| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੫. ਸਾਨੁਸੁਤ੍ਤવਣ੍ਣਨਾ
5. Sānusuttavaṇṇanā
੨੩੯. ਯਕ੍ਖੇਨ ਗਹਿਤੋ ਹੋਤੀਤਿ ਯਕ੍ਖੇਨ ਅਨੁਪવਿਟ੍ਠੋ ਹੋਤਿ। ਤਸ੍ਸ ਯਕ੍ਖਗਹਣਸ੍ਸ ਕਾਰਣਂ ਮੂਲਤੋ ਪਭੁਤਿ વਿਤ੍ਥਾਰਤੋ ਦਸ੍ਸੇਤੁਂ ‘‘ਸੋ’’ਤਿਆਦਿਮਾਹ। ਤਸ੍ਸ ਅਨ੍ਤਿਮਭવਿਕਤ੍ਤਾ ਆਦਿਤੋ ਪਟ੍ਠਾਯ ਅਧਿਸੀਲਸਿਕ੍ਖਾਯ ਸਕ੍ਕਚ੍ਚਂ ਪੂਰਣਨ੍ਤਿ ਦਸ੍ਸੇਤਿ ‘‘ਸੋ ਪਬ੍ਬਜਿਤਕਾਲਤੋ’’ਤਿਆਦਿਨਾ। ਪਚ੍ਚਾਹਾਰਨ੍ਤਿ ਪਟਿਕ੍ਖੇਪਂ। ਇਮਸ੍ਮਿਂ ਸਰਭਞ੍ਞੇਤਿ ਇਮਸ੍ਮਿਂ ਮਮ ਧਮ੍ਮਭਣਨੇ। ਪਤ੍ਤਿਨ੍ਤਿ ਪਤ੍ਤਿਦਾਨਂ। ਪਿਯਾ ਹੋਨ੍ਤਿ, ਤੇਨਾਹ ਭਗવਾ ‘‘ਆਕਙ੍ਖੇਯ੍ਯ ਚੇ, ਭਿਕ੍ਖવੇ, ਭਿਕ੍ਖੁ ‘ਸਬ੍ਰਹ੍ਮਚਾਰੀਨਂ ਪਿਯੋ ਚ ਅਸ੍ਸਂ ਮਨਾਪੋ ਚ ਗਰੁ ਚ ਭਾવਨੀਯੋ ਚਾ’ਤਿ, ਸੀਲੇਸ੍વੇવਸ੍ਸ ਪਰਿਪੂਰਕਾਰੀ’’ਤਿ (ਮ॰ ਨਿ॰ ੧.੬੫)। ਤਥਾ ਚਾਹ ‘‘ਤਸ੍ਮਿਂ ਸਾਮਣੇਰੇ’’ਤਿਆਦਿ।
239.Yakkhenagahito hotīti yakkhena anupaviṭṭho hoti. Tassa yakkhagahaṇassa kāraṇaṃ mūlato pabhuti vitthārato dassetuṃ ‘‘so’’tiādimāha. Tassa antimabhavikattā ādito paṭṭhāya adhisīlasikkhāya sakkaccaṃ pūraṇanti dasseti ‘‘so pabbajitakālato’’tiādinā. Paccāhāranti paṭikkhepaṃ. Imasmiṃ sarabhaññeti imasmiṃ mama dhammabhaṇane. Pattinti pattidānaṃ. Piyā honti, tenāha bhagavā ‘‘ākaṅkheyya ce, bhikkhave, bhikkhu ‘sabrahmacārīnaṃ piyo ca assaṃ manāpo ca garu ca bhāvanīyo cā’ti, sīlesvevassa paripūrakārī’’ti (ma. ni. 1.65). Tathā cāha ‘‘tasmiṃ sāmaṇere’’tiādi.
