| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២២៣. ឧបនន្ទសក្យបុត្តវត្ថុ
223. Upanandasakyaputtavatthu
៣៦៤. តេន ខោ បន សមយេន អាយស្មា ឧបនន្ទោ សក្យបុត្តោ សាវត្ថិយំ វស្សំវុដ្ឋោ អញ្ញតរំ គាមកាវាសំ អគមាសិ។ តត្ថ ច ភិក្ខូ ចីវរំ ភាជេតុកាមា សន្និបតិំសុ។ តេ ឯវមាហំសុ – ‘‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’’ន្តិ? ‘‘អាមាវុសោ, សាទិយិស្សាមី’’តិ។ តតោ ចីវរភាគំ គហេត្វា អញ្ញំ អាវាសំ អគមាសិ។ តត្ថបិ ភិក្ខូ ចីវរំ ភាជេតុកាមា សន្និបតិំសុ។ តេបិ ឯវមាហំសុ – ‘‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’’ន្តិ? ‘‘អាមាវុសោ, សាទិយិស្សាមី’’តិ។ តតោបិ ចីវរភាគំ គហេត្វា អញ្ញំ អាវាសំ អគមាសិ។ តត្ថបិ ភិក្ខូ ចីវរំ ភាជេតុកាមា សន្និបតិំសុ។ តេបិ ឯវមាហំសុ – ‘‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’’ន្តិ? ‘‘អាមាវុសោ, សាទិយិស្សាមី’’តិ។ តតោបិ ចីវរភាគំ គហេត្វា មហន្តំ ចីវរភណ្ឌិកំ អាទាយ បុនទេវ សាវត្ថិំ បច្ចាគញ្ឆិ។ ភិក្ខូ ឯវមាហំសុ – ‘‘មហាបុញ្ញោសិ ត្វំ , អាវុសោ ឧបនន្ទ, ពហុំ តេ ចីវរំ ឧប្បន្ន’’ន្តិ។ ‘‘កុតោ មេ , អាវុសោ, បុញ្ញំ? ឥធាហំ, អាវុសោ, សាវត្ថិយំ វស្សំវុដ្ឋោ អញ្ញតរំ គាមកាវាសំ អគមាសិំ។ តត្ថ ភិក្ខូ ចីវរំ ភាជេតុកាមា សន្និបតិំសុ។ តេ មំ ឯវមាហំសុ – ‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’ន្តិ? ‘អាមាវុសោ, សាទិយិស្សាមី’តិ។ តតោ ចីវរភាគំ គហេត្វា អញ្ញំ អាវាសំ អគមាសិំ។ តត្ថបិ ភិក្ខូ ចីវរំ ភាជេតុកាមា សន្និបតិំសុ។ តេបិ មំ ឯវមាហំសុ – ‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’’’ន្តិ? ‘អាមាវុសោ, សាទិយិស្សាមី’តិ។ តតោបិ ចីវរភាគំ គហេត្វា អញ្ញំ អាវាសំ អគមាសិំ។ តត្ថបិ ភិក្ខូ ចីវរំ ភាជេតុកាមា សន្និបតិំសុ។ តេបិ មំ ឯវមាហំសុ – ‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’ន្តិ? ‘អាមាវុសោ, សាទិយិស្សាមី’តិ។ តតោបិ ចីវរភាគំ អគ្គហេសិំ។ ឯវំ មេ ពហុំ ចីវរំ ឧប្បន្នន្តិ។ ‘‘កិំ បន ត្វំ, អាវុសោ ឧបនន្ទ, អញ្ញត្រ វស្សំវុដ្ឋោ អញ្ញត្រ ចីវរភាគំ សាទិយី’’តិ? ‘‘ឯវមាវុសោ’’តិ។ យេ តេ ភិក្ខូ អប្បិច្ឆា…បេ.… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អាយស្មា ឧបនន្ទោ សក្យបុត្តោ អញ្ញត្រ វស្សំវុដ្ឋោ អញ្ញត្រ ចីវរភាគំ សាទិយិស្សតី’’តិ។ ភគវតោ ឯតមត្ថំ អារោចេសុំ…បេ.… ‘‘សច្ចំ កិរ ត្វំ, ឧបនន្ទ, អញ្ញត្រ វស្សំវុដ្ឋោ អញ្ញត្រ ចីវរភាគំ សាទិយី’’តិ? ‘‘សច្ចំ ភគវា’’តិ។ វិគរហិ ពុទ្ធោ ភគវា…បេ.… កថញ្ហិ នាម ត្វំ, មោឃបុរិស, អញ្ញត្រ វស្សំវុដ្ឋោ អញ្ញត្រ ចីវរភាគំ សាទិយិស្សសិ។ នេតំ, មោឃបុរិស, អប្បសន្នានំ វា បសាទាយ…បេ.… វិគរហិត្វា…បេ.… ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, អញ្ញត្រ វស្សំវុដ្ឋេន អញ្ញត្រ ចីវរភាគោ សាទិតព្ពោ។ យោ សាទិយេយ្យ, អាបត្តិ ទុក្កដស្សា’’តិ។
