| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤. សន្និដ្ឋាបកត្ថេរអបទានវណ្ណនា
4. Sanniṭṭhāpakattheraapadānavaṇṇanā
អរញ្ញេ កុដិកំ កត្វាតិអាទិកំ អាយស្មតោ សន្និដ្ឋាបកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ កុលគេហេ និព្ពត្តោ វិញ្ញុតំ បត្តោ ឃរពន្ធនេន ពទ្ធោ ឃរាវាសេ អាទីនវំ ទិស្វា វត្ថុកាមកិលេសកាមេ បហាយ ហិមវន្តស្ស អវិទូរេ បព្ពតន្តរេ អរញ្ញវាសំ កប្បេសិ។ តស្មិំ កាលេ បទុមុត្តរោ ភគវា វិវេកកាមតាយ តំ ឋានំ បាបុណិ។ អថ សោ តាបសោ ភគវន្តំ ទិស្វា បសន្នមានសោ វន្ទិត្វា និសីទនត្ថាយ តិណសន្ថរំ បញ្ញាបេត្វា អទាសិ។ តត្ថ និសិន្នំ ភគវន្តំ អនេកេហិ មធុរេហិ តិណ្ឌុកាទីហិ ផលាផលេហិ សន្តប្បេសិ។ សោ តេន បុញ្ញកម្មេន តតោ ចុតោ ទេវេសុ ច មនុស្សេសុ ច អបរាបរំ សំសរន្តោ ទ្វេ សម្បត្តិយោ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ សទ្ធាសម្បន្នោ បព្ពជិតោ វិបស្សនំ វឌ្ឍេត្វា នចិរស្សេវ អរហា អហោសិ។ ខុរគ្គេ អរហត្តផលប្បត្តិយំ វិយ និរុស្សាហេនេវ សន្តិបទសង្ខាតេ និព្ពានេ សុដ្ឋុ ឋិតត្តា សន្និដ្ឋាបកត្ថេរោតិ បាកដោ។
Araññekuṭikaṃ katvātiādikaṃ āyasmato sanniṭṭhāpakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto viññutaṃ patto gharabandhanena baddho gharāvāse ādīnavaṃ disvā vatthukāmakilesakāme pahāya himavantassa avidūre pabbatantare araññavāsaṃ kappesi. Tasmiṃ kāle padumuttaro bhagavā vivekakāmatāya taṃ ṭhānaṃ pāpuṇi. Atha so tāpaso bhagavantaṃ disvā pasannamānaso vanditvā nisīdanatthāya tiṇasantharaṃ paññāpetvā adāsi. Tattha nisinnaṃ bhagavantaṃ anekehi madhurehi tiṇḍukādīhi phalāphalehi santappesi. So tena puññakammena tato cuto devesu ca manussesu ca aparāparaṃ saṃsaranto dve sampattiyo anubhavitvā imasmiṃ buddhuppāde ekasmiṃ kulagehe nibbatto saddhāsampanno pabbajito vipassanaṃ vaḍḍhetvā nacirasseva arahā ahosi. Khuragge arahattaphalappattiyaṃ viya nirussāheneva santipadasaṅkhāte nibbāne suṭṭhu ṭhitattā sanniṭṭhāpakattheroti pākaṭo.
៧០. អរហា បន ហុត្វា អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ អរញ្ញេ កុដិកំ កត្វាតិអាទិមាហ។ តត្ថ អរញ្ញេតិ សីហព្យគ្ឃាទីនំ ភយេន មនុស្សា ឯត្ថ ន រជ្ជន្តិ ន រមន្តិ ន អល្លីយន្តីតិ អរញ្ញំ, តស្មិំ អរញ្ញេ។ កុដិកន្តិ តិណច្ឆទនកុដិកំ កត្វា បព្ពតន្តរេ វសាមិ វាសំ កប្បេសិន្តិ អត្ថោ។ លាភេន ច អលាភេន ច យសេន ច អយសេន ច សន្តុដ្ឋោ វិហាសិន្តិ សម្ពន្ធោ។
70. Arahā pana hutvā attano pubbakammaṃ saritvā somanassajāto pubbacaritāpadānaṃ pakāsento araññe kuṭikaṃ katvātiādimāha. Tattha araññeti sīhabyagghādīnaṃ bhayena manussā ettha na rajjanti na ramanti na allīyantīti araññaṃ, tasmiṃ araññe. Kuṭikanti tiṇacchadanakuṭikaṃ katvā pabbatantare vasāmi vāsaṃ kappesinti attho. Lābhena ca alābhena ca yasena ca ayasena ca santuṭṭho vihāsinti sambandho.
៧២. ជលជុត្តមនាមកន្តិ ជលេ ជាតំ ជលជំ, បទុមំ, ជលជំ ឧត្តមំ ជលជុត្តមំ, ជលជុត្តមេន សមានំ នាមំ យស្ស សោ ជលជុត្តមនាមកោ, តំ ជលជុត្តមនាមកំ ពុទ្ធន្តិ អត្ថោ។ សេសំ បាឡិនយានុយោគេន សុវិញ្ញេយ្យមេវាតិ។
72.Jalajuttamanāmakanti jale jātaṃ jalajaṃ, padumaṃ, jalajaṃ uttamaṃ jalajuttamaṃ, jalajuttamena samānaṃ nāmaṃ yassa so jalajuttamanāmako, taṃ jalajuttamanāmakaṃ buddhanti attho. Sesaṃ pāḷinayānuyogena suviññeyyamevāti.
សន្និដ្ឋាបកត្ថេរអបទានវណ្ណនា សមត្តា។
Sanniṭṭhāpakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៤. សន្និដ្ឋាបកត្ថេរអបទានំ • 4. Sanniṭṭhāpakattheraapadānaṃ
