| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២. គតសញ្ញកត្ថេរអបទានវណ្ណនា
2. Gatasaññakattheraapadānavaṇṇanā
ជាតិយា សត្តវស្សោហន្តិអាទិកំ អាយស្មតោ គតសញ្ញកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ ឯកស្មិំ កុលគេហេ និព្ពត្តោ បុរាកតវាសនាវសេន សទ្ធាជាតោ សត្តវស្សិកកាលេយេវ បព្ពជិតោ ភគវតោ បណាមករណេនេវ បាកដោ អហោសិ។ សោ ឯកទិវសំ អតីវ នីលមណិប្បភានិ នង្គលកសិតដ្ឋានេ ឧដ្ឋិតសត្តបុប្ផានិ គហេត្វា អាកាសេ បូជេសិ។ សោ យាវតាយុកំ សមណធម្មំ កត្វា តេន បុញ្ញេន ទេវមនុស្សេសុ សំសរន្តោ ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វិញ្ញុតំ បត្តោ សត្ថរិ បសីទិត្វា បព្ពជិតោ នចិរស្សេវ អរហា អហោសិ។
Jātiyāsattavassohantiādikaṃ āyasmato gatasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe nibbatto purākatavāsanāvasena saddhājāto sattavassikakāleyeva pabbajito bhagavato paṇāmakaraṇeneva pākaṭo ahosi. So ekadivasaṃ atīva nīlamaṇippabhāni naṅgalakasitaṭṭhāne uṭṭhitasattapupphāni gahetvā ākāse pūjesi. So yāvatāyukaṃ samaṇadhammaṃ katvā tena puññena devamanussesu saṃsaranto imasmiṃ buddhuppāde ekasmiṃ kulagehe nibbatto viññutaṃ patto satthari pasīditvā pabbajito nacirasseva arahā ahosi.
១០. សោ អបរភាគេ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ ជាតិយា សត្តវស្សោហន្តិអាទិមាហ។ តត្ថ ជាតិយា សត្តវស្សោតិ មាតុគព្ភតោ និក្ខន្តកាលតោ បដ្ឋាយ បរិបុណ្ណសត្តវស្សិកោតិ អត្ថោ។ បព្ពជិំ អនគារិយន្តិ អគារស្ស ហិតំ អាគារិយំ កសិវាណិជ្ជាទិកម្មំ នត្ថិ អាគារិយន្តិ អនគារិយំ, ពុទ្ធសាសនេ បព្ពជិំ អហន្តិ អត្ថោ។
10. So aparabhāge attano pubbakammaṃ saritvā somanassajāto pubbacaritāpadānaṃ pakāsento jātiyā sattavassohantiādimāha. Tattha jātiyā sattavassoti mātugabbhato nikkhantakālato paṭṭhāya paripuṇṇasattavassikoti attho. Pabbajiṃ anagāriyanti agārassa hitaṃ āgāriyaṃ kasivāṇijjādikammaṃ natthi āgāriyanti anagāriyaṃ, buddhasāsane pabbajiṃ ahanti attho.
១២. សុគតានុគតំ មគ្គន្តិ ពុទ្ធេន គតំ មគ្គំ។ អថ វា សុគតេន ទេសិតំ ធម្មានុធម្មបដិបត្តិបូរណវសេន ហដ្ឋមានសោ តុដ្ឋចិត្តោ បូជេត្វាតិ សម្ពន្ធោ។ សេសំ សព្ពត្ថ ឧត្តានត្ថមេវាតិ។
12.Sugatānugataṃ magganti buddhena gataṃ maggaṃ. Atha vā sugatena desitaṃ dhammānudhammapaṭipattipūraṇavasena haṭṭhamānaso tuṭṭhacitto pūjetvāti sambandho. Sesaṃ sabbattha uttānatthamevāti.
គតសញ្ញកត្ថេរអបទានវណ្ណនា សមត្តា។
Gatasaññakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ២. គតសញ្ញកត្ថេរអបទានំ • 2. Gatasaññakattheraapadānaṃ
