| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
6. உத³யப்³ப³யஞாணனித்³தே³ஸவண்ணனா
6. Udayabbayañāṇaniddesavaṇṇanā
49. இதா³னி அனந்தரங் வுத்தஸ்ஸ ஸம்மஸனஞாணஸ்ஸ நானானயேஹி பா⁴வனாதி²ரகரணேன பாரங் க³ந்த்வா டி²தேன அனிச்சாதி³தோ தி³ட்டே² ஸங்கா²ரே உத³யப்³ப³யேன பரிச்சி²ந்தி³த்வா அனிச்சாதி³தோ விபஸ்ஸனத்த²ங் வுத்தஸ்ஸ உத³யப்³ப³யானுபஸ்ஸனாஞாணஸ்ஸ நித்³தே³ஸே ஜாதங் ரூபந்திஆதீ³ஸு ஸந்ததிவஸேன யதா²ஸகங் பச்சயேஹி நிப்³ப³த்தங் ரூபங். தஸ்ஸ ஜாதஸ்ஸ ரூபஸ்ஸ நிப்³ப³த்திலக்க²ணங் ஜாதிங் உப்பாத³ங் அபி⁴னவாகாரங் உத³யோதி, விபரிணாமலக்க²ணங் க²யங் ப⁴ங்க³ங் வயோதி, அனுபஸ்ஸனா புனப்புனங் நிஸாமனா, உத³யப்³ப³ய அனுபஸ்ஸனாஞாணந்தி அத்தோ². வேத³னாதீ³ஸுபி ஏஸேவ நயோ. ஜாதிஜராமரணவந்தானங்யேவ உத³யப்³ப³யஸ்ஸ பரிக்³க³ஹேதப்³ப³த்தா ஜாதிஜராமரணானங் உத³யப்³ப³யாபா⁴வதோ ஜாதிஜராமரணங் அனாமஸித்வா ஜாதங் சக்கு²…பே॰… ஜாதோ ப⁴வோதி பெய்யாலங் கதங். ஸோ ஏவங் பஞ்சன்னங் க²ந்தா⁴னங் உத³யப்³ப³யங் பஸ்ஸந்தோ ஏவங் ஜானாதி ‘‘இமேஸங் க²ந்தா⁴னங் உப்பத்திதோ புப்³பே³ அனுப்பன்னானங் ராஸி வா நிசயோ வா நத்தி², உப்பஜ்ஜமானானம்பி ராஸிதோ வா நிசயதோ வா ஆக³மனங் நாம நத்தி², நிருஜ்ஜ²மானானம்பி தி³ஸாவிதி³ஸாக³மனங் நாம நத்தி², நிருத்³தா⁴னம்பி ஏகஸ்மிங் டா²னே ராஸிதோ நிசயதோ நிதா⁴னதோ அவட்டா²னங் நாம நத்தி². யதா² பன வீணாய வாதி³யமானாய உப்பன்னஸ்ஸ ஸத்³த³ஸ்ஸ நேவ உப்பத்திதோ புப்³பே³ ஸன்னிசயோ அத்தி², ந உப்பஜ்ஜமானோ ஸன்னிசயதோ ஆக³தோ, ந நிருஜ்ஜ²மானஸ்ஸ தி³ஸாவிதி³ஸாக³மனங் அத்தி², ந நிருத்³தோ⁴ கத்த²சி ஸன்னிசிதோ திட்ட²தி, அத² கோ² வீணஞ்ச உபவீணஞ்ச புரிஸஸ்ஸ ச தஜ்ஜங் வாயாமங் படிச்ச அஹுத்வா ஸம்போ⁴தி, ஹுத்வா படிவேதி, ஏவங் ஸப்³பே³பி ரூபாரூபினோ த⁴ம்மா அஹுத்வா ஸம்பொ⁴ந்தி, ஹுத்வா படிவெந்தீ’’தி.
