| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១០. សុមង្គលត្ថេរអបទានំ
10. Sumaṅgalattheraapadānaṃ
១២៤.
124.
‘‘អាហុតិំ យិដ្ឋុកាមោហំ, បដិយាទេត្វាន ភោជនំ;
‘‘Āhutiṃ yiṭṭhukāmohaṃ, paṭiyādetvāna bhojanaṃ;
ព្រាហ្មណេ បដិមានេន្តោ, វិសាលេ មាឡកេ ឋិតោ។
Brāhmaṇe paṭimānento, visāle māḷake ṭhito.
១២៥.
125.
‘‘អថទ្ទសាសិំ សម្ពុទ្ធំ, បិយទស្សិំ មហាយសំ;
‘‘Athaddasāsiṃ sambuddhaṃ, piyadassiṃ mahāyasaṃ;
សព្ពលោកវិនេតារំ, សយម្ភុំ អគ្គបុគ្គលំ។
Sabbalokavinetāraṃ, sayambhuṃ aggapuggalaṃ.
១២៦.
126.
‘‘ភគវន្តំ ជុតិមន្តំ, សាវកេហិ បុរក្ខតំ;
‘‘Bhagavantaṃ jutimantaṃ, sāvakehi purakkhataṃ;
អាទិច្ចមិវ រោចន្តំ, រថិយំ បដិបន្នកំ។
Ādiccamiva rocantaṃ, rathiyaṃ paṭipannakaṃ.
១២៧.
127.
‘‘អញ្ជលិំ បគ្គហេត្វាន, សកំ ចិត្តំ បសាទយិំ;
‘‘Añjaliṃ paggahetvāna, sakaṃ cittaṃ pasādayiṃ;
មនសាវ និមន្តេសិំ, ‘អាគច្ឆតុ មហាមុនិ’។
Manasāva nimantesiṃ, ‘āgacchatu mahāmuni’.
១២៨.
128.
‘‘មម សង្កប្បមញ្ញាយ, សត្ថា លោកេ អនុត្តរោ;
‘‘Mama saṅkappamaññāya, satthā loke anuttaro;
ខីណាសវសហស្សេហិ, មម ទ្វារំ ឧបាគមិ។
Khīṇāsavasahassehi, mama dvāraṃ upāgami.
១២៩.
129.
‘‘នមោ តេ បុរិសាជញ្ញ, នមោ តេ បុរិសុត្តម;
‘‘Namo te purisājañña, namo te purisuttama;
១៣០.
130.
‘‘ទន្តោ ទន្តបរិវារោ, តិណ្ណោ តារយតំ វរោ;
‘‘Danto dantaparivāro, tiṇṇo tārayataṃ varo;
បាសាទំ អភិរូហិត្វា, និសីទិ បវរាសនេ។
Pāsādaṃ abhirūhitvā, nisīdi pavarāsane.
១៣១.
131.
‘‘យំ មេ អត្ថិ សកេ គេហេ, អាមិសំ បច្ចុបដ្ឋិតំ;
‘‘Yaṃ me atthi sake gehe, āmisaṃ paccupaṭṭhitaṃ;
តាហំ ពុទ្ធស្ស បាទាសិំ, បសន្នោ សេហិ បាណិភិ។
Tāhaṃ buddhassa pādāsiṃ, pasanno sehi pāṇibhi.
១៣២.
132.
‘‘បសន្នចិត្តោ សុមនោ, វេទជាតោ កតញ្ជលី;
‘‘Pasannacitto sumano, vedajāto katañjalī;
ពុទ្ធសេដ្ឋំ នមស្សាមិ, អហោ ពុទ្ធស្សុឡារតា។
Buddhaseṭṭhaṃ namassāmi, aho buddhassuḷāratā.
១៣៣.
133.
‘‘អដ្ឋន្នំ បយិរូបាសតំ, ភុញ្ជំ ខីណាសវា ពហូ;
‘‘Aṭṭhannaṃ payirūpāsataṃ, bhuñjaṃ khīṇāsavā bahū;
តុយ្ហេវេសោ អានុភាវោ, សរណំ តំ ឧបេមហំ។
Tuyheveso ānubhāvo, saraṇaṃ taṃ upemahaṃ.
