| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
16. ஸமாரோபனஹாரவிப⁴ங்க³வண்ணனா
16. Samāropanahāravibhaṅgavaṇṇanā
50. ஸுத்தேன க³ஹிதேதி ஸுத்தே வுத்தே. பத³ட்டா²னக்³க³ஹணங் அதி⁴ட்டா²னவிஸயத³ஸ்ஸனத்த²ங், வேவசனக்³க³ஹணங் அதி⁴வசனவிபா⁴க³த³ஸ்ஸனத்த²ந்தி யோஜனா. விஸயாதி⁴ட்டா²னபா⁴வதோதி விஸயஸங்கா²தபவத்திட்டா²னபா⁴வதோ. வனீயதீதி ப⁴ஜீயதி. வனதீதி ப⁴ஜதி ஸேவதி. வனுதேதி யாசதி, பத்தே²தீதி அத்தோ² . பஞ்ச காமகு³ணா காமதண்ஹாய காரணங் ஹோதி ஆரம்மணபச்சயதாய. நிமித்தக்³கா³ஹோ அனுப்³யஞ்ஜனக்³கா³ஹஸ்ஸ காரணங் ஹோதி உபனிஸ்ஸயதாயாதி ஏவங் ஸேஸேஸுபி யதா²ரஹங் காரணதா வத்தப்³பா³.
50.Suttena gahiteti sutte vutte. Padaṭṭhānaggahaṇaṃ adhiṭṭhānavisayadassanatthaṃ, vevacanaggahaṇaṃ adhivacanavibhāgadassanatthanti yojanā. Visayādhiṭṭhānabhāvatoti visayasaṅkhātapavattiṭṭhānabhāvato. Vanīyatīti bhajīyati. Vanatīti bhajati sevati. Vanuteti yācati, patthetīti attho . Pañca kāmaguṇā kāmataṇhāya kāraṇaṃ hoti ārammaṇapaccayatāya. Nimittaggāho anubyañjanaggāhassa kāraṇaṃ hoti upanissayatāyāti evaṃ sesesupi yathārahaṃ kāraṇatā vattabbā.
51. ‘‘காயே காயானுபஸ்ஸீ விஹராஹீ’’திஆதீ³ஸு யங் வத்தப்³ப³ங், தங் ஹெட்டா² லக்க²ணஹாரவிப⁴ங்க³வண்ணனாயங் (நெத்தி॰ அட்ட²॰ 23) வுத்தனயேனேவ வேதி³தப்³ப³ங். அயங் பன விஸேஸோ – ரூபத⁴ம்மபரிஞ்ஞாயாதி ரூபூபிகவிஞ்ஞாணட்டி²திபரிஞ்ஞாய.
51.‘‘Kāye kāyānupassī viharāhī’’tiādīsu yaṃ vattabbaṃ, taṃ heṭṭhā lakkhaṇahāravibhaṅgavaṇṇanāyaṃ (netti. aṭṭha. 23) vuttanayeneva veditabbaṃ. Ayaṃ pana viseso – rūpadhammapariññāyāti rūpūpikaviññāṇaṭṭhitipariññāya.
‘‘து³க்க²’’ந்தி பஸ்ஸந்தீ ஸா வேத³னானுபஸ்ஸனாதி யோஜேதப்³ப³ங். வேத³னாஹேதுபரிஞ்ஞாயாதி ப²ஸ்ஸபரிஞ்ஞாய. ‘‘வேத³னாவஸேனா’’தி பதே³ன அத்தனா உப்பாதி³தது³க்க²வஸேன. வேத³னாபரிஞ்ஞாயாதி வேத³னூபிகவிஞ்ஞாணட்டி²திபரிஞ்ஞாய. நிச்சாபி⁴னிவேஸபடிபக்க²தோ அனிச்சானுபஸ்ஸனாயாதி அதி⁴ப்பாயோ. நிச்சஸஞ்ஞானிமித்தஸ்ஸாதி நிச்சஸஞ்ஞாஹேதுகஸ்ஸ. ஸஞ்ஞாபரிஞ்ஞாயாதி ஸஞ்ஞூபிகவிஞ்ஞாணட்டி²திபரிஞ்ஞாய. பட²மமக்³க³வஜ்ஜ²த்தா அக³திக³மனஸ்ஸ வுத்தங் ‘‘தி³ட்டா²பி⁴னிவேஸஸ்ஸ…பே॰… அக³திக³மனஸ்ஸ சா’’தி.
‘‘Dukkha’’nti passantī sā vedanānupassanāti yojetabbaṃ. Vedanāhetupariññāyāti phassapariññāya. ‘‘Vedanāvasenā’’ti padena attanā uppāditadukkhavasena. Vedanāpariññāyāti vedanūpikaviññāṇaṭṭhitipariññāya. Niccābhinivesapaṭipakkhato aniccānupassanāyāti adhippāyo. Niccasaññānimittassāti niccasaññāhetukassa. Saññāpariññāyāti saññūpikaviññāṇaṭṭhitipariññāya. Paṭhamamaggavajjhattā agatigamanassa vuttaṃ ‘‘diṭṭhābhinivesassa…pe… agatigamanassa cā’’ti.
ஸங்கா²ரபரிஞ்ஞாயாதி ஸங்கா²ரூபிகவிஞ்ஞாணட்டி²திபரிஞ்ஞாய.
Saṅkhārapariññāyāti saṅkhārūpikaviññāṇaṭṭhitipariññāya.
ஸமாரோபனஹாரவிப⁴ங்க³வண்ணனா நிட்டி²தா.
Samāropanahāravibhaṅgavaṇṇanā niṭṭhitā.
நிட்டி²தா ச ஹாரவிப⁴ங்க³வண்ணனா.
Niṭṭhitā ca hāravibhaṅgavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 16. ஸமாரோபனஹாரவிப⁴ங்கோ³ • 16. Samāropanahāravibhaṅgo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 16. ஸமாரோபனஹாரவிப⁴ங்க³வண்ணனா • 16. Samāropanahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 16. ஸமாரோபனஹாரவிப⁴ங்க³விபா⁴வனா • 16. Samāropanahāravibhaṅgavibhāvanā