49. Idāni anantaraṃ vuttassa sammasanañāṇassa nānānayehi bhāvanāthirakaraṇena pāraṃ gantvā ṭhitena aniccādito diṭṭhe saṅkhāre udayabbayena paricchinditvā aniccādito vipassanatthaṃ vuttassa udayabbayānupassanāñāṇassa niddese jātaṃ rūpantiādīsu santativasena yathāsakaṃ paccayehi nibbattaṃ rūpaṃ. Tassa jātassa rūpassa nibbattilakkhaṇaṃ jātiṃ uppādaṃ abhinavākāraṃ udayoti, vipariṇāmalakkhaṇaṃ khayaṃ bhaṅgaṃ vayoti, anupassanā punappunaṃ nisāmanā, udayabbaya anupassanāñāṇanti attho. Vedanādīsupi eseva nayo. Jātijarāmaraṇavantānaṃyeva udayabbayassa pariggahetabbattā jātijarāmaraṇānaṃ udayabbayābhāvato jātijarāmaraṇaṃ anāmasitvā jātaṃ cakkhu…pe… jāto bhavoti peyyālaṃ kataṃ. So evaṃ pañcannaṃ khandhānaṃ udayabbayaṃ passanto evaṃ jānāti ‘‘imesaṃ khandhānaṃ uppattito pubbe anuppannānaṃ rāsi vā nicayo vā natthi, uppajjamānānampi rāsito vā nicayato vā āgamanaṃ nāma natthi, nirujjhamānānampi disāvidisāgamanaṃ nāma natthi, niruddhānampi ekasmiṃ ṭhāne rāsito nicayato nidhānato avaṭṭhānaṃ nāma natthi. Yathā pana vīṇāya vādiyamānāya uppannassa saddassa neva uppattito pubbe sannicayo atthi, na uppajjamāno sannicayato āgato, na nirujjhamānassa disāvidisāgamanaṃ atthi, na niruddho katthaci sannicito tiṭṭhati, atha kho vīṇañca upavīṇañca purisassa ca tajjaṃ vāyāmaṃ paṭicca ahutvā sambhoti, hutvā paṭiveti, evaṃ sabbepi rūpārūpino dhammā ahutvā sambhonti, hutvā paṭiventī’’ti.
50. ஏவங் ஸங்கே²பதோ உத³யப்³ப³யத³ஸ்ஸனங் த³ஸ்ஸெத்வா இதா³னி வித்தா²ரதோ த³ஸ்ஸேதுங் பஞ்சன்னங் க²ந்தா⁴னங் உத³யங் பஸ்ஸந்தோ கதி லக்க²ணானி பஸ்ஸதீதிஆதீ³ஹி ராஸிதோ க³ணனங் புச்சி²த்வா, பஞ்சன்னங் க²ந்தா⁴னங் உத³யங் பஸ்ஸந்தோ பஞ்சவீஸதி லக்க²ணானி பஸ்ஸதீதிஆதீ³ஹி ராஸிதோவ க³ணனங் விஸ்ஸஜ்ஜெத்வா, புன ரூபக்க²ந்த⁴ஸ்ஸ உத³யங் பஸ்ஸந்தோ கதி லக்க²ணானி பஸ்ஸதீதிஆதீ³ஹி விபா⁴க³தோ க³ணனங் புச்சி²த்வா ரூபக்க²ந்த⁴ஸ்ஸ உத³யங் பஸ்ஸந்தோ பஞ்ச லக்க²ணானி பஸ்ஸதீதிஆதீ³ஹி விபா⁴க³தோ க³ணனங் விஸ்ஸஜ்ஜெத்வா, புன ரூபக்க²ந்த⁴ஸ்ஸ உத³யங் பஸ்ஸந்தோ கதமானி பஞ்ச லக்க²ணானி பஸ்ஸதீதிஆதீ³ஹி லக்க²ணவிபா⁴க³ங் புச்சி²த்வா விஸ்ஸஜ்ஜனங் கதங்.
50. Evaṃ saṅkhepato udayabbayadassanaṃ dassetvā idāni vitthārato dassetuṃ pañcannaṃ khandhānaṃ udayaṃ passanto kati lakkhaṇāni passatītiādīhi rāsito gaṇanaṃ pucchitvā, pañcannaṃ khandhānaṃ udayaṃ passanto pañcavīsati lakkhaṇāni passatītiādīhi rāsitova gaṇanaṃ vissajjetvā, puna rūpakkhandhassa udayaṃ passanto kati lakkhaṇāni passatītiādīhi vibhāgato gaṇanaṃ pucchitvā rūpakkhandhassa udayaṃ passanto pañca lakkhaṇāni passatītiādīhi vibhāgato gaṇanaṃ vissajjetvā, puna rūpakkhandhassa udayaṃ passanto katamāni pañca lakkhaṇāni passatītiādīhi lakkhaṇavibhāgaṃ pucchitvā vissajjanaṃ kataṃ.
