| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤. គន្ធោទកិយត្ថេរអបទានវណ្ណនា
4. Gandhodakiyattheraapadānavaṇṇanā
បទុមុត្តរពុទ្ធស្សាតិអាទិកំ អាយស្មតោ គន្ធោទកិយត្ថេរស្ស អបទានំ។ អយម្បិ បុរិមមុនិវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ កុលគេហេ និព្ពត្តោ បរិនិព្ពុតេ ភគវតិ នគរវាសិនោ ពោធិបូជំ កុរុមានេ ទិស្វា វិចិត្តឃដេ ចន្ទនកប្បុរាគរុអាទិមិស្សកសុគន្ធោទកេន បូរេត្វា ពោធិរុក្ខំ អភិសិញ្ចិ។ តស្មិំ ខណេ ទេវោ មហាធារាហិ បវស្សិ។ តទា សោ អសនិវេគេន កាលំ កតោ។ តេនេវ បុញ្ញកម្មេន ទេវលោកេ និព្ពត្តិ, តត្ថេវ ឋិតោ ‘‘អហោ ពុទ្ធោ, អហោ ធម្មោ’’តិអាទិគាថាយោ អភាសិ។ ឯវំ សោ ទេវមនុស្សេសុ សម្បត្តិយោ អនុភវិត្វា សព្ពបរិឡាហវិប្បមុត្តោ និព្ពត្តនិព្ពត្តដ្ឋានេ សីតិភាវមុបគតោ សុខិតោ ឥមស្មិំ ពុទ្ធុប្បាទេ កុលគេហេ និព្ពត្តោ វិញ្ញុតំ បត្តោ សត្ថរិ បសន្នោ បព្ពជិត្វា កម្មដ្ឋានំ អារភិត្វា វិបស្សន្តោ នចិរស្សេវ អរហត្តំ បាបុណិ។ បុព្ពេ កតបុញ្ញេន គន្ធោទកិយត្ថេរោតិ បាកដោ អហោសិ។
Padumuttarabuddhassātiādikaṃ āyasmato gandhodakiyattherassa apadānaṃ. Ayampi purimamunivaresu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto parinibbute bhagavati nagaravāsino bodhipūjaṃ kurumāne disvā vicittaghaṭe candanakappurāgaruādimissakasugandhodakena pūretvā bodhirukkhaṃ abhisiñci. Tasmiṃ khaṇe devo mahādhārāhi pavassi. Tadā so asanivegena kālaṃ kato. Teneva puññakammena devaloke nibbatti, tattheva ṭhito ‘‘aho buddho, aho dhammo’’tiādigāthāyo abhāsi. Evaṃ so devamanussesu sampattiyo anubhavitvā sabbapariḷāhavippamutto nibbattanibbattaṭṭhāne sītibhāvamupagato sukhito imasmiṃ buddhuppāde kulagehe nibbatto viññutaṃ patto satthari pasanno pabbajitvā kammaṭṭhānaṃ ārabhitvā vipassanto nacirasseva arahattaṃ pāpuṇi. Pubbe katapuññena gandhodakiyattheroti pākaṭo ahosi.
២៥. សោ ឯកទិវសំ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ បទុមុតរស្សាតិអាទិមាហ។ តំ វុត្តត្ថមេវ។ មហាពោធិមហោ អហូតិ មហាពោធិរុក្ខស្ស បូជា អហោសីតិ អត្ថោ។ វិចិត្តំ ឃដមាទាយាតិ អនេកេហិ ចិត្តកម្មសុវណ្ណកម្មេហិ វិចិត្តំ សោភមានំ គន្ធោទកបុណ្ណំ ឃដំ គហេត្វាតិ អត្ថោ ។ គន្ធោទកមទាសហន្តិ គន្ធោទកំ អទាសិំ, អហំ គន្ធោទកេន អភិសិញ្ចិន្តិ អត្ថោ។
25. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumutarassātiādimāha. Taṃ vuttatthameva. Mahābodhimaho ahūti mahābodhirukkhassa pūjā ahosīti attho. Vicittaṃ ghaṭamādāyāti anekehi cittakammasuvaṇṇakammehi vicittaṃ sobhamānaṃ gandhodakapuṇṇaṃ ghaṭaṃ gahetvāti attho . Gandhodakamadāsahanti gandhodakaṃ adāsiṃ, ahaṃ gandhodakena abhisiñcinti attho.
២៦. ន្ហានកាលេ ច ពោធិយាតិ ពោធិយា បូជាករណសមយេតិ អត្ថោ។ សេសំ ឧត្តានត្ថមេវាតិ។
26.Nhānakāleca bodhiyāti bodhiyā pūjākaraṇasamayeti attho. Sesaṃ uttānatthamevāti.
គន្ធោទកិយត្ថេរអបទានវណ្ណនា សមត្តា។
Gandhodakiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៤. គន្ធោទកិយត្ថេរអបទានំ • 4. Gandhodakiyattheraapadānaṃ
