| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៣. សយនទាយកត្ថេរអបទានវណ្ណនា
3. Sayanadāyakattheraapadānavaṇṇanā
បទុមុត្តរពុទ្ធស្សាតិអាទិកំ អាយស្មតោ សយនទាយកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ ឯកស្មិំ កុលគេហេ និព្ពត្តោ វិញ្ញុតំ បត្តោ ឃរាវាសំ សណ្ឋបេត្វា សុខមនុភវន្តោ សត្ថុ ធម្មទេសនំ សុត្វា សត្ថរិ បសន្នោ ទន្តសុវណ្ណរជតមុត្តមណិមយំ មហារហំ មញ្ចំ ការាបេត្វា ចីនបដ្ដកម្ពលាទីនិ អត្ថរិត្វា សយនត្ថាយ ភគវតោ អទាសិ។ ភគវា តស្ស អនុគ្គហំ ករោន្តោ តត្ថ សយិ ។ សោ តេន បុញ្ញកម្មេន ទេវមនុស្សេសុ សំសរន្តោ តទនុរូបំ អាកាសគមនសុខសេយ្យាទិសុខំ អនុភវិត្វា ឥមស្មិំ ពុទ្ធុប្បាទេ វិភវសម្បន្នេ ឯកស្មិំ កុលេ និព្ពត្តិត្វា វិញ្ញុតំ បាបុណិត្វា សត្ថុ ធម្មទេសនំ សុត្វា បសន្នមានសោ បព្ពជិត្វា វិបស្សន្តោ នចិរស្សេវ អរហា អហោសិ។
Padumuttarabuddhassātiādikaṃ āyasmato sayanadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā sukhamanubhavanto satthu dhammadesanaṃ sutvā satthari pasanno dantasuvaṇṇarajatamuttamaṇimayaṃ mahārahaṃ mañcaṃ kārāpetvā cīnapaṭṭakambalādīni attharitvā sayanatthāya bhagavato adāsi. Bhagavā tassa anuggahaṃ karonto tattha sayi . So tena puññakammena devamanussesu saṃsaranto tadanurūpaṃ ākāsagamanasukhaseyyādisukhaṃ anubhavitvā imasmiṃ buddhuppāde vibhavasampanne ekasmiṃ kule nibbattitvā viññutaṃ pāpuṇitvā satthu dhammadesanaṃ sutvā pasannamānaso pabbajitvā vipassanto nacirasseva arahā ahosi.
២០. សោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ បទុមុត្តរពុទ្ធស្សាតិអាទិមាហ។ តំ ហេដ្ឋា វុត្តត្ថមេវ។
20. So attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttatthameva.
២១. សុខេត្តេ ពីជសម្បទាតិ យថា តិណកចវររហិតេ កទ្ទមាទិសម្បន្នេ សុខេត្តេ វុត្តពីជានិ សាទុផលានិ និប្ផាទេន្តិ, ឯវមេវ រាគទោសាទិទិយឌ្ឍសហស្សកិលេសសង្ខាតតិណកចវររហិតេ សុទ្ធសន្តានេ បុញ្ញក្ខេត្តេ វុត្តទានានិ អប្បានិបិ សមានានិ មហប្ផលានិ ហោន្តីតិ អត្ថោ។ សេសំ សុវិញ្ញេយ្យមេវាតិ។
21.Sukhette bījasampadāti yathā tiṇakacavararahite kaddamādisampanne sukhette vuttabījāni sāduphalāni nipphādenti, evameva rāgadosādidiyaḍḍhasahassakilesasaṅkhātatiṇakacavararahite suddhasantāne puññakkhette vuttadānāni appānipi samānāni mahapphalāni hontīti attho. Sesaṃ suviññeyyamevāti.
សយនទាយកត្ថេរអបទានវណ្ណនា សមត្តា។
Sayanadāyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៣. សយនទាយកត្ថេរអបទានំ • 3. Sayanadāyakattheraapadānaṃ
