| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೧೩. ಸಮ್ಮಾಪರಿಬ್ಬಾಜನೀಯಸುತ್ತಂ
13. Sammāparibbājanīyasuttaṃ
೩೬೧.
361.
‘‘ಪುಚ್ಛಾಮಿ ಮುನಿಂ ಪಹೂತಪಞ್ಞಂ,
‘‘Pucchāmi muniṃ pahūtapaññaṃ,
ತಿಣ್ಣಂ ಪಾರಙ್ಗತಂ ಪರಿನಿಬ್ಬುತಂ ಠಿತತ್ತಂ।
Tiṇṇaṃ pāraṅgataṃ parinibbutaṃ ṭhitattaṃ;
ನಿಕ್ಖಮ್ಮ ಘರಾ ಪನುಜ್ಜ ಕಾಮೇ, ಕಥಂ ಭಿಕ್ಖು
Nikkhamma gharā panujja kāme, kathaṃ bhikkhu
ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ’’॥
Sammā so loke paribbajeyya’’.
೩೬೨.
362.
‘‘ಯಸ್ಸ ಮಙ್ಗಲಾ ಸಮೂಹತಾ, (ಇತಿ ಭಗವಾ)
‘‘Yassa maṅgalā samūhatā, (iti bhagavā)
ಉಪ್ಪಾತಾ ಸುಪಿನಾ ಚ ಲಕ್ಖಣಾ ಚ।
Uppātā supinā ca lakkhaṇā ca;
ಸೋ ಮಙ್ಗಲದೋಸವಿಪ್ಪಹೀನೋ,
So maṅgaladosavippahīno,
ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Sammā so loke paribbajeyya.
೩೬೩.
363.
‘‘ರಾಗಂ ವಿನಯೇಥ ಮಾನುಸೇಸು, ದಿಬ್ಬೇಸು ಕಾಮೇಸು ಚಾಪಿ ಭಿಕ್ಖು।
‘‘Rāgaṃ vinayetha mānusesu, dibbesu kāmesu cāpi bhikkhu;
ಅತಿಕ್ಕಮ್ಮ ಭವಂ ಸಮೇಚ್ಚ ಧಮ್ಮಂ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Atikkamma bhavaṃ samecca dhammaṃ, sammā so loke paribbajeyya.
೩೬೪.
364.
‘‘ವಿಪಿಟ್ಠಿಕತ್ವಾನ ಪೇಸುಣಾನಿ, ಕೋಧಂ ಕದರಿಯಂ ಜಹೇಯ್ಯ ಭಿಕ್ಖು।
‘‘Vipiṭṭhikatvāna pesuṇāni, kodhaṃ kadariyaṃ jaheyya bhikkhu;
ಅನುರೋಧವಿರೋಧವಿಪ್ಪಹೀನೋ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Anurodhavirodhavippahīno, sammā so loke paribbajeyya.
೩೬೫.
365.
‘‘ಹಿತ್ವಾನ ಪಿಯಞ್ಚ ಅಪ್ಪಿಯಞ್ಚ, ಅನುಪಾದಾಯ ಅನಿಸ್ಸಿತೋ ಕುಹಿಞ್ಚಿ।
‘‘Hitvāna piyañca appiyañca, anupādāya anissito kuhiñci;
ಸಂಯೋಜನಿಯೇಹಿ ವಿಪ್ಪಮುತ್ತೋ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Saṃyojaniyehi vippamutto, sammā so loke paribbajeyya.
೩೬೬.
366.
‘‘ನ ಸೋ ಉಪಧೀಸು ಸಾರಮೇತಿ, ಆದಾನೇಸು ವಿನೇಯ್ಯ ಛನ್ದರಾಗಂ।
‘‘Na so upadhīsu sārameti, ādānesu vineyya chandarāgaṃ;
ಸೋ ಅನಿಸ್ಸಿತೋ ಅನಞ್ಞನೇಯ್ಯೋ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
So anissito anaññaneyyo, sammā so loke paribbajeyya.
೩೬೭.
367.
‘‘ವಚಸಾ ಮನಸಾ ಚ ಕಮ್ಮುನಾ ಚ, ಅವಿರುದ್ಧೋ ಸಮ್ಮಾ ವಿದಿತ್ವಾ ಧಮ್ಮಂ।
‘‘Vacasā manasā ca kammunā ca, aviruddho sammā viditvā dhammaṃ;
ನಿಬ್ಬಾನಪದಾಭಿಪತ್ಥಯಾನೋ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Nibbānapadābhipatthayāno, sammā so loke paribbajeyya.
೩೬೮.
368.
‘‘ಯೋ ವನ್ದತಿ ಮನ್ತಿ ನುಣ್ಣಮೇಯ್ಯ 1, ಅಕ್ಕುಟ್ಠೋಪಿ ನ ಸನ್ಧಿಯೇಥ ಭಿಕ್ಖು।
‘‘Yo vandati manti nuṇṇameyya 2, akkuṭṭhopi na sandhiyetha bhikkhu;
ಲದ್ಧಾ ಪರಭೋಜನಂ ನ ಮಜ್ಜೇ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Laddhā parabhojanaṃ na majje, sammā so loke paribbajeyya.
೩೬೯.
369.
‘‘ಲೋಭಞ್ಚ ಭವಞ್ಚ ವಿಪ್ಪಹಾಯ, ವಿರತೋ ಛೇದನಬನ್ಧನಾ ಚ 3 ಭಿಕ್ಖು।
‘‘Lobhañca bhavañca vippahāya, virato chedanabandhanā ca 4 bhikkhu;
ಸೋ ತಿಣ್ಣಕಥಂಕಥೋ ವಿಸಲ್ಲೋ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
So tiṇṇakathaṃkatho visallo, sammā so loke paribbajeyya.