364. Tena kho pana samayena āyasmā upanando sakyaputto sāvatthiyaṃ vassaṃvuṭṭho aññataraṃ gāmakāvāsaṃ agamāsi. Tattha ca bhikkhū cīvaraṃ bhājetukāmā sannipatiṃsu. Te evamāhaṃsu – ‘‘imāni kho, āvuso, saṅghikāni cīvarāni bhājiyissanti, sādiyissasi bhāga’’nti? ‘‘Āmāvuso, sādiyissāmī’’ti. Tato cīvarabhāgaṃ gahetvā aññaṃ āvāsaṃ agamāsi. Tatthapi bhikkhū cīvaraṃ bhājetukāmā sannipatiṃsu. Tepi evamāhaṃsu – ‘‘imāni kho, āvuso, saṅghikāni cīvarāni bhājiyissanti, sādiyissasi bhāga’’nti? ‘‘Āmāvuso, sādiyissāmī’’ti. Tatopi cīvarabhāgaṃ gahetvā aññaṃ āvāsaṃ agamāsi. Tatthapi bhikkhū cīvaraṃ bhājetukāmā sannipatiṃsu. Tepi evamāhaṃsu – ‘‘imāni kho, āvuso, saṅghikāni cīvarāni bhājiyissanti, sādiyissasi bhāga’’nti? ‘‘Āmāvuso, sādiyissāmī’’ti. Tatopi cīvarabhāgaṃ gahetvā mahantaṃ cīvarabhaṇḍikaṃ ādāya punadeva sāvatthiṃ paccāgañchi. Bhikkhū evamāhaṃsu – ‘‘mahāpuññosi tvaṃ , āvuso upananda, bahuṃ te cīvaraṃ uppanna’’nti. ‘‘Kuto me , āvuso, puññaṃ? Idhāhaṃ, āvuso, sāvatthiyaṃ vassaṃvuṭṭho aññataraṃ gāmakāvāsaṃ agamāsiṃ. Tattha bhikkhū cīvaraṃ bhājetukāmā sannipatiṃsu. Te maṃ evamāhaṃsu – ‘imāni kho, āvuso, saṅghikāni cīvarāni bhājiyissanti, sādiyissasi bhāga’nti? ‘Āmāvuso, sādiyissāmī’ti. Tato cīvarabhāgaṃ gahetvā aññaṃ āvāsaṃ agamāsiṃ. Tatthapi bhikkhū cīvaraṃ bhājetukāmā sannipatiṃsu. Tepi maṃ evamāhaṃsu – ‘imāni kho, āvuso, saṅghikāni cīvarāni bhājiyissanti, sādiyissasi bhāga’’’nti? ‘Āmāvuso, sādiyissāmī’ti. Tatopi cīvarabhāgaṃ gahetvā aññaṃ āvāsaṃ agamāsiṃ. Tatthapi bhikkhū cīvaraṃ bhājetukāmā sannipatiṃsu. Tepi maṃ evamāhaṃsu – ‘imāni kho, āvuso, saṅghikāni cīvarāni bhājiyissanti, sādiyissasi bhāga’nti? ‘Āmāvuso, sādiyissāmī’ti. Tatopi cīvarabhāgaṃ aggahesiṃ. Evaṃ me bahuṃ cīvaraṃ uppannanti. ‘‘Kiṃ pana tvaṃ, āvuso upananda, aññatra vassaṃvuṭṭho aññatra cīvarabhāgaṃ sādiyī’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto aññatra vassaṃvuṭṭho aññatra cīvarabhāgaṃ sādiyissatī’’ti. Bhagavato etamatthaṃ ārocesuṃ…pe… ‘‘saccaṃ kira tvaṃ, upananda, aññatra vassaṃvuṭṭho aññatra cīvarabhāgaṃ sādiyī’’ti? ‘‘Saccaṃ bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, aññatra vassaṃvuṭṭho aññatra cīvarabhāgaṃ sādiyissasi. Netaṃ, moghapurisa, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, aññatra vassaṃvuṭṭhena aññatra cīvarabhāgo sāditabbo. Yo sādiyeyya, āpatti dukkaṭassā’’ti.