વੁਡ੍ਢਿਮਨ੍વਾਯਾਤਿ ਯੋਬ੍ਬਨਪ੍ਪਤ੍ਤਿਯਾ ਅਙ੍ਗਪਚ੍ਚਙ੍ਗਾਨਂ ਪਰਿવੁਡ੍ਢਿਮਾਗਮ੍ਮ। ਕਾਮਸਮ੍ਭੋਗਸਮਤ੍ਥਤਾવਸੇਨ ਪਰਿਪਕ੍ਕਿਨ੍ਦ੍ਰਿਯੋ। ਅਨੁਯੋਜੇਤ੍વਾવਾਤਿ વਿਸ੍ਸਜ੍ਜੇਤ੍વਾવ, ਗਿਹਿਭਾવੇ વਾ ਅਨੁਯੋਜੇਤ੍વਾવ। ‘‘ਪੁਬ੍ਬੇ ਤੁਯ੍ਹਂ ਪੁਤ੍ਤੋ ਸੀਲવਾ ਕਲ੍ਯਾਣਧਮ੍ਮੋ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋਤਿ ਸਮ੍ਭਾવਿਤੋ, ਇਦਾਨਿ ਤਤੋ ਅਞ੍ਞਥਾ ਜਾਤੋ’’ਤਿ ਘੋਸਨਾવਸੇਨ ਦੇવਤਾਨਂ ਅਨ੍ਤਰੇ ਮਾਹੇવ ਮੇ ਲਜ੍ਜਂ ਉਪ੍ਪਾਦੇਯ੍ਯ।
Vuḍḍhimanvāyāti yobbanappattiyā aṅgapaccaṅgānaṃ parivuḍḍhimāgamma. Kāmasambhogasamatthatāvasena paripakkindriyo. Anuyojetvāvāti vissajjetvāva, gihibhāve vā anuyojetvāva. ‘‘Pubbe tuyhaṃ putto sīlavā kalyāṇadhammo lajjī kukkuccako sikkhākāmoti sambhāvito, idāni tato aññathā jāto’’ti ghosanāvasena devatānaṃ antare māheva me lajjaṃ uppādeyya.
ਪਾਟਿਹਾਰਿਯਪਕ੍ਖਞ੍ਚਾਤਿ ਚਾਤੁਦ੍ਦਸੀਪਞ੍ਚਦਸੀਅਟ੍ਠਮੀਨਂ ਯਥਾਕ੍ਕਮਂ ਆਦਿਤੋ ਅਨ੍ਤਤੋ ਆਦਿਅਨ੍ਤਤੋ ਚ ਪવੇਸਨਨਿਕ੍ਖਮਨવਸੇਨ ਉਪੋਸਥਸੀਲਸ੍ਸ ਪਟਿ ਪਟਿ ਅਭਿਮੁਖਂ ਪਚ੍ਚਾવਹਿਤਬ੍ਬਪਕ੍ਖਞ੍ਚ। ਤੇਰਸਿਯਾਪੀਤਿ ਪਰਂ ਸਤ੍ਤਮੀਨવਮੀਸੁਪੀਤਿ ਅਤ੍ਥੋ। ਪવੇਸਭੂਤਞ੍ਹਿ ਉਪੋਸਥਸੀਲਸ੍ਸ ਸਤ੍ਤਮੀਸੁ ਸਮਾਦਿਨ੍ਨਂ ਸੀਲਂ ਪਟਿਪਦਂ, ਨવਮੀਸੁ ਨਿਕ੍ਖਮਭੂਤਨ੍ਤਿ ਆਚਰਿਯਾ। ਪੋਰਾਣਟ੍ਠਕਥਾਯਂ ਪਨ ਪਚ੍ਚੁਗ੍ਗਮਨਾਨੁਗਮਨਪਰਿਯਾਯੇਨ વੁਤ੍ਤਨ੍ਤਿ ਆਹ ‘‘ਮਨੁਸ੍ਸਾ’’ਤਿਆਦਿ। ਅਡ੍ਢਮਾਸਨ੍ਤਿ ਸਕਲਕਾਲਪਕ੍ਖਂ । ਏવਞ੍ਹਿ વਸ੍ਸવਾਸਸ੍ਸ ਅਨੁਗਮਨਂ ਗਤਂ ਹੋਤਿ। ਸੁਟ੍ਠੁ ਸਮਾਗਤਨ੍ਤਿ ਸੁਪਰਿਸੁਦ੍ਧਂ ਸਮ੍ਪਨ੍ਨਂ ਕਤ੍વਾ ਅਤ੍ਤਨੋ ਸਨ੍ਤਾਨਂ ਆਗਤਂ। ਤਂ ਪਨ ਅਤ੍ਤਨੋ ਚਿਤ੍ਤੇਨ ਸਮਂ ਪਕਾਰੇਹਿ ਯੁਤ੍ਤਂ ਹੋਤੀਤਿ ਆਹ ‘‘ਸਮ੍ਪਯੁਤ੍ਤ’’ਨ੍ਤਿ। ਅਰਹਨ੍ਤਾਨਂ ਅਨੁਕਰਣੇਨ ਸੇਟ੍ਠਚਰਿਯਂ। ‘‘ਨ ਤੇ ਹਿ ਯਕ੍ਖਾ ਕੀਲ਼ਨ੍ਤੀ’’ਤਿ ਅਤ੍ਤਨੋ ਪੁਤ੍ਤਸ੍ਸ ਕਾਯੇ ਅਧਿਮੁਚ੍ਚਨਂ ਅਤ੍ਤਨੋ ਕੀਲ਼ਨਂ વਿਯ ਹੋਤੀਤਿ ਕਤ੍વਾ ਆਹ।
