| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២. សុមង្គលត្ថេរអបទានវណ្ណនា
2. Sumaṅgalattheraapadānavaṇṇanā
អត្ថទស្សី ជិនវរោតិអាទិកំ អាយស្មតោ សុមង្គលត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ អត្ថទស្សិស្ស ភគវតោ កាលេ ឯកស្មិំ តឡាកសមីបេ រុក្ខទេវតា ហុត្វា និព្ពត្តិ។ តស្មិំ សមយេ ភគវា វិហារតោ និក្ខមិត្វា នហាយិតុកាមោ តស្ស តឡាកស្ស តីរំ គន្ត្វា តត្ថ ន្ហត្វា ឯកចីវរោ ជលមានោ ព្រហ្មា វិយ សូរិយោ វិយ សុវណ្ណពិម្ពំ វិយ អដ្ឋាសិ។ អថ សោ ទេវបុត្តោ សោមនស្សជាតោ បញ្ជលិកោ ថោមនមកាសិ, អត្តនោ ទិព្ពគីតតូរិយេហិ ឧបហារញ្ច អកាសិ។ សោ តេន បុញ្ញកម្មេន ទេវមនុស្សេសុ សម្បត្តិយោ អនុភវិត្វា អបរភាគេ ឥមស្មិំ ពុទ្ធុប្បាទេ កុលគេហេ និព្ពត្តោ វិញ្ញុតំ បត្តោ សត្ថរិ បសីទិត្វា បព្ពជិត្វា នចិរស្សេវ អរហា អហោសិ។
Atthadassī jinavarotiādikaṃ āyasmato sumaṅgalattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle ekasmiṃ taḷākasamīpe rukkhadevatā hutvā nibbatti. Tasmiṃ samaye bhagavā vihārato nikkhamitvā nahāyitukāmo tassa taḷākassa tīraṃ gantvā tattha nhatvā ekacīvaro jalamāno brahmā viya sūriyo viya suvaṇṇabimbaṃ viya aṭṭhāsi. Atha so devaputto somanassajāto pañjaliko thomanamakāsi, attano dibbagītatūriyehi upahārañca akāsi. So tena puññakammena devamanussesu sampattiyo anubhavitvā aparabhāge imasmiṃ buddhuppāde kulagehe nibbatto viññutaṃ patto satthari pasīditvā pabbajitvā nacirasseva arahā ahosi.
១១. សោ បច្ឆា បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ អត្ថទស្សី ជិនវរោតិអាទិមាហ។ តត្ថ បរមត្ថំ និព្ពានំ ទក្ខតិ បស្សតីតិ អត្ថទស្សី, អថ វា សព្ពសត្តានំ ចតុរារិយសច្ចសង្ខាតំ អត្ថបយោជនំ ទស្សនសីលោតិ អត្ថទស្សី, កិលេសេ អជិនិ ជិនាតិ ជិនិស្សតីតិ ជិនោ។ វរិតព្ពោ បត្ថេតព្ពោ សព្ពសត្តេហីតិ វរោ, អត្ថទស្សី ជិនោ ច សោ វរោ ចាតិ អត្ថទស្សី ជិនវរោ។ លោកជេដ្ឋោតិ លុជ្ជតិ បលុជ្ជតីតិ លោកោ, លោកីយតិ បស្សីយតិ ពុទ្ធាទីហិ បារប្បត្តោតិ វា លោកោ, លោកោ ច លោកោ ច លោកោ ចាតិ លោកោ។ ឯកសេសសមាសវសេន ‘‘លោកា’’តិ វត្តព្ពេ ‘‘លោកោ’’តិ វុត្តោ។ លោកស្ស ជេដ្ឋោ លោកជេដ្ឋោ, សោ លោកជេដ្ឋោ នរាសភោតិ អត្ថោ។ សេសំ សព្ពត្ថ ឧត្តានមេវាតិ។
11. So pacchā pubbakammaṃ saritvā somanassajāto pubbacaritāpadānaṃ pakāsento atthadassī jinavarotiādimāha. Tattha paramatthaṃ nibbānaṃ dakkhati passatīti atthadassī, atha vā sabbasattānaṃ caturāriyasaccasaṅkhātaṃ atthapayojanaṃ dassanasīloti atthadassī, kilese ajini jināti jinissatīti jino. Varitabbo patthetabbo sabbasattehīti varo, atthadassī jino ca so varo cāti atthadassī jinavaro. Lokajeṭṭhoti lujjati palujjatīti loko, lokīyati passīyati buddhādīhi pārappattoti vā loko, loko ca loko ca loko cāti loko. Ekasesasamāsavasena ‘‘lokā’’ti vattabbe ‘‘loko’’ti vutto. Lokassa jeṭṭho lokajeṭṭho, so lokajeṭṭho narāsabhoti attho. Sesaṃ sabbattha uttānamevāti.
សុមង្គលត្ថេរអបទានវណ្ណនា សមត្តា។
Sumaṅgalattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ២. សុមង្គលត្ថេរអបទានំ • 2. Sumaṅgalattheraapadānaṃ
