| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៣. និបន្នញ្ជលិកត្ថេរអបទានវណ្ណនា
3. Nipannañjalikattheraapadānavaṇṇanā
រុក្ខមូលេ និសិន្នោហន្តិអាទិកំ អាយស្មតោ និបន្នញ្ជលិកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ អនេកេសុ ភវេសុ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ កុលគេហេ និព្ពត្តោ វុទ្ធិប្បត្តោ បព្ពជិត្វា រុក្ខមូលិកង្គំ បូរយមានោ អរញ្ញេ វិហរតិ។ តស្មិំ សមយេ ខរោ អាពាធោ ឧប្បជ្ជិ, តេន បីឡិតោ បរមការុញ្ញប្បត្តោ អហោសិ។ តទា ភគវា តស្ស ការុញ្ញេន តត្ថ អគមាសិ។ អថ សោ និបន្នកោវ ឧដ្ឋិតុំ អសក្កោន្តោ សិរសិ អញ្ជលិំ កត្វា ភគវតោ បណាមំ អកាសិ។ សោ តតោ ចុតោ តុសិតភវនេ ឧប្បន្នោ តត្ថ សម្បត្តិមនុភវិត្វា ឯវំ ឆ កាមាវចរសម្បត្តិយោ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វុទ្ធិប្បត្តោ សត្ថរិ បសីទិត្វា បព្ពជិតោ នចិរស្សេវ អរហា អហោសិ, បុរាកតបុញ្ញវសេន និបន្នញ្ជលិកត្ថេរោតិ បាកដោ។
Rukkhamūlenisinnohantiādikaṃ āyasmato nipannañjalikattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto tissassa bhagavato kāle kulagehe nibbatto vuddhippatto pabbajitvā rukkhamūlikaṅgaṃ pūrayamāno araññe viharati. Tasmiṃ samaye kharo ābādho uppajji, tena pīḷito paramakāruññappatto ahosi. Tadā bhagavā tassa kāruññena tattha agamāsi. Atha so nipannakova uṭṭhituṃ asakkonto sirasi añjaliṃ katvā bhagavato paṇāmaṃ akāsi. So tato cuto tusitabhavane uppanno tattha sampattimanubhavitvā evaṃ cha kāmāvacarasampattiyo anubhavitvā imasmiṃ buddhuppāde ekasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi, purākatapuññavasena nipannañjalikattheroti pākaṭo.
១៦. សោ អបរភាគេ អត្តនោ បុញ្ញសម្បត្តិយោ ឱលោកេត្វា សោមនស្សជាតោ បុព្ពចរិតាបទានំ បកាសេន្តោ រុក្ខមូលេ និសិន្នោហន្តិអាទិមាហ។ តត្ថ រុហតិ បដិរុហតិ ឧទ្ធមុទ្ធំ អារោហតីតិ រុក្ខោ, តស្ស រុក្ខស្ស មូលេ សមីបេតិ អត្ថោ។ ព្យាធិតោ បរមេន ចាតិ បរមេន អធិកេន ខរេន កក្ខឡេន ព្យាធិនា រោគេន ព្យាធិតោ, ព្យាធិនា អហំ សមន្នាគតោតិ អត្ថោ។ បរមការុញ្ញប្បត្តោម្ហីតិ បរមំ អធិកំ ការុញ្ញំ ទីនភាវំ ទុក្ខិតភាវំ បត្តោម្ហិ អរញ្ញេ កាននេតិ សម្ពន្ធោ។
16. So aparabhāge attano puññasampattiyo oloketvā somanassajāto pubbacaritāpadānaṃ pakāsento rukkhamūle nisinnohantiādimāha. Tattha ruhati paṭiruhati uddhamuddhaṃ ārohatīti rukkho, tassa rukkhassa mūle samīpeti attho. Byādhito paramena cāti paramena adhikena kharena kakkhaḷena byādhinā rogena byādhito, byādhinā ahaṃ samannāgatoti attho. Paramakāruññappattomhīti paramaṃ adhikaṃ kāruññaṃ dīnabhāvaṃ dukkhitabhāvaṃ pattomhi araññe kānaneti sambandho.
២០. បញ្ចេវាសុំ មហាសិខាតិ សិរសិ បិឡន្ធនត្ថេន សិខា វុច្ចតិ ចូឡា។ មណីតិ ជោតមានំ មកុដំ តស្ស អត្ថីតិ សិខោ, ចក្កវត្តិនោ ឯកនាមកា បញ្ចេវ ចក្កវត្តិនោ អាសុំ អហេសុន្តិ អត្ថោ។ សេសំ សព្ពត្ថ ឧត្តានត្ថមេវាតិ។
20.Pañcevāsuṃ mahāsikhāti sirasi piḷandhanatthena sikhā vuccati cūḷā. Maṇīti jotamānaṃ makuṭaṃ tassa atthīti sikho, cakkavattino ekanāmakā pañceva cakkavattino āsuṃ ahesunti attho. Sesaṃ sabbattha uttānatthamevāti.
និបន្នញ្ជលិកត្ថេរអបទានវណ្ណនា សមត្តា។
Nipannañjalikattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៣. និបន្នញ្ជលិកត្ថេរអបទានំ • 3. Nipannañjalikattheraapadānaṃ
