| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā |
೪. ಸುಜಾತಾಥೇರೀಗಾಥಾವಣ್ಣನಾ
4. Sujātātherīgāthāvaṇṇanā
ಅಲಙ್ಕತಾ ಸುವಸನಾತಿಆದಿಕಾ ಸುಜಾತಾಯ ಥೇರಿಯಾ ಗಾಥಾ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನನ್ತೀ ಅನುಕ್ಕಮೇನ ಸಮ್ಭತವಿಮೋಕ್ಖಸಮ್ಭಾರಾ ಹುತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾಕೇತನಗರೇ ಸೇಟ್ಠಿಕುಲೇ ನಿಬ್ಬತ್ತಿತ್ವಾ ವಯಪ್ಪತ್ತಾ ಮಾತಾಪಿತೂಹಿ ಸಮಾನಜಾತಿಕಸ್ಸ ಸೇಟ್ಠಿಪುತ್ತಸ್ಸ ದಿನ್ನಾ ಹುತ್ವಾ ಪತಿಕುಲಂ ಗತಾ। ತತ್ಥ ತೇನ ಸದ್ಧಿಂ ಸುಖಸಂವಾಸಂ ವಸನ್ತೀ ಏಕದಿವಸಂ ಉಯ್ಯಾನಂ ಗನ್ತ್ವಾ ನಕ್ಖತ್ತಕೀಳಂ ಕೀಳಿತ್ವಾ ಪರಿಜನೇನ ಸದ್ಧಿಂ ನಗರಂ ಆಗಚ್ಛನ್ತೀ ಅಞ್ಜನವನೇ ಸತ್ಥಾರಂ ದಿಸ್ವಾ ಪಸನ್ನಮಾನಸಾ ಉಪಸಙ್ಕಮಿತ್ವಾ ವನ್ದಿತ್ವಾ ಏಕಮನ್ತಂ ನಿಸೀದಿ। ಸತ್ಥಾ ತಸ್ಸಾ ಅನುಪುಬ್ಬಿಂ ಕಥಂ ಕಥೇತ್ವಾ ಕಲ್ಲಚಿತ್ತತಂ ಞತ್ವಾ ಉಪರಿ ಸಾಮುಕ್ಕಂಸಿಕಂ ಧಮ್ಮದೇಸನಂ ಪಕಾಸೇಸಿ। ಸಾ ದೇಸನಾವಸಾನೇ ಅತ್ತನೋ ಕತಾಧಿಕಾರತಾಯ ಞಾಣಸ್ಸ ಪರಿಪಾಕಂ ಗತತ್ತಾ ಚ , ಸತ್ಥು ಚ ದೇಸನಾವಿಲಾಸೇನ ಯಥಾನಿಸಿನ್ನಾವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಸತ್ಥಾರಂ ವನ್ದಿತ್ವಾ ಗೇಹಂ ಗನ್ತ್ವಾ ಸಾಮಿಕಞ್ಚ ಮಾತಾಪಿತರೋ ಚ ಅನುಜಾನಾಪೇತ್ವಾ ಸತ್ಥುಆಣಾಯ ಭಿಕ್ಖುನುಪಸ್ಸಯಂ ಗನ್ತ್ವಾ ಭಿಕ್ಖುನೀನಂ ಸನ್ತಿಕೇ ಪಬ್ಬಜಿ। ಪಬ್ಬಜಿತ್ವಾ ಚ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಉದಾನವಸೇನ –
Alaṅkatā suvasanātiādikā sujātāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī anukkamena sambhatavimokkhasambhārā hutvā imasmiṃ buddhuppāde sāketanagare seṭṭhikule nibbattitvā vayappattā mātāpitūhi samānajātikassa seṭṭhiputtassa dinnā hutvā patikulaṃ gatā. Tattha tena saddhiṃ sukhasaṃvāsaṃ vasantī ekadivasaṃ uyyānaṃ gantvā nakkhattakīḷaṃ kīḷitvā parijanena saddhiṃ nagaraṃ āgacchantī añjanavane satthāraṃ disvā pasannamānasā upasaṅkamitvā vanditvā ekamantaṃ nisīdi. Satthā tassā anupubbiṃ kathaṃ kathetvā kallacittataṃ ñatvā upari sāmukkaṃsikaṃ dhammadesanaṃ pakāsesi. Sā desanāvasāne attano katādhikāratāya ñāṇassa paripākaṃ gatattā ca , satthu ca desanāvilāsena yathānisinnāva saha paṭisambhidāhi arahattaṃ patvā satthāraṃ vanditvā gehaṃ gantvā sāmikañca mātāpitaro ca anujānāpetvā satthuāṇāya bhikkhunupassayaṃ gantvā bhikkhunīnaṃ santike pabbaji. Pabbajitvā ca attano paṭipattiṃ paccavekkhitvā udānavasena –
೧೪೫.