தத்த² அவிஜ்ஜாஸமுத³யா ரூபஸமுத³யோதி ‘‘புரிமகம்மப⁴வஸ்மிங் மோஹோ அவிஜ்ஜா’’தி வுத்தாய அவிஜ்ஜாய ஸதி இமஸ்மிங் ப⁴வே ரூபஸ்ஸ உப்பாதோ³ ஹோதீதி அத்தோ². பச்சயஸமுத³யட்டே²னாதி பச்சயஸ்ஸ உப்பன்னபா⁴வேனாதி அத்தோ². அவிஜ்ஜாதண்ஹாகம்மானி செத்த² இத⁴ படிஸந்தி⁴ஹேதுபூ⁴தா அதீதபச்சயா . இமேஸு ச தீஸு க³ஹிதேஸு ஸங்கா²ருபாதா³னானி க³ஹிதானேவ ஹொந்தி. ஆஹாரஸமுத³யாதி பவத்திபச்சயேஸு கப³ளீகாராஹாரஸ்ஸ ப³லவத்தா ஸோயேவ க³ஹிதோ. தஸ்மிங் பன க³ஹிதே பவத்திஹேதுபூ⁴தானி உதுசித்தானிபி க³ஹிதானேவ ஹொந்தி. நிப்³ப³த்திலக்க²ணந்தி அத்³தா⁴ஸந்ததிக²ணவஸேன ரூபஸ்ஸ உப்பாத³ங், உப்பாதோ³யேவ ஸங்க²தலக்க²ணத்தா லக்க²ணந்தி ச வுத்தோ. பஞ்ச லக்க²ணானீதி அவிஜ்ஜா தண்ஹா கம்மாஹாரா நிப்³ப³த்தி சாதி இமானி பஞ்ச லக்க²ணானி. அவிஜ்ஜாத³யோபி ஹி ரூபஸ்ஸ உத³யோ லக்கீ²யதி ஏதேஹீதி லக்க²ணானி. நிப்³ப³த்தி பன ஸங்க²தலக்க²ணமேவ, தம்பி ஸங்க²தந்தி லக்கீ²யதி ஏதேனாதி லக்க²ணங்.
Tattha avijjāsamudayā rūpasamudayoti ‘‘purimakammabhavasmiṃ moho avijjā’’ti vuttāya avijjāya sati imasmiṃ bhave rūpassa uppādo hotīti attho. Paccayasamudayaṭṭhenāti paccayassa uppannabhāvenāti attho. Avijjātaṇhākammāni cettha idha paṭisandhihetubhūtā atītapaccayā . Imesu ca tīsu gahitesu saṅkhārupādānāni gahitāneva honti. Āhārasamudayāti pavattipaccayesu kabaḷīkārāhārassa balavattā soyeva gahito. Tasmiṃ pana gahite pavattihetubhūtāni utucittānipi gahitāneva honti. Nibbattilakkhaṇanti addhāsantatikhaṇavasena rūpassa uppādaṃ, uppādoyeva saṅkhatalakkhaṇattā lakkhaṇanti ca vutto. Pañca lakkhaṇānīti avijjā taṇhā kammāhārā nibbatti cāti imāni pañca lakkhaṇāni. Avijjādayopi hi rūpassa udayo lakkhīyati etehīti lakkhaṇāni. Nibbatti pana saṅkhatalakkhaṇameva, tampi saṅkhatanti lakkhīyati etenāti lakkhaṇaṃ.
அவிஜ்ஜானிரோதா⁴ ரூபனிரோதோ⁴தி அனாக³தப⁴வஸ்ஸ பச்சயபூ⁴தாய இமஸ்மிங் ப⁴வே அவிஜ்ஜாய அரஹத்தமக்³க³ஞாணேன நிரோதே⁴ கதே பச்சயாபா⁴வா அனாக³தஸ்ஸ ரூபஸ்ஸ அனுப்பாதோ³ நிரோதோ⁴ ஹோதீதி அத்தோ². பச்சயனிரோத⁴ட்டே²னாதி பச்சயஸ்ஸ நிருத்³த⁴பா⁴வேனாதி அத்தோ². நிரோதோ⁴ செத்த² அனாக³தபடிஸந்தி⁴பச்சயானங் இத⁴ அவிஜ்ஜாதண்ஹாகம்மானங்யேவ நிரோதோ⁴. ஆஹாரனிரோதா⁴ ரூபனிரோதோ⁴தி பவத்திபச்சயஸ்ஸ கப³ளீகாராஹாரஸ்ஸ அபா⁴வே தங்ஸமுட்டா²னரூபாபா⁴வோ ஹோதி. விபரிணாமலக்க²ணந்தி அத்³தா⁴ஸந்ததிக²ணவஸேன ரூபஸ்ஸ ப⁴ங்க³ங், ப⁴ங்கோ³யேவ ஸங்க²தலக்க²ணத்தா லக்க²ணந்தி வுத்தோ. இத⁴ பஞ்ச லக்க²ணானீதி அவிஜ்ஜாதண்ஹாகம்மாஹாரானங் அபா⁴வனிரோதா⁴ சத்தாரி, விபரிணாமோ ஏகந்தி பஞ்ச. ஏஸ நயோ வேத³னாக்க²ந்தா²தீ³ஸு. அயங் பன விஸேஸோ – அரூபக்க²ந்தா⁴னங் உத³யப்³ப³யத³ஸ்ஸனங் அத்³தா⁴ஸந்ததிவஸேன, ந க²ணவஸேன. ப²ஸ்ஸோ வேத³னாஸஞ்ஞாஸங்கா²ரக்க²ந்தா⁴னங் பவத்திபச்சயோ, தங்னிரோதா⁴ ச தேஸங் நிரோதோ⁴. நாமரூபங் விஞ்ஞாணக்க²ந்த⁴ஸ்ஸ பவத்திபச்சயோ, தங்னிரோதா⁴ ச தஸ்ஸ நிரோதோ⁴தி.
