| Library / Tipiṭaka / তিপিটক • Tipiṭaka / চূল়নিদ্দেস-অট্ঠকথা • Cūḷaniddesa-aṭṭhakathā |
১০. কপ্পমাণৰসুত্তনিদ্দেসৰণ্ণনা
10. Kappamāṇavasuttaniddesavaṇṇanā
৬১. দসমে কপ্পসুত্তনিদ্দেসে – মজ্ঝে সরস্মিন্তি পুরিমপচ্ছিমকোটিপঞ্ঞাণাভাৰতো মজ্ঝভূতে সংসারেতি ৰুত্তং হোতি। তিট্ঠতন্তি তিট্ঠমানানং। যথাযিদং নাপরং সিযাতি যথা ইদং দুক্খং পুন ন ভৰেয্য।
61. Dasame kappasuttaniddese – majjhe sarasminti purimapacchimakoṭipaññāṇābhāvato majjhabhūte saṃsāreti vuttaṃ hoti. Tiṭṭhatanti tiṭṭhamānānaṃ. Yathāyidaṃ nāparaṃ siyāti yathā idaṃ dukkhaṃ puna na bhaveyya.
আগমনন্তি পুব্বন্ততো ইধাগমনং। গমনন্তি ইতো পরলোকগমনং। গমনাগমনন্তি তদুভযৰসেন ৰুত্তং। কালন্তি মরণকালং। গতীতি নিব্বত্তি। ভৰাভৰোতি ভৰতো ভৰো। চুতি চাতি ভৰতো চৰনঞ্চ। উপপত্তি চাতি চুতস্স উপপত্তি চ। নিব্বত্তি চাতি পাতুভাৰো চ। ভেদো চাতি খন্ধভেদো চ। জাতি চাতি জননঞ্চ। জরা চাতি হানি চ। মরণঞ্চাতি জীৰিতিন্দ্রিযস্স চাগো চ। পুরিমাপি কোটি ন পঞ্ঞাযতীতি পুব্বাপি কোটি নত্থি ন সংৰিজ্জতি। তথা পচ্ছিমাপি কোটি।
Āgamananti pubbantato idhāgamanaṃ. Gamananti ito paralokagamanaṃ. Gamanāgamananti tadubhayavasena vuttaṃ. Kālanti maraṇakālaṃ. Gatīti nibbatti. Bhavābhavoti bhavato bhavo. Cuti cāti bhavato cavanañca. Upapatti cāti cutassa upapatti ca. Nibbatti cāti pātubhāvo ca. Bhedo cāti khandhabhedo ca. Jāti cāti jananañca. Jarā cāti hāni ca. Maraṇañcāti jīvitindriyassa cāgo ca. Purimāpi koṭi na paññāyatīti pubbāpi koṭi natthi na saṃvijjati. Tathā pacchimāpi koṭi.
এত্তকা জাতিযোতি এতপরমা জাতিযো। ৰট্টং ৰত্তীতি সংসারপৰত্তি। ততো পরং ন ৰত্ততীতি ততো উদ্ধং নপ্পৰত্ততি। হেৰং নত্থীতি এৰং নত্থি ন সংৰিজ্জতি। হি-ইতি নিপাতো। অনমতগ্গোযন্তি অযং সংসারো অৰিদিতগ্গো।
Ettakā jātiyoti etaparamā jātiyo. Vaṭṭaṃ vattīti saṃsārapavatti. Tato paraṃ na vattatīti tato uddhaṃ nappavattati. Hevaṃ natthīti evaṃ natthi na saṃvijjati. Hi-iti nipāto. Anamataggoyanti ayaṃ saṃsāro aviditaggo.
