| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៣. សភោជនសិក្ខាបទវណ្ណនា
3. Sabhojanasikkhāpadavaṇṇanā
២៧៩. តតិយសិក្ខាបទេ – សយនិឃរេតិ សយនិយឃរេ។ យតោ អយ្យស្ស ភិក្ខា ទិន្នាតិ យស្មា ភិក្ខា ទិន្នា, យំ អាគតេន លទ្ធព្ពំ តំ វោ លទ្ធំ; គច្ឆថាតិ អធិប្បាយោ។ បរិយុដ្ឋិតោតិ រាគបរិយុដ្ឋិតោ; មេថុនាធិប្បាយោតិ អត្ថោ។
279. Tatiyasikkhāpade – sayanighareti sayaniyaghare. Yato ayyassa bhikkhā dinnāti yasmā bhikkhā dinnā, yaṃ āgatena laddhabbaṃ taṃ vo laddhaṃ; gacchathāti adhippāyo. Pariyuṭṭhitoti rāgapariyuṭṭhito; methunādhippāyoti attho.
២៨០. សហ ឧភោហិ ជនេហីតិ សភោជនំ; តស្មិំ សភោជនេ។ អថ វា សភោជនេតិ សភោគេ។ រាគបរិយុដ្ឋិតស្ស ហិ បុរិសស្ស ឥត្ថី ភោគោ ឥត្ថិយា ច បុរិសោ។ តេនេវស្ស បទភាជនេ – ‘‘ឥត្ថី ចេវ ហោតិ បុរិសោ ចា’’តិអាទិ វុត្តំ។ មហល្លកេ ឃរេតិ មហល្លកេ សយនិឃរេ។ បិដ្ឋសង្ឃាដស្ស ហត្ថបាសំ វិជហិត្វាតិ តស្ស សយនិឃរេ គព្ភស្ស យោ បិដ្ឋសង្ឃាដោ, តស្ស ហត្ថបាសំ វិជហិត្វា; អន្តោសយនស្ស អាសន្នេ ឋានេ និសីទតីតិ អត្ថោ។ ឦទិសញ្ច សយនិឃរំ មហាចតុស្សាលាទីសុ ហោតិ។ បិដ្ឋិវំសំ អតិក្កមិត្វាតិ ឥមិនា មជ្ឈាតិក្កមំ ទស្សេតិ។ តស្មា យថា វា តថា វា កតស្ស ខុទ្ទកស្ស សយនិឃរស្ស មជ្ឈាតិក្កមេ អាបត្តិ វេទិតព្ពា។ សេសមេត្ថ ឧត្តានមេវ។
280. Saha ubhohi janehīti sabhojanaṃ; tasmiṃ sabhojane. Atha vā sabhojaneti sabhoge. Rāgapariyuṭṭhitassa hi purisassa itthī bhogo itthiyā ca puriso. Tenevassa padabhājane – ‘‘itthī ceva hoti puriso cā’’tiādi vuttaṃ. Mahallake ghareti mahallake sayanighare. Piṭṭhasaṅghāṭassa hatthapāsaṃ vijahitvāti tassa sayanighare gabbhassa yo piṭṭhasaṅghāṭo, tassa hatthapāsaṃ vijahitvā; antosayanassa āsanne ṭhāne nisīdatīti attho. Īdisañca sayanigharaṃ mahācatussālādīsu hoti. Piṭṭhivaṃsaṃ atikkamitvāti iminā majjhātikkamaṃ dasseti. Tasmā yathā vā tathā vā katassa khuddakassa sayanigharassa majjhātikkame āpatti veditabbā. Sesamettha uttānameva.
បឋមបារាជិកសមុដ្ឋានំ – កិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, អកុសលចិត្តំ, ទ្វិវេទនន្តិ។
Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, dvivedananti.
សភោជនសិក្ខាបទំ តតិយំ។
Sabhojanasikkhāpadaṃ tatiyaṃ.
២៨៤. ចតុត្ថបញ្ចមសិក្ខាបទេសុ យំ វត្តព្ពំ សិយា, តំ សព្ពំ អនិយតទ្វយេ វុត្តនយមេវ។ យថា ច សភោជនសិក្ខាបទំ , ឯវមេតានិបិ បឋមបារាជិកសមុដ្ឋានានេវាតិ។
284. Catutthapañcamasikkhāpadesu yaṃ vattabbaṃ siyā, taṃ sabbaṃ aniyatadvaye vuttanayameva. Yathā ca sabhojanasikkhāpadaṃ , evametānipi paṭhamapārājikasamuṭṭhānānevāti.
រហោបដិច្ឆន្នសិក្ខាបទំ ចតុត្ថំ, រហោនិសជ្ជសិក្ខាបទំ បញ្ចមំ។
Rahopaṭicchannasikkhāpadaṃ catutthaṃ, rahonisajjasikkhāpadaṃ pañcamaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៥. អចេលកវគ្គោ • 5. Acelakavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៣. សភោជនសិក្ខាបទវណ្ណនា • 3. Sabhojanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā
៣. សភោជនសិក្ខាបទវណ្ណនា • 3. Sabhojanasikkhāpadavaṇṇanā
៤. រហោបដិច្ឆន្នសិក្ខាបទវណ្ណនា • 4. Rahopaṭicchannasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៣. សភោជនសិក្ខាបទវណ្ណនា • 3. Sabhojanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៣. សភោជនសិក្ខាបទំ • 3. Sabhojanasikkhāpadaṃ
