| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
6. உத³யப்³ப³யஞாணனித்³தே³ஸோ
6. Udayabbayañāṇaniddeso
49. கத²ங் பச்சுப்பன்னானங் த⁴ம்மானங் விபரிணாமானுபஸ்ஸனே பஞ்ஞா உத³யப்³ப³யானுபஸ்ஸனே ஞாணங்? ஜாதங் ரூபங் பச்சுப்பன்னங், தஸ்ஸ நிப்³ப³த்திலக்க²ணங் உத³யோ, விபரிணாமலக்க²ணங் வயோ, அனுபஸ்ஸனா ஞாணங். ஜாதா வேத³னா…பே॰… ஜாதா ஸஞ்ஞா… ஜாதா ஸங்கா²ரா… ஜாதங் விஞ்ஞாணங்… ஜாதங் சக்கு²…பே॰… ஜாதோ ப⁴வோ பச்சுப்பன்னோ, தஸ்ஸ நிப்³ப³த்திலக்க²ணங் உத³யோ, விபரிணாமலக்க²ணங் வயோ, அனுபஸ்ஸனா ஞாணங்.
49. Kathaṃ paccuppannānaṃ dhammānaṃ vipariṇāmānupassane paññā udayabbayānupassane ñāṇaṃ? Jātaṃ rūpaṃ paccuppannaṃ, tassa nibbattilakkhaṇaṃ udayo, vipariṇāmalakkhaṇaṃ vayo, anupassanā ñāṇaṃ. Jātā vedanā…pe… jātā saññā… jātā saṅkhārā… jātaṃ viññāṇaṃ… jātaṃ cakkhu…pe… jāto bhavo paccuppanno, tassa nibbattilakkhaṇaṃ udayo, vipariṇāmalakkhaṇaṃ vayo, anupassanā ñāṇaṃ.
50. பஞ்சன்னங் க²ந்தா⁴னங் உத³யங் பஸ்ஸந்தோ கதி லக்க²ணானி பஸ்ஸதி, வயங் பஸ்ஸந்தோ கதி லக்க²ணானி பஸ்ஸதி, உத³யப்³ப³யங் பஸ்ஸந்தோ கதி லக்க²ணானி பஸ்ஸதி? பஞ்சன்னங் க²ந்தா⁴னங் உத³யங் பஸ்ஸந்தோ பஞ்சவீஸதி லக்க²ணானி பஸ்ஸதி, வயங் பஸ்ஸந்தோ பஞ்சவீஸதி லக்க²ணானி பஸ்ஸதி ; உத³யப்³ப³யங் பஸ்ஸந்தோ பஞ்ஞாஸ லக்க²ணானி பஸ்ஸதி.
50. Pañcannaṃ khandhānaṃ udayaṃ passanto kati lakkhaṇāni passati, vayaṃ passanto kati lakkhaṇāni passati, udayabbayaṃ passanto kati lakkhaṇāni passati? Pañcannaṃ khandhānaṃ udayaṃ passanto pañcavīsati lakkhaṇāni passati, vayaṃ passanto pañcavīsati lakkhaṇāni passati ; udayabbayaṃ passanto paññāsa lakkhaṇāni passati.
