| Library / Tipiṭaka / তিপিটক • Tipiṭaka / চূল়নিদ্দেস-অট্ঠকথা • Cūḷaniddesa-aṭṭhakathā |
২. তিস্সমেত্তেয্যমাণৰসুত্তনিদ্দেসৰণ্ণনা
2. Tissametteyyamāṇavasuttaniddesavaṇṇanā
৯. দুতিযে তিস্সমেত্তেয্যসুত্তনিদ্দেসে – কোধ সন্তুসিতোতি নিট্ঠিতে পন অজিতসুত্তে ‘‘কথং লোকং অৰেক্খন্তং, মচ্চুরাজা ন পস্সতী’’তি (সু॰ নি॰ ১১২৪; চূল়নি॰ মোঘরাজমাণৰপুচ্ছা ১৪৩) এৰং মোঘরাজা পুচ্ছিতুং আরভি। ‘‘ন তাৰস্স ইন্দ্রিযানি পরিপাকং গতানী’’তি ঞত্ৰা ভগৰা ‘‘তিট্ঠ ত্ৰং, মোঘরাজ, অঞ্ঞো পুচ্ছতূ’’তি পটিক্খিপি। ততো তিস্সমেত্তেয্যো অত্তনো সংসযং পুচ্ছন্তো ‘‘কোধাতি গাথমাহ। তত্থ কোধ সন্তুসিতোতি কো ইধ সত্তো তুট্ঠো। ইঞ্জিতাতি তণ্হাদিট্ঠিৰিপ্ফন্দিতানি। উভন্তমভিঞ্ঞাযাতি উভো অন্তে অভিজানিত্ৰা। মন্তা ন লিপ্পতীতি পঞ্ঞায ন লিপ্পতি।
9. Dutiye tissametteyyasuttaniddese – kodha santusitoti niṭṭhite pana ajitasutte ‘‘kathaṃ lokaṃ avekkhantaṃ, maccurājā na passatī’’ti (su. ni. 1124; cūḷani. mogharājamāṇavapucchā 143) evaṃ mogharājā pucchituṃ ārabhi. ‘‘Na tāvassa indriyāni paripākaṃ gatānī’’ti ñatvā bhagavā ‘‘tiṭṭha tvaṃ, mogharāja, añño pucchatū’’ti paṭikkhipi. Tato tissametteyyo attano saṃsayaṃ pucchanto ‘‘kodhāti gāthamāha. Tattha kodha santusitoti ko idha satto tuṭṭho. Iñjitāti taṇhādiṭṭhivipphanditāni. Ubhantamabhiññāyāti ubho ante abhijānitvā. Mantā na lippatīti paññāya na lippati.
পরিপুণ্ণসঙ্কপ্পোতি নেক্খম্মাদিৰিতক্কেহি পরিপুণ্ণসঙ্কপ্পত্তা পরিপুণ্ণমনোরথো।
Paripuṇṇasaṅkappoti nekkhammādivitakkehi paripuṇṇasaṅkappattā paripuṇṇamanoratho.
তণ্হিঞ্জিতন্তি তণ্হায চলিতং। দিট্ঠিঞ্জিতাদীসুপি এসেৰ নযো। কামিঞ্জিতন্তি কিলেসকামেহি ইঞ্জিতং ফন্দিতং। ‘‘কম্মিঞ্জিত’’ন্তিপি পাঠো, তং ন সুন্দরং।
Taṇhiñjitanti taṇhāya calitaṃ. Diṭṭhiñjitādīsupi eseva nayo. Kāmiñjitanti kilesakāmehi iñjitaṃ phanditaṃ. ‘‘Kammiñjita’’ntipi pāṭho, taṃ na sundaraṃ.
মহন্তো পুরিসোতি মহাপুরিসো। উত্তমো পুরিসোতি অগ্গপুরিসো। পধানো পুরিসোতি সেট্ঠপুরিসো। অলামকো পুরিসোতি ৰিসিট্ঠপুরিসো। জেট্ঠকো পুরিসোতি পামোক্খপুরিসো। ন হেট্ঠিমকো পুরিসোতি উত্তমপুরিসো। পুরিসানং কোটিপ্পত্তো পুরিসোতি পধানপুরিসো। সব্বেসং ইচ্ছিতো পুরিসোতি পৰরপুরিসো।
Mahanto purisoti mahāpuriso. Uttamo purisoti aggapuriso. Padhāno purisoti seṭṭhapuriso. Alāmako purisoti visiṭṭhapuriso. Jeṭṭhako purisoti pāmokkhapuriso. Na heṭṭhimako purisoti uttamapuriso. Purisānaṃ koṭippatto purisoti padhānapuriso. Sabbesaṃ icchito purisoti pavarapuriso.
