| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
១៣. សេរេយ្យវគ្គោ
13. Sereyyavaggo
១. សេរេយ្យកត្ថេរអបទានវណ្ណនា
1. Sereyyakattheraapadānavaṇṇanā
អជ្ឈាយកោ មន្តធរោតិអាទិកំ អាយស្មតោ សេរេយ្យកត្ថេរស្ស អបទានំ។ អយម្បិ បុរិមជិនវរេសុ កតាធិការោ តតោ បរេសុ អត្តភាវសហស្សេសុ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ ព្រាហ្មណកុលេ និព្ពត្តោ វិញ្ញុតំ បត្វា តិណ្ណំ វេទានំ បារំ គន្ត្វា ឥតិហាសាទិសកលព្រាហ្មណធម្មេសុ កោដិប្បត្តោ ឯកស្មិំ ទិវសេ អព្ភោកាសេ សបរិវារោ ឋិតោ ភគវន្តំ ទិស្វា បសន្នមានសោ សេរេយ្យបុប្ផំ គហេត្វា អាកាសេ ខិបន្តោ បូជេសិ។ តានិ បុប្ផានិ អាកាសេ វិតានំ ហុត្វា សត្តាហំ ឋត្វា បច្ឆា អន្តរធាយិំសុ។ សោ តំ អច្ឆរិយំ ទិស្វា អតីវ បសន្នមានសោ តេនេវ បីតិសោមនស្សេន កាលំ កត្វា តុសិតាទីសុ និព្ពត្តោ តត្ថ ទិព្ពសុខមនុភវិត្វា តតោ មនុស្សសុខមនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វិញ្ញុតំ បាបុណិត្វា បុព្ពវាសនាពលេន សត្ថរិ បសន្នោ បព្ពជិត្វា នចិរស្សេវ អរហា អហោសិ។
Ajjhāyakomantadharotiādikaṃ āyasmato sereyyakattherassa apadānaṃ. Ayampi purimajinavaresu katādhikāro tato paresu attabhāvasahassesu vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto viññutaṃ patvā tiṇṇaṃ vedānaṃ pāraṃ gantvā itihāsādisakalabrāhmaṇadhammesu koṭippatto ekasmiṃ divase abbhokāse saparivāro ṭhito bhagavantaṃ disvā pasannamānaso sereyyapupphaṃ gahetvā ākāse khipanto pūjesi. Tāni pupphāni ākāse vitānaṃ hutvā sattāhaṃ ṭhatvā pacchā antaradhāyiṃsu. So taṃ acchariyaṃ disvā atīva pasannamānaso teneva pītisomanassena kālaṃ katvā tusitādīsu nibbatto tattha dibbasukhamanubhavitvā tato manussasukhamanubhavitvā imasmiṃ buddhuppāde ekasmiṃ kulagehe nibbatto viññutaṃ pāpuṇitvā pubbavāsanābalena satthari pasanno pabbajitvā nacirasseva arahā ahosi.
១. សោ អបរភាគេ បុរាកតកុសលំ សរិត្វា សោមនស្សជាតោ បុព្ពចរិតាបទានំ បកាសេន្តោ អជ្ឈាយកោ មន្តធរោតិអាទិមាហ។ តំ ហេដ្ឋា វុត្តត្ថមេវ។
1. So aparabhāge purākatakusalaṃ saritvā somanassajāto pubbacaritāpadānaṃ pakāsento ajjhāyako mantadharotiādimāha. Taṃ heṭṭhā vuttatthameva.
៣. សេរេយ្យកំ គហេត្វានាតិ សិរិសេ ភវំ ជាតិបុប្ផំ សេរេយ្យំ, សេរេយ្យមេវ សេរេយ្យកំ, តំ សេរេយ្យកំ គហេត្វានាតិ សម្ពន្ធោ។ ភគវតិ បសន្នោ ជាតិសុមនមកុឡចម្បកាទីនិ បុប្ផានិ បតិដ្ឋបេត្វា បូជេតុំ កាលំ នត្ថិតាយ តត្ថ សម្បត្តំ តំ សេរេយ្យកំ បុប្ផំ គហេត្វា បូជេសិន្តិ អត្ថោ។ សេសំ សព្ពត្ថ ឧត្តានមេវាតិ។
3.Sereyyakaṃ gahetvānāti sirise bhavaṃ jātipupphaṃ sereyyaṃ, sereyyameva sereyyakaṃ, taṃ sereyyakaṃ gahetvānāti sambandho. Bhagavati pasanno jātisumanamakuḷacampakādīni pupphāni patiṭṭhapetvā pūjetuṃ kālaṃ natthitāya tattha sampattaṃ taṃ sereyyakaṃ pupphaṃ gahetvā pūjesinti attho. Sesaṃ sabbattha uttānamevāti.
សេរេយ្យកត្ថេរអបទានវណ្ណនា សមត្តា។
Sereyyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១. សេរេយ្យកត្ថេរអបទានំ • 1. Sereyyakattheraapadānaṃ