ரூபக்க²ந்த⁴ஸ்ஸ உத³யங் பஸ்ஸந்தோ கதி லக்க²ணானி பஸ்ஸதி, வயங் பஸ்ஸந்தோ கதி லக்க²ணானி பஸ்ஸதி, உத³யப்³ப³யங் பஸ்ஸந்தோ கதி லக்க²ணானி பஸ்ஸதி? வேத³னாக்க²ந்த⁴ஸ்ஸ…பே॰… ஸஞ்ஞாக்க²ந்த⁴ஸ்ஸ…பே॰… ஸங்கா²ரக்க²ந்த⁴ஸ்ஸ…பே॰… விஞ்ஞாணக்க²ந்த⁴ஸ்ஸ உத³யங் பஸ்ஸந்தோ கதி லக்க²ணானி பஸ்ஸதி, வயங் பஸ்ஸந்தோ கதி லக்க²ணானி பஸ்ஸதி, உத³யப்³ப³யங் பஸ்ஸந்தோ கதி லக்க²ணானி பஸ்ஸதி? ரூபக்க²ந்த⁴ஸ்ஸ உத³யங் பஸ்ஸந்தோ பஞ்ச லக்க²ணானி பஸ்ஸதி, வயங் பஸ்ஸந்தோ பஞ்ச லக்க²ணானி பஸ்ஸதி; உத³யப்³ப³யங் பஸ்ஸந்தோ த³ஸ லக்க²ணானி பஸ்ஸதி. வேத³னாக்க²ந்த⁴ஸ்ஸ…பே॰… ஸஞ்ஞாக்க²ந்த⁴ஸ்ஸ… ஸங்கா²ரக்க²ந்த⁴ஸ்ஸ… விஞ்ஞாணக்க²ந்த⁴ஸ்ஸ உத³யங் பஸ்ஸந்தோ பஞ்ச லக்க²ணானி பஸ்ஸதி, வயங் பஸ்ஸந்தோ பஞ்ச லக்க²ணானி பஸ்ஸதி; உத³யப்³ப³யங் பஸ்ஸந்தோ த³ஸ லக்க²ணானி பஸ்ஸதி.
Rūpakkhandhassa udayaṃ passanto kati lakkhaṇāni passati, vayaṃ passanto kati lakkhaṇāni passati, udayabbayaṃ passanto kati lakkhaṇāni passati? Vedanākkhandhassa…pe… saññākkhandhassa…pe… saṅkhārakkhandhassa…pe… viññāṇakkhandhassa udayaṃ passanto kati lakkhaṇāni passati, vayaṃ passanto kati lakkhaṇāni passati, udayabbayaṃ passanto kati lakkhaṇāni passati? Rūpakkhandhassa udayaṃ passanto pañca lakkhaṇāni passati, vayaṃ passanto pañca lakkhaṇāni passati; udayabbayaṃ passanto dasa lakkhaṇāni passati. Vedanākkhandhassa…pe… saññākkhandhassa… saṅkhārakkhandhassa… viññāṇakkhandhassa udayaṃ passanto pañca lakkhaṇāni passati, vayaṃ passanto pañca lakkhaṇāni passati; udayabbayaṃ passanto dasa lakkhaṇāni passati.
ரூபக்க²ந்த⁴ஸ்ஸ உத³யங் பஸ்ஸந்தோ கதமானி பஞ்ச லக்க²ணானி பஸ்ஸதி? அவிஜ்ஜாஸமுத³யா ரூபஸமுத³யோதி – பச்சயஸமுத³யட்டே²ன ரூபக்க²ந்த⁴ஸ்ஸ உத³யங் பஸ்ஸதி. தண்ஹாஸமுத³யா ரூபஸமுத³யோதி – பச்சயஸமுத³யட்டே²ன ரூபக்க²ந்த⁴ஸ்ஸ உத³யங் பஸ்ஸதி. கம்மஸமுத³யா ரூபஸமுத³யோதி – பச்சயஸமுத³யட்டே²ன ரூபக்க²ந்த⁴ஸ்ஸ உத³யங் பஸ்ஸதி. ஆஹாரஸமுத³யா ரூபஸமுத³யோதி – பச்சயஸமுத³யட்டே²ன ரூபக்க²ந்த⁴ஸ்ஸ உத³யங் பஸ்ஸதி. நிப்³ப³த்திலக்க²ணங் பஸ்ஸந்தோபி ரூபக்க²ந்த⁴ஸ்ஸ உத³யங் பஸ்ஸதி. ரூபக்க²ந்த⁴ஸ்ஸ உத³யங் பஸ்ஸந்தோ இமானி பஞ்ச லக்க²ணானி பஸ்ஸதி.
