| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
១០. បញ្ចង្គុលិយត្ថេរអបទានវណ្ណនា
10. Pañcaṅguliyattheraapadānavaṇṇanā
តិស្សោ នាមាសិ ភគវាតិអាទិកំ អាយស្មតោ បញ្ចង្គុលិយត្ថេរស្ស អបទានំ។ អយម្បិ បុរិមពុទ្ធេសុ កតាធិការេ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ ឯកស្មិំ កុលេ និព្ពត្តោ វុទ្ធិមន្វាយ ឃរាវាសំ សណ្ឋបេត្វា វិភវសម្បន្នោ សទ្ធោ បសន្នោ វីថិតោ វិហារំ បដិបន្នំ ភគវន្តំ ទិស្វា ជាតិសុមនាទិអនេកានិ សុគន្ធបុប្ផានិ ចន្ទនាទីនិ ច វិលេបនានិ គាហាបេត្វា វិហារំ គតោ បុប្ផេហិ ភគវន្តំ បូជេត្វា វិលេបនេហិ ភគវតោ សរីរេ បញ្ចង្គុលិកំ កត្វា វន្ទិត្វា បក្កាមិ។
Tissonāmāsi bhagavātiādikaṃ āyasmato pañcaṅguliyattherassa apadānaṃ. Ayampi purimabuddhesu katādhikāre tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kule nibbatto vuddhimanvāya gharāvāsaṃ saṇṭhapetvā vibhavasampanno saddho pasanno vīthito vihāraṃ paṭipannaṃ bhagavantaṃ disvā jātisumanādianekāni sugandhapupphāni candanādīni ca vilepanāni gāhāpetvā vihāraṃ gato pupphehi bhagavantaṃ pūjetvā vilepanehi bhagavato sarīre pañcaṅgulikaṃ katvā vanditvā pakkāmi.
៥០. សោ តេន បុញ្ញេន ទេវមនុស្សេសុ ឧភយសម្បត្តិយោ អនុភវិត្វា ឥមស្មិំ ពុទ្ធុប្បាទេ វិភវសម្បន្នេ ឯកស្មិំ កុលេ និព្ពត្តិត្វា វុទ្ធិមន្វាយ សត្ថុ ធម្មទេសនំ សុត្វា បសន្នមានសោ បព្ពជិត្វា វិបស្សនំ វឌ្ឍេត្វា នចិរស្សេវ អរហា ហុត្វា បុព្ពកម្មំ សរន្តោ បច្ចក្ខតោ ញត្វា ‘‘ឥមំ នាម កុសលកម្មំ កត្វា ឦទិសំ លោកុត្តរសម្បត្តិំ បត្តោម្ហី’’តិ បុព្ពចរិតាបទានំ បកាសេន្តោ តិស្សោ នាមាសិ ភគវាតិអាទិមាហ។ តំ សព្ពំ ឧត្តានត្ថមេវាតិ។
50. So tena puññena devamanussesu ubhayasampattiyo anubhavitvā imasmiṃ buddhuppāde vibhavasampanne ekasmiṃ kule nibbattitvā vuddhimanvāya satthu dhammadesanaṃ sutvā pasannamānaso pabbajitvā vipassanaṃ vaḍḍhetvā nacirasseva arahā hutvā pubbakammaṃ saranto paccakkhato ñatvā ‘‘imaṃ nāma kusalakammaṃ katvā īdisaṃ lokuttarasampattiṃ pattomhī’’ti pubbacaritāpadānaṃ pakāsento tisso nāmāsi bhagavātiādimāha. Taṃ sabbaṃ uttānatthamevāti.
បញ្ចង្គុលិយត្ថេរអបទានវណ្ណនា សមត្តា។
Pañcaṅguliyattheraapadānavaṇṇanā samattā.
សត្តរសមវគ្គវណ្ណនា សមត្តា។
Sattarasamavaggavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១០. បញ្ចង្គុលិយត្ថេរអបទានំ • 10. Pañcaṅguliyattheraapadānaṃ
