| Library / Tipiṭaka / তিপিটক • Tipiṭaka / চূল়নিদ্দেস-অট্ঠকথা • Cūḷaniddesa-aṭṭhakathā |
৯. তোদেয্যমাণৰসুত্তনিদ্দেসৰণ্ণনা
9. Todeyyamāṇavasuttaniddesavaṇṇanā
৫৭. নৰমে তোদেয্যসুত্তে – ৰিমোক্খো তস্স কীদিসোতি তস্স কীদিসো ৰিমোক্খো ইচ্ছিতব্বোতি পুচ্ছতি।
57. Navame todeyyasutte – vimokkho tassa kīdisoti tassa kīdiso vimokkho icchitabboti pucchati.
৫৮. ইদানিস্স অঞ্ঞৰিমোক্খাভাৰং দস্সেন্তো ভগৰা দুতিযং গাথমাহ। তত্থ ৰিমোক্খো তস্স নাপরোতি তস্স অঞ্ঞো ৰিমোক্খো নত্থি।
58. Idānissa aññavimokkhābhāvaṃ dassento bhagavā dutiyaṃ gāthamāha. Tattha vimokkho tassa nāparoti tassa añño vimokkho natthi.
৫৯. এৰং ‘‘তণ্হক্খযো এৰ ৰিমোক্খো’’তি ৰুত্তেপি তমত্থং অসল্লক্খেন্তো ‘‘নিরাসসো সো উদ আসসানো’’তি পুন পুচ্ছতি। তত্থ উদ পঞ্ঞকপ্পীতি উদাহু সমাপত্তিঞাণাদিনা ঞাণেন তণ্হাকপ্পং ৰা দিট্ঠিকপ্পং ৰা কপ্পযতি।
59. Evaṃ ‘‘taṇhakkhayo eva vimokkho’’ti vuttepi tamatthaṃ asallakkhento ‘‘nirāsaso so uda āsasāno’’ti puna pucchati. Tattha uda paññakappīti udāhu samāpattiñāṇādinā ñāṇena taṇhākappaṃ vā diṭṭhikappaṃ vā kappayati.
৬০. অথস্স ভগৰা তং আচিক্খন্তো চতুত্থং গাথমাহ। তত্থ কামভৰেতি কামে চ ভৰে চ।
60. Athassa bhagavā taṃ ācikkhanto catutthaṃ gāthamāha. Tattha kāmabhaveti kāme ca bhave ca.
রূপে নাসীসতীতি চতুসমুট্ঠানিকে রূপারম্মণে ছন্দরাগৰসেন ন পত্থেতি। সদ্ধাদীসুপি এসেৰ নযো। পলিবোধট্ঠেন রাগো এৰ কিঞ্চনং রাগকিঞ্চনং মদনট্ঠেন ৰা। দোসকিঞ্চনাদীসুপি এসেৰ নযো। সেসং সব্বত্থ পাকটমেৰ।
Rūpe nāsīsatīti catusamuṭṭhānike rūpārammaṇe chandarāgavasena na pattheti. Saddhādīsupi eseva nayo. Palibodhaṭṭhena rāgo eva kiñcanaṃ rāgakiñcanaṃ madanaṭṭhena vā. Dosakiñcanādīsupi eseva nayo. Sesaṃ sabbattha pākaṭameva.
এৰং ভগৰা ইদম্পি সুত্তং অরহত্তনিকূটেনেৰ দেসেসি, দেসনাপরিযোসানে চ পুব্বসদিসো এৰ ধম্মাভিসমযো অহোসীতি।
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
সদ্ধম্মপ্পজ্জোতিকায চূল়নিদ্দেস-অট্ঠকথায
Saddhammappajjotikāya cūḷaniddesa-aṭṭhakathāya
তোদেয্যমাণৰসুত্তনিদ্দেসৰণ্ণনা নিট্ঠিতা।
Todeyyamāṇavasuttaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চূল়নিদ্দেসপাল়ি • Cūḷaniddesapāḷi
৯. তোদেয্যমাণৰপুচ্ছা • 9. Todeyyamāṇavapucchā
৯. তোদেয্যমাণৰপুচ্ছানিদ্দেসো • 9. Todeyyamāṇavapucchāniddeso