Pāṭihāriyapakkhañcāti cātuddasīpañcadasīaṭṭhamīnaṃ yathākkamaṃ ādito antato ādiantato ca pavesananikkhamanavasena uposathasīlassa paṭi paṭi abhimukhaṃ paccāvahitabbapakkhañca. Terasiyāpīti paraṃ sattamīnavamīsupīti attho. Pavesabhūtañhi uposathasīlassa sattamīsu samādinnaṃ sīlaṃ paṭipadaṃ, navamīsu nikkhamabhūtanti ācariyā. Porāṇaṭṭhakathāyaṃ pana paccuggamanānugamanapariyāyena vuttanti āha ‘‘manussā’’tiādi. Aḍḍhamāsanti sakalakālapakkhaṃ . Evañhi vassavāsassa anugamanaṃ gataṃ hoti. Suṭṭhu samāgatanti suparisuddhaṃ sampannaṃ katvā attano santānaṃ āgataṃ. Taṃ pana attano cittena samaṃ pakārehi yuttaṃ hotīti āha ‘‘sampayutta’’nti. Arahantānaṃ anukaraṇena seṭṭhacariyaṃ. ‘‘Na te hi yakkhā kīḷantī’’ti attano puttassa kāye adhimuccanaṃ attano kīḷanaṃ viya hotīti katvā āha.
ਉਪਾਸਿਕਾ ਯਥਾવੁਤ੍ਤਉਪੋਸਥਸੀਲੇਨ ਸੀਲવਤੀ, ਸਾਮਣੇਰੋ ਪਨ ਅਤ੍ਤਨੋ ਸਾਮਣੇਰਸੀਲੇਨ ਸੀਲવਾ। ਉਪ੍ਪਤਿਤ੍વਾਤਿ ਆਕਾਸੇ ਉਪ੍ਪਤਿਤ੍વਾ। ਮੋਕ੍ਖੋ ਨਤ੍ਥਿ ਦੁਕ੍ਖਾવਹਸ੍ਸ ਕਮ੍ਮਸ੍ਸ ਕਤੂਪਚਿਤਤ੍ਤਾ।
Upāsikā yathāvuttauposathasīlena sīlavatī, sāmaṇero pana attano sāmaṇerasīlena sīlavā. Uppatitvāti ākāse uppatitvā. Mokkho natthi dukkhāvahassa kammassa katūpacitattā.