145.
‘‘ಅಲಙ್ಕತಾ ಸುವಸನಾ, ಮಾಲಿನೀ ಚನ್ದನೋಕ್ಖಿತಾ।
‘‘Alaṅkatā suvasanā, mālinī candanokkhitā;
ಸಬ್ಬಾಭರಣಸಞ್ಛನ್ನಾ, ದಾಸೀಗಣಪುರಕ್ಖತಾ॥
Sabbābharaṇasañchannā, dāsīgaṇapurakkhatā.
೧೪೬.
146.
‘‘ಅನ್ನಂ ಪಾನಞ್ಚ ಆದಾಯ, ಖಜ್ಜಂ ಭೋಜ್ಜಂ ಅನಪ್ಪಕಂ।
‘‘Annaṃ pānañca ādāya, khajjaṃ bhojjaṃ anappakaṃ;
ಗೇಹತೋ ನಿಕ್ಖಮಿತ್ವಾನ, ಉಯ್ಯಾನಮಭಿಹಾರಯಿಂ॥
Gehato nikkhamitvāna, uyyānamabhihārayiṃ.
೧೪೭.
147.
‘‘ತತ್ಥ ರಮಿತ್ವಾ ಕೀಳಿತ್ವಾ, ಆಗಚ್ಛನ್ತೀ ಸಕಂ ಘರಂ।
‘‘Tattha ramitvā kīḷitvā, āgacchantī sakaṃ gharaṃ;
ವಿಹಾರಂ ದಟ್ಠುಂ ಪಾವಿಸಿಂ, ಸಾಕೇತೇ ಅಞ್ಜನಂ ವನಂ॥
Vihāraṃ daṭṭhuṃ pāvisiṃ, sākete añjanaṃ vanaṃ.
೧೪೮.
148.
‘‘ದಿಸ್ವಾನ ಲೋಕಪಜ್ಜೋತಂ, ವನ್ದಿತ್ವಾನ ಉಪಾವಿಸಿಂ।
‘‘Disvāna lokapajjotaṃ, vanditvāna upāvisiṃ;
ಸೋ ಮೇ ಧಮ್ಮಮದೇಸೇಸಿ, ಅನುಕಮ್ಪಾಯ ಚಕ್ಖುಮಾ॥
So me dhammamadesesi, anukampāya cakkhumā.
೧೪೯.
149.
‘‘ಸುತ್ವಾ ಚ ಖೋ ಮಹೇಸಿಸ್ಸ, ಸಚ್ಚಂ ಸಮ್ಪಟಿವಿಜ್ಝಹಂ।
‘‘Sutvā ca kho mahesissa, saccaṃ sampaṭivijjhahaṃ;
ತತ್ಥೇವ ವಿರಜಂ ಧಮ್ಮಂ, ಫುಸಯಿಂ ಅಮತಂ ಪದಂ॥
Tattheva virajaṃ dhammaṃ, phusayiṃ amataṃ padaṃ.
೧೫೦.
150.
‘‘ತತೋ ವಿಞ್ಞಾತಸದ್ಧಮ್ಮಾ, ಪಬ್ಬಜಿಂ ಅನಗಾರಿಯಂ।
‘‘Tato viññātasaddhammā, pabbajiṃ anagāriyaṃ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಅಮೋಘಂ ಬುದ್ಧಸಾಸನ’’ನ್ತಿ॥ –
Tisso vijjā anuppattā, amoghaṃ buddhasāsana’’nti. –
ಇಮಾ ಗಾಥಾ ಅಭಾಸಿ।
Imā gāthā abhāsi.
