| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៣. សរណគមនិយត្ថេរអបទានវណ្ណនា
3. Saraṇagamaniyattheraapadānavaṇṇanā
ឧភិន្នំ ទេវរាជូនន្ត្យាទិកំ អាយស្មតោ សរណគមនិយត្ថេរស្ស អបទានំ។ អយម្បិ បុរិមពុទ្ធេសុ កតាធិការោ ឧប្បន្នុប្បន្នភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរេ ភគវតិ ឧប្បន្នេ អយំ ហិមវន្តេ ទេវរាជា ហុត្វា និព្ពត្តិ, តស្មិំ អបរេន យក្ខទេវរញ្ញា សទ្ធិំ សង្គាមត្ថាយ ឧបដ្ឋិតេ ទ្វេ អនេកយក្ខសហស្សបរិវារា ផលកាវុធាទិហត្ថា សង្គាមត្ថាយ សមុបព្យូឡ្ហា អហេសុំ។ តទា បទុមុត្តរោ ភគវា តេសុ សត្តេសុ ការុញ្ញំ ឧប្បាទេត្វា អាកាសេន តត្ថ គន្ត្វា សបរិវារានំ ទ្វិន្នំ ទេវរាជូនំ ធម្មំ ទេសេសិ។ តទា តេ សព្ពេ ផលកាវុធានិ ឆឌ្ឌេត្វា ភគវន្តំ គារវពហុមានេន វន្ទិត្វា សរណមគមំសុ។ តេសំ អយំ បឋមំ សរណមគមាសិ។ សោ តេន បុញ្ញេន ទេវមនុស្សេសុ សំសរន្តោ ឧភយសម្បត្តិយោ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វុទ្ធិមន្វាយ សត្ថរិ បសន្នោ បព្ពជិត្វា នចិរស្សេវ អរហា អហោសិ។
Ubhinnaṃdevarājūnantyādikaṃ āyasmato saraṇagamaniyattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto padumuttare bhagavati uppanne ayaṃ himavante devarājā hutvā nibbatti, tasmiṃ aparena yakkhadevaraññā saddhiṃ saṅgāmatthāya upaṭṭhite dve anekayakkhasahassaparivārā phalakāvudhādihatthā saṅgāmatthāya samupabyūḷhā ahesuṃ. Tadā padumuttaro bhagavā tesu sattesu kāruññaṃ uppādetvā ākāsena tattha gantvā saparivārānaṃ dvinnaṃ devarājūnaṃ dhammaṃ desesi. Tadā te sabbe phalakāvudhāni chaḍḍetvā bhagavantaṃ gāravabahumānena vanditvā saraṇamagamaṃsu. Tesaṃ ayaṃ paṭhamaṃ saraṇamagamāsi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
២០. សោ អបរភាគេ បុព្ពកុសលំ សរិត្វា សោមនស្សជាតោ បុព្ពចរិតាបទានំ បកាសេន្តោ ឧភិន្នំ ទេវរាជូនន្តិអាទិមាហ។ តត្ថ សុចិលោមខរលោមអាឡវកកុម្ភីរកុវេរាទយោ វិយ នាមគោត្តេន អបាកដា ទ្វេ យក្ខរាជានោ អញ្ញាបទេសេន ទស្សេន្តោ ‘‘ឧភិន្នំ ទេវរាជូន’’ន្តិអាទិមាហ។ សង្គាមោ សមុបដ្ឋិតោតិ សំ សុដ្ឋុ គាមោ កលហត្ថាយ ឧបគមនន្តិ សង្គាមោ, សោ សង្គាមោ សំ សុដ្ឋុ ឧបដ្ឋិតោ, ឯកដ្ឋានេ ឧបគន្ត្វា ឋិតោតិ អត្ថោ។ អហោសិ សមុបព្យូឡ្ហោតិ សំ សុដ្ឋុ ឧបសមីបេ រាសិភូតោតិ អត្ថោ។
20. So aparabhāge pubbakusalaṃ saritvā somanassajāto pubbacaritāpadānaṃ pakāsento ubhinnaṃ devarājūnantiādimāha. Tattha sucilomakharalomaāḷavakakumbhīrakuverādayo viya nāmagottena apākaṭā dve yakkharājāno aññāpadesena dassento ‘‘ubhinnaṃ devarājūna’’ntiādimāha. Saṅgāmo samupaṭṭhitoti saṃ suṭṭhu gāmo kalahatthāya upagamananti saṅgāmo, so saṅgāmo saṃ suṭṭhu upaṭṭhito, ekaṭṭhāne upagantvā ṭhitoti attho. Ahosi samupabyūḷhoti saṃ suṭṭhu upasamīpe rāsibhūtoti attho.
២១. សំវេជេសិ មហាជនន្តិ តេសំ រាសិភូតានំ យក្ខានំ អាកាសេ និសិន្នោ ភគវា ចតុសច្ចធម្មទេសនាយ សំ សុដ្ឋុ វេជេសិ, អាទីនវទស្សនេន គណ្ហាបេសិ វិញ្ញាបេសិ ពោធេសីតិ អត្ថោ។ សេសំ សព្ពត្ថ ឧត្តានមេវាតិ។
21.Saṃvejesi mahājananti tesaṃ rāsibhūtānaṃ yakkhānaṃ ākāse nisinno bhagavā catusaccadhammadesanāya saṃ suṭṭhu vejesi, ādīnavadassanena gaṇhāpesi viññāpesi bodhesīti attho. Sesaṃ sabbattha uttānamevāti.
សរណគមនិយត្ថេរអបទានវណ្ណនា សមត្តា។
Saraṇagamaniyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៣. សរណគមនិយត្ថេរអបទានំ • 3. Saraṇagamaniyattheraapadānaṃ
