| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៥. សរភង្គត្ថេរគាថា
5. Sarabhaṅgattheragāthā
៤៨៧.
487.
‘‘សរេ ហត្ថេហិ ភញ្ជិត្វា, កត្វាន កុដិមច្ឆិសំ;
‘‘Sare hatthehi bhañjitvā, katvāna kuṭimacchisaṃ;
តេន មេ សរភង្គោតិ, នាមំ សម្មុតិយា អហុ។
Tena me sarabhaṅgoti, nāmaṃ sammutiyā ahu.
៤៨៨.
488.
‘‘ន មយ្ហំ កប្បតេ អជ្ជ, សរេ ហត្ថេហិ ភញ្ជិតុំ;
‘‘Na mayhaṃ kappate ajja, sare hatthehi bhañjituṃ;
សិក្ខាបទា នោ បញ្ញត្តា, គោតមេន យសស្សិនា។
Sikkhāpadā no paññattā, gotamena yasassinā.
៤៨៩.
489.
‘‘សកលំ សមត្តំ រោគំ, សរភង្គោ នាទ្ទសំ បុព្ពេ;
‘‘Sakalaṃ samattaṃ rogaṃ, sarabhaṅgo nāddasaṃ pubbe;
សោយំ រោគោ ទិដ្ឋោ, វចនករេនាតិទេវស្ស។
Soyaṃ rogo diṭṭho, vacanakarenātidevassa.
៤៩០.
490.
‘‘យេនេវ មគ្គេន គតោ វិបស្សី, យេនេវ មគ្គេន សិខី ច វេស្សភូ;
‘‘Yeneva maggena gato vipassī, yeneva maggena sikhī ca vessabhū;
កកុសន្ធកោណាគមនោ ច កស្សបោ, តេនញ្ជសេន អគមាសិ គោតមោ។
Kakusandhakoṇāgamano ca kassapo, tenañjasena agamāsi gotamo.
៤៩១.
491.
‘‘វីតតណ្ហា អនាទានា, សត្ត ពុទ្ធា ខយោគធា;
‘‘Vītataṇhā anādānā, satta buddhā khayogadhā;
យេហាយំ ទេសិតោ ធម្មោ, ធម្មភូតេហិ តាទិភិ។
Yehāyaṃ desito dhammo, dhammabhūtehi tādibhi.
៤៩២.
492.
‘‘ចត្តារិ អរិយសច្ចានិ, អនុកម្បាយ បាណិនំ;
‘‘Cattāri ariyasaccāni, anukampāya pāṇinaṃ;
ទុក្ខំ សមុទយោ មគ្គោ, និរោធោ ទុក្ខសង្ខយោ។
Dukkhaṃ samudayo maggo, nirodho dukkhasaṅkhayo.
៤៩៣.
493.
‘‘យស្មិំ និវត្តតេ 1 ទុក្ខំ, សំសារស្មិំ អនន្តកំ;
‘‘Yasmiṃ nivattate 2 dukkhaṃ, saṃsārasmiṃ anantakaṃ;
ភេទា ឥមស្ស កាយស្ស, ជីវិតស្ស ច សង្ខយា;
Bhedā imassa kāyassa, jīvitassa ca saṅkhayā;
អញ្ញោ បុនព្ភវោ នត្ថិ, សុវិមុត្តោម្ហិ សព្ពធី’’តិ។
Añño punabbhavo natthi, suvimuttomhi sabbadhī’’ti.
… សរភង្គោ ថេរោ…។
… Sarabhaṅgo thero….
សត្តកនិបាតោ និដ្ឋិតោ។
Sattakanipāto niṭṭhito.
តត្រុទ្ទានំ –
Tatruddānaṃ –
សុន្ទរសមុទ្ទោ ថេរោ, ថេរោ លកុណ្ឌភទ្ទិយោ;
Sundarasamuddo thero, thero lakuṇḍabhaddiyo;
ភទ្ទោ ថេរោ ច សោបាកោ, សរភង្គោ មហាឥសិ;
Bhaddo thero ca sopāko, sarabhaṅgo mahāisi;
សត្តកេ បញ្ចកា ថេរា, គាថាយោ បញ្ចតិំសតីតិ។
Sattake pañcakā therā, gāthāyo pañcatiṃsatīti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ៥. សរភង្គត្ថេរគាថាវណ្ណនា • 5. Sarabhaṅgattheragāthāvaṇṇanā
