| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៦. សោឡសមវគ្គោ
16. Soḷasamavaggo
(១៥៨) ៣. សុខានុប្បទានកថា
(158) 3. Sukhānuppadānakathā
៧៤៧. បរោ បរស្ស សុខំ អនុប្បទេតីតិ? អាមន្តា។ បរោ បរស្ស ទុក្ខំ អនុប្បទេតីតិ? ន ហេវំ វត្តព្ពេ…បេ.… បរោ បរស្ស ទុក្ខំ ន អនុប្បទេតីតិ? អាមន្តា។ បរោ បរស្ស សុខំ ន អនុប្បទេតីតិ? ន ហេវំ វត្តព្ពេ…បេ.… បរោ បរស្ស សុខំ អនុប្បទេតីតិ? អាមន្តា។ បរោ បរស្ស អត្តនោ សុខំ អនុប្បទេតិ, អញ្ញេសំ សុខំ អនុប្បទេតិ, តស្ស សុខំ អនុប្បទេតីតិ? ន ហេវំ វត្តព្ពេ…បេ.… បរោ បរស្ស នេវត្តនោ, ន អញ្ញេសំ, ន តស្ស សុខំ អនុប្បទេតីតិ? អាមន្តា។ ហញ្ចិ បរោ បរស្ស នេវត្តនោ, ន អញ្ញេសំ, ន តស្ស សុខំ អនុប្បទេតិ, នោ ច វត រេ វត្តព្ពេ – ‘‘បរោ បរស្ស សុខំ អនុប្បទេតី’’តិ។
747. Paro parassa sukhaṃ anuppadetīti? Āmantā. Paro parassa dukkhaṃ anuppadetīti? Na hevaṃ vattabbe…pe… paro parassa dukkhaṃ na anuppadetīti? Āmantā. Paro parassa sukhaṃ na anuppadetīti? Na hevaṃ vattabbe…pe… paro parassa sukhaṃ anuppadetīti? Āmantā. Paro parassa attano sukhaṃ anuppadeti, aññesaṃ sukhaṃ anuppadeti, tassa sukhaṃ anuppadetīti? Na hevaṃ vattabbe…pe… paro parassa nevattano, na aññesaṃ, na tassa sukhaṃ anuppadetīti? Āmantā. Hañci paro parassa nevattano, na aññesaṃ, na tassa sukhaṃ anuppadeti, no ca vata re vattabbe – ‘‘paro parassa sukhaṃ anuppadetī’’ti.
បរោ បរស្ស សុខំ អនុប្បទេតីតិ? អាមន្តា។ អញ្ញោ អញ្ញស្ស ការកោ, បរង្កតំ សុខំ ទុក្ខំ អញ្ញោ ករោតិ អញ្ញោ បដិសំវេទេតីតិ? ន ហេវំ វត្តព្ពេ…បេ.…។
Paro parassa sukhaṃ anuppadetīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
៧៤៨. ន វត្តព្ពំ – ‘‘បរោ បរស្ស សុខំ អនុប្បទេតី’’តិ? អាមន្តា។ ននុ អាយស្មា ឧទាយី ឯតទវោច – ‘‘ពហូនំ វត នោ ភគវា ទុក្ខធម្មានំ អបហត្តា, ពហូនំ វត នោ ភគវា សុខធម្មានំ ឧបហត្តា, ពហូនំ វត នោ ភគវា អកុសលានំ ធម្មានំ អបហត្តា, ពហូនំ វត នោ ភគវា កុសលានំ ធម្មានំ ឧបហត្តា’’តិ 1! អត្ថេវ សុត្តន្តោតិ? អាមន្តា។ តេន ហិ បរោ បរស្ស សុខំ អនុប្បទេតីតិ។
748. Na vattabbaṃ – ‘‘paro parassa sukhaṃ anuppadetī’’ti? Āmantā. Nanu āyasmā udāyī etadavoca – ‘‘bahūnaṃ vata no bhagavā dukkhadhammānaṃ apahattā, bahūnaṃ vata no bhagavā sukhadhammānaṃ upahattā, bahūnaṃ vata no bhagavā akusalānaṃ dhammānaṃ apahattā, bahūnaṃ vata no bhagavā kusalānaṃ dhammānaṃ upahattā’’ti 2! Attheva suttantoti? Āmantā. Tena hi paro parassa sukhaṃ anuppadetīti.
សុខានុប្បទានកថា និដ្ឋិតា។
Sukhānuppadānakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៣. សុខានុប្បទានកថាវណ្ណនា • 3. Sukhānuppadānakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៣. សុខានុប្បទានកថាវណ្ណនា • 3. Sukhānuppadānakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៣. សុខានុប្បទានកថាវណ្ណនា • 3. Sukhānuppadānakathāvaṇṇanā