Avijjānirodhā rūpanirodhoti anāgatabhavassa paccayabhūtāya imasmiṃ bhave avijjāya arahattamaggañāṇena nirodhe kate paccayābhāvā anāgatassa rūpassa anuppādo nirodho hotīti attho. Paccayanirodhaṭṭhenāti paccayassa niruddhabhāvenāti attho. Nirodho cettha anāgatapaṭisandhipaccayānaṃ idha avijjātaṇhākammānaṃyeva nirodho. Āhāranirodhā rūpanirodhoti pavattipaccayassa kabaḷīkārāhārassa abhāve taṃsamuṭṭhānarūpābhāvo hoti. Vipariṇāmalakkhaṇanti addhāsantatikhaṇavasena rūpassa bhaṅgaṃ, bhaṅgoyeva saṅkhatalakkhaṇattā lakkhaṇanti vutto. Idha pañca lakkhaṇānīti avijjātaṇhākammāhārānaṃ abhāvanirodhā cattāri, vipariṇāmo ekanti pañca. Esa nayo vedanākkhanthādīsu. Ayaṃ pana viseso – arūpakkhandhānaṃ udayabbayadassanaṃ addhāsantativasena, na khaṇavasena. Phasso vedanāsaññāsaṅkhārakkhandhānaṃ pavattipaccayo, taṃnirodhā ca tesaṃ nirodho. Nāmarūpaṃ viññāṇakkhandhassa pavattipaccayo, taṃnirodhā ca tassa nirodhoti.
கேசி பனாஹு – ‘‘சதுதா⁴ பச்சயதோ உத³யப்³ப³யத³ஸ்ஸனே அதீதாதி³விபா⁴க³ங் அனாமஸித்வாவ ஸப்³ப³ஸாமஞ்ஞவஸேன அவிஜ்ஜாதீ³ஹி உதே³தீதி உப்பஜ்ஜமானபா⁴வமத்தங் க³ண்ஹாதி, ந உப்பாத³ங். அவிஜ்ஜாதி³னிரோதா⁴ நிருஜ்ஜதீதி அனுப்பஜ்ஜமானபா⁴வமத்தங் க³ண்ஹாதி, ந ப⁴ங்க³ங். க²ணதோ உத³யப்³ப³யத³ஸ்ஸனே பச்சுப்பன்னானங் உப்பாத³ங் ப⁴ங்க³ங் க³ண்ஹாதீ’’தி.
Keci panāhu – ‘‘catudhā paccayato udayabbayadassane atītādivibhāgaṃ anāmasitvāva sabbasāmaññavasena avijjādīhi udetīti uppajjamānabhāvamattaṃ gaṇhāti, na uppādaṃ. Avijjādinirodhā nirujjatīti anuppajjamānabhāvamattaṃ gaṇhāti, na bhaṅgaṃ. Khaṇato udayabbayadassane paccuppannānaṃ uppādaṃ bhaṅgaṃ gaṇhātī’’ti.
விபஸ்ஸமானோ பன விபஸ்ஸகோ பட²மங் பச்சயதோ உத³யப்³ப³யங் மனஸிகரித்வா விபஸ்ஸனாகாலே அவிஜ்ஜாதி³கே சதுரோ த⁴ம்மே விஸ்ஸஜ்ஜெத்வா உத³யப்³ப³யவந்தேயேவ க²ந்தே⁴ க³ஹெத்வா தேஸங் உத³யப்³ப³யங் பஸ்ஸதி, ஏவஞ்ச தஸ்ஸ விபஸ்ஸகஸ்ஸ ‘‘ஏவங் ரூபாதீ³னங் உத³யோ, ஏவங் வயோ, ஏவங் ரூபாத³யோ உதெ³ந்தி, ஏவங் வெந்தீ’’தி பச்சயதோ ச க²ணதோ ச வித்தா²ரேன உத³யப்³ப³யங் பஸ்ஸதோ ‘‘இதி கிர இமே த⁴ம்மா அஹுத்வா ஸம்பொ⁴ந்தி, ஹுத்வா படிவெந்தீ’’தி ஞாணங் விஸத³தரங் ஹோதி, ஸச்சபடிச்சஸமுப்பாத³னயலக்க²ணபே⁴தா³ பாகடா ஹொந்தி . யஞ்ஹி ஸோ அவிஜ்ஜாதி³ஸமுத³யா க²ந்தா⁴னங் ஸமுத³யங் அவிஜ்ஜாதி³னிரோதா⁴ ச க²ந்தா⁴னங் நிரோத⁴ங் பஸ்ஸதி, இத³மஸ்ஸ பச்சயதோ உத³யப்³ப³யத³ஸ்ஸனங். யங் பன நிப்³ப³த்திலக்க²ணவிபரிணாமலக்க²ணானி பஸ்ஸந்தோ க²ந்தா⁴னங் உத³யப்³ப³யங் பஸ்ஸதி, இத³மஸ்ஸ க²ணதோ உத³யப்³ப³யத³ஸ்ஸனங். உப்பத்திக்க²ணேயேவ ஹி நிப்³ப³த்திலக்க²ணங், ப⁴ங்க³க்க²ணே ச விபரிணாமலக்க²ணங்.
