| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៩. តិមិរវគ្គោ
9. Timiravaggo
១. តិមិរបុប្ផិយត្ថេរអបទានវណ្ណនា
1. Timirapupphiyattheraapadānavaṇṇanā
ចន្ទភាគានទីតីរេតិអាទិកំ អាយស្មតោ តិមិរបុប្ផិយត្ថេរស្ស អបទានំ។ កា ឧប្បត្តិ? អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សិទ្ធត្ថស្ស ភគវតោ កាលេ ឯកស្មិំ កុលគេហេ និព្ពត្តោ វុទ្ធិប្បត្តោ ឃរាវាសំ សណ្ឋបេត្វា វសន្តោ កាមេសុ អាទីនវំ ទិស្វា ឃរាវាសំ បហាយ តាបសបព្ពជ្ជំ បព្ពជិត្វា ចន្ទភាគាយ នទិយា សមីបេ វសតិ, វិវេកកាមតាយ ហិមវន្តំ គន្ត្វា និសិន្នំ សិទ្ធត្ថំ ភគវន្តំ ទិស្វា វន្ទិត្វា តស្ស គុណំ បសីទិត្វា តិមិរបុប្ផំ គហេត្វា បូជេសិ។ សោ តេន បុញ្ញេន ទេវេសុ ច មនុស្សេសុ ច សម្បត្តិមនុភវន្តោ សំសរិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វុទ្ធិមន្វាយ សត្ថរិ បសីទិត្វា បព្ពជិតោ នចិរស្សេវ អរហា អហោសិ។
Candabhāgānadītīretiādikaṃ āyasmato timirapupphiyattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto gharāvāsaṃ saṇṭhapetvā vasanto kāmesu ādīnavaṃ disvā gharāvāsaṃ pahāya tāpasapabbajjaṃ pabbajitvā candabhāgāya nadiyā samīpe vasati, vivekakāmatāya himavantaṃ gantvā nisinnaṃ siddhatthaṃ bhagavantaṃ disvā vanditvā tassa guṇaṃ pasīditvā timirapupphaṃ gahetvā pūjesi. So tena puññena devesu ca manussesu ca sampattimanubhavanto saṃsaritvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
១. សោ អបរភាគេ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ ចន្ទភាគានទីតីរេតិអាទិមាហ។ តស្សត្ថោ ហេដ្ឋា វុត្តោវ។ អនុភោតំ វជាមហន្តិ គង្គាយ អាសន្នេ វសនភាវេន សព្ពត្ថ រម្មភាវេន គង្គាតោ ហេដ្ឋា សោតានុសារេន អហំ វជាមិ គច្ឆាមិ តត្ថ តត្ថ វសាមីតិ អត្ថោ។ និសិន្នំ សមណំ ទិស្វាតិ សមិតបាបត្តា សោសិតបាបត្តា សមណសង្ខាតំ សម្មាសម្ពុទ្ធំ ទិស្វាតិ អត្ថោ។
1. So aparabhāge pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tassattho heṭṭhā vuttova. Anubhotaṃ vajāmahanti gaṅgāya āsanne vasanabhāvena sabbattha rammabhāvena gaṅgāto heṭṭhā sotānusārena ahaṃ vajāmi gacchāmi tattha tattha vasāmīti attho. Nisinnaṃ samaṇaṃ disvāti samitapāpattā sositapāpattā samaṇasaṅkhātaṃ sammāsambuddhaṃ disvāti attho.
២. ឯវំ ចិន្តេសហំ តទាតិ អយំ ភគវា សយំ តិណ្ណោ សព្ពសត្តេ តារយិស្សតិ សំសារតោ ឧត្តារេតិ សយំ កាយទ្វារាទីហិ ទមិតោ អយំ ភគវា បរេ ទមេតិ។
2.Evaṃ cintesahaṃ tadāti ayaṃ bhagavā sayaṃ tiṇṇo sabbasatte tārayissati saṃsārato uttāreti sayaṃ kāyadvārādīhi damito ayaṃ bhagavā pare dameti.
៣. សយំ អស្សត្ថោ អស្សាសម្បត្តោ, កិលេសបរិឡាហតោ មុត្តោ សព្ពសត្តេ អស្សាសេតិ, សន្តភាវំ អាបាបេតិ។ សយំ សន្តោ សន្តកាយចិត្តោ បរេសំ សន្តកាយចិត្តំ បាបេតិ។ សយំ មុត្តោ សំសារតោ មុច្ចិតោ បរេ សំសារតោ មោចយិស្សតិ។ សោ អយំ ភគវា សយំ និព្ពុតោ កិលេសគ្គីហិ និព្ពុតោ បរេសម្បិ កិលេសគ្គីហិ និព្ពាបេស្សតីតិ អហំ តទា ឯវំ ចិន្តេសិន្តិ អត្ថោ។
3. Sayaṃ assattho assāsampatto, kilesapariḷāhato mutto sabbasatte assāseti, santabhāvaṃ āpāpeti. Sayaṃ santo santakāyacitto paresaṃ santakāyacittaṃ pāpeti. Sayaṃ mutto saṃsārato muccito pare saṃsārato mocayissati. So ayaṃ bhagavā sayaṃ nibbuto kilesaggīhi nibbuto paresampi kilesaggīhi nibbāpessatīti ahaṃ tadā evaṃ cintesinti attho.
៤. គហេត្វា តិមិរបុប្ផន្តិ សកលំ វនន្តំ នីលកាឡរំសីហិ អន្ធការំ វិយ កុរុមានំ ខាយតីតិ តិមិរំ បុប្ផំ តំ គហេត្វា កណ្ណិកាវណ្ដំ គហេត្វា មត្ថកេ សីសស្ស ឧបរិ អាកាសេ ឱកិរិំ បូជេសិន្តិ អត្ថោ។ សេសំ ឧត្តានត្ថមេវាតិ។
4.Gahetvā timirapupphanti sakalaṃ vanantaṃ nīlakāḷaraṃsīhi andhakāraṃ viya kurumānaṃ khāyatīti timiraṃ pupphaṃ taṃ gahetvā kaṇṇikāvaṇṭaṃ gahetvā matthake sīsassa upari ākāse okiriṃ pūjesinti attho. Sesaṃ uttānatthamevāti.
តិមិរបុប្ផិយត្ថេរអបទានវណ្ណនា សមត្តា។
Timirapupphiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១. តិមិរបុប្ផិយត្ថេរអបទានំ • 1. Timirapupphiyattheraapadānaṃ
