံ ဘေဒံ။ အဂ္ဂကောဋိယံ ဗန္ဓိတ္ဝာတိ ယထာ တသ္သ ဝာလဘေဒသ္သ ဦကာမတ္တံ လိခာမတ္တံ ဝာ ကဏ္ဍသ္သ အဂ္ဂကောဋိံ အဓိကံ ဟုတ္ဝာ တိဋ္ဌတိ, ဧဝံ ဗန္ဓိတ္ဝာ။ ဥသဘမတ္တေတိ ဝီသတိယဋ္ဌိမတ္တေ ဌာနေ ဌိတော။ ကဏ္ဍဗဒ္ဓာယ ကောဋိယာတိ ကဏ္ဍဗဒ္ဓာယ ဝာလသ္သ ကောဋိယာ ဝာတိင္ဂဏဗန္ဓနဝာလသ္သ ကောဋိံ ပဋိဝိဇ္ဈေယ္ယ။
1115.Upāsananti ācariyaupāsanaṃ, ācariyaṃ antevāsinā vā divase divase sikkhanavasena upāsitabbato upāsananti laddhanāmaṃ kaṇḍakhipanasippaṃ. Kaṇḍaṃ atikkamanteti saraṃ khipante. Poṅkhānupoṅkhanti poṅkhasaddatthaṃ pākaṭaṃ katvā dassetuṃ ‘‘ekaṃ kaṇḍaṃ khipitvā’’tiādi vuttaṃ. Aparaṃ anupoṅkhanti ettha aparanti tatiyakaṇḍaṃ. Anupoṅkhaṃ nāma idanti dassetuṃ ‘‘anupoṅkhaṃ nāma dutiyassa poṅkha’’nti vuttaṃ. Tañhi tatiyena sarena vijjhīyati. Puna aparaṃ tassa poṅkhanti idaṃ pana aparāparaṃ avirajjhanaṃ dassetuṃ vuttaṃ. Durabhisambhavataranti abhibhavituṃ asakkuṇeyyataraṃ. Vālanti kesaṃ. Sattadhā bhinditvāti sattakkhattuṃ viphāletvā. Tassa ekaṃ bhedanti tassa kesassa ekaṃ aṃsusaṅkhātaṃ bhedaṃ gahetvā. Vātiṅgaṇamajjhe bandhitvāti vātiṅgaṇaphalassa majjhaṭṭhāne bandhitvā. Aparaṃ bhedanti aparaṃ kesassa aṃsusaṅkhātaṃ bhedaṃ. Aggakoṭiyaṃ bandhitvāti yathā tassa vālabhedassa ūkāmattaṃ likhāmattaṃ vā kaṇḍassa aggakoṭiṃ adhikaṃ hutvā tiṭṭhati, evaṃ bandhitvā. Usabhamatteti vīsatiyaṭṭhimatte ṭhāne ṭhito. Kaṇḍabaddhāya koṭiyāti kaṇḍabaddhāya vālassa koṭiyā vātiṅgaṇabandhanavālassa koṭiṃ paṭivijjheyya.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. ဝာလသုတ္တံ • 5. Vālasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. ဝာလသုတ္တဝဏ္ဏနာ • 5. Vālasuttavaṇṇanā
