| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. သတ္တဝသ္သာနုဗန္ဓသုတ္တဝဏ္ဏနာ
4. Sattavassānubandhasuttavaṇṇanā
၁၆၀. ယသ္မာ ကပိလဝတ္ထုတော နိက္ခန္တကာလတော ပဋ္ဌာယ မာရော ဩတာရာပေက္ခော လောကနာထံ အနုဗန္ဓိတုံ အာရဒ္ဓော, တသ္မာ ဝုတ္တံ ‘‘ပုရေ ဗောဓိယာ ဆဗ္ဗသ္သာနီ’’တိ။ အတိဂဟေတ္ဝာတိ အနုဂန္တ္ဝာ တသ္သ ယထာရုစိ ပဋိပတ္တိံ အနုဝတ္တော ဝိယ ဟုတ္ဝာ။
160. Yasmā kapilavatthuto nikkhantakālato paṭṭhāya māro otārāpekkho lokanāthaṃ anubandhituṃ āraddho, tasmā vuttaṃ ‘‘pure bodhiyā chabbassānī’’ti. Atigahetvāti anugantvā tassa yathāruci paṭipattiṃ anuvatto viya hutvā.
အဝဇ္ဈာယန္တောတိ ပဇ္ဈာယန္တော။ ဇိတော ဝိတ္တပရာဇိတော အသိ နု။ ပမာဏာတိက္ကန္တန္တိ ဂရုတရံ။
Avajjhāyantoti pajjhāyanto. Jito vittaparājito asi nu. Pamāṇātikkantanti garutaraṃ.
ခနိတ္ဝာ ဥမ္မူလေတ္ဝာ။ ကာမာသဝာဒီနိ ပဇဟန္တော အနာသဝော။
Khanitvā ummūletvā. Kāmāsavādīni pajahanto anāsavo.
ပေဟီတိ အပေဟိ။ ပာရဂာမိနောတိ ပာရင္ဂမနသီလာ။ တေကာလိကော အယံ ဂာမိ-သဒ္ဒောတိ အာဟ ‘‘ယေပီ’’တိအာဒိ။
Pehīti apehi. Pāragāminoti pāraṅgamanasīlā. Tekāliko ayaṃ gāmi-saddoti āha ‘‘yepī’’tiādi.
မာရဝိသူကာနီတိ မာရကဏ္ဋကာနိ ကဏ္ဋကသဒိသာနိ မာရသ္သ ဒုရာစာရာနိ။ ဝိရုဒ္ဓသေဝိတာနိ ဝိရောဓဝသေန တာသံယေဝ ဝေဝစနာနိ။ တာနိ သရူပတော ဒသ္သေတုံ ‘‘အပ္ပမာယူ’’တိအာဒိ ဝုတ္တံ။ နိဗ္ဗေဇနီယာတိ နိဗ္ဗေဒဒာယိကာ။ ဥက္ကဏ္ဌနီယာတိ ဥက္ကဏ္ဌဝဟာ။
Māravisūkānīti mārakaṇṭakāni kaṇṭakasadisāni mārassa durācārāni. Viruddhasevitāni virodhavasena tāsaṃyeva vevacanāni. Tāni sarūpato dassetuṃ ‘‘appamāyū’’tiādi vuttaṃ. Nibbejanīyāti nibbedadāyikā. Ukkaṇṭhanīyāti ukkaṇṭhavahā.
ဝိကပ္ပဝသေန ဝေဒိတဗ္ဗော ဩပမ္မပရိကပ္ပဝိသယတ္တာ တသ္သ ကိရိယာပဒသ္သ။ တေနာဟ ‘‘အနုပရိဂစ္ဆေယ္ယာ’’တိ။ ဧတ္ထာတိ ဧတသ္မိံ မေဒဝဏ္ဏဝတ္ထုသ္မိံ။ မုဒုန္တိ မုဒုမဓုရသံ ဝိန္ဒေယ္ယာမ ပဋိလဘေယ္ယာမ။ အသ္သာဒောတိ အသ္သာဒေတဗ္ဗော။
Vikappavasenaveditabbo opammaparikappavisayattā tassa kiriyāpadassa. Tenāha ‘‘anuparigaccheyyā’’ti. Etthāti etasmiṃ medavaṇṇavatthusmiṃ. Mudunti mudumadhurasaṃ vindeyyāma paṭilabheyyāma. Assādoti assādetabbo.
သတ္တဝသ္သာနုဗန္ဓသုတ္တဝဏ္ဏနာ နိဋ္ဌိတာ။
Sattavassānubandhasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. သတ္တဝသ္သာနုဗန္ဓသုတ္တံ • 4. Sattavassānubandhasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. သတ္တဝသ္သာနုဗန္ဓသုတ္တဝဏ္ဏနာ • 4. Sattavassānubandhasuttavaṇṇanā
