| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. ထေရနာမကသုတ္တဝဏ္ဏနာ
10. Theranāmakasuttavaṇṇanā
၂၄၄. အတီတေ ခန္ဓပဉ္စကေတိ အတီတေ အတ္တဘာဝေ။ ဆန္ဒရာဂပ္ပဟာနေနာတိ ဆန္ဒရာဂသ္သ အစ္စန္တမေဝ ဇဟနေန။ ပဟီနံ နာမ ဟောတိ အနပေက္ခပရိစ္စာဂတော။ ပဋိနိသ္သဋ္ဌံ နာမ ဟောတိ သဗ္ဗသော ဆဍ္ဍိတတ္တာ။ တယော ဘဝေတိ ဣမိနာ ဥပာဒိဏ္ဏကဓမ္မာနံယေဝ ဂဟဏံ။ သဗ္ဗာ ခန္ဓာယတနဓာတုယော စာတိ ဣမိနာ ဥပာဒိဏ္ဏာနမ္ပိ အနုပာဒိဏ္ဏာနမ္ပိ ဒ္ဝိဓာ ပဝတ္တလောကိယဓမ္မာနံ ဂဟဏံ အဝိသေသေတ္ဝာ ဝုတ္တတ္တာ။ ဝိဒိတံ ပာကဋံ ကတ္ဝာ ဌိတံ ပရိညာဘိသမယဝသေန။ တေသ္ဝေဝာတိ တေဘူမကဓမ္မေသု ဧဝ။ အနုပလိတ္တံ အမထိတံ အသံကိလိဋ္ဌံ တဏ္ဟာဒိဋ္ဌိသံကိလေသာဘာဝတော။ တဒေဝ သဗ္ဗန္တိ ဟေဋ္ဌာ တီသုပိ ပဒေသု ဣဓ သဗ္ဗဂ္ဂဟဏေန ဂဟိတံ တေဘူမကဝဋ္ဋံ။ ဇဟိတ္ဝာတိ ပဟာနာဘိသမယဝသေန။ တဏ္ဟာ ခီယတိ ဧတ္ထာတိ တဏ္ဟက္ခယသင္ခာတေ နိဗ္ဗာနေ ဝိမုတ္တံ။ တမဟန္တိ တံ ဥတ္တမပုဂ္ဂလံ ဧကဝိဟာရိံ ဗ္ရူမိ တဏ္ဟာဒုတိယသ္သ အဘာဝတော။ ဧတ္ထ စ ပရိညာပဟာနာဘိသမယကထနေန ဣတရမ္ပိ အဘိသမယံ အတ္ထတော ကထိတမေဝာတိ ဒဋ္ဌဗ္ဗံ။
244.Atīte khandhapañcaketi atīte attabhāve. Chandarāgappahānenāti chandarāgassa accantameva jahanena. Pahīnaṃ nāma hoti anapekkhapariccāgato. Paṭinissaṭṭhaṃ nāma hoti sabbaso chaḍḍitattā. Tayobhaveti iminā upādiṇṇakadhammānaṃyeva gahaṇaṃ. Sabbā khandhāyatanadhātuyo cāti iminā upādiṇṇānampi anupādiṇṇānampi dvidhā pavattalokiyadhammānaṃ gahaṇaṃ avisesetvā vuttattā. Viditaṃ pākaṭaṃ katvā ṭhitaṃ pariññābhisamayavasena. Tesvevāti tebhūmakadhammesu eva. Anupalittaṃ amathitaṃ asaṃkiliṭṭhaṃ taṇhādiṭṭhisaṃkilesābhāvato. Tadeva sabbanti heṭṭhā tīsupi padesu idha sabbaggahaṇena gahitaṃ tebhūmakavaṭṭaṃ. Jahitvāti pahānābhisamayavasena. Taṇhā khīyati etthāti taṇhakkhayasaṅkhāte nibbāne vimuttaṃ. Tamahanti taṃ uttamapuggalaṃ ekavihāriṃ brūmi taṇhādutiyassa abhāvato. Ettha ca pariññāpahānābhisamayakathanena itarampi abhisamayaṃ atthato kathitamevāti daṭṭhabbaṃ.
ထေရနာမကသုတ္တဝဏ္ဏနာ နိဋ္ဌိတာ။
Theranāmakasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ထေရနာမကသုတ္တံ • 10. Theranāmakasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. ထေရနာမကသုတ္တဝဏ္ဏနာ • 10. Theranāmakasuttavaṇṇanā