Vipassamāno pana vipassako paṭhamaṃ paccayato udayabbayaṃ manasikaritvā vipassanākāle avijjādike caturo dhamme vissajjetvā udayabbayavanteyeva khandhe gahetvā tesaṃ udayabbayaṃ passati, evañca tassa vipassakassa ‘‘evaṃ rūpādīnaṃ udayo, evaṃ vayo, evaṃ rūpādayo udenti, evaṃ ventī’’ti paccayato ca khaṇato ca vitthārena udayabbayaṃ passato ‘‘iti kira ime dhammā ahutvā sambhonti, hutvā paṭiventī’’ti ñāṇaṃ visadataraṃ hoti, saccapaṭiccasamuppādanayalakkhaṇabhedā pākaṭā honti . Yañhi so avijjādisamudayā khandhānaṃ samudayaṃ avijjādinirodhā ca khandhānaṃ nirodhaṃ passati, idamassa paccayato udayabbayadassanaṃ. Yaṃ pana nibbattilakkhaṇavipariṇāmalakkhaṇāni passanto khandhānaṃ udayabbayaṃ passati, idamassa khaṇato udayabbayadassanaṃ. Uppattikkhaṇeyeva hi nibbattilakkhaṇaṃ, bhaṅgakkhaṇe ca vipariṇāmalakkhaṇaṃ.
இச்சஸ்ஸேவங் பச்சயதோ சேவ க²ணதோ ச த்³வேதா⁴ உத³யப்³ப³யங் பஸ்ஸதோ பச்சயதோ உத³யத³ஸ்ஸனேன ஸமுத³யஸச்சங் பாகடங் ஹோதி ஜனகாவபோ³த⁴தோ. க²ணதோ உத³யத³ஸ்ஸனேன து³க்க²ஸச்சங் பாகடங் ஹோதி ஜாதிது³க்கா²வபோ³த⁴தோ. பச்சயதோ வயத³ஸ்ஸனேன நிரோத⁴ஸச்சங் பாகடங் ஹோதி பச்சயானுப்பாதே³ன பச்சயவதங் அனுப்பாதா³வபோ³த⁴தோ. க²ணதோ வயத³ஸ்ஸனேன து³க்க²ஸச்சமேவ பாகடங் ஹோதி மரணது³க்கா²வபோ³த⁴தோ. யஞ்சஸ்ஸ உத³யப்³ப³யத³ஸ்ஸனங், மக்³கோ³வாயங் லோகிகோதி மக்³க³ஸச்சங் பாகடங் ஹோதி தத்ர ஸம்மோஹவிகா⁴ததோ.
Iccassevaṃ paccayato ceva khaṇato ca dvedhā udayabbayaṃ passato paccayato udayadassanena samudayasaccaṃ pākaṭaṃ hoti janakāvabodhato. Khaṇato udayadassanena dukkhasaccaṃ pākaṭaṃ hoti jātidukkhāvabodhato. Paccayato vayadassanena nirodhasaccaṃ pākaṭaṃ hoti paccayānuppādena paccayavataṃ anuppādāvabodhato. Khaṇato vayadassanena dukkhasaccameva pākaṭaṃ hoti maraṇadukkhāvabodhato. Yañcassa udayabbayadassanaṃ, maggovāyaṃ lokikoti maggasaccaṃ pākaṭaṃ hoti tatra sammohavighātato.
பச்சயதோ சஸ்ஸ உத³யத³ஸ்ஸனேன அனுலோமோ படிச்சஸமுப்பாதோ³ பாகடோ ஹோதி ‘‘இமஸ்மிங் ஸதி இத³ங் ஹோதீ’’தி (ம॰ நி॰ 1.404; ஸங்॰ நி॰ 2.21; உதா³॰ 1) அவபோ³த⁴தோ. பச்சயதோ வயத³ஸ்ஸனேன படிலோமோ படிச்சஸமுப்பாதோ³ பாகடோ ஹோதி ‘‘இமஸ்ஸ நிரோதா⁴ இத³ங் நிருஜ்ஜ²தீ’’தி (ம॰ நி॰ 1.406; ஸங்॰ நி॰ 2.21; உதா³॰ 2) அவபோ³த⁴தோ. க²ணதோ பன உத³யப்³ப³யத³ஸ்ஸனேன படிச்சஸமுப்பன்னா த⁴ம்மா பாகடா ஹொந்தி ஸங்க²தலக்க²ணாவபோ³த⁴தோ. உத³யப்³ப³யவந்தோ ஹி ஸங்க²தா, தே ச படிச்சஸமுப்பன்னாதி.
