| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៩. សាលបុប្ផទាយកត្ថេរអបទានំ
9. Sālapupphadāyakattheraapadānaṃ
៦០.
60.
‘‘មិគរាជា តទា អាសិំ, អភិជាតោ សុកេសរី;
‘‘Migarājā tadā āsiṃ, abhijāto sukesarī;
គិរិទុគ្គំ គវេសន្តោ, អទ្ទសំ លោកនាយកំ។
Giriduggaṃ gavesanto, addasaṃ lokanāyakaṃ.
៦១.
61.
‘‘អយំ នុ ខោ មហាវីរោ, និព្ពាបេតិ មហាជនំ;
‘‘Ayaṃ nu kho mahāvīro, nibbāpeti mahājanaṃ;
យំនូនាហំ ឧបាសេយ្យំ, ទេវទេវំ នរាសភំ។
Yaṃnūnāhaṃ upāseyyaṃ, devadevaṃ narāsabhaṃ.
៦២.
62.
‘‘សាខំ សាលស្ស ភញ្ជិត្វា, សកោសំ បុប្ផមាហរិំ;
‘‘Sākhaṃ sālassa bhañjitvā, sakosaṃ pupphamāhariṃ;
ឧបគន្ត្វាន សម្ពុទ្ធំ, អទាសិំ បុប្ផមុត្តមំ។
Upagantvāna sambuddhaṃ, adāsiṃ pupphamuttamaṃ.
៦៣.
63.
‘‘ឯកនវុតិតោ កប្បេ, យំ បុប្ផមភិរោបយិំ;
‘‘Ekanavutito kappe, yaṃ pupphamabhiropayiṃ;
ទុគ្គតិំ នាភិជានាមិ, បុប្ផទានស្សិទំ ផលំ។
Duggatiṃ nābhijānāmi, pupphadānassidaṃ phalaṃ.
៦៤.
64.
‘‘ឥតោ ច នវមេ កប្បេ, វិរោចនសនាមកា;
‘‘Ito ca navame kappe, virocanasanāmakā;
តយោ អាសិំសុ រាជានោ, ចក្កវត្តី មហព្ពលា។
Tayo āsiṃsu rājāno, cakkavattī mahabbalā.
៦៥.
65.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា សាលបុប្ផទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā sālapupphadāyako thero imā gāthāyo abhāsitthāti.
សាលបុប្ផទាយកត្ថេរស្សាបទានំ នវមំ។
Sālapupphadāyakattherassāpadānaṃ navamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ៩. សាលបុប្ផទាយកត្ថេរអបទានវណ្ណនា • 9. Sālapupphadāyakattheraapadānavaṇṇanā