೩೭೦.
370.
‘‘ಸಾರುಪ್ಪಂ ಅತ್ತನೋ ವಿದಿತ್ವಾ, ನೋ ಚ ಭಿಕ್ಖು ಹಿಂಸೇಯ್ಯ ಕಞ್ಚಿ ಲೋಕೇ।
‘‘Sāruppaṃ attano viditvā, no ca bhikkhu hiṃseyya kañci loke;
ಯಥಾ ತಥಿಯಂ ವಿದಿತ್ವಾ ಧಮ್ಮಂ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Yathā tathiyaṃ viditvā dhammaṃ, sammā so loke paribbajeyya.
೩೭೧.
371.
‘‘ಯಸ್ಸಾನುಸಯಾ ನ ಸನ್ತಿ ಕೇಚಿ, ಮೂಲಾ ಚ 5 ಅಕುಸಲಾ ಸಮೂಹತಾಸೇ।
‘‘Yassānusayā na santi keci, mūlā ca 6 akusalā samūhatāse;
೩೭೨.
372.
‘‘ಆಸವಖೀಣೋ ಪಹೀನಮಾನೋ, ಸಬ್ಬಂ ರಾಗಪಥಂ ಉಪಾತಿವತ್ತೋ।
‘‘Āsavakhīṇo pahīnamāno, sabbaṃ rāgapathaṃ upātivatto;
ದನ್ತೋ ಪರಿನಿಬ್ಬುತೋ ಠಿತತ್ತೋ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Danto parinibbuto ṭhitatto, sammā so loke paribbajeyya.
೩೭೩.
373.
‘‘ಸದ್ಧೋ ಸುತವಾ ನಿಯಾಮದಸ್ಸೀ, ವಗ್ಗಗತೇಸು ನ ವಗ್ಗಸಾರಿ ಧೀರೋ।
‘‘Saddho sutavā niyāmadassī, vaggagatesu na vaggasāri dhīro;
ಲೋಭಂ ದೋಸಂ ವಿನೇಯ್ಯ ಪಟಿಘಂ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Lobhaṃ dosaṃ vineyya paṭighaṃ, sammā so loke paribbajeyya.
೩೭೪.
374.
‘‘ಸಂಸುದ್ಧಜಿನೋ ವಿವಟ್ಟಚ್ಛದೋ, ಧಮ್ಮೇಸು ವಸೀ ಪಾರಗೂ ಅನೇಜೋ।
‘‘Saṃsuddhajino vivaṭṭacchado, dhammesu vasī pāragū anejo;
ಸಙ್ಖಾರನಿರೋಧಞಾಣಕುಸಲೋ , ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Saṅkhāranirodhañāṇakusalo , sammā so loke paribbajeyya.
೩೭೫.
375.
‘‘ಅತೀತೇಸು ಅನಾಗತೇಸು ಚಾಪಿ, ಕಪ್ಪಾತೀತೋ ಅತಿಚ್ಚಸುದ್ಧಿಪಞ್ಞೋ।
‘‘Atītesu anāgatesu cāpi, kappātīto aticcasuddhipañño;
ಸಬ್ಬಾಯತನೇಹಿ ವಿಪ್ಪಮುತ್ತೋ, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ॥
Sabbāyatanehi vippamutto, sammā so loke paribbajeyya.
೩೭೬.
376.
‘‘ಅಞ್ಞಾಯ ಪದಂ ಸಮೇಚ್ಚ ಧಮ್ಮಂ, ವಿವಟಂ ದಿಸ್ವಾನ ಪಹಾನಮಾಸವಾನಂ।
‘‘Aññāya padaṃ samecca dhammaṃ, vivaṭaṃ disvāna pahānamāsavānaṃ;
ಸಬ್ಬುಪಧೀನಂ ಪರಿಕ್ಖಯಾನೋ 11, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯ’’॥
Sabbupadhīnaṃ parikkhayāno 12, sammā so loke paribbajeyya’’.
೩೭೭.
377.
‘‘ಅದ್ಧಾ ಹಿ ಭಗವಾ ತಥೇವ ಏತಂ, ಯೋ ಸೋ ಏವಂವಿಹಾರೀ ದನ್ತೋ ಭಿಕ್ಖು।
‘‘Addhā hi bhagavā tatheva etaṃ, yo so evaṃvihārī danto bhikkhu;
ಸಬ್ಬಸಂಯೋಜನಯೋಗವೀತಿವತ್ತೋ 13, ಸಮ್ಮಾ ಸೋ ಲೋಕೇ ಪರಿಬ್ಬಜೇಯ್ಯಾ’’ತಿ॥
Sabbasaṃyojanayogavītivatto 14, sammā so loke paribbajeyyā’’ti.
ಸಮ್ಮಾಪರಿಬ್ಬಾಜನೀಯಸುತ್ತಂ ತೇರಸಮಂ ನಿಟ್ಠಿತಂ।
Sammāparibbājanīyasuttaṃ terasamaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೧೩. ಸಮ್ಮಾಪರಿಬ್ಬಾಜನೀಯಸುತ್ತ-(ಮಹಾಸಮಯಸುತ್ತ)-ವಣ್ಣನಾ • 13. Sammāparibbājanīyasutta-(mahāsamayasutta)-vaṇṇanā
