4. Sanniṭṭhāpakattheraapadānaṃ

70.

‘‘Araññe kuṭikaṃ katvā, vasāmi pabbatantare;

Lābhālābhena santuṭṭho, yasena ayasena ca.

71.

‘‘Padumuttaro lokavidū, āhutīnaṃ paṭiggaho;

Vasīsatasahassehi ², āgacchi mama santikaṃ.

72.

‘‘Upāgataṃ mahānāgaṃ ⁴, jalajuttamanāmakaṃ;

Tiṇasantharaṃ ⁶ paññāpetvā, adāsiṃ satthuno ahaṃ.

73.

‘‘Pasannacitto sumano, āmaṇḍaṃ pānīyañcahaṃ;

Adāsiṃ ujubhūtassa, vippasannena cetasā.

74.

‘‘Satasahassito kappe ⁸, yaṃ dānamadadiṃ tadā;

Duggatiṃ nābhijānāmi, āmaṇḍassa idaṃ phalaṃ.

75.

‘‘Ekatālīsakappamhi, eko āsiṃ arindamo;

Sattaratanasampanno, cakkavattī mahabbalo.

76.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sanniṭṭhāpako ¹⁰ thero imā gāthāyo abhāsitthāti.

Sanniṭṭhāpakattherassāpadānaṃ catutthaṃ.