Rūpakkhandhassa udayaṃ passanto katamāni pañca lakkhaṇāni passati? Avijjāsamudayā rūpasamudayoti – paccayasamudayaṭṭhena rūpakkhandhassa udayaṃ passati. Taṇhāsamudayā rūpasamudayoti – paccayasamudayaṭṭhena rūpakkhandhassa udayaṃ passati. Kammasamudayā rūpasamudayoti – paccayasamudayaṭṭhena rūpakkhandhassa udayaṃ passati. Āhārasamudayā rūpasamudayoti – paccayasamudayaṭṭhena rūpakkhandhassa udayaṃ passati. Nibbattilakkhaṇaṃ passantopi rūpakkhandhassa udayaṃ passati. Rūpakkhandhassa udayaṃ passanto imāni pañca lakkhaṇāni passati.
வயங் பஸ்ஸந்தோ கதமானி பஞ்ச லக்க²ணானி பஸ்ஸதி? அவிஜ்ஜானிரோதா⁴ ரூபனிரோதோ⁴தி – பச்சயனிரோத⁴ட்டே²ன ரூபக்க²ந்த⁴ஸ்ஸ வயங் பஸ்ஸதி. தண்ஹானிரோதா⁴ ரூபனிரோதோ⁴தி – பச்சயனிரோத⁴ட்டே²ன ரூபக்க²ந்த⁴ஸ்ஸ வயங் பஸ்ஸதி. கம்மனிரோதா⁴ ரூபனிரோதோ⁴தி – பச்சயனிரோத⁴ட்டே²ன ரூபக்க²ந்த⁴ஸ்ஸ வயங் பஸ்ஸதி. ஆஹாரனிரோதா⁴ ரூபனிரோதோ⁴தி – பச்சயனிரோத⁴ட்டே²ன ரூபக்க²ந்த⁴ஸ்ஸ வயங் பஸ்ஸதி . விபரிணாமலக்க²ணங் பஸ்ஸந்தோபி ரூபக்க²ந்த⁴ஸ்ஸ வயங் பஸ்ஸதி. ரூபக்க²ந்த⁴ஸ்ஸ வயங் பஸ்ஸந்தோ இமானி பஞ்ச லக்க²ணானி பஸ்ஸதி. உத³யப்³ப³யங் பஸ்ஸந்தோ இமானி த³ஸ லக்க²ணானி பஸ்ஸதி.
Vayaṃ passanto katamāni pañca lakkhaṇāni passati? Avijjānirodhā rūpanirodhoti – paccayanirodhaṭṭhena rūpakkhandhassa vayaṃ passati. Taṇhānirodhā rūpanirodhoti – paccayanirodhaṭṭhena rūpakkhandhassa vayaṃ passati. Kammanirodhā rūpanirodhoti – paccayanirodhaṭṭhena rūpakkhandhassa vayaṃ passati. Āhāranirodhā rūpanirodhoti – paccayanirodhaṭṭhena rūpakkhandhassa vayaṃ passati . Vipariṇāmalakkhaṇaṃ passantopi rūpakkhandhassa vayaṃ passati. Rūpakkhandhassa vayaṃ passanto imāni pañca lakkhaṇāni passati. Udayabbayaṃ passanto imāni dasa lakkhaṇāni passati.