តេន ខោ បន សមយេន អាយស្មា ឧបនន្ទោ សក្យបុត្តោ ឯកោ ទ្វីសុ អាវាសេសុ វស្សំ វសិ – ‘‘ឯវំ មេ ពហុំ ចីវរំ ឧប្បជ្ជិស្សតី’’តិ។ អថ ខោ តេសំ ភិក្ខូនំ ឯតទហោសិ – ‘‘កថំ នុ ខោ អាយស្មតោ ឧបនន្ទស្ស សក្យបុត្តស្ស ចីវរបដិវីសោ ទាតព្ពោ’’តិ? ភគវតោ ឯតមត្ថំ អារោចេសុំ។ ទេថ, ភិក្ខវេ, មោឃបុរិសស្ស ឯកាធិប្បាយំ។ ឥធ បន, ភិក្ខវេ, ភិក្ខុ ឯកោ ទ្វីសុ អាវាសេសុ វស្សំ វសតិ – ‘‘ឯវំ មេ ពហុំ ចីវរំ ឧប្បជ្ជិស្សតី’’តិ។ សចេ អមុត្រ ឧបឌ្ឍំ អមុត្រ ឧបឌ្ឍំ វសតិ, អមុត្រ ឧបឌ្ឍោ អមុត្រ ឧបឌ្ឍោ ចីវរបដិវីសោ ទាតព្ពោ។ យត្ថ វា បន ពហុតរំ វសតិ, តតោ ចីវរបដិវីសោ ទាតព្ពោតិ។
Tena kho pana samayena āyasmā upanando sakyaputto eko dvīsu āvāsesu vassaṃ vasi – ‘‘evaṃ me bahuṃ cīvaraṃ uppajjissatī’’ti. Atha kho tesaṃ bhikkhūnaṃ etadahosi – ‘‘kathaṃ nu kho āyasmato upanandassa sakyaputtassa cīvarapaṭivīso dātabbo’’ti? Bhagavato etamatthaṃ ārocesuṃ. Detha, bhikkhave, moghapurisassa ekādhippāyaṃ. Idha pana, bhikkhave, bhikkhu eko dvīsu āvāsesu vassaṃ vasati – ‘‘evaṃ me bahuṃ cīvaraṃ uppajjissatī’’ti. Sace amutra upaḍḍhaṃ amutra upaḍḍhaṃ vasati, amutra upaḍḍho amutra upaḍḍho cīvarapaṭivīso dātabbo. Yattha vā pana bahutaraṃ vasati, tato cīvarapaṭivīso dātabboti.
ឧបនន្ទសក្យបុត្តវត្ថុ និដ្ឋិតំ។
Upanandasakyaputtavatthu niṭṭhitaṃ.
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / ឧបនន្ទសក្យបុត្តវត្ថុកថា • Upanandasakyaputtavatthukathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ឧបនន្ទសក្យបុត្តវត្ថុកថាវណ្ណនា • Upanandasakyaputtavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ឧបនន្ទសក្យបុត្តវត្ថុកថាវណ្ណនា • Upanandasakyaputtavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ឧបនន្ទសក្យបុត្តវត្ថុកថាវណ្ណនា • Upanandasakyaputtavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២២៣. ឧបនន្ទសក្យបុត្តវត្ថុកថា • 223. Upanandasakyaputtavatthukathā
