| Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৪. সুদ্ধট্ঠকসুত্তং
4. Suddhaṭṭhakasuttaṃ
৭৯৪.
794.
পস্সামি সুদ্ধং পরমং অরোগং, দিট্ঠেন সংসুদ্ধি নরস্স হোতি।
Passāmi suddhaṃ paramaṃ arogaṃ, diṭṭhena saṃsuddhi narassa hoti;
এৰাভিজানং 1 পরমন্তি ঞত্ৰা, সুদ্ধানুপস্সীতি পচ্চেতি ঞাণং॥
Evābhijānaṃ 2 paramanti ñatvā, suddhānupassīti pacceti ñāṇaṃ.
৭৯৫.
795.
দিট্ঠেন চে সুদ্ধি নরস্স হোতি, ঞাণেন ৰা সো পজহাতি দুক্খং।
Diṭṭhena ce suddhi narassa hoti, ñāṇena vā so pajahāti dukkhaṃ;
অঞ্ঞেন সো সুজ্ঝতি সোপধীকো, দিট্ঠী হি নং পাৰ তথা ৰদানং॥
Aññena so sujjhati sopadhīko, diṭṭhī hi naṃ pāva tathā vadānaṃ.
৭৯৬.
796.
ন ব্রাহ্মণো অঞ্ঞতো সুদ্ধিমাহ, দিট্ঠে সুতে সীলৰতে মুতে ৰা।
Na brāhmaṇo aññato suddhimāha, diṭṭhe sute sīlavate mute vā;
পুঞ্ঞে চ পাপে চ অনূপলিত্তো, অত্তঞ্জহো নযিধ পকুব্বমানো॥
Puññe ca pāpe ca anūpalitto, attañjaho nayidha pakubbamāno.
৭৯৭.
797.
পুরিমং পহায অপরং সিতাসে, এজানুগা তে ন তরন্তি সঙ্গং।
Purimaṃ pahāya aparaṃ sitāse, ejānugā te na taranti saṅgaṃ;
তে উগ্গহাযন্তি নিরস্সজন্তি, কপীৰ সাখং পমুঞ্চং গহাযং 3॥
Te uggahāyanti nirassajanti, kapīva sākhaṃ pamuñcaṃ gahāyaṃ 4.
৭৯৮.
798.
সযং সমাদায ৰতানি জন্তু, উচ্চাৰচং গচ্ছতি সঞ্ঞসত্তো।
Sayaṃ samādāya vatāni jantu, uccāvacaṃ gacchati saññasatto;
ৰিদ্ৰা চ ৰেদেহি সমেচ্চ ধম্মং, ন উচ্চাৰচং গচ্ছতি ভূরিপঞ্ঞো॥
Vidvā ca vedehi samecca dhammaṃ, na uccāvacaṃ gacchati bhūripañño.
৭৯৯.
799.
স সব্বধম্মেসু ৰিসেনিভূতো, যং কিঞ্চি দিট্ঠং ৰ সুতং মুতং ৰা।
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
তমেৰ দস্সিং ৰিৰটং চরন্তং, কেনীধ লোকস্মি ৰিকপ্পযেয্য॥
Tameva dassiṃ vivaṭaṃ carantaṃ, kenīdha lokasmi vikappayeyya.
৮০০.
800.
ন কপ্পযন্তি ন পুরেক্খরোন্তি, অচ্চন্তসুদ্ধীতি ন তে ৰদন্তি।
Na kappayanti na purekkharonti, accantasuddhīti na te vadanti;
আদানগন্থং গথিতং ৰিসজ্জ, আসং ন কুব্বন্তি কুহিঞ্চি লোকে॥
Ādānaganthaṃ gathitaṃ visajja, āsaṃ na kubbanti kuhiñci loke.
৮০১.
801.
সীমাতিগো ব্রাহ্মণো তস্স নত্থি, ঞত্ৰা ৰ দিস্ৰা ৰ 5 সমুগ্গহীতং।
Sīmātigo brāhmaṇo tassa natthi, ñatvā va disvā va 6 samuggahītaṃ;
ন রাগরাগী ন ৰিরাগরত্তো, তস্সীধ নত্থী পরমুগ্গহীতন্তি॥
Na rāgarāgī na virāgaratto, tassīdha natthī paramuggahītanti.
সুদ্ধট্ঠকসুত্তং চতুত্থং নিট্ঠিতং।
Suddhaṭṭhakasuttaṃ catutthaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ৪. সুদ্ধট্ঠকসুত্তৰণ্ণনা • 4. Suddhaṭṭhakasuttavaṇṇanā