Paccayato cassa udayadassanena anulomo paṭiccasamuppādo pākaṭo hoti ‘‘imasmiṃ sati idaṃ hotī’’ti (ma. ni. 1.404; saṃ. ni. 2.21; udā. 1) avabodhato. Paccayato vayadassanena paṭilomo paṭiccasamuppādo pākaṭo hoti ‘‘imassa nirodhā idaṃ nirujjhatī’’ti (ma. ni. 1.406; saṃ. ni. 2.21; udā. 2) avabodhato. Khaṇato pana udayabbayadassanena paṭiccasamuppannā dhammā pākaṭā honti saṅkhatalakkhaṇāvabodhato. Udayabbayavanto hi saṅkhatā, te ca paṭiccasamuppannāti.
பச்சயதோ சஸ்ஸ உத³யத³ஸ்ஸனேன ஏகத்தனயோ பாகடோ ஹோதி ஹேதுப²லஸம்ப³ந்தே⁴ன ஸந்தானஸ்ஸ அனுபச்சே²தா³வபோ³த⁴தோ. அத² ஸுட்டு²தரங் உச்சே²த³தி³ட்டி²ங் பஜஹதி. க²ணதோ உத³யத³ஸ்ஸனேன நானத்தனயோ பாகடோ ஹோதி நவனவானங் உப்பாதா³வபோ³த⁴தோ. அத² ஸுட்டு²தரங் ஸஸ்ஸததி³ட்டி²ங் பஜஹதி. பச்சயதோ சஸ்ஸ உத³யப்³ப³யத³ஸ்ஸனேன அப்³யாபாரனயோ பாகடோ ஹோதி த⁴ம்மானங் அவஸவத்திபா⁴வாவபோ³த⁴தோ. அத² ஸுட்டு²தரங் அத்ததி³ட்டி²ங் பஜஹதி. பச்சயதோ பன உத³யத³ஸ்ஸனேன ஏவங்த⁴ம்மதானயோ பாகடோ ஹோதி பச்சயானுரூபேன ப²லஸ்ஸுப்பாதா³வபோ³த⁴தோ. அத² ஸுட்டு²தரங் அகிரியதி³ட்டி²ங் பஜஹதி.
Paccayato cassa udayadassanena ekattanayo pākaṭo hoti hetuphalasambandhena santānassa anupacchedāvabodhato. Atha suṭṭhutaraṃ ucchedadiṭṭhiṃ pajahati. Khaṇato udayadassanena nānattanayo pākaṭo hoti navanavānaṃ uppādāvabodhato. Atha suṭṭhutaraṃ sassatadiṭṭhiṃ pajahati. Paccayato cassa udayabbayadassanena abyāpāranayo pākaṭo hoti dhammānaṃ avasavattibhāvāvabodhato. Atha suṭṭhutaraṃ attadiṭṭhiṃ pajahati. Paccayato pana udayadassanena evaṃdhammatānayo pākaṭo hoti paccayānurūpena phalassuppādāvabodhato. Atha suṭṭhutaraṃ akiriyadiṭṭhiṃ pajahati.
பச்சயதோ சஸ்ஸ உத³யத³ஸ்ஸனேன அனத்தலக்க²ணங் பாகடங் ஹோதி த⁴ம்மானங் நிரீஹகத்தபச்சயபடிப³த்³த⁴வுத்திதாவபோ³த⁴தோ. க²ணதோ உத³யப்³ப³யத³ஸ்ஸனேன அனிச்சலக்க²ணங் பாகடங் ஹோதி ஹுத்வா அபா⁴வாவபோ³த⁴தோ, புப்³ப³ந்தாபரந்தவிவேகாவபோ³த⁴தோ ச. து³க்க²லக்க²ணம்பி பாகடங் ஹோதி உத³யப்³ப³யேஹி படிபீளனாவபோ³த⁴தோ. ஸபா⁴வலக்க²ணம்பி பாகடங் ஹோதி உத³யப்³ப³யபரிச்சி²ன்னாவபோ³த⁴தோ . ஸபா⁴வலக்க²ணே ஸங்க²தலக்க²ணஸ்ஸ தாவகாலிகத்தம்பி பாகடங் ஹோதி, உத³யக்க²ணே வயஸ்ஸ, வயக்க²ணே ச உத³யஸ்ஸ அபா⁴வாவபோ³த⁴தோதி.
