| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
២. ឧយ្យោជនសិក្ខាបទវណ្ណនា
2. Uyyojanasikkhāpadavaṇṇanā
២៧៤. ទុតិយសិក្ខាបទេ – បដិក្កមនេបីតិ អាសនសាលាយម្បិ។ ភត្តវិស្សគ្គន្តិ ភត្តកិច្ចំ។ ន សម្ភាវេសីតិ ន បាបុណិ។
274. Dutiyasikkhāpade – paṭikkamanepīti āsanasālāyampi. Bhattavissagganti bhattakiccaṃ. Na sambhāvesīti na pāpuṇi.
២៧៦. អនាចារន្តិ វុត្តាវសេសំ កាយវចីទ្វារវីតិក្កមំ។ ទស្សនូបចារំ វា សវនូបចារំ វា វិជហន្តស្សាតិ ឯត្ថ យទិ ឋិតោ វា និសិន្នោ វា ឧយ្យោជេតិ; យោ ឧយ្យោជិតោ, សោ វិជហតិ, តស្ស ច អាបត្តិ នាម នត្ថិ។ តស្មិំ បន វិជហន្តេបិ អត្ថតោ ឥតរេន វិជហិតមេវ ហោតិ។ តស្មា យោ ឧយ្យោជេតិ, តស្សេវាយំ អាបត្តិ។ តត្ថ សចេ ឧបចារព្ភន្តរេ ឯកោ បាទោ ហោតិ, ទុក្កដំ។ សីមាតិក្កមេ បាចិត្តិយំ។ ឯត្ថ ច ទស្សនូបចារស្ស អព្ភោកាសេ ទ្វាទសហត្ថប្បមាណំ, តថា សវនូបចារស្ស។ សចេ បន អន្តរា កុដ្ដទ្វារបាការាទយោ ហោន្តិ, តេហិ អន្តរិតភាវោ ទស្សនូបចារាតិក្កមោ, តស្ស វសេន អាបត្តិ វេទិតព្ពា។ ន អញ្ញោ កោចិ បច្ចយោ ហោតីតិ ឋបេត្វា វុត្តប្បការមនាចារំ អញ្ញំ កិញ្ចិ ការណំ ន ហោតិ។
276.Anācāranti vuttāvasesaṃ kāyavacīdvāravītikkamaṃ. Dassanūpacāraṃ vā savanūpacāraṃ vāvijahantassāti ettha yadi ṭhito vā nisinno vā uyyojeti; yo uyyojito, so vijahati, tassa ca āpatti nāma natthi. Tasmiṃ pana vijahantepi atthato itarena vijahitameva hoti. Tasmā yo uyyojeti, tassevāyaṃ āpatti. Tattha sace upacārabbhantare eko pādo hoti, dukkaṭaṃ. Sīmātikkame pācittiyaṃ. Ettha ca dassanūpacārassa abbhokāse dvādasahatthappamāṇaṃ, tathā savanūpacārassa. Sace pana antarā kuṭṭadvārapākārādayo honti, tehi antaritabhāvo dassanūpacārātikkamo, tassa vasena āpatti veditabbā. Na añño koci paccayo hotīti ṭhapetvā vuttappakāramanācāraṃ aññaṃ kiñci kāraṇaṃ na hoti.
២៧៧. កលិសាសនំ អារោបេតីតិ ‘‘កលី’’តិ កោធោ; តស្ស សាសនំ អារោបេតិ; កោធស្ស អាណំ អារោបេតិ; កោធវសេន ឋាននិសជ្ជាទីសុ ទោសំ ទស្សេត្វា ‘‘បស្សថ ភោ ឥមស្ស ឋានំ, និសជ្ជំ អាលោកិតំ វិលោកិតំ ខាណុកោ វិយ តិដ្ឋតិ, សុនខោ វិយ និសីទតិ, មក្កដោ វិយ ឥតោ ចិតោ ច វិលោកេតី’’តិ ឯវំ អមនាបវចនំ វទតិ ‘‘អប្បេវ នាម ឥមិនាបិ ឧព្ពាឡ្ហោ បក្កមេយ្យា’’តិ។ សេសំ ឧត្តានមេវ។
277.Kalisāsanaṃ āropetīti ‘‘kalī’’ti kodho; tassa sāsanaṃ āropeti; kodhassa āṇaṃ āropeti; kodhavasena ṭhānanisajjādīsu dosaṃ dassetvā ‘‘passatha bho imassa ṭhānaṃ, nisajjaṃ ālokitaṃ vilokitaṃ khāṇuko viya tiṭṭhati, sunakho viya nisīdati, makkaṭo viya ito cito ca viloketī’’ti evaṃ amanāpavacanaṃ vadati ‘‘appeva nāma imināpi ubbāḷho pakkameyyā’’ti. Sesaṃ uttānameva.
តិសមុដ្ឋានំ – កាយចិត្តតោ វាចាចិត្តតោ កាយវាចាចិត្តតោ ច សមុដ្ឋាតិ, កិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, វចីកម្មំ, អកុសលចិត្តំ, តិវេទនន្តិ។
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
ឧយ្យោជនសិក្ខាបទំ ទុតិយំ។
Uyyojanasikkhāpadaṃ dutiyaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៥. អចេលកវគ្គោ • 5. Acelakavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ២. ឧយ្យោជនសិក្ខាបទវណ្ណនា • 2. Uyyojanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ២. ឧយ្យោជនសិក្ខាបទវណ្ណនា • 2. Uyyojanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ២. ឧយ្យោជនសិក្ខាបទវណ្ណនា • 2. Uyyojanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២. ឧយ្យោជនសិក្ខាបទំ • 2. Uyyojanasikkhāpadaṃ
