| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
១៨. កុមុទវគ្គោ
18. Kumudavaggo
១. កុមុទមាលិយត្ថេរអបទានវណ្ណនា
1. Kumudamāliyattheraapadānavaṇṇanā
បព្ពតេ ហិមវន្តម្ហីតិអាទិកំ អាយស្មតោ កុមុទមាលិយត្ថេរស្ស អបទានំ។ អយម្បិ ថេរោ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ អត្ថទស្សិស្ស ភគវតោ កាលេ ហិមវន្តបព្ពតសមីបេ ជាតស្សរស្ស អាសន្នេ រក្ខសោ ហុត្វា និព្ពត្តោ អត្ថទស្សិំ ភគវន្តំ តត្ថ ឧបគតំ ទិស្វា បសន្នមានសោ កុមុទបុប្ផានិ ឱចិនិត្វា ភគវន្តំ បូជេសិ។ ភគវា អនុមោទនំ កត្វា បក្កាមិ។
Pabbatehimavantamhītiādikaṃ āyasmato kumudamāliyattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavantapabbatasamīpe jātassarassa āsanne rakkhaso hutvā nibbatto atthadassiṃ bhagavantaṃ tattha upagataṃ disvā pasannamānaso kumudapupphāni ocinitvā bhagavantaṃ pūjesi. Bhagavā anumodanaṃ katvā pakkāmi.
១. សោ តេន បុញ្ញេន តតោ ចវិត្វា ទេវលោកំ ឧបបន្នោ ឆ កាមាវចរសម្បត្តិយោ អនុភវិត្វា មនុស្សេសុ ច ចក្កវត្តិអាទិសម្បត្តិយោ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វុទ្ធិប្បត្តោ រតនត្តយេ បសន្នោ បព្ពជិត្វា វាយមន្តោ ព្រហ្មចរិយបរិយោសានំ អរហត្តំ បត្វា អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ បព្ពតេ ហិមវន្តម្ហីតិអាទិមាហ។ តត្ថ តត្ថជោ រក្ខសោ អាសិន្តិ តស្មិំ ជាតស្សរសមីបេ ជាតោ និព្ពត្តោ រក្ខសោ បររុធិរមំសខាទកោ និទ្ទយោ ឃោររូបោ ភយានកសភាវោ មហាពលោ មហាថាមោ កក្ខឡោ យក្ខោ អាសិំ អហោសិន្តិ អត្ថោ។
1. So tena puññena tato cavitvā devalokaṃ upapanno cha kāmāvacarasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde kulagehe nibbatto vuddhippatto ratanattaye pasanno pabbajitvā vāyamanto brahmacariyapariyosānaṃ arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento pabbate himavantamhītiādimāha. Tattha tatthajo rakkhaso āsinti tasmiṃ jātassarasamīpe jāto nibbatto rakkhaso pararudhiramaṃsakhādako niddayo ghorarūpo bhayānakasabhāvo mahābalo mahāthāmo kakkhaḷo yakkho āsiṃ ahosinti attho.
កុមុទំ បុប្ផតេ តត្ថាតិ តស្មិំ មហាសរេ សូរិយរំសិយា អភាវេ សតិ សាយន្ហេ មកុឡិតំ កុញ្ចិតាការេន និប្បភំ អវណ្ណំ ហោតីតិ ‘‘កុមុទ’’ន្តិ លទ្ធនាមំ បុប្ផំ បុប្ផតេ វិកសតីតិ អត្ថោ។ ចក្កមត្តានិ ជាយរេតិ តានិ បុប្ផានិ រថចក្កបមាណានិ ហុត្វា ជាយន្តីតិ អត្ថោ។ សេសំ សុវិញ្ញេយ្យមេវាតិ។
Kumudaṃpupphate tatthāti tasmiṃ mahāsare sūriyaraṃsiyā abhāve sati sāyanhe makuḷitaṃ kuñcitākārena nippabhaṃ avaṇṇaṃ hotīti ‘‘kumuda’’nti laddhanāmaṃ pupphaṃ pupphate vikasatīti attho. Cakkamattāni jāyareti tāni pupphāni rathacakkapamāṇāni hutvā jāyantīti attho. Sesaṃ suviññeyyamevāti.
កុមុទមាលិយត្ថេរអបទានវណ្ណនា សមត្តា។
Kumudamāliyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១. កុមុទមាលិយត្ថេរអបទានំ • 1. Kumudamāliyattheraapadānaṃ
