| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៣. តិសរណគមនិយត្ថេរអបទានវណ្ណនា
3. Tisaraṇagamaniyattheraapadānavaṇṇanā
នគរេ ពន្ធុមតិយាតិអាទិកំ អាយស្មតោ តិសរណគមនិយត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ ពន្ធុមតីនគរេ កុលគេហេ និព្ពត្តិត្វា អន្ធមាតាបិតរោ ឧបដ្ឋាសិ។ សោ ឯកទិវសំ ចិន្តេសិ – ‘‘អហំ មាតាបិតរោ ឧបដ្ឋហន្តោ បព្ពជិតុំ ន លភាមិ, យំនូនាហំ តីណិ សរណានិ គណ្ហិស្សាមិ , ឯវំ ទុគ្គតិតោ មោចេស្សាមី’’តិ និសភំ នាម វិបស្សិស្ស ភគវតោ អគ្គសាវកំ ឧបសង្កមិត្វា តីណិ សរណានិ គណ្ហិ។ សោ តានិ វស្សសតសហស្សានិ រក្ខិត្វា តេនេវ កម្មេន តាវតិំសភវនេ និព្ពត្តោ, តតោ បរំ ទេវមនុស្សេសុ សំសរន្តោ ឧភយសម្បត្តិយោ អនុភវិត្វា ឥមស្មិំ ពុទ្ធុប្បាទេ សាវត្ថិនគរេ មហាសាលកុលេ និព្ពត្តោ វិញ្ញុតំ បត្តោ សត្តវស្សិកោវ ទារកេហិ បរិវុតោ ឯកំ សង្ឃារាមំ អគមាសិ។ តត្ថ ឯកោ ខីណាសវត្ថេរោ តស្ស ធម្មំ ទេសេត្វា សរណានិ អទាសិ។ សោ តានិ គហេត្វា បុព្ពេ អត្តនោ រក្ខិតានិ សរណានិ សរិត្វា វិបស្សនំ វឌ្ឍេត្វា អរហត្តំ បាបុណិ។ តំ អរហត្តប្បត្តំ ភគវា ឧបសម្បាទេសិ។
Nagare bandhumatiyātiādikaṃ āyasmato tisaraṇagamaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle bandhumatīnagare kulagehe nibbattitvā andhamātāpitaro upaṭṭhāsi. So ekadivasaṃ cintesi – ‘‘ahaṃ mātāpitaro upaṭṭhahanto pabbajituṃ na labhāmi, yaṃnūnāhaṃ tīṇi saraṇāni gaṇhissāmi , evaṃ duggatito mocessāmī’’ti nisabhaṃ nāma vipassissa bhagavato aggasāvakaṃ upasaṅkamitvā tīṇi saraṇāni gaṇhi. So tāni vassasatasahassāni rakkhitvā teneva kammena tāvatiṃsabhavane nibbatto, tato paraṃ devamanussesu saṃsaranto ubhayasampattiyo anubhavitvā imasmiṃ buddhuppāde sāvatthinagare mahāsālakule nibbatto viññutaṃ patto sattavassikova dārakehi parivuto ekaṃ saṅghārāmaṃ agamāsi. Tattha eko khīṇāsavatthero tassa dhammaṃ desetvā saraṇāni adāsi. So tāni gahetvā pubbe attano rakkhitāni saraṇāni saritvā vipassanaṃ vaḍḍhetvā arahattaṃ pāpuṇi. Taṃ arahattappattaṃ bhagavā upasampādesi.
១០៦. សោ អរហត្តប្បត្តោ ឧបសម្បន្នោ ហុត្វា អត្តនោ បុព្ពកម្មំ សរិត្វា សោមនស្សវសេន បុព្ពចរិតាបទានំ បកាសេន្តោ នគរេ ពន្ធុមតិយាតិអាទិមាហ។ តត្ថ មាតុ ឧបដ្ឋាកោ អហុន្តិ អហំ មាតាបិតូនំ ឧបដ្ឋាកោ ភរកោ ពន្ធុមតីនគរេ អហោសិន្តិ សម្ពន្ធោ។
106. So arahattappatto upasampanno hutvā attano pubbakammaṃ saritvā somanassavasena pubbacaritāpadānaṃ pakāsento nagare bandhumatiyātiādimāha. Tattha mātu upaṭṭhāko ahunti ahaṃ mātāpitūnaṃ upaṭṭhāko bharako bandhumatīnagare ahosinti sambandho.
១០៨. តមន្ធការបិហិតាតិ មោហន្ធការេន បិហិតា ឆាទិតា។ តិវិធគ្គីហិ ឌយ្ហរេតិ រាគគ្គិទោសគ្គិមោហគ្គិសង្ខាតេហិ តីហិ អគ្គីហិ ឌយ្ហរេ ឌយ្ហន្តិ សព្ពេ សត្តាតិ សម្ពន្ធោ។
108.Tamandhakārapihitāti mohandhakārena pihitā chāditā. Tividhaggīhi ḍayhareti rāgaggidosaggimohaggisaṅkhātehi tīhi aggīhi ḍayhare ḍayhanti sabbe sattāti sambandho.
១១៤. អដ្ឋ ហេតូ លភាមហន្តិ អដ្ឋ ការណានិ សុខស្ស បច្ចយភូតានិ ការណានិ លភាមិ អហន្តិ អត្ថោ។ សេសំ សុវិញ្ញេយ្យមេវាតិ។
114.Aṭṭha hetū labhāmahanti aṭṭha kāraṇāni sukhassa paccayabhūtāni kāraṇāni labhāmi ahanti attho. Sesaṃ suviññeyyamevāti.
តិសរណគមនិយត្ថេរអបទានវណ្ណនា សមត្តា។
Tisaraṇagamaniyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៣. តិសរណគមនិយត្ថេរអបទានំ • 3. Tisaraṇagamaniyattheraapadānaṃ