Paccayato cassa udayadassanena anattalakkhaṇaṃ pākaṭaṃ hoti dhammānaṃ nirīhakattapaccayapaṭibaddhavuttitāvabodhato. Khaṇato udayabbayadassanena aniccalakkhaṇaṃ pākaṭaṃ hoti hutvā abhāvāvabodhato, pubbantāparantavivekāvabodhato ca. Dukkhalakkhaṇampi pākaṭaṃ hoti udayabbayehi paṭipīḷanāvabodhato. Sabhāvalakkhaṇampi pākaṭaṃ hoti udayabbayaparicchinnāvabodhato . Sabhāvalakkhaṇe saṅkhatalakkhaṇassa tāvakālikattampi pākaṭaṃ hoti, udayakkhaṇe vayassa, vayakkhaṇe ca udayassa abhāvāvabodhatoti.
தஸ்ஸேவங் பாகடீபூ⁴தஸச்சபடிச்சஸமுப்பாத³னயலக்க²ணபே⁴த³ஸ்ஸ ‘‘ஏவங் கிர நாமிமே த⁴ம்மா அனுப்பன்னபுப்³பா³ உப்பஜ்ஜந்தி, உப்பன்னா நிருஜ்ஜ²ந்தீ’’தி நிச்சனவாவ ஹுத்வா ஸங்கா²ரா உபட்ட²ஹந்தி. ந கேவலஞ்ச நிச்சனவாவ, ஸூரியுக்³க³மனே உஸ்ஸாவபி³ந்து³ விய உத³கபுப்³பு³ளோ விய உத³கே த³ண்ட³ராஜி விய ஆரக்³கே³ ஸாஸபோ விய விஜ்ஜுப்பாதோ³ விய ச பரித்தட்டா²யினோ மாயாமரீசிஸுபினந்தஅலாதசக்கக³ந்த⁴ப்³ப³னக³ரபே²ணகத³லிஆத³யோ விய அஸாரா நிஸ்ஸாராதி சாபி உபட்ட²ஹந்தி. எத்தாவதா தேன ‘‘வயத⁴ம்மமேவ உப்பஜ்ஜதி, உப்பன்னஞ்ச வயங் உபேதீ’’தி இமினா ஆகாரேன ஸமபஞ்ஞாஸ லக்க²ணானி படிவிஜ்ஜி²த்வா டி²தங் உத³யப்³ப³யானுபஸ்ஸனா நாம பட²மங் தருணவிபஸ்ஸனாஞாணங் அதி⁴க³தங் ஹோதி, யஸ்ஸாதி⁴க³மா ‘‘ஆரத்³த⁴விபஸ்ஸகோ’’தி ஸங்க²ங் க³ச்ச²தி. இமஸ்மிங் ஞாணே டி²தஸ்ஸ ஓபா⁴ஸாத³யோ த³ஸ விபஸ்ஸனூபக்கிலேஸா உப்பஜ்ஜந்தி, யேஸங் உப்பத்தியா அகுஸலோ யோகா³வசரோ தேஸு மக்³க³ஞாணஸஞ்ஞீ ஹுத்வா அமக்³க³மேவ ‘‘மக்³கோ³’’தி க³ண்ஹாதி, உபக்கிலேஸஜடாஜடிதோ ச ஹோதி. குஸலோ பன யோகா³வசரோ தேஸு விபஸ்ஸனங் ஆரோபெந்தோ உபக்கிலேஸஜடங் விஜடெத்வா ‘‘ஏதே த⁴ம்மா ந மக்³கோ³, உபக்கிலேஸவிமுத்தங் பன வீதி²படிபன்னங் விபஸ்ஸனாஞாணங் மக்³கோ³’’தி மக்³க³ஞ்ச அமக்³க³ஞ்ச வவத்த²பேதி. தஸ்ஸேவங் மக்³க³ஞ்ச அமக்³க³ஞ்ச ஞத்வா டி²தங் ஞாணங் மக்³கா³மக்³க³ஞாணத³ஸ்ஸனவிஸுத்³தி⁴ நாம.