வேத³னாக்க²ந்த⁴ஸ்ஸ உத³யங் பஸ்ஸந்தோ கதமானி பஞ்ச லக்க²ணானி பஸ்ஸதி? அவிஜ்ஜாஸமுத³யா வேத³னாஸமுத³யோதி – பச்சயஸமுத³யட்டே²ன வேத³னாக்க²ந்த⁴ஸ்ஸ உத³யங் பஸ்ஸதி. தண்ஹாஸமுத³யா வேத³னாஸமுத³யோதி – பச்சயஸமுத³யட்டே²ன வேத³னாக்க²ந்த⁴ஸ்ஸ உத³யங் பஸ்ஸதி. கம்மஸமுத³யா வேத³னாஸமுத³யோதி – பச்சயஸமுத³யட்டே²ன வேத³னாக்க²ந்த⁴ஸ்ஸ உத³யங் பஸ்ஸதி. ப²ஸ்ஸஸமுத³யா வேத³னாஸமுத³யோதி – பச்சயஸமுத³யட்டே²ன வேத³னாக்க²ந்த⁴ஸ்ஸ உத³யங் பஸ்ஸதி. நிப்³ப³த்திலக்க²ணங் பஸ்ஸந்தோபி வேத³னாக்க²ந்த⁴ஸ்ஸ உத³யங் பஸ்ஸதி. வேத³னாக்க²ந்த⁴ஸ்ஸ உத³யங் பஸ்ஸந்தோ இமானி பஞ்ச லக்க²ணானி பஸ்ஸதி.
Vedanākkhandhassa udayaṃ passanto katamāni pañca lakkhaṇāni passati? Avijjāsamudayā vedanāsamudayoti – paccayasamudayaṭṭhena vedanākkhandhassa udayaṃ passati. Taṇhāsamudayā vedanāsamudayoti – paccayasamudayaṭṭhena vedanākkhandhassa udayaṃ passati. Kammasamudayā vedanāsamudayoti – paccayasamudayaṭṭhena vedanākkhandhassa udayaṃ passati. Phassasamudayā vedanāsamudayoti – paccayasamudayaṭṭhena vedanākkhandhassa udayaṃ passati. Nibbattilakkhaṇaṃ passantopi vedanākkhandhassa udayaṃ passati. Vedanākkhandhassa udayaṃ passanto imāni pañca lakkhaṇāni passati.
வயங் பஸ்ஸந்தோ கதமானி பஞ்ச லக்க²ணானி பஸ்ஸதி? அவிஜ்ஜானிரோதா⁴ வேத³னானிரோதோ⁴தி – பச்சயனிரோத⁴ட்டே²ன வேத³னாக்க²ந்த⁴ஸ்ஸ வயங் பஸ்ஸதி. தண்ஹானிரோதா⁴ வேத³னானிரோதோ⁴தி – பச்சயனிரோத⁴ட்டே²ன வேத³னாக்க²ந்த⁴ஸ்ஸ வயங் பஸ்ஸதி. கம்மனிரோதா⁴ வேத³னானிரோதோ⁴தி – பச்சயனிரோத⁴ட்டே²ன வேத³னாக்க²ந்த⁴ஸ்ஸ வயங் பஸ்ஸதி. ப²ஸ்ஸனிரோதா⁴ வேத³னானிரோதோ⁴தி – பச்சயனிரோத⁴ட்டே²ன வேத³னாக்க²ந்த⁴ஸ்ஸ வயங் பஸ்ஸதி. விபரிணாமலக்க²ணங் பஸ்ஸந்தோபி வேத³னாக்க²ந்த⁴ஸ்ஸ வயங் பஸ்ஸதி. வேத³னாக்க²ந்த⁴ஸ்ஸ வயங் பஸ்ஸந்தோ இமானி பஞ்ச லக்க²ணானி பஸ்ஸதி. உத³யப்³ப³யங் பஸ்ஸந்தோ இமானி த³ஸ லக்க²ணானி பஸ்ஸதி.
Vayaṃ passanto katamāni pañca lakkhaṇāni passati? Avijjānirodhā vedanānirodhoti – paccayanirodhaṭṭhena vedanākkhandhassa vayaṃ passati. Taṇhānirodhā vedanānirodhoti – paccayanirodhaṭṭhena vedanākkhandhassa vayaṃ passati. Kammanirodhā vedanānirodhoti – paccayanirodhaṭṭhena vedanākkhandhassa vayaṃ passati. Phassanirodhā vedanānirodhoti – paccayanirodhaṭṭhena vedanākkhandhassa vayaṃ passati. Vipariṇāmalakkhaṇaṃ passantopi vedanākkhandhassa vayaṃ passati. Vedanākkhandhassa vayaṃ passanto imāni pañca lakkhaṇāni passati. Udayabbayaṃ passanto imāni dasa lakkhaṇāni passati.
