| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. ဥပယဝဂ္ဂော
6. Upayavaggo
၁. ဥပယသုတ္တဝဏ္ဏနာ
1. Upayasuttavaṇṇanā
၅၃. ဥပေတီတိ ဥပယော။ ကထမုပေတိ? တဏ္ဟာမာနာဒိဝသေနာတိ အာဟ ‘‘တဏ္ဟာမာနဒိဋ္ဌိဝသေနာ’’တိ။ ကထမိဒံ လဗ္ဘတီတိ? ‘‘အဝိမုတ္တော’’တိ ဝစနတော။ တဏ္ဟာဒိဋ္ဌိဝသေန ဟိ ဗဒ္ဓော, ကိံ ဥပေတီတိ အာဟ ‘‘ပဉ္စက္ခန္ဓေ’’တိ တဗ္ဗိနိမုတ္တသ္သ တထာ ဥပေတသ္သ အဘာဝတော။ ကော ပနုပေတီတိ? တံသမင္ဂီပုဂ္ဂလော။ တဏ္ဟာဒိဋ္ဌိဝသေန ဥပဂမသ္သ ဝုတ္တတ္တာ ဝိညာဏန္တိ အကုသလကမ္မဝိညာဏမေဝာတိ ဝဒန္တိ။ ဇဝာပေတ္ဝာတိ ဂဟိတဇဝံ ကတ္ဝာ။ ယထာ ပဋိသန္ဓိံ အာကဍ္ဎိတုံ သမတ္ထံ, ဧဝံ ကတ္ဝာ။ တေနာဟ ‘‘ပဋိသန္ဓီ’’တိအာဒိ။ အဂ္ဂဟဏေ ကာရဏံ ဝုတ္တမေဝ ‘‘ဩကံ ပဟာယ အနိကေတသာရီ’’တိ ဂာထာယ ဝိသ္သဇ္ဇနေ။ ကမ္မနိမိတ္တာဒိဝသေန ပဋိသန္ဓိယာ ပစ္စယဘူတံ အာရမ္မဏံ ပဋိသန္ဓိဇနကသ္သ ကမ္မသ္သ ဝသေန ဝောစ္ဆိဇ္ဇတိ။ ပတိဋ္ဌာ န ဟောတိ သရာဂကာလေ ဝိယ အနုပဋ္ဌာနတော ။ အပ္ပတိဋ္ဌိတံ ဝိညာဏံ ဝုတ္တပ္ပကာရေန။ အနဘိသင္ခရိတ္ဝာတိ အနုပ္ပာဒေတ္ဝာ ပစ္စယဃာတေန။
53. Upetīti upayo. Kathamupeti? Taṇhāmānādivasenāti āha ‘‘taṇhāmānadiṭṭhivasenā’’ti. Kathamidaṃ labbhatīti? ‘‘Avimutto’’ti vacanato. Taṇhādiṭṭhivasena hi baddho, kiṃ upetīti āha ‘‘pañcakkhandhe’’ti tabbinimuttassa tathā upetassa abhāvato. Ko panupetīti? Taṃsamaṅgīpuggalo. Taṇhādiṭṭhivasena upagamassa vuttattā viññāṇanti akusalakammaviññāṇamevāti vadanti. Javāpetvāti gahitajavaṃ katvā. Yathā paṭisandhiṃ ākaḍḍhituṃ samatthaṃ, evaṃ katvā. Tenāha ‘‘paṭisandhī’’tiādi. Aggahaṇe kāraṇaṃ vuttameva ‘‘okaṃ pahāya aniketasārī’’ti gāthāya vissajjane. Kammanimittādivasena paṭisandhiyā paccayabhūtaṃ ārammaṇaṃ paṭisandhijanakassa kammassa vasena vocchijjati. Patiṭṭhā na hoti sarāgakāle viya anupaṭṭhānato . Appatiṭṭhitaṃ viññāṇaṃ vuttappakārena. Anabhisaṅkharitvāti anuppādetvā paccayaghātena.
ဥပယသုတ္တဝဏ္ဏနာ နိဋ္ဌိတာ။
Upayasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ဥပယသုတ္တံ • 1. Upayasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ဥပယသုတ္တဝဏ္ဏနာ • 1. Upayasuttavaṇṇanā
