| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤. ឯកាសនិយត្ថេរអបទានវណ្ណនា
4. Ekāsaniyattheraapadānavaṇṇanā
វរុណោ នាម នាមេនាតិអាទិកំ អាយស្មតោ ឯកាសនិយត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ អត្ថទស្សិស្ស ភគវតោ កាលេ វរុណោ នាម ទេវរាជា ហុត្វា និព្ពត្តិ។ សោ ភគវន្តំ ទិស្វា បសន្នមានសោ គន្ធមាលាទីហិ គីតវាទិតេហិ ច ឧបដ្ឋយមានោ សបរិវារោ បូជេសិ។ តតោ អបរភាគេ ភគវតិ បរិនិព្ពុតេ តស្ស មហាពោធិរុក្ខំ ពុទ្ធទស្សនំ វិយ សព្ពតូរិយតាឡាវចរេហិ សបរិវារោ ឧបហារមកាសិ។ សោ តេន បុញ្ញេន តតោ កាលង្កត្វា និម្មានរតិទេវលោកេ ឧប្បជ្ជិ។ ឯវំ ទេវសម្បត្តិមនុភវិត្វា មនុស្សេសុ ច មនុស្សភូតោ ចក្កវត្តិសម្បត្តិំ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វិញ្ញុតំ បត្វា សត្ថុ សាសនេ បព្ពជិត្វា នចិរស្សេវ អរហា អហោសិ។
Varuṇonāma nāmenātiādikaṃ āyasmato ekāsaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle varuṇo nāma devarājā hutvā nibbatti. So bhagavantaṃ disvā pasannamānaso gandhamālādīhi gītavāditehi ca upaṭṭhayamāno saparivāro pūjesi. Tato aparabhāge bhagavati parinibbute tassa mahābodhirukkhaṃ buddhadassanaṃ viya sabbatūriyatāḷāvacarehi saparivāro upahāramakāsi. So tena puññena tato kālaṅkatvā nimmānaratidevaloke uppajji. Evaṃ devasampattimanubhavitvā manussesu ca manussabhūto cakkavattisampattiṃ anubhavitvā imasmiṃ buddhuppāde kulagehe nibbatto viññutaṃ patvā satthu sāsane pabbajitvā nacirasseva arahā ahosi.
៣១. សោ បច្ឆា សកកម្មំ សរិត្វា តំ តថតោ ញត្វា សោមនស្សជាតោ បុព្ពចរិតាបទានំ បកាសេន្តោ វរុណោ នាម នាមេនាតិអាទិមាហ។ តត្ថ យទា អហំ សម្ពោធនត្ថាយ ពុទ្ធំ ពោធិញ្ច បូជេសិំ, តទា វរុណោ នាម ទេវរាជា អហោសិន្តិ សម្ពន្ធោ។
31. So pacchā sakakammaṃ saritvā taṃ tathato ñatvā somanassajāto pubbacaritāpadānaṃ pakāsento varuṇo nāma nāmenātiādimāha. Tattha yadā ahaṃ sambodhanatthāya buddhaṃ bodhiñca pūjesiṃ, tadā varuṇo nāma devarājā ahosinti sambandho.
៣៤. ធរណីរុហបាទបន្តិ ឯត្ថ រុក្ខលតាបព្ពតសត្ថរតនាទយោ ធារេតីតិ ធរណី, តស្មិំ រុហតិ បតិដ្ឋហតីតិ ធរណីរុហោ។ បាទេន បិវតីតិ បាទបោ, សិញ្ចិតសិញ្ចិតោទកំ បាទេន មូលេន បិវតិ រុក្ខក្ខន្ធសាខាវិដបេហិ អាបោរសំ បត្ថរិយតីតិ អត្ថោ, តំ ធរណីរុហបាទបំ ពោធិរុក្ខន្តិ សម្ពន្ធោ។
34.Dharaṇīruhapādapanti ettha rukkhalatāpabbatasattharatanādayo dhāretīti dharaṇī, tasmiṃ ruhati patiṭṭhahatīti dharaṇīruho. Pādena pivatīti pādapo, siñcitasiñcitodakaṃ pādena mūlena pivati rukkhakkhandhasākhāviṭapehi āporasaṃ patthariyatīti attho, taṃ dharaṇīruhapādapaṃ bodhirukkhanti sambandho.
៣៥. សកកម្មាភិរទ្ធោតិ អត្តនោ កុសលកម្មេន អភិរទ្ធោ បសន្នោ ឧត្តមេ ពោធិម្ហិ បសន្នោតិ សម្ពន្ធោ។ សេសំ សព្ពត្ថ ឧត្តានមេវាតិ។
35.Sakakammābhiraddhoti attano kusalakammena abhiraddho pasanno uttame bodhimhi pasannoti sambandho. Sesaṃ sabbattha uttānamevāti.
ឯកាសនិយត្ថេរអបទានវណ្ណនា សមត្តា។
Ekāsaniyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៤. ឯកាសនិយត្ថេរអបទានំ • 4. Ekāsaniyattheraapadānaṃ