অৰিজ্জানীৰরণানন্তি অৰিজ্জায আৰরিতানং। তণ্হাসংযোজনানন্তি কামরাগসঙ্খাততণ্হাবন্ধনবদ্ধানং। সন্ধাৰতন্তি কামধাতুযা পুনপ্পুনং ধাৰন্তানং। সংসরতন্তি রূপারূপধাতুযা সংসরন্তানং। দুক্খং পচ্চনুভূতন্তি কাযিকচেতসিকদুক্খং অনুভূতং ৰিন্দিতং। তিব্বন্তি বহলং। ব্যসনন্তি অৰড্ঢি ৰিনাসো। কটসী ৰড্ঢিতাতি সুসানৰড্ঢিতং। অলমেৰাতি যুত্তমেৰ । সব্বসঙ্খারেসূতি তেভূমকসঙ্খারেসু। নিব্বিন্দিতুন্তি উক্কণ্ঠিতুং। ৰিরজ্জিতুন্তি ৰিরাগং উপ্পাদেতুং। ৰিমুচ্চিতুন্তি মোচেতুং। ৰট্টং ৰত্তিস্সতীতি সংসারপৰত্তং তেভূমকৰট্টং অনাগতে পৰত্তিস্সতি। ততো পরং ন ৰত্তিস্সতীতি ততো উদ্ধং অনাগতে সংসারপৰত্তং নপ্পৰত্তিস্সতি। জাতিভযেতি জাতিং পটিচ্চ উপ্পজ্জনকভযে। জরাভযাদীসুপি এসেৰ নযো।
Avijjānīvaraṇānanti avijjāya āvaritānaṃ. Taṇhāsaṃyojanānanti kāmarāgasaṅkhātataṇhābandhanabaddhānaṃ. Sandhāvatanti kāmadhātuyā punappunaṃ dhāvantānaṃ. Saṃsaratanti rūpārūpadhātuyā saṃsarantānaṃ. Dukkhaṃ paccanubhūtanti kāyikacetasikadukkhaṃ anubhūtaṃ vinditaṃ. Tibbanti bahalaṃ. Byasananti avaḍḍhi vināso. Kaṭasī vaḍḍhitāti susānavaḍḍhitaṃ. Alamevāti yuttameva . Sabbasaṅkhāresūti tebhūmakasaṅkhāresu. Nibbinditunti ukkaṇṭhituṃ. Virajjitunti virāgaṃ uppādetuṃ. Vimuccitunti mocetuṃ. Vaṭṭaṃ vattissatīti saṃsārapavattaṃ tebhūmakavaṭṭaṃ anāgate pavattissati. Tato paraṃ na vattissatīti tato uddhaṃ anāgate saṃsārapavattaṃ nappavattissati. Jātibhayeti jātiṃ paṭicca uppajjanakabhaye. Jarābhayādīsupi eseva nayo.
৬২-৩. অথস্স ভগৰা তমত্থং ব্যাকরোন্তো উপরূপরিগাথাযো অভাসি। দুতিযগাথা ৰুত্তত্থাযেৰ। ততিযগাথায অকিঞ্চনন্তি কিঞ্চনপটিপক্খং। অনাদানন্তি আদানপটিপক্খং, কিঞ্চনাদানৰূপসমন্তি ৰুত্তং হোতি। অনাপরন্তি অপরপটিভাগদীপৰিরহিতং, সেট্ঠন্তি ৰুত্তং হোতি।
62-3. Athassa bhagavā tamatthaṃ byākaronto uparūparigāthāyo abhāsi. Dutiyagāthā vuttatthāyeva. Tatiyagāthāya akiñcananti kiñcanapaṭipakkhaṃ. Anādānanti ādānapaṭipakkhaṃ, kiñcanādānavūpasamanti vuttaṃ hoti. Anāparanti aparapaṭibhāgadīpavirahitaṃ, seṭṭhanti vuttaṃ hoti.
৬৪. চতুত্থগাথায ন তে মারস্স পদ্ধগূতি তে মারস্স পদ্ধচরা পরিচারিকা সিস্সা ন হোন্তি।
64. Catutthagāthāya na te mārassa paddhagūti te mārassa paddhacarā paricārikā sissā na honti.
মহাজনং পাসে নিযোজেত্ৰা মারেতীতি মারো। অকুসলকম্মে নিযুত্তত্তা কণ্হো। ছসু দেৰলোকেসু অধিপতিত্তা অধিপতি। অকুসলানং ধম্মানং অন্তং গতত্তা অন্তগূ। পাপজনং ন মুঞ্চতীতি নমুচি। সতিৰিপ্পৰাসপ্পমত্তপুগ্গলানং ঞাতকোতি পমত্তবন্ধু। সেসং সব্বত্থ পাকটমেৰ।
Mahājanaṃ pāse niyojetvā māretīti māro. Akusalakamme niyuttattā kaṇho. Chasu devalokesu adhipatittā adhipati. Akusalānaṃ dhammānaṃ antaṃ gatattā antagū. Pāpajanaṃ na muñcatīti namuci. Sativippavāsappamattapuggalānaṃ ñātakoti pamattabandhu. Sesaṃ sabbattha pākaṭameva.
এৰং ভগৰা ইদম্পি সুত্তং অরহত্তনিকূটেনেৰ দেসেসি, দেসনাপরিযোসানে চ পুব্বসদিসোৰ ধম্মাভিসমযো অহোসীতি।
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadisova dhammābhisamayo ahosīti.
সদ্ধম্মপ্পজ্জোতিকায চূল়নিদ্দেস-অট্ঠকথায
Saddhammappajjotikāya cūḷaniddesa-aṭṭhakathāya
কপ্পমাণৰসুত্তনিদ্দেসৰণ্ণনা নিট্ঠিতা।
Kappamāṇavasuttaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চূল়নিদ্দেসপাল়ি • Cūḷaniddesapāḷi
১০. কপ্পমাণৰপুচ্ছা • 10. Kappamāṇavapucchā
১০. কপ্পমাণৰপুচ্ছানিদ্দেসো • 10. Kappamāṇavapucchāniddeso
