| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៩. សមាទបកត្ថេរអបទានវណ្ណនា
9. Samādapakattheraapadānavaṇṇanā
នគរេ ពន្ធុមតិយាតិអាទិកំ អាយស្មតោ សមាទបកត្ថេរស្ស អបទានំ។ អយម្បិ ថេរោ បុរិមពុទ្ធានំ សន្តិកេ កតកុសលសម្ភារោ អនេកេសុ ភវេសុ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ កុលគេហេ និព្ពត្តោ វុទ្ធិមន្វាយ ឃរាវាសំ សណ្ឋបេត្វា បុញ្ញានិ ករោន្តោ វសមានោ សទ្ធោ បសន្នោ ពហូ ឧបាសកេ សន្និបាតេត្វា គណជេដ្ឋកោ ហុត្វា ‘‘មាឡកំ ករិស្សាមា’’តិ តេ សព្ពេ សមាទបេត្វា ឯកំ មាឡកំ សមំ ការេត្វា បណ្ឌរបុលិនំ ឱកិរិត្វា ភគវតោ និយ្យាទេសិ។ សោ តេន បុញ្ញេន ទេវលោកេ ឧប្បន្នោ ឆ កាមាវចរសម្បត្តិយោ អនុភវិត្វា មនុស្សេសុ ច ចក្កវត្តិអាទិសម្បត្តិយោ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វិញ្ញុតំ បត្តោ ភគវតិ បសន្នោ ធម្មំ សុត្វា បសន្នមានសោ សទ្ធាជាតោ បព្ពជិត្វា សីលសម្បន្នោ វត្តសម្បន្នោ នចិរស្សេវ អរហត្តំ បាបុណិ។
Nagare bandhumatiyātiādikaṃ āyasmato samādapakattherassa apadānaṃ. Ayampi thero purimabuddhānaṃ santike katakusalasambhāro anekesu bhavesu vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā puññāni karonto vasamāno saddho pasanno bahū upāsake sannipātetvā gaṇajeṭṭhako hutvā ‘‘māḷakaṃ karissāmā’’ti te sabbe samādapetvā ekaṃ māḷakaṃ samaṃ kāretvā paṇḍarapulinaṃ okiritvā bhagavato niyyādesi. So tena puññena devaloke uppanno cha kāmāvacarasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde kulagehe nibbatto viññutaṃ patto bhagavati pasanno dhammaṃ sutvā pasannamānaso saddhājāto pabbajitvā sīlasampanno vattasampanno nacirasseva arahattaṃ pāpuṇi.
៤៤. សោ អបរភាគេ អត្តនោ កតកុសលំ សរិត្វា សញ្ជាតសោមនស្សោ បុព្ពចរិតាបទានំ បកាសេន្តោ នគរេ ពន្ធុមតិយាតិអាទិមាហ។ តត្ថ ពន្ធន្តិ ញាតិគោត្តាទិវសេន ឯកសម្ពន្ធា ហោន្តិ សកលនគរវាសិនោតិ ពន្ធូ, ពន្ធូ ឯតស្មិំ វិជ្ជន្តីតិ ពន្ធុមតី, តស្សា ពន្ធុមតិយា នាម នគរេ មហាបូគគណោ ឧបាសកសមូហោ អហោសីតិ អត្ថោ។ មាឡំ កស្សាម សង្ឃស្សាតិ ឯត្ថ មាតិ គណ្ហាតិ សម្បត្តសម្បត្តជនានំ ចិត្តន្តិ មាឡំ, អថ វា សម្បត្តយតិគណានំ ចិត្តស្ស វិវេកករណេ អលន្តិ មាឡំ, មាឡមេវ មាឡកំ, ភិក្ខុសង្ឃស្ស ផាសុវិហារត្ថាយ មាឡកំ ករិស្សាមាតិ អត្ថោ។ សេសំ បាកដមេវាតិ។
44. So aparabhāge attano katakusalaṃ saritvā sañjātasomanasso pubbacaritāpadānaṃ pakāsento nagare bandhumatiyātiādimāha. Tattha bandhanti ñātigottādivasena ekasambandhā honti sakalanagaravāsinoti bandhū, bandhū etasmiṃ vijjantīti bandhumatī, tassā bandhumatiyā nāma nagare mahāpūgagaṇo upāsakasamūho ahosīti attho. Māḷaṃ kassāma saṅghassāti ettha māti gaṇhāti sampattasampattajanānaṃ cittanti māḷaṃ, atha vā sampattayatigaṇānaṃ cittassa vivekakaraṇe alanti māḷaṃ, māḷameva māḷakaṃ, bhikkhusaṅghassa phāsuvihāratthāya māḷakaṃ karissāmāti attho. Sesaṃ pākaṭamevāti.
សមាទបកត្ថេរអបទានវណ្ណនា សមត្តា។
Samādapakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៩. សមាទបកត្ថេរអបទានំ • 9. Samādapakattheraapadānaṃ
