| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៥. សុវណ្ណបុប្ផិយត្ថេរអបទានវណ្ណនា
5. Suvaṇṇapupphiyattheraapadānavaṇṇanā
វិបស្សី នាម ភគវាតិអាទិកំ អាយស្មតោ សុវណ្ណបុប្ផិយត្ថេរស្ស អបទានំ។ អយម្បិ បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ ឯកស្មិំ ឋានេ ភូមដ្ឋកទេវបុត្តោ ហុត្វា និព្ពត្តោ តស្ស ភគវតោ ធម្មំ សុត្វា បសន្នមានសោ ចតូហិ សុវណ្ណបុប្ផេហិ បូជេសិ។ តានិ បុប្ផានិ អាកាសេ សុវណ្ណវិតានំ ហុត្វា ឆាទេសុំ, សុវណ្ណបភា ច ពុទ្ធស្ស សរីរបភា ច ឯកតោ ហុត្វា មហាឱភាសោ អហោសិ។ សោ អតិរេកតរំ បសន្នោ សកភវនំ គតោបិ សរតិយេវ។ សោ តេន បុញ្ញកម្មេន តុសិតភវនាទិសុគតីសុយេវ សំសរន្តោ ទិព្ពសម្បត្តិំ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វិញ្ញុតំ បត្តោ សត្ថុ ធម្មទេសនំ សុត្វា សាសនេ ឧរំ ទត្វា បព្ពជិតោ នចិរស្សេវ អរហា អហោសិ។
Vipassīnāma bhagavātiādikaṃ āyasmato suvaṇṇapupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ ṭhāne bhūmaṭṭhakadevaputto hutvā nibbatto tassa bhagavato dhammaṃ sutvā pasannamānaso catūhi suvaṇṇapupphehi pūjesi. Tāni pupphāni ākāse suvaṇṇavitānaṃ hutvā chādesuṃ, suvaṇṇapabhā ca buddhassa sarīrapabhā ca ekato hutvā mahāobhāso ahosi. So atirekataraṃ pasanno sakabhavanaṃ gatopi saratiyeva. So tena puññakammena tusitabhavanādisugatīsuyeva saṃsaranto dibbasampattiṃ anubhavitvā imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā sāsane uraṃ datvā pabbajito nacirasseva arahā ahosi.
៤០. សោ អបរភាគេ បុព្ពកម្មំ សរិត្វា សោមនស្សជាតោ អត្តនោ បុព្ពចរិតាបទានំ បកាសេន្តោ វិបស្សី នាម ភគវាតិអាទិមាហ។ តំ ហេដ្ឋា វុត្តត្ថមេវ។
40. So aparabhāge pubbakammaṃ saritvā somanassajāto attano pubbacaritāpadānaṃ pakāsento vipassī nāma bhagavātiādimāha. Taṃ heṭṭhā vuttatthameva.
៤៤. បាមោជ្ជំ ជនយិត្វានាតិ ពលវបីតិំ ឧប្បាទេត្វា ‘‘បាមោជ្ជំ អាមោទនា បមោទនា ហាសោ បហាសោ វិត្តិ ឱទគ្យំ អត្តមនតា ចិត្តស្សា’’តិអាទីសុ (ធ. ស. ៩, ៨៦; មហានិ. ១) វិយ អត្តមនតា សកភាវំ ឧប្បាទេត្វាតិ អត្ថោ។ សេសំ សព្ពត្ថ ឧត្តានមេវាតិ។
44.Pāmojjaṃ janayitvānāti balavapītiṃ uppādetvā ‘‘pāmojjaṃ āmodanā pamodanā hāso pahāso vitti odagyaṃ attamanatā cittassā’’tiādīsu (dha. sa. 9, 86; mahāni. 1) viya attamanatā sakabhāvaṃ uppādetvāti attho. Sesaṃ sabbattha uttānamevāti.
សុវណ្ណបុប្ផិយត្ថេរអបទានវណ្ណនា សមត្តា។
Suvaṇṇapupphiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៥. សុវណ្ណបុប្ផិយត្ថេរអបទានំ • 5. Suvaṇṇapupphiyattheraapadānaṃ