সিব্বিনিমচ্চগাতি তণ্হং অতিঅগা, অতিক্কমিত্ৰা ঠিতো। উপচ্চগাতি ভুসং অতিঅগা।
Sibbinimaccagāti taṇhaṃ atiagā, atikkamitvā ṭhito. Upaccagāti bhusaṃ atiagā.
১০. তস্সেতমত্থং ভগৰা ব্যাকরোন্তো ‘‘কামেসূ’’তি গাথাদ্ৰযমাহ। তত্থ কামেসু ব্রহ্মচরিযৰাতি কামনিমিত্তং ব্রহ্মচরিযৰা, কামেসু আদীনৰং দিস্ৰা মগ্গব্রহ্মচরিযেন সমন্নাগতোতি ৰুত্তং হোতি। এত্তাৰতা সন্তুসিততং দস্সেতি। ‘‘ৰীততণ্হো’’তিআদীহি অনিঞ্জিততং। তত্থ সঙ্খায নিব্বুতোতি অনিচ্চাদিৰসেন ধম্মে ৰীমংসিত্ৰা রাগাদিনিব্বানেন নিব্বুতো।
10. Tassetamatthaṃ bhagavā byākaronto ‘‘kāmesū’’ti gāthādvayamāha. Tattha kāmesu brahmacariyavāti kāmanimittaṃ brahmacariyavā, kāmesu ādīnavaṃ disvā maggabrahmacariyena samannāgatoti vuttaṃ hoti. Ettāvatā santusitataṃ dasseti. ‘‘Vītataṇho’’tiādīhi aniñjitataṃ. Tattha saṅkhāya nibbutoti aniccādivasena dhamme vīmaṃsitvā rāgādinibbānena nibbuto.
অসদ্ধম্মসমাপত্তিযাতি নীচধম্মসমাযোগতো। আরতীতি আরকা রমনং। ৰিরতীতি তায ৰিনা রমনং। পটিৰিরতীতি পটিনিৰত্তিত্ৰা তায ৰিনা রমনং। ৰেরমণীতি ৰেরৰিনাসনং। অকিরিযাতি কিরিযাপচ্ছিন্দনং। অকরণন্তি করণপরিচ্ছিন্দনং। অনজ্ঝাপত্তীতি অনাপজ্জনতা। ৰেলাঅনতিক্কমোতি সীমাঅনতিক্কমো। সেসং তত্থ তত্থ ৰুত্তনযত্তা পাকটমেৰ।
Asaddhammasamāpattiyāti nīcadhammasamāyogato. Āratīti ārakā ramanaṃ. Viratīti tāya vinā ramanaṃ. Paṭiviratīti paṭinivattitvā tāya vinā ramanaṃ. Veramaṇīti veravināsanaṃ. Akiriyāti kiriyāpacchindanaṃ. Akaraṇanti karaṇaparicchindanaṃ. Anajjhāpattīti anāpajjanatā. Velāanatikkamoti sīmāanatikkamo. Sesaṃ tattha tattha vuttanayattā pākaṭameva.
এৰং ভগৰা ইদম্পি সুত্তং অরহত্তনিকূটেনেৰ দেসেসি। দেসনাপরিযোসানে অযম্পি ব্রাহ্মণো অরহত্তে পতিট্ঠাসি সদ্ধিং অন্তেৰাসিকসহস্সেন, অঞ্ঞেসঞ্চ অনেকসহস্সানং ধম্মচক্খুং উদপাদি। সেসং পুব্বসদিসমেৰ।
Evaṃ bhagavā idampi suttaṃ arahattanikūṭeneva desesi. Desanāpariyosāne ayampi brāhmaṇo arahatte patiṭṭhāsi saddhiṃ antevāsikasahassena, aññesañca anekasahassānaṃ dhammacakkhuṃ udapādi. Sesaṃ pubbasadisameva.
সদ্ধম্মপ্পজ্জোতিকায চূল়নিদ্দেস-অট্ঠকথায
Saddhammappajjotikāya cūḷaniddesa-aṭṭhakathāya
তিস্সমেত্তেয্যমাণৰসুত্তনিদ্দেসৰণ্ণনা নিট্ঠিতা।
Tissametteyyamāṇavasuttaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চূল়নিদ্দেসপাল়ি • Cūḷaniddesapāḷi
২. তিস্সমেত্তেয্যমাণৰপুচ্ছা • 2. Tissametteyyamāṇavapucchā
২. তিস্সমেত্তেয্যমাণৰপুচ্ছানিদ্দেসো • 2. Tissametteyyamāṇavapucchāniddeso