Tassevaṃ pākaṭībhūtasaccapaṭiccasamuppādanayalakkhaṇabhedassa ‘‘evaṃ kira nāmime dhammā anuppannapubbā uppajjanti, uppannā nirujjhantī’’ti niccanavāva hutvā saṅkhārā upaṭṭhahanti. Na kevalañca niccanavāva, sūriyuggamane ussāvabindu viya udakapubbuḷo viya udake daṇḍarāji viya āragge sāsapo viya vijjuppādo viya ca parittaṭṭhāyino māyāmarīcisupinantaalātacakkagandhabbanagarapheṇakadaliādayo viya asārā nissārāti cāpi upaṭṭhahanti. Ettāvatā tena ‘‘vayadhammameva uppajjati, uppannañca vayaṃ upetī’’ti iminā ākārena samapaññāsa lakkhaṇāni paṭivijjhitvā ṭhitaṃ udayabbayānupassanā nāma paṭhamaṃ taruṇavipassanāñāṇaṃ adhigataṃ hoti, yassādhigamā ‘‘āraddhavipassako’’ti saṅkhaṃ gacchati. Imasmiṃ ñāṇe ṭhitassa obhāsādayo dasa vipassanūpakkilesā uppajjanti, yesaṃ uppattiyā akusalo yogāvacaro tesu maggañāṇasaññī hutvā amaggameva ‘‘maggo’’ti gaṇhāti, upakkilesajaṭājaṭito ca hoti. Kusalo pana yogāvacaro tesu vipassanaṃ āropento upakkilesajaṭaṃ vijaṭetvā ‘‘ete dhammā na maggo, upakkilesavimuttaṃ pana vīthipaṭipannaṃ vipassanāñāṇaṃ maggo’’ti maggañca amaggañca vavatthapeti. Tassevaṃ maggañca amaggañca ñatvā ṭhitaṃ ñāṇaṃ maggāmaggañāṇadassanavisuddhi nāma.
எத்தாவதா ச பன தேன சதுன்னங் ஸச்சானங் வவத்தா²னங் கதங் ஹோதி. கத²ங்? நாமரூபபரிக்³க³ஹே ஸதி பச்சயபரிக்³க³ஹஸம்ப⁴வதோ த⁴ம்மட்டி²திஞாணவசனேனேவ வுத்தேன தி³ட்டி²விஸுத்³தி⁴ஸங்கா²தேன நாமரூபவவத்தா²பனேன து³க்க²ஸச்சஸ்ஸ வவத்தா²னங் கதங் ஹோதி, கங்கா²விதரணவிஸுத்³தி⁴ஸங்கா²தேன பச்சயபரிக்³க³ஹணேன ஸமுத³யஸச்சஸ்ஸ வவத்தா²னங், உத³யப்³ப³யானுபஸ்ஸனேன ச க²ணதோ உத³யப்³ப³யத³ஸ்ஸனேன து³க்க²ஸச்சஸ்ஸ வவத்தா²னங் கதங், பச்சயதோ உத³யத³ஸ்ஸனேன ஸமுத³யஸச்சஸ்ஸ வவத்தா²னங், பச்சயதோ வயத³ஸ்ஸனேன நிரோத⁴ஸச்சஸ்ஸ வவத்தா²னங், யஞ்சஸ்ஸ உத³யப்³ப³யத³ஸ்ஸனங், மக்³கோ³வாயங் லோகிகோதி தத்ர ஸம்மோஹவிகா⁴ததோ இமிஸ்ஸஞ்ச மக்³கா³மக்³க³ஞாணத³ஸ்ஸனவிஸுத்³தி⁴யங் விபஸ்ஸதோ ஸம்மா மக்³க³ஸ்ஸ அவதா⁴ரணேன மக்³க³ஸச்சஸ்ஸ வவத்தா²னங் கதங். ஏவங் லோகியேன தாவ ஞாணேன சதுன்னங் ஸச்சானங் வவத்தா²னங் கதங் ஹோதீதி.
Ettāvatā ca pana tena catunnaṃ saccānaṃ vavatthānaṃ kataṃ hoti. Kathaṃ? Nāmarūpapariggahe sati paccayapariggahasambhavato dhammaṭṭhitiñāṇavacaneneva vuttena diṭṭhivisuddhisaṅkhātena nāmarūpavavatthāpanena dukkhasaccassa vavatthānaṃ kataṃ hoti, kaṅkhāvitaraṇavisuddhisaṅkhātena paccayapariggahaṇena samudayasaccassa vavatthānaṃ, udayabbayānupassanena ca khaṇato udayabbayadassanena dukkhasaccassa vavatthānaṃ kataṃ, paccayato udayadassanena samudayasaccassa vavatthānaṃ, paccayato vayadassanena nirodhasaccassa vavatthānaṃ, yañcassa udayabbayadassanaṃ, maggovāyaṃ lokikoti tatra sammohavighātato imissañca maggāmaggañāṇadassanavisuddhiyaṃ vipassato sammā maggassa avadhāraṇena maggasaccassa vavatthānaṃ kataṃ. Evaṃ lokiyena tāva ñāṇena catunnaṃ saccānaṃ vavatthānaṃ kataṃ hotīti.
உத³யப்³ப³யஞாணனித்³தே³ஸவண்ணனா நிட்டி²தா.
Udayabbayañāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 6. உத³யப்³ப³யஞாணனித்³தே³ஸோ • 6. Udayabbayañāṇaniddeso
