| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៧. តិណសូលកត្ថេរអបទានវណ្ណនា
7. Tiṇasūlakattheraapadānavaṇṇanā
ហិមវន្តស្សាវិទូរេតិអាទិកំ អាយស្មតោ តិណសូលកត្ថេរស្ស អបទានំ។ អយម្បិ ថេរោ បុរិមជិនវរេសុ កតបុញ្ញសម្ភារោ ឧប្បន្នុប្បន្នភវេ កុសលានិ ឧបចិនន្តោ សិខិស្ស ភគវតោ កាលេ កុលគេហេ និព្ពត្តោ ឃរាវាសំ សណ្ឋបេត្វា តត្ថ ទោសំ ទិស្វា តំ បហាយ តាបសបព្ពជ្ជំ បព្ពជិត្វា វសន្តោ ហិមវន្តសមីបេ ភូតគណេ នាម បព្ពតេ វសន្តំ ឯកតំ វិវេកមនុព្រូហន្តំ សិខិំ សម្ពុទ្ធំ ទិស្វា បសន្នមានសោ តិណសូលបុប្ផំ គហេត្វា បាទមូលេ បូជេសិ។ ពុទ្ធោបិ តស្ស អនុមោទនំ អកាសិ។
Himavantassāvidūretiādikaṃ āyasmato tiṇasūlakattherassa apadānaṃ. Ayampi thero purimajinavaresu katapuññasambhāro uppannuppannabhave kusalāni upacinanto sikhissa bhagavato kāle kulagehe nibbatto gharāvāsaṃ saṇṭhapetvā tattha dosaṃ disvā taṃ pahāya tāpasapabbajjaṃ pabbajitvā vasanto himavantasamīpe bhūtagaṇe nāma pabbate vasantaṃ ekataṃ vivekamanubrūhantaṃ sikhiṃ sambuddhaṃ disvā pasannamānaso tiṇasūlapupphaṃ gahetvā pādamūle pūjesi. Buddhopi tassa anumodanaṃ akāsi.
៣៥. សោ តេន បុញ្ញេន ទេវមនុស្សេសុ សំសរន្តោ ឧភយសម្បត្តិយោ អនុភវិត្វា ឥមស្មិំ ពុទ្ធុប្បាទេ សាវត្ថិយំ វិភវសម្បន្នេ ឯកស្មិំ កុលេ និព្ពត្តោ វុទ្ធិមន្វាយ សាសនេ បសន្នោ បព្ពជិត្វា ឧបនិស្សយសម្បន្នត្តា នចិរស្សេវ អរហត្តំ បាបុណិត្វា បុព្ពកម្មំ សរិត្វា សោមនស្សប្បត្តោ បុព្ពចរិតាបទានំ បកាសេន្តោ ហិមវន្តស្សាវិទូរេតិអាទិមាហ។ ភូតគណោ នាម បព្ពតោតិ ភូតគណានំ ទេវយក្ខសមូហានំ អាវាសភូតត្តា ភវនសទិសត្តា អវិរូឡ្ហភាវេន បវត្តត្តា ច ភូតគណោ នាម បព្ពតោ, តស្មិំ ឯកោ អទុតិយោ ជិនោ ជិតមារោ ពុទ្ធោ វសតេ ទិព្ពព្រហ្មអរិយឥរិយាបថវិហារេហិ វិហរតីតិ អត្ថោ។
35. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ vibhavasampanne ekasmiṃ kule nibbatto vuddhimanvāya sāsane pasanno pabbajitvā upanissayasampannattā nacirasseva arahattaṃ pāpuṇitvā pubbakammaṃ saritvā somanassappatto pubbacaritāpadānaṃ pakāsento himavantassāvidūretiādimāha. Bhūtagaṇo nāma pabbatoti bhūtagaṇānaṃ devayakkhasamūhānaṃ āvāsabhūtattā bhavanasadisattā avirūḷhabhāvena pavattattā ca bhūtagaṇo nāma pabbato, tasmiṃ eko adutiyo jino jitamāro buddho vasate dibbabrahmaariyairiyāpathavihārehi viharatīti attho.
៣៦. ឯកូនសតសហស្សំ , កប្បំ ន វិនិបាតិកោតិ តេន តិណសូលបុប្ផបូជាករណផលេន និរន្តរំ ឯកូនសតសហស្សកប្បានំ អវិនិបាតកោ ចតុរាបាយវិនិមុត្តោ សគ្គសម្បត្តិភវមេវ ឧបបន្នោតិ អត្ថោ។ សេសំ សុវិញ្ញេយ្យមេវាតិ។
36.Ekūnasatasahassaṃ , kappaṃ na vinipātikoti tena tiṇasūlapupphapūjākaraṇaphalena nirantaraṃ ekūnasatasahassakappānaṃ avinipātako caturāpāyavinimutto saggasampattibhavameva upapannoti attho. Sesaṃ suviññeyyamevāti.
តិណសូលកត្ថេរអបទានវណ្ណនា សមត្តា។
Tiṇasūlakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៧. តិណសូលកត្ថេរអបទានំ • 7. Tiṇasūlakattheraapadānaṃ