១៣៤.
134.
‘‘បិយទស្សី ច ភគវា, លោកជេដ្ឋោ នរាសភោ;
‘‘Piyadassī ca bhagavā, lokajeṭṭho narāsabho;
ភិក្ខុសង្ឃេ និសីទិត្វា, ឥមា គាថា អភាសថ។
Bhikkhusaṅghe nisīditvā, imā gāthā abhāsatha.
១៣៥.
135.
‘‘‘យោ សោ សង្ឃំ អភោជេសិ, ឧជុភូតំ សមាហិតំ;
‘‘‘Yo so saṅghaṃ abhojesi, ujubhūtaṃ samāhitaṃ;
តថាគតញ្ច សម្ពុទ្ធំ, សុណាថ មម ភាសតោ។
Tathāgatañca sambuddhaṃ, suṇātha mama bhāsato.
១៣៦.
136.
‘‘‘សត្តវីសតិក្ខត្តុំ សោ, ទេវរជ្ជំ ករិស្សតិ;
‘‘‘Sattavīsatikkhattuṃ so, devarajjaṃ karissati;
សកកម្មាភិរទ្ធោ សោ, ទេវលោកេ រមិស្សតិ។
Sakakammābhiraddho so, devaloke ramissati.
១៣៧.
137.
‘‘‘ទស អដ្ឋ ចក្ខត្តុំ 3 សោ, ចក្កវត្តី ភវិស្សតិ;
‘‘‘Dasa aṭṭha cakkhattuṃ 4 so, cakkavattī bhavissati;
បថព្យា រជ្ជំ បញ្ចសតំ, វសុធំ អាវសិស្សតិ’។
Pathabyā rajjaṃ pañcasataṃ, vasudhaṃ āvasissati’.
១៣៨.
138.
‘‘អរញ្ញវនមោគ្គយ្ហ, កាននំ ព្យគ្ឃសេវិតំ;
‘‘Araññavanamoggayha, kānanaṃ byagghasevitaṃ;
បធានំ បទហិត្វាន, កិលេសា ឈាបិតា មយា។
Padhānaṃ padahitvāna, kilesā jhāpitā mayā.
១៣៩.
139.
‘‘អដ្ឋារសេ កប្បសតេ, យំ ទានមទទិំ តទា;
‘‘Aṭṭhārase kappasate, yaṃ dānamadadiṃ tadā;
ទុគ្គតិំ នាភិជានាមិ, ភត្តទានស្សិទំ ផលំ។
Duggatiṃ nābhijānāmi, bhattadānassidaṃ phalaṃ.
១៤០.
140.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា សុមង្គលោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā sumaṅgalo thero imā gāthāyo abhāsitthāti.
សុមង្គលត្ថេរស្សាបទានំ ទសមំ។
Sumaṅgalattherassāpadānaṃ dasamaṃ.
តស្សុទ្ទានំ –
Tassuddānaṃ –
សីហាសនី ឯកថម្ភី, នន្ទោ ច ចូឡបន្ថកោ;
Sīhāsanī ekathambhī, nando ca cūḷapanthako;
បិលិន្ទរាហុលោ ចេវ, វង្គន្តោ រដ្ឋបាលកោ។
Pilindarāhulo ceva, vaṅganto raṭṭhapālako.
សោបាកោ មង្គលោ ចេវ, ទសេវ ទុតិយេ វគ្គេ;
Sopāko maṅgalo ceva, daseva dutiye vagge;
សតញ្ច អដ្ឋតិំស ច, គាថា ចេត្ថ បកាសិតា។
Satañca aṭṭhatiṃsa ca, gāthā cettha pakāsitā.
សីហាសនិយវគ្គោ ទុតិយោ។
Sīhāsaniyavaggo dutiyo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ១០. សុមង្គលត្ថេរអបទានវណ្ណនា • 10. Sumaṅgalattheraapadānavaṇṇanā
