| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤. សូចិទាយកត្ថេរអបទានវណ្ណនា
4. Sūcidāyakattheraapadānavaṇṇanā
កម្មារោហំ បុរេ អាសិន្តិអាទិកំ អាយស្មតោ សូចិទាយកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ អន្តរន្តរា កុសលពីជានិ បូរេន្តោ វិបស្សិស្ស ភគវតោ កាលេ អន្តរន្តរា កតេន ឯកេន កម្មច្ឆិទ្ទេន កម្មារកុលេ និព្ពត្តោ វុទ្ធិមន្វាយ សកសិប្បេសុ និប្ផត្តិំ បត្តោ សត្ថុ ធម្មទេសនំ សុត្វា បសន្នមានសោ ចីវរសិព្ពនត្ថាយ សូចិទានមទាសិ, តេន បុញ្ញេន ទិព្ពសម្បត្តិំ អនុភវិត្វា អបរភាគេ មនុស្សេសុ ឧប្បន្នោ ចក្កវត្តាទយោ សម្បត្តិយោ ច អនុភវន្តោ ឧប្បន្នុប្បន្នភវេ តិក្ខបញ្ញោ វជីរញាណោ អហោសិ។ សោ កមេន ឥមស្មិំ ពុទ្ធុប្បាទេ និព្ពត្តោ វុទ្ធិប្បត្តោ មហទ្ធនោ សទ្ធាជាតោ តិក្ខបញ្ញោ អហោសិ។ សោ ឯកទិវសំ សត្ថុ ធម្មទេសនំ សុត្វា ធម្មានុសារេន ញាណំ បេសេត្វា និសិន្នាសនេយេវ អរហា អហោសិ។
Kammārohaṃ pure āsintiādikaṃ āyasmato sūcidāyakattherassa apadānaṃ. Ayampi purimabuddhesu katādhikāro antarantarā kusalabījāni pūrento vipassissa bhagavato kāle antarantarā katena ekena kammacchiddena kammārakule nibbatto vuddhimanvāya sakasippesu nipphattiṃ patto satthu dhammadesanaṃ sutvā pasannamānaso cīvarasibbanatthāya sūcidānamadāsi, tena puññena dibbasampattiṃ anubhavitvā aparabhāge manussesu uppanno cakkavattādayo sampattiyo ca anubhavanto uppannuppannabhave tikkhapañño vajīrañāṇo ahosi. So kamena imasmiṃ buddhuppāde nibbatto vuddhippatto mahaddhano saddhājāto tikkhapañño ahosi. So ekadivasaṃ satthu dhammadesanaṃ sutvā dhammānusārena ñāṇaṃ pesetvā nisinnāsaneyeva arahā ahosi.
១៩. សោ អរហា សមានោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ កម្មារោហំ បុរេ អាសិន្តិអាទិមាហ។ តត្ថ កម្មារោតិ អយោកម្មលោហកម្មាទិនា កម្មេន ជីវតិ រុហតិ វុទ្ធិំ វិរូឡ្ហិំ អាបជ្ជតីតិ កម្មារោ, បុព្ពេ បុញ្ញករណកាលេ កម្មារោ អាសិំ អហោសិន្តិ អត្ថោ។ សេសំ សព្ពត្ថ ឧត្តានមេវាតិ។
19. So arahā samāno attano pubbakammaṃ saritvā somanassajāto pubbacaritāpadānaṃ pakāsento kammārohaṃ pure āsintiādimāha. Tattha kammāroti ayokammalohakammādinā kammena jīvati ruhati vuddhiṃ virūḷhiṃ āpajjatīti kammāro, pubbe puññakaraṇakāle kammāro āsiṃ ahosinti attho. Sesaṃ sabbattha uttānamevāti.
សូចិទាយកត្ថេរអបទានវណ្ណនា សមត្តា។
Sūcidāyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៤. សូចិទាយកត្ថេរអបទានំ • 4. Sūcidāyakattheraapadānaṃ