ತತ್ಥ ಅಲಙ್ಕತಾತಿ ವಿಭೂಸಿತಾ। ತಂ ಪನ ಅಲಙ್ಕತಾಕಾರಂ ದಸ್ಸೇತುಂ ‘‘ಸುವಸನಾ ಮಾಲಿನೀ ಚನ್ದನೋಕ್ಖಿತಾ’’ತಿ ವುತ್ತಂ। ತತ್ಥ ಮಾಲಿನೀತಿ ಮಾಲಾಧಾರಿನೀ। ಚನ್ದನೋಕ್ಖಿತಾತಿ ಚನ್ದನಾನುಲಿತ್ತಾ। ಸಬ್ಬಾಭರಣಸಞ್ಛನ್ನಾತಿ ಹತ್ಥೂಪಗಾದೀಹಿ ಸಬ್ಬೇಹಿ ಆಭರಣೇಹಿ ಅಲಙ್ಕಾರವಸೇನ ಸಞ್ಛಾದಿತಸರೀರಾ।
Tattha alaṅkatāti vibhūsitā. Taṃ pana alaṅkatākāraṃ dassetuṃ ‘‘suvasanā mālinī candanokkhitā’’ti vuttaṃ. Tattha mālinīti mālādhārinī. Candanokkhitāti candanānulittā. Sabbābharaṇasañchannāti hatthūpagādīhi sabbehi ābharaṇehi alaṅkāravasena sañchāditasarīrā.
ಅನ್ನಂ ಪಾನಞ್ಚ ಆದಾಯ, ಖಜ್ಜಂ ಭೋಜ್ಜಂ ಅನಪ್ಪಕನ್ತಿ ಸಾಲಿಓದನಾದಿಅನ್ನಂ, ಅಮ್ಬಪಾನಾದಿಪಾನಂ, ಪಿಟ್ಠಖಾದನೀಯಾದಿಖಜ್ಜಂ, ಅವಸಿಟ್ಠಂ ಆಹಾರಸಙ್ಖಾತಂ ಭೋಜ್ಜಞ್ಚ ಪಹೂತಂ ಗಹೇತ್ವಾ। ಉಯ್ಯಾನಮಭಿಹಾರಯಿನ್ತಿ ನಕ್ಖತ್ತಕೀಳಾವಸೇನ ಉಯ್ಯಾನಂ ಉಪನೇಸಿಂ। ಅನ್ನಪಾನಾದಿಂ ತತ್ಥ ಆನೇತ್ವಾ ಸಹ ಪರಿಜನೇನ ಕೀಳನ್ತೀ ರಮನ್ತೀ ಪರಿಚಾರೇಸಿನ್ತಿ ಅಧಿಪ್ಪಾಯೋ।
Annaṃpānañca ādāya, khajjaṃ bhojjaṃ anappakanti sāliodanādiannaṃ, ambapānādipānaṃ, piṭṭhakhādanīyādikhajjaṃ, avasiṭṭhaṃ āhārasaṅkhātaṃ bhojjañca pahūtaṃ gahetvā. Uyyānamabhihārayinti nakkhattakīḷāvasena uyyānaṃ upanesiṃ. Annapānādiṃ tattha ānetvā saha parijanena kīḷantī ramantī paricāresinti adhippāyo.
ಸಾಕೇತೇ ಅಞ್ಜನಂ ವನನ್ತಿ ಸಾಕೇತಸಮೀಪೇ ಅಞ್ಜನವನೇ ವಿಹಾರಂ ಪಾವಿಸಿಂ।
Sākete añjanaṃ vananti sāketasamīpe añjanavane vihāraṃ pāvisiṃ.
ಲೋಕಪಜ್ಜೋತನ್ತಿ ಞಾಣಪಜ್ಜೋತೇನ ಲೋಕಸ್ಸ ಪಜ್ಜೋತಭೂತಂ।
Lokapajjotanti ñāṇapajjotena lokassa pajjotabhūtaṃ.
ಫುಸಯಿನ್ತಿ ಫುಸಿಂ, ಅಧಿಗಚ್ಛಿನ್ತಿ ಅತ್ಥೋ। ಸೇಸಂ ವುತ್ತನಯಮೇವ।
Phusayinti phusiṃ, adhigacchinti attho. Sesaṃ vuttanayameva.
ಸುಜಾತಾಥೇರೀಗಾಥಾವಣ್ಣನಾ ನಿಟ್ಠಿತಾ।
Sujātātherīgāthāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಥೇರೀಗಾಥಾಪಾಳಿ • Therīgāthāpāḷi / ೪. ಸುಜಾತಾಥೇರೀಗಾಥಾ • 4. Sujātātherīgāthā