ஸஞ்ஞாக்க²ந்த⁴ஸ்ஸ…பே॰… ஸங்கா²ரக்க²ந்த⁴ஸ்ஸ…பே॰… விஞ்ஞாணக்க²ந்த⁴ஸ்ஸ உத³யங் பஸ்ஸந்தோ கதமானி பஞ்ச லக்க²ணானி பஸ்ஸதி? அவிஜ்ஜாஸமுத³யா விஞ்ஞாணஸமுத³யோதி – பச்சயஸமுத³யட்டே²ன விஞ்ஞாணக்க²ந்த⁴ஸ்ஸ உத³யங் பஸ்ஸதி. தண்ஹாஸமுத³யா விஞ்ஞாணஸமுத³யோதிபச்சயஸமுத³யட்டே²ன விஞ்ஞாணக்க²ந்த⁴ஸ்ஸ உத³யங் பஸ்ஸதி. கம்மஸமுத³யா விஞ்ஞாணஸமுத³யோதி – பச்சயஸமுத³யட்டே²ன விஞ்ஞாணக்க²ந்த⁴ஸ்ஸ உத³யங் பஸ்ஸதி. நாமரூபஸமுத³யா விஞ்ஞாணஸமுத³யோதி – பச்சயஸமுத³யட்டே²ன விஞ்ஞாணக்க²ந்த⁴ஸ்ஸ உத³யங் பஸ்ஸதி. நிப்³ப³த்திலக்க²ணங் பஸ்ஸந்தோபி விஞ்ஞாணக்க²ந்த⁴ஸ்ஸ உத³யங் பஸ்ஸதி. விஞ்ஞாணக்க²ந்த⁴ஸ்ஸ உத³யங் பஸ்ஸந்தோ இமானி பஞ்ச லக்க²ணானி பஸ்ஸதி.
Saññākkhandhassa…pe… saṅkhārakkhandhassa…pe… viññāṇakkhandhassa udayaṃ passanto katamāni pañca lakkhaṇāni passati? Avijjāsamudayā viññāṇasamudayoti – paccayasamudayaṭṭhena viññāṇakkhandhassa udayaṃ passati. Taṇhāsamudayā viññāṇasamudayotipaccayasamudayaṭṭhena viññāṇakkhandhassa udayaṃ passati. Kammasamudayā viññāṇasamudayoti – paccayasamudayaṭṭhena viññāṇakkhandhassa udayaṃ passati. Nāmarūpasamudayā viññāṇasamudayoti – paccayasamudayaṭṭhena viññāṇakkhandhassa udayaṃ passati. Nibbattilakkhaṇaṃ passantopi viññāṇakkhandhassa udayaṃ passati. Viññāṇakkhandhassa udayaṃ passanto imāni pañca lakkhaṇāni passati.
