| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៧. សត្តរសមវគ្គោ
17. Sattarasamavaggo
(១៧០) ៥. ឋបេត្វា អរិយមគ្គន្តិកថា
(170) 5. Ṭhapetvā ariyamaggantikathā
៧៨៩. ឋបេត្វា អរិយមគ្គំ អវសេសា សង្ខារា ទុក្ខាតិ? អាមន្តា។ ទុក្ខសមុទយោបិ ទុក្ខោតិ? ន ហេវំ វត្តព្ពេ…បេ.… ទុក្ខសមុទយោបិ ទុក្ខោតិ? អាមន្តា។ តីណេវ អរិយសច្ចានីតិ? ន ហេវំ វត្តព្ពេ…បេ.… តីណេវ អរិយសច្ចានីតិ? អាមន្តា។ ននុ ចត្តារិ អរិយសច្ចានិ វុត្តានិ ភគវតា – ទុក្ខំ, ទុក្ខសមុទយោ, ទុក្ខនិរោធោ, ទុក្ខនិរោធគាមិនី បដិបទាតិ? អាមន្តា។ ហញ្ចិ ចត្តារិ អរិយសច្ចានិ វុត្តានិ ភគវតា – ទុក្ខំ, ទុក្ខសមុទយោ, ទុក្ខនិរោធោ, ទុក្ខនិរោធគាមិនី បដិបទា; នោ ច វត រេ វត្តព្ពេ – ‘‘តីណេវ អរិយសច្ចានី’’តិ។
789. Ṭhapetvā ariyamaggaṃ avasesā saṅkhārā dukkhāti? Āmantā. Dukkhasamudayopi dukkhoti? Na hevaṃ vattabbe…pe… dukkhasamudayopi dukkhoti? Āmantā. Tīṇeva ariyasaccānīti? Na hevaṃ vattabbe…pe… tīṇeva ariyasaccānīti? Āmantā. Nanu cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadāti? Āmantā. Hañci cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadā; no ca vata re vattabbe – ‘‘tīṇeva ariyasaccānī’’ti.
ទុក្ខសមុទយោបិ ទុក្ខោតិ? អាមន្តា។ កេនដ្ឋេនាតិ? អនិច្ចដ្ឋេន។ អរិយមគ្គោ អនិច្ចោតិ? អាមន្តា។ អរិយមគ្គោ ទុក្ខោតិ? ន ហេវំ វត្តព្ពេ…បេ.…។
Dukkhasamudayopi dukkhoti? Āmantā. Kenaṭṭhenāti? Aniccaṭṭhena. Ariyamaggo aniccoti? Āmantā. Ariyamaggo dukkhoti? Na hevaṃ vattabbe…pe….
អរិយមគ្គោ អនិច្ចោ, សោ ច ន ទុក្ខោតិ? អាមន្តា។ ទុក្ខសមុទយោ អនិច្ចោ, សោ ច ន ទុក្ខោតិ? ន ហេវំ វត្តព្ពេ…បេ.… ទុក្ខសមុទយោ អនិច្ចោ, សោ ច ទុក្ខោតិ? អាមន្តា។ អរិយមគ្គោ អនិច្ចោ, សោ ច ទុក្ខោតិ? ន ហេវំ វត្តព្ពេ…បេ.…។
Ariyamaggo anicco, so ca na dukkhoti? Āmantā. Dukkhasamudayo anicco, so ca na dukkhoti? Na hevaṃ vattabbe…pe… dukkhasamudayo anicco, so ca dukkhoti? Āmantā. Ariyamaggo anicco, so ca dukkhoti? Na hevaṃ vattabbe…pe….
៧៩០. ន វត្តព្ពំ – ‘‘ឋបេត្វា អរិយមគ្គំ អវសេសា សង្ខារា ទុក្ខា’’តិ? អាមន្តា។ ននុ សា ទុក្ខនិរោធគាមិនី បដិបទាតិ? អាមន្តា។ ហញ្ចិ សា ទុក្ខនិរោធគាមិនី បដិបទា, តេន វត រេ វត្តព្ពេ – ‘‘ឋបេត្វា អរិយមគ្គំ អវសេសា សង្ខារា ទុក្ខា’’តិ។
790. Na vattabbaṃ – ‘‘ṭhapetvā ariyamaggaṃ avasesā saṅkhārā dukkhā’’ti? Āmantā. Nanu sā dukkhanirodhagāminī paṭipadāti? Āmantā. Hañci sā dukkhanirodhagāminī paṭipadā, tena vata re vattabbe – ‘‘ṭhapetvā ariyamaggaṃ avasesā saṅkhārā dukkhā’’ti.
ឋបេត្វា អរិយមគ្គន្តិកថា និដ្ឋិតា។
Ṭhapetvā ariyamaggantikathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៥. ឋបេត្វា អរិយមគ្គន្តិកថាវណ្ណនា • 5. Ṭhapetvā ariyamaggantikathāvaṇṇanā