ਦੁવਿਧੇਪਿ ਕਾਮੇਤਿ વਤ੍ਥੁਕਾਮਕਿਲੇਸਕਾਮੇ। ਕਿਲੇਸਕਾਮਂ ਪਰਿਚ੍ਚਜਨ੍ਤੋ ਏવ ਹਿ વਤ੍ਥੁਕਾਮੇ ਪਰਿਚ੍ਚਜਤਿ ਨਾਮ। વਿਬ੍ਭਮਨવਸੇਨ ਆਗਚ੍ਛਤਿ ਭਿਕ੍ਖਾਯ ਆਹਿਣ੍ਡਨਾਦਿਪਬ੍ਬਜਿਤਕਿਚ੍ਚਤੋ। ਉਪ੍ਪਬ੍ਬਜਿਤ੍વਾ વਿਗਤਸੀਲਸ੍ਸ ਜੀવਤੋ ਆਨਾਪਾਨਮਤ੍ਤੇਨ ਜੀવਨ੍ਤੋਪਿ ਸੋ ਮਤਕੋવ। વੁਤ੍ਤਞ੍ਹੇਤਂ ‘‘ਮਰਣਞ੍ਹੇਤਂ, ਸੁਨਕ੍ਖਤ੍ਤ, ਅਰਿਯਸ੍ਸ વਿਨਯੇ, ਯੋ ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾવਤ੍ਤਤੀ’’ਤਿ (ਮ॰ ਨਿ॰ ੩.੪੫)।
Duvidhepi kāmeti vatthukāmakilesakāme. Kilesakāmaṃ pariccajanto eva hi vatthukāme pariccajati nāma. Vibbhamanavasena āgacchati bhikkhāya āhiṇḍanādipabbajitakiccato. Uppabbajitvā vigatasīlassa jīvato ānāpānamattena jīvantopi so matakova. Vuttañhetaṃ ‘‘maraṇañhetaṃ, sunakkhatta, ariyassa vinaye, yo sikkhaṃ paccakkhāya hīnāyāvattatī’’ti (ma. ni. 3.45).
ਉਣ੍ਹਟ੍ਠੇਨਾਤਿ ਸਪਰਿਲ਼ਾਹਟ੍ਠੇਨ। ਅਭਿਧਾવਥਾਤਿ ਅਭਿਧਾવਤੀਤਿ ਇਮਸ੍ਮਿਂ ਅਭਿਧਾવਨਕਿਚ੍ਚੇ ਭਦ੍ਦਂ ਤੇ ਹੋਤੂਤਿ વਤ੍વਾ ਗਿਹਿਭਾવਾਯ ਅਭਿਧਾવਥ। ਨੀਹਰਿਤ੍વਾਤਿ ਨਿਕ੍ਖਾਮੇਤ੍વਾ। ਏਕਾਦਸਹਿ ਅਗ੍ਗੀਹਿ ਆਦਿਤ੍ਤਤ੍ਤਾ ਮਹਾਡਾਹਸਦਿਸੇ। ਸਲ੍ਲਕ੍ਖੇਤ੍વਾਤਿ ਗਿਹਿਭਾવੇ ਆਦੀਨવਂ, ਪਬ੍ਬਜ੍ਜਾਯ ਆਨਿਸਂਸਞ੍ਚ ਸਲ੍ਲਕ੍ਖੇਤ੍વਾ। ਹਿਰੋਤ੍ਤਪ੍ਪਂ ਪਟਿਲਭਿਤ੍વਾ ‘‘ਮਮ ਉਪ੍ਪਬ੍ਬਜਿਤੁਕਾਮਤਂ ਸਬ੍ਰਹ੍ਮਚਾਰਿਨੋ ਜਾਨਿਸ੍ਸਨ੍ਤੀ’’ਤਿ। ਚਤੁਨ੍ਨਂ ਪਰਿਸਾਨਂ ਚਿਤ੍ਤਸਙ੍ਖੋਭવਸੇਨ ਸਕਲਜਮ੍ਬੁਦੀਪਂ ਖੋਭੇਤ੍વਾ।
Uṇhaṭṭhenāti sapariḷāhaṭṭhena. Abhidhāvathāti abhidhāvatīti imasmiṃ abhidhāvanakicce bhaddaṃ te hotūti vatvā gihibhāvāya abhidhāvatha. Nīharitvāti nikkhāmetvā. Ekādasahi aggīhi ādittattā mahāḍāhasadise. Sallakkhetvāti gihibhāve ādīnavaṃ, pabbajjāya ānisaṃsañca sallakkhetvā. Hirottappaṃ paṭilabhitvā ‘‘mama uppabbajitukāmataṃ sabrahmacārino jānissantī’’ti. Catunnaṃ parisānaṃ cittasaṅkhobhavasena sakalajambudīpaṃ khobhetvā.
ਸਾਨੁਸੁਤ੍ਤવਣ੍ਣਨਾ ਨਿਟ੍ਠਿਤਾ।
Sānusuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੫. ਸਾਨੁਸੁਤ੍ਤਂ • 5. Sānusuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੫. ਸਾਨੁਸੁਤ੍ਤવਣ੍ਣਨਾ • 5. Sānusuttavaṇṇanā