வயங் பஸ்ஸந்தோ கதமானி பஞ்ச லக்க²ணானி பஸ்ஸதி? அவிஜ்ஜானிரோதா⁴ விஞ்ஞாணனிரோதோ⁴தி – பச்சயனிரோத⁴ட்டே²ன விஞ்ஞாணக்க²ந்த⁴ஸ்ஸ வயங் பஸ்ஸதி. தண்ஹானிரோதா⁴ விஞ்ஞாணனிரோதோ⁴தி – பச்சயனிரோத⁴ட்டே²ன விஞ்ஞாணக்க²ந்த⁴ஸ்ஸ வயங் பஸ்ஸதி. கம்மனிரோதா⁴ விஞ்ஞாணனிரோதோ⁴தி – பச்சயனிரோத⁴ட்டே²ன விஞ்ஞாணக்க²ந்த⁴ஸ்ஸ வயங் பஸ்ஸதி. நாமரூபனிரோதா⁴ விஞ்ஞாணனிரோதோ⁴தி – பச்சயனிரோத⁴ட்டே²ன விஞ்ஞாணக்க²ந்த⁴ஸ்ஸ வயங் பஸ்ஸதி. விபரிணாமலக்க²ணங் பஸ்ஸந்தோபி விஞ்ஞாணக்க²ந்த⁴ஸ்ஸ வயங் பஸ்ஸதி. விஞ்ஞாணக்க²ந்த⁴ஸ்ஸ வயங் பஸ்ஸந்தோ இமானி பஞ்ச லக்க²ணானி பஸ்ஸதி. உத³யப்³ப³யங் பஸ்ஸந்தோ இமானி த³ஸ லக்க²ணானி பஸ்ஸதி.
Vayaṃ passanto katamāni pañca lakkhaṇāni passati? Avijjānirodhā viññāṇanirodhoti – paccayanirodhaṭṭhena viññāṇakkhandhassa vayaṃ passati. Taṇhānirodhā viññāṇanirodhoti – paccayanirodhaṭṭhena viññāṇakkhandhassa vayaṃ passati. Kammanirodhā viññāṇanirodhoti – paccayanirodhaṭṭhena viññāṇakkhandhassa vayaṃ passati. Nāmarūpanirodhā viññāṇanirodhoti – paccayanirodhaṭṭhena viññāṇakkhandhassa vayaṃ passati. Vipariṇāmalakkhaṇaṃ passantopi viññāṇakkhandhassa vayaṃ passati. Viññāṇakkhandhassa vayaṃ passanto imāni pañca lakkhaṇāni passati. Udayabbayaṃ passanto imāni dasa lakkhaṇāni passati.
பஞ்சன்னங் க²ந்தா⁴னங் உத³யங் பஸ்ஸந்தோ இமானி பஞ்சவீஸதி லக்க²ணானி பஸ்ஸதி, வயங் பஸ்ஸந்தோ இமானி பஞ்சவீஸதி லக்க²ணானி பஸ்ஸதி, உத³யப்³ப³யங் பஸ்ஸந்தோ இமானி பஞ்ஞாஸ லக்க²ணானி பஸ்ஸதி. தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘பச்சுப்பன்னானங் த⁴ம்மானங் விபரிணாமானுபஸ்ஸனே பஞ்ஞா உத³யப்³ப³யானுபஸ்ஸனே ஞாணங்’’. ரூபக்க²ந்தோ⁴ 1 ஆஹாரஸமுத³யோ . வேத³னா, ஸஞ்ஞா, ஸங்கா²ரா – தயோ 2 க²ந்தா⁴ ப²ஸ்ஸஸமுத³யா. விஞ்ஞாணக்க²ந்தோ⁴ நாமரூபஸமுத³யோ.
Pañcannaṃ khandhānaṃ udayaṃ passanto imāni pañcavīsati lakkhaṇāni passati, vayaṃ passanto imāni pañcavīsati lakkhaṇāni passati, udayabbayaṃ passanto imāni paññāsa lakkhaṇāni passati. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘paccuppannānaṃ dhammānaṃ vipariṇāmānupassane paññā udayabbayānupassane ñāṇaṃ’’. Rūpakkhandho 3 āhārasamudayo . Vedanā, saññā, saṅkhārā – tayo 4 khandhā phassasamudayā. Viññāṇakkhandho nāmarūpasamudayo.
உத³யப்³ப³யஞாணனித்³தே³ஸோ ச²ட்டோ².
Udayabbayañāṇaniddeso chaṭṭho.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 6. உத³யப்³ப³யஞாணனித்³தே³ஸவண்ணனா • 6. Udayabbayañāṇaniddesavaṇṇanā
