| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៦. តិបុប្ផិយត្ថេរអបទានវណ្ណនា
6. Tipupphiyattheraapadānavaṇṇanā
មិគលុទ្ទោ បុរេ អាសិន្តិអាទិកំ អាយស្មតោ តិបុប្ផិយត្ថេរស្ស អបទានំ។ អយម្បិ បុរិមពុទ្ធេសុ កតាធិការោ អន្តរា កេនចិ អកុសលច្ឆិទ្ទេន វិបស្សិស្ស ភគវតោ កាលេ នេសាទកុលេ និព្ពត្តោ មិគលុទ្ទោ ហុត្វា អរញ្ញេ វិហរតិ។ តទា វិបស្សិស្ស ភគវតោ បាដលិពោធិំ សម្បុណ្ណបត្តបល្លវំ ហរិតវណ្ណំ នីលោភាសំ មនោរមំ ទិស្វា តីហិ បុប្ផេហិ បូជេត្វា បុរាណបត្តំ ឆឌ្ឌេត្វា ភគវតោ សម្មុខា វិយ បាដលិមហាពោធិំ វន្ទិ។ សោ តេន បុញ្ញេន តតោ ចុតោ ទេវលោកេ ឧប្បន្នោ តត្ថ ទិព្ពសម្បត្តិំ អបរាបរំ អនុភវិត្វា តតោ ចុតោ មនុស្សេសុ ជាតោ តត្ថ ចក្កវត្តិសម្បត្តិអាទយោ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វុទ្ធិមន្វាយ សត្ថុ ធម្មទេសនំ សុត្វា បដិលទ្ធសោមនស្សហទយោ គេហំ បហាយ បព្ពជិត្វា នចិរស្សេវ អរហា អហោសិ។
Migaluddo pure āsintiādikaṃ āyasmato tipupphiyattherassa apadānaṃ. Ayampi purimabuddhesu katādhikāro antarā kenaci akusalacchiddena vipassissa bhagavato kāle nesādakule nibbatto migaluddo hutvā araññe viharati. Tadā vipassissa bhagavato pāṭalibodhiṃ sampuṇṇapattapallavaṃ haritavaṇṇaṃ nīlobhāsaṃ manoramaṃ disvā tīhi pupphehi pūjetvā purāṇapattaṃ chaḍḍetvā bhagavato sammukhā viya pāṭalimahābodhiṃ vandi. So tena puññena tato cuto devaloke uppanno tattha dibbasampattiṃ aparāparaṃ anubhavitvā tato cuto manussesu jāto tattha cakkavattisampattiādayo anubhavitvā imasmiṃ buddhuppāde ekasmiṃ kulagehe nibbatto vuddhimanvāya satthu dhammadesanaṃ sutvā paṭiladdhasomanassahadayo gehaṃ pahāya pabbajitvā nacirasseva arahā ahosi.
៣១. សោ ឯវំ សិទ្ធិប្បត្តោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ មិគលុទ្ទោ បុរេ អាសិន្តិអាទិមាហ។ តត្ថ មរណាយ គច្ឆតិ បាបុណាតីតិ មិគោ, អថ វា មគយមានោ ឥហតិ បវត្តតីតិ មិគោ, មិគានំ មារណេ លុទ្ទោ លោភី គេធោតិ មិគលុទ្ទោ, បុរេ មយ្ហំ បុញ្ញករណសមយេ កាននសង្ខាតេ មហាអរញ្ញេ មិគលុទ្ទោ អាសិន្តិ សម្ពន្ធោ។ បាដលិំ ហរិតំ ទិស្វាតិ តត្ថ បការេន តលេន រត្តវណ្ណេន ភវតីតិ បាដលិ , បុប្ផានំ រត្តវណ្ណតាយ បាដលីតិ វោហារោ, បត្តានំ ហរិតតាយ ហរិតំ នីលវណ្ណំ បាដលិពោធិំ ទិស្វាតិ អត្ថោ។ សេសំ សព្ពត្ថ ឧត្តានត្ថមេវាតិ។
31. So evaṃ siddhippatto attano pubbakammaṃ saritvā somanassajāto pubbacaritāpadānaṃ pakāsento migaluddo pure āsintiādimāha. Tattha maraṇāya gacchati pāpuṇātīti migo, atha vā magayamāno ihati pavattatīti migo, migānaṃ māraṇe luddo lobhī gedhoti migaluddo, pure mayhaṃ puññakaraṇasamaye kānanasaṅkhāte mahāaraññe migaluddo āsinti sambandho. Pāṭaliṃ haritaṃ disvāti tattha pakārena talena rattavaṇṇena bhavatīti pāṭali , pupphānaṃ rattavaṇṇatāya pāṭalīti vohāro, pattānaṃ haritatāya haritaṃ nīlavaṇṇaṃ pāṭalibodhiṃ disvāti attho. Sesaṃ sabbattha uttānatthamevāti.
តិបុប្ផិយត្ថេរអបទានវណ្ណនា សមត្តា។
Tipupphiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៦. តិបុប្ផិយត្ថេរអបទានំ • 6. Tipupphiyattheraapadānaṃ
