| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៧. សត្តរសមវគ្គោ
17. Sattarasamavaggo
(១៧១) ៦. ន វត្តព្ពំ សង្ឃោ ទក្ខិណំ បដិគ្គណ្ហាតិកថា
(171) 6. Na vattabbaṃ saṅgho dakkhiṇaṃ paṭiggaṇhātikathā
៧៩១. ន វត្តព្ពំ – ‘‘សង្ឃោ ទក្ខិណំ បដិគ្គណ្ហាតី’’តិ? អាមន្តា។ ននុ សង្ឃោ អាហុនេយ្យោ បាហុនេយ្យោ ទក្ខិណេយ្យោ អញ្ជលិករណីយោ អនុត្តរំ បុញ្ញក្ខេត្តំ លោកស្សាតិ? អាមន្តា។ ហញ្ចិ សង្ឃោ អាហុនេយ្យោ បាហុនេយ្យោ ទក្ខិណេយ្យោ អញ្ជលិករណីយោ អនុត្តរំ បុញ្ញក្ខេត្តំ លោកស្ស, តេន វត រេ វត្តព្ពេ – ‘‘សង្ឃោ ទក្ខិណំ បដិគ្គណ្ហាតី’’តិ។
791. Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti? Āmantā. Hañci saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ន វត្តព្ពំ – ‘‘សង្ឃោ ទក្ខិណំ បដិគ្គណ្ហាតី’’តិ? អាមន្តា។ ននុ ចត្តារោ បុរិសយុគា អដ្ឋបុរិសបុគ្គលា ទក្ខិណេយ្យា វុត្តា ភគវតាតិ? អាមន្តា។ ហញ្ចិ ចត្តារោ បុរិសយុគា អដ្ឋ បុរិសបុគ្គលា ទក្ខិណេយ្យា វុត្តា ភគវតា, តេន វត រេ វត្តព្ពេ – ‘‘សង្ឃោ ទក្ខិណំ បដិគ្គណ្ហាតី’’តិ។
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu cattāro purisayugā aṭṭhapurisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ន វត្តព្ពំ – ‘‘សង្ឃោ ទក្ខិណំ បដិគ្គណ្ហាតី’’តិ? អាមន្តា។ ននុ អត្ថិ កេចិ សង្ឃស្ស ទានំ ទេន្តីតិ? អាមន្តា។ ហញ្ចិ អត្ថិ កេចិ សង្ឃស្ស ទានំ ទេន្តិ, តេន វត រេ វត្តព្ពេ – ‘‘សង្ឃោ ទក្ខិណំ បដិគ្គណ្ហាតី’’តិ។ ននុ អត្ថិ កេចិ សង្ឃស្ស ចីវរំ ទេន្តិ…បេ.… បិណ្ឌបាតំ ទេន្តិ… សេនាសនំ ទេន្តិ… គិលានបច្ចយភេសជ្ជបរិក្ខារំ ទេន្តិ… ខាទនីយំ ទេន្តិ… ភោជនីយំ ទេន្តិ…បេ.… បានីយំ ទេន្តីតិ? អាមន្តា។ ហញ្ចិ អត្ថិ កេចិ សង្ឃស្ស បានីយំ ទេន្តិ, តេន វត រេ វត្តព្ពេ – ‘‘សង្ឃោ ទក្ខិណំ បដិគ្គណ្ហាតី’’តិ។
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu atthi keci saṅghassa dānaṃ dentīti? Āmantā. Hañci atthi keci saṅghassa dānaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti. Nanu atthi keci saṅghassa cīvaraṃ denti…pe… piṇḍapātaṃ denti… senāsanaṃ denti… gilānapaccayabhesajjaparikkhāraṃ denti… khādanīyaṃ denti… bhojanīyaṃ denti…pe… pānīyaṃ dentīti? Āmantā. Hañci atthi keci saṅghassa pānīyaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
ន វត្តព្ពំ – ‘‘សង្ឃោ ទក្ខិណំ បដិគ្គណ្ហាតី’’តិ? អាមន្តា។ ននុ វុត្តំ ភគវតា –
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu vuttaṃ bhagavatā –
‘‘អាហុតិំ ជាតវេទោវ, មហាមេឃំវ មេទនី;
‘‘Āhutiṃ jātavedova, mahāmeghaṃva medanī;
សង្ឃោ សមាធិសម្បន្នោ, បដិគ្គណ្ហាតិ ទក្ខិណ’’ន្តិ។
Saṅgho samādhisampanno, paṭiggaṇhāti dakkhiṇa’’nti.
អត្ថេវ សុត្តន្តោតិ? អាមន្តា។ តេន ហិ សង្ឃោ ទក្ខិណំ បដិគ្គណ្ហាតីតិ។
Attheva suttantoti? Āmantā. Tena hi saṅgho dakkhiṇaṃ paṭiggaṇhātīti.
៧៩២. សង្ឃោ ទក្ខិណំ បដិគ្គណ្ហាតីតិ? អាមន្តា។ មគ្គោ បដិគ្គណ្ហាតិ, ផលំ បដិគ្គណ្ហាតីតិ? ន ហេវំ វត្តព្ពេ…បេ.…។
792. Saṅgho dakkhiṇaṃ paṭiggaṇhātīti? Āmantā. Maggo paṭiggaṇhāti, phalaṃ paṭiggaṇhātīti? Na hevaṃ vattabbe…pe….
ន វត្តព្ពំ សង្ឃោ ទក្ខិណំ បដិគ្គណ្ហាតីតិកថា និដ្ឋិតា។
Na vattabbaṃ saṅgho dakkhiṇaṃ paṭiggaṇhātītikathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៦. ន វត្តព្ពំ សង្ឃោ ទក្ខិណំ បដិគ្គណ្ហាតីតិកថាវណ្ណនា • 6. Na vattabbaṃ saṅgho dakkhiṇaṃ paṭiggaṇhātītikathāvaṇṇanā
